བོད་རིགས་བུད་མེད་གཡང་འདུས་མཚོར་རྒྱལ་སྤྱིའི་བུད་མེད་མགོ་ཁྲིད་ཀྱི་གཟེངས་རྟགས་ཐོབ།

ཡུ་རོབ་གྲོས་ཚོགས་ནས་བོད་རིགས་བུད་མེད་གཡང་འདུས་མཚོ་སོགས་འཛམ་གླིང་རྒྱལ་ཁབ་ཁག་ཅིག་གི་བུད་མེད་ ༨ ལ་རྒྱལ་སྤྱིའི་བུད་མེད་ཀྱི་མགོ་ཁྲིད་གཟེངས་རྟགས་གནང་ཡོད་འདུག

ཟླ་འདིའི་ཕྱི་ཚེས་ ༡ ཉིན་ཡུ་རོབ་གྲོས་ཚོགས་ཀྱིས་ཕྱི་ལོ་ ༢༠༢༡ ལོའི་ཡུ་རོབ་ཀྱི་རྒྱལ་སྤྱིའི་བུད་མེད་ཀྱི་མགོ་ཁྲིད་གཟེངས་རྟགས་སྤྲད་ཡོད་པ་དང་། མཛད་སྒོའི་སྟེང་སྦེལ་ཇམ་རྒྱལ་ས་བྷིལ་ཟིལ་དུ་གནས་སྡོད་བོད་རིགས་བུད་མེད་གཡང་འདུས་མཚོ་ལགས་དང་། ཨབ་གྷན་གྱི་བུད་མེད་གསར་འགོད་པ་(Lailuma Sadid)ལགས། ཨ་ཛི་བྷི་ཁི་སི་ཐན་གྱི་བུད་མེད་(Gulnoza Ismailova)ལགས། ཨེ་ཛི་རལ་གྱི་བུད་མེད་(Bissan Salman)ལགས་སོགས་འབུར་དུ་ཐོན་པའི་བུད་མེད་མགོ་ཁྲིད་ ༨ ལ་གཟེངས་རྟགས་དེ་ཐོབ་ཡོད་འདུག་ལ། ཡུ་རོབ་ཀྱི་རྒྱལ་སྤྱིའི་བུད་མེད་མགོ་ཁྲིད་ཀྱི་གཟེངས་རྟགས་དེ་ནི་སྤྱི་ཚོགས་ནང་གདོང་མཆོང་ལྷག་བསམ་ཅན་དང་། འཇོན་ཐང་ཅན། གཞན་ལ་སྐུལ་འདེད་ཀྱི་ནུས་པ་ལྡན་པའི་བུད་མེད་རིགས་ལ་ཕུལ་གྱི་ཡོད་འདུག

འདི་གའི་གསར་འགོད་པས་ཁོང་མོར་ཁ་པར་བརྒྱུད་ད་ལན་གཟེངས་རྟགས་ཐོབ་པ་དེར་སེམས་ཚོར་ཅི་བྱུང་དྲིས་པར། འཛམ་གླིང་གི་མི་རིགས་དང་རྒྱལ་ཁབ་མང་པོའི་བུད་མེད་ཀྱི་ཁྲོད་ནས། བོད་རིགས་བུད་མེད་ཅིག་ལ་གཟེངས་བསྟོད་བྱ་དགའ་འདི་འདྲ་ཞིག་ཐོབ་དུས་དགའ་སྤོབས་ཆེན་པོ་སྐྱེས་བ་དང་། ད་ལྟ་བར་དུ་རང་ནུས་གང་ཡོད་ཀྱིས་སྤྱི་ཚོགས་ཞབས་ཕྱི་ཞུས་པ་དེར་ངོས་འཛིན་ཐོབ་པ་ཞིག་ཆགས་ཡོད་ལ། ལྷག་བསམ་རྣམ་དག་གིས་མུ་མཐུད་སྤྱི་ཚོགས་ཞབས་ཕྱིའི་ལས་ཀར་ནུས་པ་འདོན་རྒྱུ་ཡིན་སྐོར་བརྗོད་བྱུང་།

གཡང་འདུས་མཚོ་ནི་བོད་དུ་སྐྱེས་ཤིང་རྒྱ་ནག་ཏུ་སློབ་སྦྱོང་བྱས་མྱོང་ཡོད་པ་མ་ཟད། ཕྱི་ལོ་ ༡༩༨༡ ལོར་ཀན་སུའུ་བོད་རིགས་རང་སྐྱོང་ཁུལ་གྱི་བོད་ཀྱི་ཟློས་གར་ཚོགས་པའི་ནང་འདེམས་ཐོན་བྱུང་ཞིང་། བོད་ནང་གི་ས་ཕྱོགས་གང་སར་ཟློས་གར་འཁྲབ་སྟོན་གྱི་སྐོར་སྐྱོད་བྱས་ཡོད་འདུག

