༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་ཉིན་གྲངས་གཉིས་རིང་གི་གསུང་ཆོས་དབུ་འཛུགས་མཛད་སོང་།
སིངྒ་པོར་ནང་པའི་ཆོས་ཚོགས་ (Tibetan Buddhist Centre) གཙོས་པའི་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུ་ཡིས་གསོལ་བ་བཏབ་པ་ལྟར། དེ་རིང་སྔ་དྲོར་༧གོང་ས་མཆོག་གིས་དྲ་ལམ་བརྒྱུད་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་ཉིན་གྲངས་གཉིས་རིང་གི་གསུང་ཆོས་དབུ་འཛུགས་མཛད། ཐོག་མར་༧གོང་ས་མཆོག་གིས། སངས་རྒྱས་པའི་ཆོས་ཟེར་བ་འདི་ལོ་ངོ་ ༢༥༠༠ གོང་ལ་བཅོམ་ལྡན་འདས་ཀྱིས་ཆོས་འཁོར་བསྐོར་བ་རེད། བཅོམ་ལྡན་འདས་ཀྱིས་གསུངས་པའི་ཆོས་འདི་ལ་ཡིད་ཆེས་བྱས་ནས་ཁས་ལེན་བྱེད་དགོས་མ་རེད། ངས་ལབ་བཞག་པ་འདི་ལ་བརྟག་དཔྱད་བྱས་ནས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། ཟེར་བ་འདི་ལ་ངས་བསྟན་པའི་ཆོས་ལ་དཔྱད་པ་བྱས་ནས་རྒྱུ་མཚན་ལྡན་པ་དང་བློ་ལ་འགྱུར་བ་འགྲོ་བར་ཕན་ཐོགས་ཡོང་གི་འདུག་ན་ཁས་ལེན་བྱོས། ཞེས་བཅོམ་ལྡན་འདས་ཀྱིས་གསུངས་འདུག དེར་བརྟེན་ཕྱིས་སུ་བཅོམ་ལྡན་འདས་ཀྱི་མཇུག་ལ་བསྟན་པའི་གཏད་རབས་བདུན་བྱུང་ཡོད་རེད་དེ། སངས་རྒྱས་པའི་ཆོས་ཀྱི་ལྟ་གྲུབ་སྐོར་འདིས་དམིགས་བསལ་གྱིས་དོ་སྣང་ཡོང་རྒྱུ་དང་སློབ་སྦྱོང་བྱེད་པར་ན་ལེནྜ་བཙུགས་ནས་ཡོང་བ་རེད། སྐབས་དེ་དུས་ན་ལེནྜ་མཁས་པའི་ཤེས་ཡོན་གྱི་བསྟི་གནས་ཤིག་ཡིན་པ་དང་ཕལ་ཆེར་བཅོམ་ལྡན་འདས་ཞལ་བཞུགས་དུས་ནས་ཡོད་པ་རེད། དེ་ནས་ནང་པའི་ལྟ་གྲུབ་ཀྱི་སྐོར་ལ་སློབ་སྦྱོང་བྱེད་པར་དམིགས་བསལ་གྱིས་དོ་སྣང་སྐྱེས་ནས་ཕྱིས་སུ་ན་ལེནྜ་འདི་སངས་རྒྱས་ཀྱི་ཆོས་སློབ་སྦྱོང་བྱེད་སའི་བསྟི་གནས་རྩེ་ཕུད་ཅིག་ཆགས་པ་རེད། འདིའི་རྒྱུ་མཚན་ནི་ན་ལེནྜའི་ལོ་རྒྱུས་ཀྱི་ཐོག་ནས་སྙན་གྲགས་ཆེན་པོ་འདུག་ཟེར་ནས་མ་བཤད་པར། ན་ལེཎྜ་ནས་ཐོན་པའི་མཁས་པའི་དབང་པོ་དང་མཁས་པ་དེ་ཚོའི་ལེགས་བཤད་གང་འདྲ་ཡོད་པ་སོགས་ལ་ཞིབ་འཇུག་བྱེད་དུས། ན་ལེཎྜའི་མཁས་པ་དག་གིས་གཞུང་ཆེན་མོའི་གོ་བ་བླངས་ཏེ་ལྟ་གྲུབ་དང་ཚད་མའི་སྐོར་ཡིན་རུང་། དེ་དག་ལ་སློབ་སྦྱོང་ཞེ་དྲགས་གནང་ཡོད་པ་རེད། ཅེས་གསུངས་སོང་།
