འདས་པའི་བདུན་ཕྲག་གཅིག་རིང་རྒྱལ་བལ་གཉིས་ཀྱི་བོད་མི་གྲངས་ ༥༥ ལ་ཏོག་དབྱིབས་གཉན་རིམས་ཕོག་ཡོད་པ་དང་བོད་མི་གཉིས་རྐྱེན་འདས་སུ་ཕྱིན་ཡོད་འདུག
དེ་རིང་ཉིན་རྒྱབ་ཆུ་ཚོད་ ༤ ཙམ་གྱི་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༣ སྤེལ་བ་ལྟར་ན། འདས་པའི་བདུན་གཅིག་ནང་རྒྱ་གར་གྱི་ས་གནས་ ༡༤ དང་བལ་ཡུལ་གྱི་ས་གནས་ ༥ ཡི་ནང་རང་ཁྱིམ་དུ་འགོག་དབྱེ་ཟུར་བཀག་ཏུ་བཞུགས་མཁན་མི་གྲངས་ ༧༦༢ དང་ཚོགས་སྡེའི་ཟུར་བཀག་ཁང་དུ་བཞུགས་མཁན་མི་གྲངས་ ༣༥༨ བཅས་ཁྱོན་བསྡོམས་མི་གྲངས་ ༡༡༢༠ ཟུར་བཀག་འོག་བཞུགས་ཡོད་པ་དང་། རྒྱ་གར་དང་བལ་ཡུལ་ནང་ནད་གཞི་གསར་པ་ཕོག་པའི་བོད་མི་ ༥༥ བྱུང་བའི་ཁྲོད་ནས་ལོ་ན་མཐོ་ཤོས་ ༩༣ དང་ལོ་ན་ཆུང་ཤོས་དེ་བྱིས་པ་ལོ་བདུན་ཅན་ཡིན་པ་དང་། དེ་བཞིན་བོད་མི་ ༢ འདས་གྲོངས་སུ་ཕྱིན་ཡོད་འདུག་ལ། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་ ༦༡༣༥ བྱུང་བའི་ཁྲོད་དྲག་སྐྱེད་ཟིན་པ་ ༥༧༦༥ དང་། རྐྱེན་འདས་སུ་ཕྱིན་པ་ ༡༤༦། ད་ལྟ་ཏོག་ནད་ཀྱིས་མནར་བཞིན་པའི་མི་གྲངས་ ༢༢༤ ཡོད་འདུག
གསར་འགོད་གསལ་བསྒྲགས་སྐབས་སྨན་པ་མཚམས་གཅོད་སྒྲོལ་མ་ལགས་ཀྱིས། རྒྱ་གར་ལྷོ་ཕྱོགས་ཁུལ་གྱི་མངའ་སྡེ་ཁ་ཤས་སུ་ཏོག་དབྱིབས་རིམས་ནད་ཀྱི་ནད་རླབས་གཉིས་པ་མཇུག་སྒྲིལ་ཏེ་གནས་སྟངས་ཇེ་ལྷོད་དུ་ཕྱིན་པ་དང་། རྒྱ་གར་ལྷོ་ཕྱོགས་ཁུལ་གྱི་མངའ་སྡེ་ཁ་ཤས་སུ་མཐོ་སློབ་དང་སློབ་གྲྭ་ཁག་སྒོ་ཕྱེ་ནས་སློབ་མགོ་འཛུགས་ཀྱི་ཡོད་པ་ལྟར། མངའ་སྡེ་དེ་དག་ཏུ་ཡོད་པའི་བོད་པའི་སློབ་གྲྭ་ཁག་སྒོ་ཕྱེ་དགོས་ཁེལ་ཚེ། དབུས་དང་ས་གནས་སོ་སོའི་ལམ་སྟོན་འོག་ཤར་སྐྱོད་བྱ་གལ་ཆེན་པོ་ཡིན་པ་དང་། རྒྱ་གར་ནང་དུ་ཟླ་བ་ ༨ དང་༩། དེ་བཞིན་ཟླ་ ༡༠ ནང་པའི་ནད་རླབས་གསུམ་པ་ཡོང་གི་ཡོད་པའི་ཚོད་དཔག་བྱེད་བཞིན་ཡོད་སྟབས། འཛིན་སྐྱོང་དང་ཆེད་ལས་པ་རྣམས་ཀྱི་ནད་རླབས་གསུམ་པར་གདོང་ལེན་གྱི་གྲ་སྒྲིག་འཐུས་ཚང་ཡོད་པ་དང་། དེ་བཞིན་མི་དམངས་ཀྱིས་སྤྱི་ཚོགས་སྤྱི་ཡོངས་ཀྱི་ཕན་བདེའི་སླད་རང་འགན་རང་སྲུང་གིས་འཕྲོད་བསྟེན་ལ་དོ་སྣང་བྱ་དགོས་སྐོར་སོགས་ཀྱི་ལམ་སྟོན་གནང་སོང་།