ཕྱི་ལོ་ ༡༩༩༦ ལོ་ཙམ་ལ་ཀན་སུའུ་བོད་ཀྱི་ཟློས་གར་ཚོགས་པ་དེས་ཟླ་བ་ ༣ རིང་ཡུ་རོབ་ནང་ཟློས་གར་འཁྲབ་སྟོན་གྱི་སྐོར་སྐྱོད་བྱས་ཡོད་པ་དང་། ཟློས་གར་འཁྲབ་སྟོན་གྱི་སྐོར་སྐྱོད་ལེགས་པར་གྲུབ་རྗེས། ཁོང་མོ་ཕྱིར་བོད་དུ་མ་ལོག་པར་ཡུ་རོབ་ཀྱི་རྒྱལ་ཁབ་ཧོ་ལན་ཌིའི་ནང་བསྡད་དེ་མུ་མཐུད་སློབ་སྦྱོང་བྱས། ཕྱི་ལོ་ ༡༩༩༨ ཙམ་ལ་སྦེལ་ཇམ་གྱི་རྒྱལ་ས་བྷིར་སལ་གྱི་ཐེབས་རྩ་ (Brussels-based Yehudi Menuhin Foundation) ཞེས་པས། ཁོང་མོ་ཞི་བདེའི་འབོད་སྒྲ་ ( voice for peace ) གླུ་གར་དགོང་ཚོགས་ཀྱི་འཁྲབ་སྟོན་ནང་འདེམས་ཐོན་བྱུང་ཡོད་སྟབས། ཁོང་མོ་དང་འཛམ་གླིང་རྒྱལ་ཁབ་མི་འདྲ་བ་ཡི་བུད་མེད་འཁྲབ་སྟོན་པ་ལྔ་ཡིས། ཡུ་རོབ་ཀྱི་རྒྱལ་ཁབ་ཚང་མའི་ནང་གླུ་གར་འཁྲབ་སྟོན་གྱི་སྐོར་སྐྱོད་བྱས་ཡོད་པ་མ་ཟད། ༧རྒྱལ་བ་རིན་པོ་ཆེ་མཆོག་ཡུ་རོབ་ནང་ཆིབས་བསྒྱུར་སྐབས་སོགས་སུ་ཁོང་མོས་གླུ་གཞས་འཁྲབ་སྟོན་གཟིགས་འབུལ་ཞུས་ཡོད་འདུག

དེ་བཞིན་ཕྱིེ་ལོ་ ༡༩༩༨ ལོར་ཁོང་མོས་བོད་ཀྱི་རླུང་རྟ་ཟ་ཁང་ཞེས་པའི་སྒེར་གཉེར་ཟ་ཁང་ཞིག་སྒོ་ཕྱེས་ཡོད་པ་དང་། ཕྱིས་སུ་ཧྥུ་ཀུ་ཏ་ཞེས་པའི་ཉི་ཧོང་གི་ཟ་མ་བཟའ་ས་ཞིག་ཀྱང་གཉེར་བཞིན་ཡོད་འདུག་ལ། ཁོང་མོའི་ཟ་ཁང་དུ་བོད་དང་ཕྱི་རྒྱལ་གྱི་ཆབ་སྲིད་དང་སྒྱུ་རྩལ་ཐད་ཀྱི་གནད་ཡོད་མི་སྣ་གང་མང་ཕེབས་ཀྱི་ཡོད་འདུག་ལ། ཟ་ཁང་གི་ཚོང་འབྲེལ་བརྒྱུད་གནད་ཡོད་མི་སྣ་མང་པོར་འབྲེལ་འདྲིས་བྱུང་སྟེ་བོད་དང་བོད་དོན་ཐོག་འབྲེལ་ལམ་ཡག་པོ་འཛུགས་པའི་གོ་སྐབས་བྱུང་གི་ཡོད་པ་ལྟར། ཕྱི་ལོ ༢༠༠༤ དང་ ༢༠༠༥། ༢༠༠༦ སོགས་སུ་ཁོང་མོས་ཕྱི་རྒྱལ་བ་མང་པོ་ཚོགས་པ་བྱས་ཏེ་བོད་ཀྱི་ས་ཁུལ་མང་པོར་སྐོར་སྐྱོད་དུ་འཁྲིད་ཡོད་འདུག

ཕྱི་ལོ་ ༢༠༠༢ ནས་བཟུང་སྦེལ་ཇམ་ནང་སྲིད་ལས་ཁུངས་དང་ཉེན་རྟོག་ཁང་དུ་ཁོང་མོས་སྐད་སྒྱུར་གྱི་ལས་ཀ་བྱས་ཡོད་པ་མ་ཟད། སྦེལ་འཇམ་བོད་རིགས་ཚོགས་པའི་ཚོགས་གཙོ་དང་ཚོགས་གཞོན་ལོ་ ༦ རིང་བྱས་ཏེ། ༧གོང་ས་མཆོག་གི་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྔ་རྗེས་རྣམས་སྦེལ་ཇམ་ནང་ཕེབས་བསུ་སྣེ་ལེན་དང་། ལོ་རེའི་༧སྐུའི་འཁྲུངས་སྐར་སོགས་དུས་ཆེན་དང་དུས་དྲན་གལ་ཆེན་ཁག་གོ་སྒྲིག་གནང་ཡོད་འདུག འདས་པའི་ལོ་མང་ནས་བཟུང་བོད་པ་མང་པོ་སྦེལ་ཇམ་ནང་བསླེབས་ཏེ་ཡིག་ཆ་མ་རག་པ་དང་། ལས་ཀ་མ་རག་པ་སོགས་ཀྱི་དཀའ་ངལ་མང་པོ་འཕྲད་སྐབས། སྦེལ་ཇམ་ནང་སྲིད་ལས་ཁུངས་ལ་ཡིག་ཆའི་བོད་མིའི་དཀའ་སྡུག་ཡར་ཞུ་དང་གྲོས་ཚོགས་ལ་སྙན་ཞུ་རིམ་པར་ཕུལ་ཡོད་པ་དང་། སྐབས་བསྟུན་བོད་མི་ཚོར་བཟོ་གྲྭ་སོགས་ཀྱི་ནང་ཁྲིམས་མཐུན་ལས་ཀ་བརྟན་པོ་ཐོབ་ཆེད་ཡིག་ཆ་ཞུ་རོགས་སོགས་ཀྱི་རོགས་རམ་མང་པོ་གནང་ཡོད་འདུག

དཔལ་ལྡན།