བོད་མི་ ༧༡ ལ་ཏོག་དབྱིབས་ནད་ཡམས་ཕོག

འདས་པའི་བདུན་ཕྲག་གཅིག་རིང་རྒྱ་གར་དང་བལ་ཡུལ་ནང་ཁྱོན་བོད་མི་ ༧༡ ལ་ཏོག་དབྱིབས་ན་ཚ་ཕོག་ཡོད་པ་དང་བོད་མི་གཅིག་འདས་གྲོངས་སུ་ཕྱིན་ཡོད་འདུག

ཁ་སང་ཉིན་རྒྱབ་ཆུ་ཚོད་ ༤ ཙམ་གྱི་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༥ སྤེལ་བ་ལྟར་ན། འདས་པའི་བདུན་གཅིག་ནང་རྒྱ་གར་གྱི་ས་གནས་ ༡༥ དང་བལ་ཡུལ་གྱི་ས་གནས་ ༦  ཡི་ནང་རང་ཁྱིམ་ལ་བཀག་ཏུ་སྡོད་མཁན་བོད་མི་ ༨༦༦  དང་ཚོགས་སྡེའི་ཟུར་བཀག་ཁང་དུ་མི་ ༤༠༧ བཅས་ཁྱོན་བསྡོམས་མི་གྲངས་ ༡༢༧༣  ཟུར་བཀག་འོག་ཡོད་པ་དང་། རྒྱ་གར་དང་བལ་ཡུལ་ནང་ཏོག་དབྱིབས་ནད་གཞི་གསར་དུ་ཕོག་མཁན་བོད་མི་ ༧༡ བྱུང་བའི་ཁྲོད་ནས་ལོ་ན་མཐོ་ཤོས་ ༨༥ དང་ལོ་ན་ཆུང་ཤོས་བྱིས་པ་ལོ་གཅིག་ཅན་ཞིག་ཡིན་འདུག ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་ ༦༢༤༢ བྱུང་བའི་ཁྲོད་དྲག་སྐྱེད་ཟིན་པ་ ༥༩༩༠ དང་། འདས་གྲོངས་སུ་ཕྱིན་པ་ ༡༤༩། ད་ལྟ་ཏོག་ནད་ཀྱིས་མནར་བཞིན་པ་བོད་མི་ ༡༠༣ ཡོད་འདུག

གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས།  ད་ལོའི་དགུན་ཚོང་དུ་སྐྱོད་མཁན་བོད་མི་ཚོས་དགུན་ཚོང་ལ་གྲ་སྒྲིག་བྱེད་མུས་ཡིན་པ་བཞིན། དབུས་ཏོག་དབྱིབས་ཛ་དྲག་ཚོགས་ཆུང་ཡང་ས་གནས་ཁག་ལ་སྐོར་སྐྱོད་སྐབས་ལམ་སྟོན་གནང་བ་ལྟར། དགུན་ཚོང་དུ་འགྲོ་མཁན་ཚོས་བྱིས་པ་ལོ་ཆུང་དང་། རྒས་འཁོགས། གཅིན་སྙི་ནད་ཅན། སྙིང་ནད་ཅན། ཁྲག་རླུང་སྟོད་འཚང་གི་ནད་གཞི་ཅན། རླུང་བསག་གི་ནད་གཞི་ཅན་གྱི་རིགས་འཁྲིད་མི་ཉན་པ་དང་། གལ་ཏེ་འཁྲིད་དགོས་ཁེལ་ཚེ་ཏོག་དབྱིབས་རིམས་ནད་ཀྱི་ལམ་སྟོན་གཞིར་བཟུང་རང་རང་གིས་སྔོན་འགོག་བྱེད་ནས་འཕྲོད་བསྟེན་ལ་དོ་སྣང་བྱ་རྒྱུ་གལ་ཆེན་ཡིན་པ་དང་། དགུན་ཚོང་གཉེར་ས་རུ་ཡོད་པའི་ཚོགས་པ་སྐྱིད་སྡུག་ཚོས་ནད་ཡམས་ལ་སྔོན་འགོག་དང་། སྨན་པར་བསྟེན་གཏུགས་སླད་ཉེ་འཁྲིས་སུ་ཡོད་པའི་སྨན་ཁང་དག་ལ་འབྲེལ་ལམ་བཞག་རྒྱུ་གལ་ཆེན་ཡིན་པ་དང་། རང་ཉིད་ལ་ནད་རྟགས་རིགས་བྱུང་ཚེ་སྨན་པར་བསྟེན་གཏུག་བྱ་རྒྱུ་གལ་ཆེན་པའི་ལམ་སྟོན་སོགས་གནང་སོང་།

ཡང་བདེ་ལེགས་སྨན་ཁང་གི་ཕྱི་ལུགས་སྨན་པ་འཇིགས་མེད་སྐལ་བཟང་ལགས་ཀྱིས། རྒྱ་གར་ས་གནས་གང་སར་འགོག་ཁབ་རྒྱག་མུས་ཡིན་པ་ལྟར། བོད་མི་ཚོས་འགོག་ཁབ་བརྒྱག་རྒྱུར་མཉམ་ཞུགས་བྱ་དགོས་པ་དང་། དེ་བཞིན་དགུན་ཚོང་ལ་སྐྱོད་མཁན་ཚོས་ཏོག་དབྱིབས་རིམས་ནད་ཀྱི་དཀའ་ངལ་མི་བྱུང་སླད།  ཁ་རས་གྱོན་རྒྱུ་དང་། གདོང་ཁེབས་གྱོན་རྒྱུ། རྒྱང་བཀྱེད་ཀྱི་བར་ཐག་གཞག་དགོས་པའི་ལམ་སྟོན་སོགས་ཀྱང་གནང་སོང་།

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་བོད་ཀྱི་སྨན་རྩིས་ཁང་ནས་རིན་མེད་ཐོག་གསོ་རིག་ལུས་སེམས་ནད་གསོའི་སྨན་ ༤༦༦༩༤ བགོ་འགྲེམས་དང་། དམིགས་བསལ་བྱིས་པ་རྣམས་ལ་ལུས་སེམས་ནད་གསོའི་སྨན་ ༨༠༥༧ བགོ་འགྲེམས་བྱུང་ཡོད་ཅིང་།  འདས་པའི་བདུན་ཕྲག་གཅིག་རིང་མི་གྲངས་ ༣༨ ལ་སེམས་ཁམས་འཕྲོད་བསྟེན་ལམ་སྟོན་གནང་ཡོད་པ་དང་རྒྱ་གར་གྱི་ས་གནས་ ༡༣ དང་བལ་ཡུལ་ནང་གི་ས་གནས་གྲངས་ ༤ ནས་མི་གྲངས་ ༧༥༠ ལ་ཏོག་དབྱིབས་བརྟག་དཔྱད་གནང་ཡོད་པ་རེད་ལ། ད་བར་རྒྱ་གར་ནང་ཏོག་དབྱིབས་འགོག་ཁབ་ཚར་གཉིས་ཀ་བརྒྱབ་ཟིན་པའི་མི་གྲངས་ ༢༩༤༡༩ དང་ཐེངས་དང་པོ་བརྒྱབ་ཟིན་པའི་གྲངས་འབོར་ཁྱོན་  ༢༠༣༩༡ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༣༠༨༧ དང་འགོག་ཁབ་ཚར་དང་པོ་ཐོབ་མཁན་མི་གྲངས་ ༦༧༣ ཆགས་ཡོད་འདུག

དཔལ་ལྡན།