དེ་རིང་༧གོང་ས་མཆོག་གིས་དྲ་ལམ་བརྒྱུད་ཨ་རིའི་མོན་མའོ་ཐ་གཙུག་ལག་སློབ་ཆེན་ (Monmouth University) གྱི་དགེ་ལས་རྣམས་དང་ལྷན་དུ་མ་འོངས་པར་འཕྲོད་བསྟེན་དང་བདེ་སྐྱིད་རྒྱུན་གནས་ཐུབ་ཐབས་ཀྱི་སྐོར་ལ་བཀའ་སློབ་གནང་སོང་།
ཐོག་མར་༧གོང་ས་མཆོག་གིས། དེ་རིང་ཁྱེད་རང་ཚོས་བཀའ་མོལ་ཞུ་རྒྱུའི་གོ་སྐབས་བསྐྲུན་པར་ཐུགས་རྗེ་ཆེ་ཞུ་རྒྱུ་ཡིན། དེ་རིང་གི་བརྗོད་བྱ་གཙོ་བོ་ནི་བདེ་སྐྱིད་དང་འཕྲོད་བསྟེན་སྐོར་ཡིན་ཙང་འདིའི་སྐོར་བཀའ་མོལ་ཞུ་རྒྱུའི་གྲ་སྒྲིག་གནང་བར་ཐུགས་རྗེ་ཆེ་ཞུ་ཡི་ཡིན། ང་ཚོ་སེམས་ཅན་སྲོག་ལྡན་གང་འདྲ་ཞིག་ཡིན་རུང་ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་རེད། སེམས་ཅན་གཟུགས་པོ་ཆེ་ཆུང་གང་འདྲ་ཞིག་ཡིན་རུང་སྡུག་བསྔལ་རྩ་བ་ཉིད་ནས་མི་འདོད་པ་དང་བདེ་བ་འདོད་པ་གཅིག་གྱུར་རེད། དཔེར་ན་འབུ་གྲོག་མ་ཞིག་ཡིན་རུང་སྲོག་ལ་ཉེན་ཁ་ཡོད་པའི་གནོད་སྐྱོན་དེ་འདྲ་མཐོང་ཡོང་དུས་བྲོས་འགྲོ་རྒྱུའི་ཐབས་ཤེས་བྱེད་ཀྱི་རེད། ལྷག་པར་དུ་ང་ཚོ་འགྲོ་བ་མི་ཡིན་པའི་ཆ་ནས་སེམས་ཅན་གཞན་ལས་ཁྱད་པར་དུ་འཕགས་པའི་ཁྱད་ཆོས་གཅིག་མིའི་ཐུན་མོང་མ་ཡིན་པའི་རྣམ་དཔྱོད་དང་འབྲེལ་བའི་ཀླད་པ་ཡོད་རེད། དེར་བརྟེན་དཀའ་ངལ་ལ་གདོང་ལེན་བྱ་རྒྱུ་དང་དཀའ་ངལ་ལས་གཡོལ་ཐབས་བྱ་རྒྱུའི་རྣམ་དཔྱོད་རྒྱ་ཆེ་བ་ཡོད་པས། རྒྱ་ཆེ་ས་ནས་བསམ་བློ་གཏང་ཐུབ་རྒྱུ་དང་ད་ལྟའི་དུས་ཚོད་ཙམ་མིན་པར་མ་འོངས་པར་འབྱུང་འགྱུར་གྱི་གནས་ཚུལ་སྐོར་ལའང་ང་ཚོས་བསམ་བློ་གཏང་ཐུབ་ཀྱི་ཡོད་པ་རེད། མི་མ་ཡིན་པའི་སེམས་ཅན་གཞན་དུད་འགྲོ་ལ་སོགས་པའི་བདེ་སྡུག་བསྒྲུབ་རྒྱུའི་མིག་རྒྱང་ཐུང་ཐུང་རེད། འདས་པའི་ལོ་རྒྱུས་ལ་ཕྱིར་ལོག་བལྟས་ན། འཛམ་གླིང་འདིའི་ནང་དཀའ་ངལ་བཟོ་མཁན་ཤུགས་ཆེ་ཤོས་འདི་མི་ཆགས་ཀྱི་ཡོད་པ་རེད། དཔེར་ན་ལོ་ངོ་སྟོང་ཕྲག་གོང་ནས་མི་ལ་གནོད་པ་བྱ་རྒྱུའི་གོ་མཚོན་དེ་མིས་བཟོས་པ་རེད། སྐབས་རེར་ཞི་བདེའི་བསྐྲུན་རྒྱུའི་གོ་མཚོན་ཟེར་ནས་ཐ་སྙད་ཡོད་རེད་དེ། གོ་མཚོན་གྱི་བྱ་བ་གཙོ་བོ་དེ་གཞན་གྱི་སྲོག་གཅོད་རྒྱུ་ཆགས་ཀྱི་ཡོད་པ་རེད། དེར་བརྟེན་འདས་པའི་མིའི་བྱུང་རབས་ནང་དུ་གོ་མཚོན་མེད་ན། འཛམ་གླིང་འདི་གང་ཙམ་གྱིས་ཞི་བདེ་ཅན་དུ་འགྱུར་གྱི་རེད་བསམ་གྱི་ཡོད། འོན་ཀྱང་གོ་མཚོན་བཟོ་བའི་དོན་དུ་དཔལ་འབྱོར་དང་ནུས་པ་རྩལ་དུ་སྟོན་ནས་བཟོས་པ་རེད། དེས་ན། ཞི་བདེ་ལ་ཁ་གཡར་ནས་གོ་མཚོན་མང་པོ་བཟོས་པ་ཡིན་ནའང་གོ་མཚོན་གྱིས་ཞི་བདེ་སྒྲུབ་རྒྱུར་ཕན་གྱི་མ་རེད། གོ་མཚོན་ནི་གཞན་ལ་འཚེ་བ་བྱ་རྒྱུའི་དངོས་པོ་ཞིག་ཆགས་ཀྱི་ཡོད་པ་རེད། ཅེས་བཀའ་སློབ་ལམ་སྟོན་གནང་སོང་།
ཡང་༧གོང་ས་མཆོག་གིས། ང་ཚོའི་ད་ལྟའི་འཛམ་གླིང་ཆ་བཞག་ན། གླིང་ཕྲན་ཕན་ཚུན་དང་ཤར་ནུབ་ཡིན་རུང་འདས་པའི་དུས་ཚོད་ལ་བལྟས་ན་དེང་སང་ལྟོས་ཐབས་ཆེན་པོ་ཞེ་དྲགས་རེད། འདས་པའི་དུས་སུ་སོ་སོའི་གླིང་ཕྲན་ནང་སོ་སོའི་རྒྱལ་ཁབ། སོ་སོའི་ཁོར་ཡུག་ཙམ་མ་གཏོགས་འབྲེལ་བ་ཤུགས་ཆེན་པོ་ཆགས་ཀྱི་ཡོད་མ་རེད། དེང་སང་འཛམ་གླིང་གི་ཚ་དྲོད་གོང་འཕེལ་དང་འབྲེལ་བའི་དཀའ་ངལ་འདི་རྒྱལ་ཁབ་གཅིག་གཉིས་ཀྱི་དཀའ་ངལ་མ་རེད། དེ་བཞིན་དཔལ་འབྱོར་དང་ཁོར་ཡུག་ལ་སོགས་པ་གནས་ཚུལ་གང་འདྲ་ཡིན་རུང་འཛམ་གླིང་སྤྱིའི་ཁྱད་ཕན་དང་འབྲེལ་བ་ཡོད་རེད། དཔལ་འབྱོར་ལྟ་བུ་ཆ་བཞག་ན་དེང་སང་ང་ཚོ་ (Global) ཟེར་ནས་རྒྱལ་སྤྱིའི་དཔལ་འབྱོར་ཟེར་ནས་ཐ་སྙད་སྦྱར་རྒྱུ་ཆགས་ཡོད་པ་རེད། དེར་བརྟེན་གོ་མཚོན་གྱི་བྱ་བ་གཙོ་བོ་ནི་གནོད་འཚེ་བྱ་རྒྱུ་ཡིན་ཙང་བྱ་བ་དེ་སྒྲུབ་ཟིན་པ་ལྟ་བུ་རེད། ཚང་མས་ཤེས་གསལ་ལྟར་གོ་མཚོན་གྱིས་སྲོག་མང་པོ་བཅད་ཡོད་རེད། དེས་ན་གོ་མཚོན་གྱི་ལས་ཀ་བྱ་རྒྱུ་དེ་འགྲིག་སོང་ཟེར་བའི་མཚམས་ལ་བསླེབས་ཡོད་པ་རེད། ཁ་ཡོད་ལག་ཡོད་ཀྱིས་གོ་མཚོན་དང་མ་འབྲེལ་བའི་ཐོག་ནས་ཞི་བདེ་བསྐྲུན་རྒྱུའི་ཐབས་ཤེས་ངེས་པར་དུ་བྱ་དགོས་རེད། གལ་སྲིད་གོ་མཚོན་དགོས་ཀྱི་ཡོད་ན་ལག་པས་ཁུ་ཚུར་གཞུས་ནས་གནོད་པ་བྱ་རྒྱུའི་ཆེད་དུ་བེད་སྤྱོད་གཏོང་ན་མ་གཏོགས། གཞན་རྡུལ་ཕྲན་མཚོན་ཆ་ལ་སོགས་པའི་གོ་མཚོན་དེ་དག་རྩ་བ་ཉིད་ནས་མེད་པ་བྱ་དགོས་རེད། ཁུ་ཚུར་གཞུས་པའི་གོ་མཚོན་དེ་དག་དེ་འདྲའི་གནོད་པ་ཆེན་པོ་ཡོད་མ་རེད། ཆུང་དུས་འཁྲུག་པ་བརྒྱག་པའི་སྐབས་སུ་སེན་མོ་བེད་སྤྱོད་བྱེད་ཀྱི་ཡོད་རེད། ངོས་རང་གི་གཅེན་པོ་ད་ལྟ་ཁོང་སྐུ་ཚེ་མ་ཟིན་པ་རེད། ཁོང་གི་མཚན་ལ་ཇོ་ལགས་བློ་བཟང་བསམ་གཏན་ཞུས་ཀྱི་ཡོད། ཆུང་བྱིས་པའི་དུས་སུ་ལོ་མང་པོའི་རིང་ཕན་ཚུན་རྩེད་མོ་རྩེ་ནས་སྐྱིད་པོ་ཞེ་དྲགས་ཡོང་གི་ཡོད། སྐབས་རེར་སྐབས་རེར་འཁྲུག་པ་ཤོར་བའི་སྐབས་སུ་ངོས་རང་གི་སེན་མོ་དེ་ཁོང་མཉམ་དུ་འཐབ་རྩོད་བྱ་རྒྱུའི་ལག་ཆ་གཙོ་བོ་ཆགས་ཡོང་དུས། ཆུང་བའི་དུས་སུ་ཁོང་གི་ཞལ་རས་ལ་ངོས་རང་གིས་སྦར་ཤད་རྒྱག་པའི་རྟགས་ཏོག་ཙམ་ཡོད་རེད། དེར་བརྟེན་ངོས་རང་གི་བསམ་པ་ལ་ང་ཚོ་ཚང་མ་རང་གཞན་གཉིས་ཀ་ཞི་བདེ་དང་འཆམ་མཐུན་དགོས་ཀྱི་ཡོད་ཙང་འཛམ་གླིང་གོ་ལ་འདིའི་ནང་མི་ཚང་མ་གཅིག་གྱུར་གྱི་འདུ་ཤེས་ཤིག་བཅངས་དགོས་རྒྱུ་གལ་ཆེན་པོ་རེད། གཅིག་གྱུར་གྱི་འདུ་ཤེས་དེ་འདྲའི་གོང་འཕེལ་ཡོང་བར་ཞི་བདེ་དང་བག་ཕེབས། འཆམ་མཐུན་ཡོང་བར་གོ་མཚོན་གྱིས་ཕན་གྱི་མ་རེད། གླིང་ཕྲན་སོགས་ལ་གོ་མཚོན་གྱིས་ཕན་ཚུན་ཕན་ཐོགས་ཐུབ་ཀྱི་མ་རེད། གལ་སྲིད་རྒྱལ་ཁབ་ཆེ་ས་དང་གླིང་ཕྲན་ཆེ་ཁག་འདི་གས་གོ་མཚོན་བཟོས་ཀྱི་མེད་ན་རྒྱལ་ཁབ་ཆུང་ཆུང་གིས་གོ་མཚོན་ཉོ་ས་རྙེད་ཀྱི་མ་རེད། དེར་བརྟེན་གོ་མཚོན་མེད་པ་བཟོས་པར་འབད་བརྩོན་རིམ་པས་བརྩམས་ནས་མཐར་གོ་མཚོན་བཟོ་མཁན་གྱི་བཟོ་གྲྭ་