བོད་མི་རིགས་གཙོས་པའི་རྒྱ་ནག་གི་དབང་སྒྱུར་འོག་གནས་པའི་གྲངས་ཉུང་མི་རིགས་ཀྱི་བྱིས་པ་ཚོར་ཆུང་དུས་ནས་རང་གི་ཕ་སྐད་ཀྱི་ཚབ་ཏུ་རྒྱའི་སྐད་ཡིག་སློབ་ཁྲིད་བྱས་ཏེ། གྲངས་ཉུང་མི་རིགས་ཀྱི་སྐད་ཡིག་རྩ་མེད་བཟོ་ཐབས་བྱེད་ཀྱི་ཡོད་པ་རེད།
ཞི་ཅིན་ཕིན་གྱིས་མི་རིགས་སློབ་གསོ་ནི་བྱིས་པ་ནས་མགོ་རྩོམ་དགོས་པའི་ལམ་སྟོན་དང་དགོངས་པ་ཟེར་བར་སློབ་སྦྱོང་དོན་འཁྱོལ་ཡོང་སླད་དུ། རྒྱ་ནག་གཞུང་གིས་བོད་དང་ནང་སོག ཡུ་གུར་བཅས་གཙོས་པའི་རྒྱ་ནག་གི་དྲག་གནོན་དབང་སྒྱུར་འོག་གནས་པའི་གྲངས་ཉུང་མི་རིགས་ཀྱི་ས་ཁུལ་ཁག་དང་གྲོང་གསེབ་ཀྱི་སྔོན་འགྲོའི་སློབ་གྲྭ་ཁག་ཏུ། འབྱུང་འགྱུར་ཕྱི་ཟླ་ ༩ པ་ནས་བཟུང་རྒྱ་སྐད་རྒྱ་ཡིག་སློབ་ཁྲིད་ཀྱི་སློབ་གསོའི་སྲིད་ཇུས་ཟེར་བ་ལག་བསྟར་བྱེད་དགོས་པ་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། དེ་བཞིན་གྲོང་སྡེ་སོགས་ལ་བཀའ་བསྒྲགས་ཡོད་པ་རེད།
རྒྱ་ནག་གི་ཤེས་རིག་ལྷན་ཁང་ཟེར་བས་སྤེལ་བའི་གནས་ཚུལ་ལྟར་ན། ཡོང་རྒྱུ་བསྡད་པའི་ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། གྲོང་སྡེ་ཁག་སོགས་ནས་ཞི་ཅིན་ཕིན་གྱི་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་བག་ཆགས་ཟབ་མོ་བཞག་སྟེ། མི་སྒེར་འཕེལ་རྒྱས་དང་རིག་རྩལ་ལྡན་པ་ཞིག་ཏུ་བཟོས་པ་བརྒྱུད་གྲོང་གསེབ་གོང་འཕེལ་དང་། ཀྲུང་ཧཱ་མི་རིགས་ཆེན་མོའི་གཞིས་ཁྱིམ་སྲ་བརྟན་གྱི་འདུ་ཤེས་ཡོད་མཁན་ཟེར་བ་ཞིག་ཏུ་བསྒྱུར་དགོས་སྐོར་བསྒྲགས་ཡོད་པ་དང་། ཐག་གཅོད་དེ་ནི་འདས་ལོའི་ཕྱི་ཟླ་ ༡༡ ནང་འཚོགས་པའི་ལོ་ལྔ་འཆར་ཅན་གྱི་ཚོགས་འདུ་སྐབས་བཅུ་བཞི་བའི་སྟེང་བྱུང་བ་ཞིག་ཡིན་པ་རེད།
དེ་འབྲེལ་གནས་ཚུལ་ནང་རྒྱ་ནག་གིས་བཅད་བགོ་བྱས་པའི་བྱེ་བྲག་བོད་ཀྱི་ས་ཁུལ་ཁག་ཅིག་མིང་འདོན་བྱས་པ་ལྟར་ན། རྒྱ་ནག་དབུས་ས་གཉིས་མཉམ་འབྲེལ་གྱི་གཙོས་ས་གནས་དམར་ཤོག་ཚོགས་པ་དང་སྲིད་གཞུང་། དེ་བཞིན། སྐད་ཡིག་སློབ་གསོ་དོ་དམ་ལས་ཁུངས་བཅས་ཀྱི་མགོ་ཁྲིད་ཚོས་མཚོ་སྔོན་ལ་རྒྱབ་སྐྱོར་གྱིས། རྒྱའི་སྐད་ཡིག་སློབ་གསོ་དར་སྤེལ་དུ་གཏོང་སླད། ༼ལག་བསྟར་ནས་མགོ་རྩོམ་པ་དང་རྒྱ་སྐྱེད་ལ་དམིགས་པ། ཕྱོགས་ཡོངས་ནས་དར་སྤེལ་དང་སྲ་བརྟན། འཕེལ་རྒྱས་༽ཞེས་པའི་སློབ་གསོའི་ཐབས་ལམ་བརྒྱུད་མཚོ་སྔོན་ཞིང་ཆེན་ཁྱོན་ཡོངས་གྱི་དགེ་རྒན་དང་གྲོང་གསེབ་ཀྱི་སློབ་མ་དང་རྩ་ཐང་གི་ཞིང་འབྲོག་མང་ཚོགས་བཅས་ཀྱི་རྒྱ་ཡིག་གི་འཕེལ་རྒྱས་སྲ་བརྟན་ཅན་དུ་བསྒྱུར་བའི་ཐབས་ལམ་འཚོལ་དགོས་པ་དང་། སི་ཁྲོན་ཞིང་ཆེན་གྱི་༼གྲོང་གསེབ་གཅིག་ལ་བྱིས་སློབ་ཁང་གཅིག་༽ ཅེས་པའི་སྐད་ཡིག་སློབ་གསོའི་སྲིད་ཇུས་ལག་བསྟར་གྱི་གྲུབ་འབྲས་དང་ཉམས་མྱོང་གཞིར་བཞག་ཐོག དོན་ཕན་གསོས་པའི་དཔེ་མཚོན་ཉམས་མྱོང་དང་ངེས་དོན་གྱི་འཛུབ་ཁྲིད་ལག་བསྟར་དར་སྤེལ་གཏོང་རྒྱུ་ཡིན་པ་དང་། གྲོང་གསེབ་གཅིག་ལ་བྱིས་སློབ་ཁང་གཅིག་ཟེར་བའི་སྲིད་ཇུས་དེ་ཕྱི་ལོ་ ༢༠༡༥ ཙམ་ནས་སི་ཁྲོན་ཞིང་ཆེན་གྱི་ཁོགས་གཏོགས་གྲངས་ཉུང་མི་རིགས་གཞན་ལ་ལག་བསྟར་མགོ་འཛུགས་བྱས་ཡོད་པ་ལས། དམིགས་བསལ་བོད་ཀྱི་སློབ་གྲྭ་ཁག་ཏུ་ལག་བསྟར་བྱས་ཡོད་མེད་ཁ་གསལ་མེད་པ་རེད།
ད་རེས་རྒྱ་ནག་གིས་གྲངས་ཉུང་མི་རིགས་ས་ཁུལ་དུ་རྒྱ་ཡིག་རྒྱ་སྐད་སློབ་ཁྲིད་ལག་བསྟར་བྱ་རྒྱུ་ནི་སྐད་གཉིས་སློབ་གསོར་རམ་འདེགས་བྱེད་ཀྱིན་ཡོད་པ་ཡོངས་བསྒྲགས་བྱས་པ་དང་། རྒྱ་ནག་གིས་བོད་ཁུལ་དུ་སྐད་གཉིས་སློབ་གསོའི་སྲིད་ཇུས་ལག་བསྟར་བྱེད་མུས་ཡིན་པ་ཡོངས་གྲགས་ཐོག རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཕྱི་ལོ་ ༢༠༠༡ ལོ་ནས་བོད་རང་སྐྱོང་ལྗོངས་ཟེར་བའི་ནང་འཛིན་རིམ་གསུམ་པ་ནས་སྐད་གཉིས་སློབ་གསོ་ལག་བསྟར་གྲ་སྒྲིག་བྱས་ཡོད་པ་དང་། ཕྱི་ལོ་ ༢༠༡༦ ལོར་བོད་ཀྱི་་རྒྱལ་ས་ལྷ་སའི་སློབ་གསོ་ཁང་ཟེར་བས། ལྷ་སའི་ཉེ་འགྲམ་དང་མངའ་ཁོངས་རྫོང་ཁག་མང་ཆེ་བའི་སློབ་ཆུང་དུ་སྐད་གཉིས་སློབ་གསོ་ལག་བསྟར་བྱེད་བཞིན་པ་དང་། བོད་རང་སྐྱོང་ལྗོངས་ཁོངས་ཀྱི་བུ་བཅོལ་ཁང་གི་ལོ་གསུམ་མན་གྱི་བྱིས་པ་ཁྲི་བརྒྱད་དང་ཆིག་སྟོང་ལ་སྐད་གཉིས་སློབ་གསོ་ལག་བསྟར་བྱེད་མགོ་བརྩམས་ཡོད་ཡོངས་བསྒྲགས་བྱས་རྗེས་མ་གཏོགས། ཕྱི་ཕྱོགས་ནས་བོད་རང་སྐྱོང་ལྗོངས་ནང་སྐད་གཉིས་སློབ་གསོའི་ཐབས་ལམ་ལག་བསྟར་བྱེད་བཞིན་པ་ཤེས་རྟོགས་ཐུབ་མེད་ལ། འདི་ལོའི་ཕྱི་ཟླ་ ༥ བར་རྒྱ་ནག་གཞུང་འབྲེལ་གྱི་གནས་ཚུལ་ལ་གཞིགས་ན། བོད་རང་སྐྱོང་ལྗོངས་ཟེར་བའི་ནང་བུ་བཅོལ་ཁང་ཁྱོན་ ༢༡༩༩ ཡོད་པའི་ནང་བྱིས་པ་ཁྲི་ ༡༥ ལྷག་ཡོད་པར་བཤད་ལ། བྱིས་པ་དེ་དག་ལ་སློབ་ཁྲིད་དགེ་རྒན་དང་ལས་བཟོ་མི་སྣ་ཁྱོན་ ༩༡༥༩ ཡོད་སྐད་བསྒྲགས།
རྒྱ་ནག་གཞུང་གི་སློབ་གསོ་ཐབས་ལམ་གཉིས་པ་ཟེར་བ་ནི་གྲངས་ཉུང་མི་རིགས་ས་ཁུལ་གཅིག་ནས་གཅིག་བར་འཆར་གཞི་ལྡན་པ་དང་རྣམ་པ་མི་འདྲ་བའི་ཐོག་ནས་སྤེལ་གྱིན་ཡོད་པ་ལྟར། མཚོ་སྔོན་དང་སི་ཁྲོན། ཀན་ལྷོ་ཕྱོགས་ཀྱི་བོད་པའི་སྔོན་འགྲོ་སློབ་གྲྭ་ཁག་ཏུ་བསླབ་གཞི་རྒྱ་ཡིག་སློབ་ཁྲིད་བྱེད་ཀྱི་ཡོད་མེད་ཡོངས་བསྒྲགས་བྱས་མེད་ནའང་། དེང་སང་རྒྱ་ནག་གཞུང་གིས་བོད་མཚོ་སྔོན་ཕྱོགས་ཀྱི་བོད་པའི་བུ་བཅོལ་ཁང་གི་སློབ་ཁྲིད་ཀྱི་ཐབས་ལམ་ལ་ཚོད་འཛིན་གྱིས་བོད་ཀྱི་སྐད་ཡིག་རིག་གཞུང་མཚོན་པའི་བཀྲ་ཤིས་རྟགས་བརྒྱད་དང་ནང་པའི་མཚོན་རྟགས་སོགས་ཀྱི་ཚབ་ཏུ། རྒྱ་ནག་གི་མགོ་ཁྲིད་དང་དམར་ཤོག་ཚོགས་པའི་ལྟ་གྲུབ་མཚོན་པའི་ཡིག་པར་སོགས་འཛིན་ཁང་དུ་སྦྱོར་དགོས་ཀྱི་ཡོད་པ་དང་། བོད་མི་མང་པོ་ཞིག་གིས་བྱིས་པར་རང་ཁྱིམ་ནས་ལྟ་རྟོག་མི་དགོས་པར་སྟབས་བདེ་རེད་བསམ་ནས་བྱིས་པ་བུ་བཅོལ་ཁང་དུ་འཇོག་མཁན་ཇེ་མང་དུ་འགྲོ་ཡི་ཡོད་པའི་གནས་སྟངས་བོད་ནང་གི་བོད་མི་ཞིག་གིས་འགྲེལ་བརྗོད་གནང་བྱུང་།
ད་རེས་གྲངས་ཉུང་མི་རིགས་ས་ཁུལ་གྱི་སྔོན་འགྲོ་སློབ་གྲྭ་ཁག་ཏུ་རྒྱ་སྐད་རྒྱ་ཡིག་སློབ་ཁྲིད་བྱེད་དོན་བཞི་ཡོད་པའི་ནང་། རྒྱ་ནག་གི་ཤར་ནུབ་ཀྱི་གྲངས་ཉུང་མི་རིགས་ས་ཁུལ་གྱི་སྔོན་འགྲོའི་སློབ་གྲྭ་ཁག་ཏུ་ངེས་པར་དུ་རྒྱ་སྐད་རྒྱ་ཡིག་སློབ་ཁྲིད་དགོས་པ་དང་། ས་ཁུལ་དེ་དག་གི་དགེ་རྒན་རྣམས་ལ་ངེས་པར་དུ་བྱིས་པར་རྒྱ་ཡིག་འཁྲིད་ཐུབ་པའི་ཤེས་ཚད་ལྡན་པའི་ཐོག་ནས་སློབ་ཕྲུག་གི་རྒྱུད་ལ་རྒྱའི་སྐད་ཡིག་གི་རྨང་གཞི་ལེགས་པོ་བཏིང་སྟེ། སྔོན་འགྲོའི་སློབ་མ་རྣམས་ལ་རྒྱ་སྐད་ཀྱི་དཀའ་མེད་ཅིང་། སྐད་གཉིས་སློབ་གསོའི་སྲིད་ཇུས་ལ་རམ་འདེགས་ཀྱིས་སློབ་མ་རྣམས་དམའ་རིམ་སློབ་གྲྭར་ཞུགས་སྐབས་རྒྱའི་སྐད་ཡིག་གི་དཀའ་ངལ་མེད་པ་ཞིག་བཟོ་དགོས་ཀྱི་ཡོད་འདུག
གྲངས་ཉུང་མི་རིགས་ས་ཁུལ་གྱི་སྔོན་འགྲོའི་སློབ་གྲྭ་ཁག་གི་གཞི་རྩའི་དཀའ་ངལ་ལ་རྒྱུས་ལོན་ཟབ་མོ་བྱས་ཏེ། དམིགས་བསལ་རྒྱའི་སྐད་ཡིག་སློབ་ཁྲིད་བྱས་པ་བརྒྱུད་བཅོས་སྒྱུར་དང་ཕྱོགས་ཀུན་ནས་འཕེལ་རྒྱས་ཀྱི་ཕྱོགས་སུ་འཁྲིད་དགོས་པ་དང་། དབུས་ས་གཉིས་མཉམ་འབྲེལ་དང་ས་གནས་སྲིད་གཞུང་གི་མགོ་ཁྲིད་ཀྱི་སྣེ་འཁྲིད་འོག་དཔལ་འབྱོར་འདུ་འགོད་བྱས་ཏེ། རྒྱ་ཡིག་སློབ་ཁྲིད་ཀྱི་མཐུན་རྐྱེན་དང་དགེ་རྒན་གྱི་རྒྱ་ཡིག་དང་སློབ་ཁྲིད་ཀྱི་གནས་ཚད་གོང་མཐོར་བཏང་སྟེ། རྒྱ་ཆེ་ས་ནས་མང་ཚོགས་མཉམ་ཞུགས་བྱེད་དུ་འཇུག་དགོས་པ། དེ་བཞིན། ས་གནས་སྲིད་གཞུང་གིས་རྒྱ་སྐད་རྒྱ་ཡིག་སློབ་ཁྲིད་ཀྱི་གལ་སྙིང་གཙུགས་སུ་བཟུང་སྟེ་ནུས་ཤུགས་ཡོད་རྒུ་བཏོན་པ་བརྒྱུད་གཞུང་དང་སློབ་གྲྭ བཟོ་གྲྭ་དང་ཁེ་ལས་བཅས་མཉམ་འདུས་ཀྱི་རྒྱ་ཡིག་སློབ་ཁྲིད་ཀྱི་ཁོར་ཡུག་བསྐྲུན་ཐབས་བྱས་ཏེ། བྱིས་པ་རྣམས་ལ་འདྲ་མཉམ་སློབ་གསོ་དང་ཚད་མཐོའི་སློབ་གསོ་བསྐྲུན་པའི་ཞབས་འདེགས་ཞུ་བ། དེ་བཞིན་གོམ་སྟབས་རིམ་སྤོ་ཡིས་བྱིས་པའི་ལུས་སེམས་གཉིས་ཀྱི་འཕེལ་རྒྱས་དང་རྒྱ་སྐད་རྒྱ་ཡིག་གི་གོ་རྟོགས་ཇེ་མཐོར་གཏོང་བ་དང་། ཁྲིམས་ལུགས་དང་མཐུན་པའི་ལས་དོན་སྤེལ་ཏེ་མངོན་སུམ་གྱི་གྲུབ་འབྲས་ལ་དམིགས་དགོས་པ། དགེ་རྒན་གྱི་སློབ་གསོའི་བྱ་གཞག་གི་བསམ་བློར་བཅོས་སྒྱུར་གྱིས། རྒྱའི་སྐད་ཡིག་སློབ་གསོའི་སྲིད་ཇུས་ཀྱི་རྗེས་སུ་འབྲངས་དགོས་པ་དང་། སློབ་ཁྲིད་ཀྱི་ཁོར་ཡུག་ཚད་ལྡན་དུ་བསྐྲུན་ཏེ། བྱིས་པའི་ཡིད་ངག་གཉིས་ལ་རྒྱའི་སྐད་ཡིག་འབྱར་ཡོད་པར་བཟོ་དགོས་ཀྱི་ཡོད་འདུག
དགེ་རྒན་འོས་སྦྱོང་གི་བྱེད་སྒོ་དོན་འཁྱོལ་དང་དོ་ནན་དུ་སྤེལ་ཏེ་སྔོན་འགྲོའི་སློབ་གྲྭའི་དགེ་རྒན་རྣམས་ཀྱི་རྒྱ་ཡིག་གི་དམའ་མཐའི་ཆུ་ཚད་ནི་བརྒྱ་ཆ་ ༨༠ དང་དགེ་རྒན་གྱི་ལག་ཁྱེར་ཚད་ལྡན་དགོས་པ་དང་། གྲངས་ཉུང་མི་རིགས་རང་གི་ས་ཁུལ་གྱི་སློབ་ཐོན་སློབ་མ་རྣམས་ལ་ལམ་སྟོན་དང་བློ་སྟོབས་སྐྱེད་དེ་ས་གནས་རང་གི་སྔོན་འགྲོ་སློབ་གྲྭའི་དགེ་རྒན་གྱི་འོས་སྦྱོང་སྤྲད་པ་བརྒྱུད་ལས་གནས་བསྐྲུན་ཐབས་བྱ་དགོས་པ་དང་། རྒྱའི་སྐད་ཡིག་གི་གནས་ཚད་མཐོ་ཞིང་བཟང་གསུམ་འཛོམས་པའི་དགེ་རྒན་དག་གྲངས་ཉུང་མི་རིགས་ས་ཁུལ་དུ་ཆེད་དུ་མངགས་གཏོང་བྱ་རྒྱུ། གྲངས་ཉུང་མི་རིགས་ཀྱི་ས་གནས་དང་འཚམས་པའི་རྒྱའི་སྐད་ཡིག་སློབ་གསོ་དར་སྤེལ་གྱི་ཀུན་སློང་བསླངས་ཏེ། དྲ་ཐོག་ནས་སྤྱི་དམངས་ལ་མཁོ་སྒྲུབ་བྱས་པའི་རྒྱ་ནག་གཞུང་འབྲེལ་གྱི་སློབ་གསོའི་