ཡང་ཕྱི་ལུགས་པ་སྨན་པ་ཨོ་རྒྱན་རྒྱ་མཚོ་ལགས་ཀྱིས། ཏོག་དབྱིབས་ནད་ཡམས་དང་འབྲེལ་བའི་དཀྲོགས་གཏམ་རིགས་ལ་ཡིད་ཆེས་མི་བྱེད་པར། སོ་སོའི་ཉེ་འཁོར་དུ་ཡོད་པའི་འཕྲོད་བསྟེན་མི་སྣའི་དྲུང་ནས་ལམ་སྟོན་ཞུ་དགོས་པ་དང་། རྒྱུན་དུ་ནས་ལག་པ་བཀྲུ་རྒྱུ། ཁ་རས་གྱོན་རྒྱུ། མི་དམངས་འདུ་འཛོམས་ཀྱི་གྲས་སུ་མི་འགྲོ་རྒྱུ་དང་། མི་གཞན་དང་འཕྲད་སྐབས་བར་ཐག་འཇོག་དགོས་པ་དང་། དེ་བཞིན་ཏོག་དབྱིབས་རིམས་ནད་ཀྱི་སྐབས་འདིར་སེམས་ཁམས་ཀྱི་དཀའ་ངལ་ཡོད་རིགས་ཚོས། རང་གི་འཕྲོད་བསྟེན་ལ་དོ་དབྱིངས་གནང་དགོས་པ་དང་། གལ་སྲིད་སེམས་ཁམས་ཀྱི་དཀའ་ཁག་བྱུང་ཚེ་རང་གི་གྲོགས་པོ་གྲོགས་མོོ་དང་གཉེན་ཉེ། སེམས་ཁམས་ལམ་སྟོན་པ་ཚོར་འབྲེལ་བ་གནང་དགོས་སྐོར་སོགས་ཀྱི་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་བོད་ཀྱི་སྨན་རྩིས་ཁང་ནས་རིན་མེད་ཐོག་གསོ་རིག་ལུས་སེམས་ནད་གསོའི་སྨན་ ༤༣༤༧༣ བགོ་འགྲེམས་དང་། དམིགས་བསལ་བྱིས་པ་རྣམས་ལ་ལུས་སེམས་ནད་གསོའི་སྨན་ ༤༨༧༥ བགོ་འགྲེམས་བྱུང་ཡོད་ཅིང་། འདས་པའི་བདུན་ཕྲག་གཅིག་རིང་མི་གྲངས་ ༦༢ ལ་སེམས་ཁམས་འཕྲོད་བསྟེན་ལམ་སྟོན་གནང་ཡོད་པ་དང་རྒྱ་གར་གྱི་ས་གནས་ ༡༥ དང་བལ་ཡུལ་ནང་གི་ས་གནས་གྲངས་ ༣ ནས་མི་གྲངས་ ༧༦༩ ལ་ཏོག་དབྱིབས་བརྟག་དཔྱད་གནང་ཡོད་པ་རེད་ལ། ད་བར་རྒྱ་གར་ནང་ཏོག་དབྱིབས་འགོག་ཁབ་ཚར་གཉིས་ཀ་བརྒྱབ་ཟིན་པའི་མི་གྲངས་ ༢༡༠༩༩ དང་ཐེངས་དང་པོ་བརྒྱབ་ཟིན་པའི་གྲངས་འབོར་ཁྱོན་ ༢༨༧༡༠ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༣༠༢༤ དང་ཁབ་ཚར་དང་པོ་ཐོབ་མཁན་མི་གྲངས་ ༦༨༣ ཆགས་ཡོད་འདུག
དཔལ་ལྡན།