ཡང་ཁོང་གིས། དུས་རབས་བདུན་པའི་ནང་སྲོང་བཙན་སྒམ་པོའི་སྐབས་སུ་རྒྱའི་རྒྱལ་པོ་དང་རྒྱལ་མོ་མཉམ་དུ་ང་ཚོ་འབྲེལ་བ་ཡག་པོ་བྱུང་ཡོད་རེད། སྲོང་བཙན་སྒམ་པོས་རྒྱ་བཟའ་ཀོང་ཇོ་དང་ཆང་ས་བསྐྱོན་ནས་དམིགས་བསལ་གྱིས་འབྲེལ་བ་ཡོད་རེད། དུས་རབས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེའུ་བཙན་གྱིས་བོད་ཀྱི་ནང་ཆོས་འདི་ན་ལེནྜ་ལ་ཁུངས་གཏུགས་ནས་སྤུས་དག་པོ་ཡོང་རྒྱུའི་དགོངས་པ་བཞེས་ནས་མཁན་ཆེན་ཞི་བ་འཚོ་བོད་ལ་གདན་ཞུ་གནང་། མཁན་ཆེན་ཞི་བ་འཚོ་བོད་ལ་ཕེབས་ཚར་བའི་རྗེས་སུ་ཁོང་གིས། ཁྱེད་ཚོ་ལ་བོད་ཡིག་འདུག དེར་བརྟེན་པཱ་ལི་དང་ལེགས་སྦྱར་བསླབ་དགོས་མི་འདུག ཁྱེད་ཚོས་བཀའ་དང་བསྟན་བཅོས་བོད་ཡིག་ནང་བསྒྱུར་བ་ཡིན་ན་ཡག་པོ་ཡོང་ས་རེད། ཅེས་བཀའ་སློབ་གནང་བ་རེད། མཁས་པ་ཁ་ཤས་ཀྱིས་མཁན་ཆེན་ཞི་བ་འཚོས་བོད་ཡིག་ལ་ཐུགས་སྣང་གནང་བའི་ལོ་རྒྱུས་དེ་འདྲ་བཤད་རྒྱུ་འདུག ང་ཚོས་བོད་ཡིག་འདི་རྒྱ་གར་གྱི་ཡི་གེ་ལ་དཔེ་བལྟས་ནས་དབྱངས་དང་གསལ་བྱེད་ཡོད་པའི་ཡི་གེ་འདིའི་ཐོག་ལ་པཱ་ལིའི་གཞུང་དང་ལེགས་སྦྱར་གྱི་གཞུང་ནང་ཡོད་པ་མང་པོ་ཞིག་བོད་ཡིག་ནང་བསྒྱུར་བ་རེད། ནམ་རྒྱུན་ང་ཚོ་ལ་བཀའ་འགྱུར་པོ་ཏི་ ༡༠༠ ལྷག་དང་བསྟན་འགྱུར་པོ་ཏི་ ༢༠༠ ལྷག་ཅིག་བོད་ཡིག་ནང་ཡོད་རེད། འདུལ་བའི་གཞུང་དེ་ཚོ་ཕལ་ཆེར་པཱ་ལིའི་གཞུང་གཙོ་བོ་ཡིན་ས་རེད། ཕར་ཕྱིན་དང་དབུ་མའི་སྐོར་དེ་ཚོ་ལེགས་སྦྱར་གྱི་སྐད་གཙོ་བོ་རེད་འདུག