རྒྱ་གར་ལྷོ་ཕྱོགས་སུ་ཏོག་དབྱིབས་སྔོན་འགོག་གི་གྲ་སྒྲིག་ཐད་རྟོག་ཞིབ་གནང་གི་འདུག

བོད་མིའི་སྒྲིག་འཛུགས་ཀྱི་ཏོག་དབྱིབས་ནད་ཡམས་ཛ་དྲག་ལས་དོན་ཚོགས་ཆུང་གིས་རྒྱ་གར་ལྷོ་ཕྱོགས་ཀྱི་གཞིས་ཆགས་ཁག་ནང་ནད་རླབས་གསུམ་པའི་ཆེད་གྲ་སྒྲིག་འཐུས་ཚང་ཡོད་མེད་ཐད་རྟོག་ཞིབ་སྐོར་སྐྱོད་གནང་བཞིན་འདུགཏོག་དབྱིབས་ནད་རླབས་གསུམ་པའི་སྔོན་འགོག་ཆེད་བོད་མིའི་སྒྲིག་འཛུགས་ཀྱི་དབུས་ཏོག་དབྱིབས་ནད་ཡམས་ཛ་དྲག་ཚོགས་ཆུང་གིས། གཞིས་ཆགས་ཁག་ནང་གྲ་སྒྲིག་གི་ལས་དོན་ཚགས་ཚུད་ཡོད་མེད་སྐོར་ལ་རྟོག་ཞིབ་གནང་བཞིན་ཡོད་པ་ལྟར། ཚོགས་ཆུང་གི་སྐུ་ཚབ་འཕྲོད་བསྟེན་དྲུང་གཞོན་བསྟན་འཛིན་ཀུན་བཟང་ལགས་དང་ལྷོ་ཕྱོགས་སྤྱི་ཁྱབ་ཐུབ་བསྟན་ཚེ་རིང་ལགས་རྣམ་གཉིས་ཀྱིས། ཟླ་འདིའི་ཕྱི་ཚེས་༡༡ཉིན་ལྷོ་ཕྱོགས་ཀོ་ལི་གྷལ་དོན་ལྡན་གླིང་གཞིས་ཆགས་ནས་རྟོག་ཞིབ་དབུ་འཛུགས་གནང་ཡོད་པ་དང་། དེ་རིང་ཉིན་རྒྱབ་ནས་ཧུན་སུར་རབ་རྒྱས་གླིང་གཞིས་ཆགས་ནང་རྟོག་ཞིབ་གནང་ཡོད་པ་རེད།

བསྟན་འཛིན་ཀུན་བཟང་ལགས་ཀྱིས་འདི་གའི་གསར་འགོད་པར། ད་བར་རྟོག་ཞིབ་བྱས་པའི་ཉམས་མྱོང་ཐོག་ནས་ལྷོ་ཕྱོགས་གཞིས་ཆགས་ཁག་ཚང་མར་ཏོག་དབྱིབས་གྲ་སྒྲིག་ལས་དོན་ཆ་ཚང་ཡག་པོ་ཡོད་པ་དང་། དེ་བཞིན་ས་གནས་སོ་སོའི་ཛ་དྲག་ལས་དོན་ཚོགས་ཆུང་གི་ལས་བྱེད་ཚོས་ཀྱང་ནད་རླབས་དང་པོ་གཉིས་པའི་ཉམས་མྱོང་ཐོག་ནས་གལ་སྲིད་ནད་རླབས་གསུམ་པ་ཡོང་བ་ཡིན་ན་ཡང་གྲ་སྒྲིག་ལས་དོན་སྔར་ལས་ལྷག་པ་ཡོད་པ་དང་། སེམས་ཁྲལ་དང་ཞེད་སྣང་བྱེད་དགོས་དོན་མེད་ཅེས་གདེང་ཚོད་ཆེན་པོས་གསུང་གི་འདུག་ལ། གལ་སྲིད་མཐུན་འགྱུར་ཐད་ད་དུང་དགོས་གལ་བྱུང་ན་ཡང་བོད་མིའི་སྒྲིག་འཛུགས་ནས་མཐུན་འགྱུར་གང་ཐུབ་གནང་རྒྱུ་སྐོར་དང་།  བལ་ཡུལ་ལ་ཆ་མཚོན་ན། རྒྱ་གར་ནང་གི་གཞིས་ཆགས་ཁག་ནང་བཞིན་གྱི་མཐུན་རྐྱེན་དང་གྲ་སྒྲིག་མེད་ཀྱང་གང་ཙམ་གྱིས་ཡག་པོ་ཡོད་སྐོར་བརྗོད་བྱུང་།

གཞན་ཡང་། ལྷོ་ཕྱོགས་གཞིས་ཆགས་ཁག་ནང་དེ་སྔོན་ནད་པ་མང་བའི་སྐབས་སུ་སྨན་པས་མ་འདང་བའི་དཀའ་ངལ་བྱུང་ཏེ་མོན་གྷོ་འདོད་རྒུ་གླིང་དང་ཧུན་སུར་གཞིས་ཆགས། སྦེལ་ཀོབ་གཞིས་ཆགས་བཅས་བར་ལ་སྨན་པ་དང་སྨན་ཞབས་ཁ་སྣོན་གཏོང་རེས་བྱེད་དགོས་བྱུང་ཡོད་ཀྱང་། ཀོ་ལི་གྷལ་གཞིས་ཆགས་ནང་དཀའ་ངལ་མེད་པར་ཡག་པོ་ཆགས་ཡོད་སྐོར་དང་། ད་བར་གཞིས་ཆགས་ཁག་ནང་རྟོག་ཞིབ་བྱས་པའི་ཉམས་མྱོང་ཐོག་ནས་ཏོག་དབྱིབས་ནད་མནར་བྱུང་མཁན་མང་ཆེ་བ་རྒྱུན་དུ་ཁ་རས་མ་རྒྱག་མཁན་ཆགས་འདུག་པས། ཚང་མས་ཁ་རས་རྒྱག་རྒྱུ་དེ་གལ་ཆེ་ཤོས་ཡིན་པ་དང་། དེ་བཞིན་འཕྲོད་བསྟེན་བྱེད་ཕྱོགས་ཀྱི་ལམ་སྟོན་ཁག་ལ་ལྷོད་ཡང་མ་བཏང་བར་གཟབ་གཟབ་གནང་དགོས་རྒྱུ་གལ་ཆེན་པོ་ཡིན་པ་སོགས་ཀྱི་འབོད་སྐུལ་གནང་སོང་།

འདས་པའི་བདུན་ཕྲག་གཅིག་ཙམ་རིང་མོན་གྷོ་འདོད་རྒུ་གླིང་གཞིས་ཆགས་དང་སྦེལ་ཀོབ་བོད་མིའི་གཞིས་ཆགས་བཅས་ཀྱི་ནང་གི་དགོན་སྡེ་དང་སློབ་གྲྭ་ཁག    གཞིས་ཆགས་བཅས་ཀྱི་ནང་ཏོག་དབྱིབས་ནད་རླབས་གསུམ་པའི་སྔོན་ཚུད་གྲ་སྒྲིག་འཐུས་ཚང་ཡོད་མེད་རྟོག་ཞིབ་ཆེད་སྐོར་སྐྱོད་གནང་ཟིན་ཡོད་འདུག

རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།