རྩ་བ་ཉིད་ནས་མེད་པར་བཟོ་རྒྱུའི་དམིགས་ཡུལ་བཅངས་ཐུབ་ན། འདིས་སྒྲུབ་འོས་པ་གཅིག་དང་སྒྲུབ་ཐུབ་རྒྱུ་གཅིག་རེད། ང་རང་ཚོས་ཞི་བདེ་ཟེར་བ་དེ་གཙོ་བོ་ནང་བསམ་པའི་སྒོ་ནས་སེམས་པ་གཏིང་ནས་ཡོང་དགོས་རྒྱུ་གཅིག་རེད། ཁོང་ཁྲོ་དང་ཕྲག་དོག དེ་བཞིན་སེམས་ནང་སུན་སྣང་འདི་གས་ལ་བརྟེན་ནས་འཚེ་བ་དང་གཞན་ལ་གནོད་འཚེ་ཡོང་གི་ཡོད་པ་རེད། འདིའི་འགལ་ཟླ་ལ་འགྲོ་བ་མི་ལ་རང་ཤེས་སུ་ཡོད་པའི་བཟང་པོའི་ཡོན་ཏན། དཔེར་ན་སེམས་བཟང་པོ་ལྟ་བུ་ངེས་པར་དུ་བསྐྱེད་པར་འབད་བརྩོན་བྱ་དགོས་ཀྱི་ཡོད་རེད། ང་ཚོ་འགྲོ་བ་མི་དེ་དག་སྤྱི་ཚོགས་ལ་བརྟེན་པའི་སེམས་ཅན་ཡིན་ཙང་། སྤྱི་ཚོགས་ལ་བརྟེན་པའི་སེམས་ཅན་ཡིན་ཕྱིན་ཆད་ལ་རང་གང་ལ་བརྟེན་སའི་སྤྱི་ཚོགས་ནང་དུ་རྟོགས་པའི་སེམས་ཅན་གཞན་ལ་སེམས་ཁུར་གྱི་རྣམ་པ་ཡོད་ཡོད་པ་རེད། སྔར་ཡིན་ན་སོ་སོའི་རྒྱལ་ཁབ་དང་སོ་སོའི་སྤྱི་ཚོགས་ཆུང་ཆུང་། སོ་སོའི་ནང་མི་ཆུང་ཆུང་གི་བསམ་བློའི་སྟེང་དུ་རྩལ་དུ་དོན་གྱི་ཡོད་རེད། དེང་སང་འཛམ་གླིང་སྤྱི་ཡོངས་ལ་ཁྱབ་པའི་སེམས་ཁུར་བཅངས་དགོས་རྒྱུ་གལ་ཆེན་པོ་རེད། ཅེས་གསུངས་སོང་།
དེ་ནས་བཀའ་འདྲི་བཀའ་ལན་གྱི་ལས་རིམ་ནང་། སློབ་ཕྲུག་ (Jacob) གིས་གོ་ལ་འདིའི་ནང་གནམ་གཤིས་འགྱུར་ལྡོག་གིས་ང་ཚོའི་མ་འོངས་པར་ཤུགས་རྐྱེན་གང་འདྲ་ཡོང་གི་ཡོད་སྐོར་དང་གནམ་གཤིས་འགྱུར་ལྡོག་སྔོན་འགོག་བྱེད་པར་ང་ཚོས་བྱ་དགོས་པ་ག་རེ་ཡོད་སྐོར་སོགས་དྲིས་པར་༧གོང་ས་མཆོག་གིས།ང་ཚོའི་འཛམ་གླིང་གྲུབ་པའི་སྐབས་གཅིག་བྱུང་ཡོད་རེད། དེར་བརྟེན་ག་ལེར་འཇིག་འགྲོ་བའི་དུས་ཚོད་ཡོང་གི་རེད། ཚན་རིག་པ་འགས་ཉི་མའི་ཚ་དྲོད་ཆེ་རུ་འགྲོ་བའི་ཉེན་ཁ་ཡོད་རེད། དེ་འདྲ་བྱུང་ན་ང་ཚོའི་འཛམ་གླིང་གི་གནམ་གཤིས་དང་ཁོར་ཡུག་ལ་འགྱུར་བ་ཤུགས་ཆེན་པོ་འགྲོ་ཡི་རེད་གསུངས་ཀྱི་འདུག