ད་ལྟ་དབུ་མ་འཇུག་པ་དང་འཇུག་པ་རང་འགྲེལ་འདི་ཟླ་བ་གྲགས་པས་བརྩམས་པ་འདི་ང་ཚོས་བོད་ཡིག་ནང་བསྒྱུར་ནས་བོད་ཀྱི་སངས་རྒྱས་པའི་ཆོས་འདི་ན་ལེནྜའི་ཆོས་བརྒྱུད་ལ་ཁུངས་གཏུགས་པ་རེད། འདི་གས་ན་ལེནྜའི་ཆོས་བརྒྱུད་རྩ་ཆེན་པོ་རེད་ཟེར་བ་མིན་པར་ན་ལེནྜའི་མཁས་པའི་དབང་པོ་ཀླུ་སྒྲུབ་དང་ཐོགས་མེད་ལ་སོགས་པ། ལྷག་པར་ད་ལྟ་སྐབས་སུ་བབས་པ་ཟླ་བ་གྲགས་པ་ཁོང་གིས་གཞུང་དེ་ཚོ་བོད་ཡིག་ནང་བསྒྱུར་ནས་བོད་པ་ཚོས་སློབ་སྦྱོང་བྱེད་ཀྱི་ཡོད་པ་རེད། ངོས་རང་གིས་དབུ་མ་འཇུག་པ་ཆུང་དུས་ནས་བློ་ལ་བཟུང་བ་རེད། ཉིན་གཉིས་གསུམ་གྱི་ནང་དུ་དབུ་མ་འཇུག་པ་ཆ་ཚང་འགྲོ་ཡི་ཡོད། དབུ་མ་འཇུག་པ་བློ་ལ་བཟུང་ནས་ངག་ཐོག་ནས་བསྐྱོར་གྱི་ཡོད། ཆུང་བའི་དུས་དུ་དོན་དག་ཤེས་ཀྱི་མེད། དབུ་མ་འཇུག་པའི་བཤད་ལུང་གླིང་རིན་པོ་ཆེའི་སྐུ་མདུན་ནས་ངོས་རང་གིས་ཐོབ་པ་ཡིན། འཇུག་པ་རང་འགྲེལ་གྱི་བཤད་ལུང་འདི་མཁན་རིན་པོ་ཆེ་ཀུན་དགའ་དབང་ཕྱུག་གི་སྐུ་མདུན་ནས་ཐོབ་པ་ཡིན། ངོས་ཀྱིས་ལེགས་སྦྱར་གྱི་གཞུང་གཙོ་བོ་བརྩི་ཡི་ཡོད། ཅེས་གསུངས་སོང་།
མགོན་པོ་མཆོག་གིས། ཁོང་ཁྲོ་ཟ་བའི་སྐབས་སུ་སོ་སོའི་སེམས་མ་སྐྱིད་པ་ཆགས་ཀྱི་རེད། དེ་ཡང་དབུ་མ་འཇུག་པར་གསུངས་པའི་ནང་ཁོང་ཁྲོ་ཟ་ཡོང་དུས་ངོ་གདོང་མི་སྡུག་པ་ཆགས་ཡོང་གི་རེད། བཟོད་པ་སྒོམ་པ་ཡིན་ན་མི་འཛུམ་ཤིག་ཤིག་དང་ལྷོད་ལྷོད་ཡོང་གི་རེད་ཅེས་ཟླ་བ་གྲགས་པས་གསུངས་འདུག དེར་བརྟེན་ང་ཚོ་ཚང་མས་འཛམ་གླིང་འདིའི་སྒང་ལ་འཆམ་པ་དང་། གཅིག་གིས་གཅིག་ལ་བརྩེ་བ་ཡོད་བསྡད་པ་ཞིག་བྱུང་བ་ཡིན་ན། འཛམ་བུ་གླིང་ལ་བདེ་སྐྱིད་ཡོང་གི་རེད། དེ་འདྲ་སོང་ཙང་བརྩེ་བ་ཁོ་ན་གོང་དུ་སྤེལ་བ་འདི་ཁོང་ཁྲོ་ལ་གཉེན་པོ་བསྟེན་གྱི་ཡོད་པ་རེད། དེར་བརྟེན་ཆོས་ལུགས་ཚང་མས་བྱམས་བརྩེ་གསུངས་ཀྱི་ཡོད་རེད། ཆོས་ལུགས་ཚང་མར་སེམས་ཀྱི་ཞི་བདེ་སྒྲུབ་པའི་ནུས་པ་དང་ཆ་རྐྱེན་ཏན་ཏན་ཡོད་པ་རེད། ངོས་རང་གི་ངོས་ནས་ཆོས་ལུགས་ཚང་མ་མཐུན་པོ་དང་ཐུན་མོང་གི་ཐོག་ནས་འཛམ་གླིང་འདིའི་སྒང་ལ་སེམས་ཀྱི་ཞི་བདེ་བརྒྱུད་ནས་ཞི་བདེ་སྤེལ་ཐུབ་པ་བྱ་རྒྱུར་ངོས་ཀྱིས་འབད་བརྩོན་བྱེད་ཀྱི་ཡོད་ལ་འབོད་སྐུལ་ཡང་བྱེད་ཀྱི་ཡོད་ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ།