རྒྱུ་ཆ་བེད་སྤྱོད་ཚད་ལྡན་དུ་གཏོང་བ་དང་། སྔོན་འགྲོ་སློབ་གྲྭའི་སློབ་ཁྲིད་ཀྱི་ཐབས་ལམ་གོང་མཐོར་དམིགས་ཏེ་སློབ་གྲྭ་ཕན་ཚུན་བར་མཉམ་འབྲེལ་དང་སྔོན་འགྲོ་སློབ་གསོའི་དཔེ་ལེགས་ཀྱི་རྒྱུ་ཆ་བགོ་འགྲེམས་བྱེད་པ་སོགས་དུས་དང་བསྟུན་པའི་དྲ་ཐོག་སྔོན་འགྲོ་སློབ་གྲྭ་ཟེར་བ་བསྐྲུན་རྒྱུ། དེ་བཞིན་རྒྱ་ནག་གི་ཤར་ནུབ་ཀྱི་གྲངས་ཉུང་མི་རིགས་ཀྱི་ས་ཁུལ་དང་གྲོང་གསེབ་ཁག་ཏུ་ལྡུམ་ར་སོགས་ཀྱི་འཛུགས་སྐྲུན་རྒྱ་ཆེ་སྤེལ་ཏེ། ས་ཁུལ་དེ་དག་གི་སྔོན་འགྲོའི་སློབ་གྲྭར་རྒྱབ་སྐྱོར་དང་རོགས་རམ་གང་ཐུབ་བྱ་དགོས་པ། རྒྱལ་ཁབ་ཀྱི་སྐད་ཡིག་སློབ་གསོ་དར་སྤེལ་ཟེར་བའི་འོས་འགན་ཁུར་བའི་འོག་ནས་མཐོ་སློབ་ཀྱི་སློབ་ཐོན་སློབ་མ་རྩ་འཛུགས་ཀྱིས། གྲོང་གསེབ་ཀྱི་སྔོན་འགྲོའི་སློབ་གྲྭ་ཁག་འཕེལ་རྒྱས་དང་རྒྱུ་ཆ་འཚོལ་བསྡུ། དགེ་རྒན་འོས་སྦྱོང་སོགས་ཀྱི་བྱ་འགུལ་ཚགས་ཚུད་སྤེལ་དགོས་ཀྱི་ཡོད་སྐོར་སོགས་བརྗོད་འདུག
ད་རེས་གྲངས་ཉུང་མི་རིགས་ས་ཁུལ་ཀུན་ལ་རྒྱའི་སྐད་ཡིག་སློབ་ཁྲིད་ཀྱི་སྲིད་ཇུས་ལག་བསྟར་བྱ་རྒྱུ་ཡིན་པའི་ཐད་ནང་སོག་མི་རིགས་ཀྱི་སྐད་ཡིག་ཐོབ་ཐང་བརྩོན་ལེན་པ་རྣམས་གཙོས་རྒྱའི་དབང་སྒྱུར་འོག་གནས་པའི་སྐད་ཡིག་ཐོབ་ཐང་གི་རང་དབང་རྩོད་མཁན་མང་པོ་ཞིག་གིས་སེམས་ཁུར་བྱེད་བཞིན་ཡོད་པ་དང་བསྟུན། ནང་སོག་མི་རིགས་ཀྱི་སྐད་ཡིག་ཐོབ་ཐང་བརྩོན་ལེན་པ་ཁག་ཅིག་གིས་རྒྱ་ནག་སོག་པོའི་སྐད་ཡིག་རྩ་གཏོར་མཁན་ཡིན་པའི་སྐྱོན་བརྗོད་ཀྱང་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
ད་མི་རིགས་ཀྱི་བླ་སྲོག་གཞན་གྱིས་ཧམ་སེམས་ཀྱིས་འཁྱེར་བཞིན་འདུག་ཀྱང་། དེ་ལ་རྒོལ་ལན་སློག་ཤེས་པའི་བོད་པ་བཙན་བྱོལ་བ་ཞིག་མི་འདུག་པའམ། ཡོད་ཀྱང་གཉིད་དུ་ཡུར་ནས་རིང་ཞིག་འདས་སོང་།