དེ་འདྲ་ང་ཚོའི་དངོས་སུ་མཐོང་ཆོས་སུ་འདུག དེར་བརྟེན་འཛམ་གླིང་གི་བྱང་རྩེ་དང་ལྷོ་རྩེ་ལྟ་བུར་ཆ་བཞག་ན། ས་ཆ་འདི་གཉིས་ནང་གངས་ཤུགས་ཆེན་པོ་བཞུར་ཡོང་གི་འདུག འདི་ནི་ང་ཚོས་བྱེད་ཐབས་མེད་པ་ལྟ་བུ་རེད། དེས་ན་ལོ་བརྒྱ་ཕྲག་ཁ་ཤས་རིང་ལ་ང་ཚོའི་འཛམ་གླིང་གི་གནམ་གཤིས་འདི་འགྱུར་ལྡོག་མ་ཆགས་པའི་རེ་བ་བརྒྱག་རྒྱུ་ཡོད་པ་རེད། དེ་ནི་ང་རང་ཚོའི་བྱ་སྤྱོད་ལ་རག་ལས་ཡོད་པ་རེད། ལོ་བཅུ་ཕྲག་ཁ་ཤས་ཤིག་གི་རིང་ལ་ང་རང་ཚོས་འཛམ་གླིང་སྤྱིའི་གནམ་གཤིས་འགྱུར་ལྡོག་སྐོར་ལ་འབད་བརྩོན་གནང་དགོས་རྒྱུ་གལ་ཆེན་པོ་རེད། ཧ་ལམ་ཨེ་ཤ་ཡ་ཆ་ཚང་འདྲ་བོའི་ཆུ་བོ་ཆེ་ཁག་འབྱུང་སའི་ས་ཆ་བོད་ཡིན་པ་དང་། ལྷག་པར་དུ་རྒྱ་གར་དང་རྒྱ་ནག པ་ཀི་སི་ཐན་སོགས་ལ་རྒྱུག་འགྲོ་བའི་ཆུ་བོ་འབྱུང་ས་དེ་བོད་ཆགས་བསྡད་ཡོད་པ་རེད། དེར་བརྟེན་བོད་ནང་གི་ལྗོན་ཤིང་དང་ནགས་ཚལ་དེ་ཚོས་སྲུང་སྐྱོབ་བྱ་དགོས་རྒྱུ་དེ་ཞེ་དྲགས་གལ་ཆེན་པོ་ཆགས་ཀྱི་ཡོད་རེད། བོད་ཀྱི་ཆུ་བོ་ཆེན་པོ་དེ་ཚོས་འཕྲོ་བརླག་མ་འགྲོ་བའི་ཐོག་ལ་འབད་བརྩོན་གནང་དགོས་རྒྱུ་གལ་ཆེན་པོ་ཆགས་ཀྱི་ཡོད་རེད། དེར་བརྟེན་ལོ་བརྒྱ་ཕྲག་གསུམ་ཙམ་རིང་ལ་ཡག་པོ་ཡོད་རེད་དྲན་གྱི་འདུག དེའི་རྗེས་ལ་སུ་ཡིན་རུང་ཚོད་དཔག་བྱས་ནས་ཞུ་ཐུབ་རྒྱུ་ཁག་པོ་རེད། འཇིག་རྟེན་བཀོད་པ་པོ་འདོད་མཁན་ཡིན་ན་ (Allah) ལ་གསོལ་བ་བཏབ་པ་དང་ཡང་འཇིག་རྟེན་བཀོད་པ་པོ་ཡེ་ཤུ་དཀོན་མཆོག་ལ་གསོལ་བ་འདེབས་རྒྱུ་ཡོང་གི་རེད། དཀོན་མཆོག་གིས་ང་ཚོའི་གནམ་གཤིས་ཀྱི་འགྱུར་ལྡོག་ལ་སྟངས་འཛིན་ག་ཚོད་གནང་གི་ཡོད་མེད་ང་ཚོས་ཞུ་ཐུབ་རྒྱུ་ཁག་པོ་རེད། དེ་བཞིན་སངས་རྒྱས་བཅོམ་ལྡན་འདས་ཁས་ལེན་མཁན་དང་མི་ལེན་མཁན་གང་ཡིན་རུང་དཀོན་མཆོག་ལ་གསོལ་འདེབས་རྒྱུ་མ་གཏོགས་མེད་པ་ལྟ་བུ་རེད། ཅེས་བཀའ་ལན་སྩལ་སོང་།
གསར་འགོད་པ། བསྟན་འཛིན་ཕུར་བུ།
