བོད་ཀྱི་དམག་སྡེ་ཁག་ཅིག་ལ་དྲག་པོའི་དམག་སྦྱོང་སྤྲད།

ཉེ་ཆར་རྒྱ་ནག་མི་མང་བཅིངས་འགྲོལ་དམག་ཟེར་བའི་ཁོངས་གཏོགས་བོད་ཀྱི་དམག་ཁུལ་ཁང་གི་དམག་སྡེ་མི་འདྲ་བ་ ༡༠ ལས་མང་བ་མཉམ་བསྡུས་ཀྱི་ཐོག་ནས་གཞི་རྒྱ་ཆེ་བའི་དངོས་གཞིའི་དམག་སྦྱོང་ཞིག་བསྡུས་ཏེ། རྒྱ་ནག་གི་དམག་དོན་འཕྲུལ་ཆས་དང་གོ་མཚོན་གསར་པ་སྐོར་ཞིག་ཚོད་ལྟ་བྱས་ཡོད་འདུག

PLA troops holding live-fire drills in Tibet Military Region.

ཁ་སང་རྒྱ་ནག་གི་གཞུང་འབྲེལ་དབྱིན་ཡིག་དྲ་རྒྱ་གོ་ལའི་དུས་བབ་ནང་། ད་ལན་གྱི་དམག་སྦྱོང་དེ་ནི་དགྲ་བོ་རྩ་མེད་གཏོང་ཐབས་ཀྱི་ཐབས་ཇུས་ལ་སྦྱོང་བརྡར་བྱ་རྒྱུར་དམིགས་པ་ཞིག་ཡིན་པ་མ་ཟད། དེ་ཡང་བོད་ལྟ་བུའི་མཐོ་སྒང་དང་རི་ཁུལ་དུ་མཉམ་རུབ་ཀྱི་ཐོག་ནས་ཕྱོགས་ཡོངས་ནས་ཕར་རྒོལ་བྱེད་ཐབས་ཀྱི་ཐད་ལ་དམག་སྦྱོང་བྱས་ཡོད། དངོས་གཞིའི་དམག་སྦྱོང་སྐབས་སུ་དམག་མི་རྣམས་ལ་ས་བབ་འདྲ་མིན་ནང་དངོས་སུ་མེ་མདའ་འཕེན་དུ་བཅུག་ཡོད་ཅིང་། དམག་སྦྱོང་དེ་བརྒྱུད་ནས་བཅིངས་འགྲོལ་དམག་ལ་རྒྱ་ནག་གི་ས་མཚམས་དང་བོད་ཀྱི་བརྟན་བརླིང་སྲུང་སྐྱོབ་བྱ་རྒྱུའི་ནུས་པ་ཐོན་ཡོད་སྐོར་བཀོད་འདུག

དེ་བཞིན། ད་ལན་གྱི་དམག་སྦྱོང་སྐབས་བཅིངས་འགྲོལ་དམག་གིས་རང་འགུལ་མེ་སྒྱོགས་ཧོ་ཝི་ཛར་དང་། མེ་ཤུགས་འཕུར་མདེལ་འཕེན་བྱེད་མ་ལག་གིས་མཚོན་པའི་གོ་མཚོན་གསར་པ་བཀོལ་སྤྱོད་བྱས་ཏེ། ཕ་རོལ་དགྲ་བོའི་དམག་དོན་ལྟེ་གནས་ཁག་དང་ཐད་འཕུར་གནམ་གྲུ་འབབ་ཐང་རྣམས་རྩ་མེད་གཏོང་ཐབས་ཐད་སྦྱོར་བརྡར་བྱས་འདུག་ལ། དམག་སྦྱོང་བྱ་ཡུལ་དེ་ཡང་རྒྱ་མཚོའི་ངོས་ལས་མཐོ་ཚད་སྨི་ ༤༥༠༠ ཡི་མཚམས་སུ་བསྡུས་ཡོད་འདུག

རྒྱ་ནག་གཞུང་གིས་བོད་ནང་དམག་སྦྱོང་གཞི་རྒྱ་ཆེན་པོ་སྤེལ་བཞིན་པ་དེ་རྒྱུན་ལྡན་ལྟ་བུ་ཡིན་ཞིང་། དམག་སྦྱོང་དེ་ཡང་གཙོ་བོ་རྒྱལ་ཁབ་ཀྱི་ས་ཁོངས་བདག་དབང་སྲུང་སྐྱོབ་དང་བོད་ནང་གི་བརྟན་བརླིང་སྲུང་སྐྱོབ་ཆེད་ཡིན་སྐོར་སྒྲོག་མུས་རེད། བོད་དམག་ཁུལ་ཁང་གི་དམག་སྦྱོང་ཕལ་ཆེ་བ་མཐོ་སྒང་དང་རི་ཁུལ་དུ་སྤྲོད་ཀྱིན་ཡོད་ལ། དབྱེ་ཞིབ་པས་དེ་ནི་འབྱུང་འགྱུར་རྒྱ་གར་དང་རྒྱ་ནག་དབར་འབྱུང་སྲིད་པའི་དམག་འཁྲུག་ལ་གྲ་སྒྲིག་བྱེད་ཐབས་ཤིག་ཡིན་སྐོར་རྗོད་ཀྱིན་ཡོད་པ་རེད།

ཡང་ཉེ་ཆར་རྒྱ་ནག་གི་གོ་ལའི་དུས་བབ་ཀྱིས་གནས་ཚུལ་ཞིག་སྤེལ་བའི་ནང་། རྒྱ་ནག་གི་ཆེད་ལས་པ་སྐོར་ཞིག་གིས་ས་མཐོ་དྲགས་པའི་རྐྱེན་གྱིས་མགོ་ན་བ་ལ་སོགས་པའི་མཐོ་སྒང་གི་ནད་གཞི་ལ་ཞིབ་འཇུག་ཆེད་དུ། བོད་ནང་འཛམ་གླིང་སྟེང་གི་མིའི་རྒྱུད་རྒྱུ་ཐོན་སྐྱེད་ཉར་ཚགས་ཁང་ (Human Genetic Resource Biological Sample Bank) ཞིག་བཙུགས་ཡོད་སྐོར་དང་། ཆེད་མཁས་མི་སྣ་དེ་དག་གིས་འདས་པའི་ལོ་ ༡༥ ལྷག་གི་རིང་བོད་ནང་མི་གྲངས་འབུམ་ ༡ ལྷག་གི་རྒྱུད་རྒྱུ་མཁོ་སྒྲུབ་བྱས་ཟིན་པ་མ་ཟད། དེའི་ཐོག་བོད་ཀྱི་གཞིས་ཀ་རྩེ་ཁུལ་དུ་རྟེན་གཞི་བྱས་པའི་བོད་ཀྱི་དམག་ཁུལ་ཁང་གི་སྨན་ཁང་ཞིག་ནས་ཀྱང་རྒྱུད་རྒྱུའི་དཔེ་གཞི་གྲངས་ཁྲི་ ༢ ལྷག་མཁོ་སྤྲད་བྱས་ཡོད་སྐོར་དང་། ས་མཐོའི་མི་ཡི་རྒྱུད་རྒྱུ་ལ་ཞིབ་འཇུག་བྱས་ཏེ་ས་མཐོའི་ནད་གཞི་ཁག་ལ་བཅོས་ཐབས་ཤིག་རྙེད་སྲིད་སྐོར་བརྗོད་འདུག་ནའང་། དབྱེ་ཞིབ་པས་རྒྱ་ནག་ནས་བོད་ཀྱི་ས་མཚམས་ཁག་ལ་བགོ་འགྲེམ་བྱས་པའི་རྒྱ་དམག་རྣམས་ལ་དུས་རྒྱུན་དུ་དབུགས་མ་འདང་བ་དང་། མགོ་ན་བ་སོགས་ཀྱི་དཀའ་ངལ་འབྱུང་གི་ཡོད་པ་དང་། འདས་ལོར་བོད་ཧིན་ས་མཚམས་སུ་ཡོད་པའི་རྒྱའི་དམག་མི་རྣམས་དེ་འདྲའི་དཀའ་ངལ་བྱུང་བའི་གནས་ཚུལ་ཐོན་པར་བརྟེན། ལས་གཞི་དེ་ནི་རྒྱ་ནག་གི་བཅིངས་འགྲོལ་དམག་ལ་དམིགས་པ་ཞིག་ཡིན་སྐོར་བརྗོད་ཡོད་འདུག