ཐའེ་ཝན་ནང་བོད་དོན་དྲིལ་བསྒྲགས་ཀྱི་འགྲེམས་སྟོན་གཤོམ་གྱི་འདུག

ཐའེ་ཝན་གྱི་རྒྱལ་ས་ཐའེ་པེ་ནང་རྒྱ་ནག་གཞུང་གི་སྡུག་རྩུབ་མནར་གཅོད་འོག་འདས་གྲོངས་སུ་ཕྱིན་པ་དང་བཙོན་འཇུག་བྱས་པའི་བོད་ཀྱི་ཆབ་སྲིད་བཙོན་པ་སོགས་ཀྱི་པར་རིས་འགྲེམས་སྟོན་བཤམས་ཏེ་བོད་དོན་དྲིལ་བསྒྲགས་བྱེད་ཀྱི་འདུག

Taiwan Democratic Progressive Party legislator Fan Yun (third from left), Taipei City Councillor Wu Peiyi (second from left), Dalai Lama representative to Taiwan Gesangjian (first from right), Chenglai Gyatso Geshe (third from right) Tibet Taiwan Human Rights Zhaxi Ciren (first from left), chairman of the online connection, attended Dong Jingrong (second from right)’s first solo exhibition. (Photo by reporter Li Zonghan)

དེ་རིང་ཐའེ་ཝན་གྱི་ཐའེ་པེ་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཐའེ་ཝན་གྱི་རྒྱལ་ས་ཐའེ་པེ་ནང་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་ལས་འགུལ་ཁང་དང་ཐའེ་ཝན་བོད་རང་བཙན་སློབ་ཕྲུག་ཚོགས་པ་གཉིས་ཟུང་འབྲེལ་གྱིས་གོ་སྒྲིག་འོག རྒྱ་ནག་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་གྱི་གནས་སྟངས་མཚོན་པའི་པར་རིས་འགྲེམས་སྟོན་ཞིག་མགོ་འཛུགས་བྱས་ཡོད་འདུག

འགྲེམས་སྟོན་གྱི་པར་རིས་སྒྱུ་རྩལ་ཁྲོད་༧གོང་ས་རྒྱལ་བ་རིན་པོ་ཆེ་མཆོག་གི་དབུས་ཞིང་གཤེགས་དམ་པ་བོད་ཀྱི་ཆབ་སྲིད་བཙོན་ཟུར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་། ཨ་མ་ཨ་བདེ་ལགས་དང་ཆབ་སྲིད་བཙོན་ཟུར་དཔལ་ལྡན་རྒྱ་མཚོ་ལགས། གྲྭ་བསྟན་འཛིན་ཉི་མ་ལགས། བོད་ཀྱི་སྐད་ཡིག་རང་དབང་གི་ཐོབ་ཐང་བརྩོན་ལེན་པ་བཀྲ་ཤིས་དབང་ཕྱུག་ལགས་སོགས་ཡོད་ཅིང་། དམིགས་བསལ་འགྲེམས་སྟེང་རྒྱ་ནག་གཞུང་གིས་བོད་ནང་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་། བཙན་བྱོལ་ནང་གི་བོད་ཁྱིམ་སློབ་མ་བོད་དོན་འཐབ་རྩོད་པ་སོགས་བོད་ཕྱི་ནང་གཉིས་ཀྱི་གནས་སྟངས་མཚོན་པར་བྱས་ཏེ་མི་རིགས་ཤིག་གི་སྐྱོ་གར་གྱི་གནས་སྟངས་མངོན་པར་བྱས་ཡོད་པ་དང་། པར་རིས་འགྲེམས་སྟོན་དེ་ནི་ཐའེ་ཝན་བོད་རང་བཙན་སློབ་ཕྲུག་ཚོགས་པའི་ཚོགས་མི་ (董靜蓉) ལགས་ཀྱི་སྒྱུ་རྩལ་བརྩམས་ཆོས་གཙོ་སྒྲུབ་ཞུས་པ་ཞིག་ཡིན་པ་དང་། ཁོང་མོ་ནི་ཡུན་རིང་ཐའེ་ཝན་གྱི་བོད་དོན་རྒྱབ་སྐྱོར་བ་ཞིག་ཡིན་འདུག

ཐའེ་ཝན་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། འགྲེམས་སྟོན་གྱི་ལམ་ནས་སྒྱུ་རྩལ་བ་ཁོང་གིས་བོད་དོན་དྲིལ་བསྒྲགས་གནང་བར་བཀའ་དྲིན་ཞུས་པ་དང་འབྲེལ། བོད་ནང་གི་བོད་མི་ཚོས་བོད་སྐད་བཤད་པ་དང་༧གོང་ས་མཆོག་གི་སྐུ་པར་ཉར་བ་ཙམ་གྱིས་བཙོན་འཇུག་བྱེད་ཀྱི་ཡོད་པ་དང་། རྒྱ་ནག་གིས་བོད་ནང་གི་སློབ་གྲྭ་ཁག་བརྒྱབ་སྟེ་བོད་རིགས་གཞོན་སྐྱེས་ཚོར་རང་མི་རིགས་ཀྱི་ལོ་རྒྱུས་རྒྱབ་ལྗོངས་སོགས་ཤེས་རྟོགས་འབྱུང་རྒྱུར་བཀག་འགོག་དང་། བོད་ཀྱི་ཆོས་དང་རིག་གཞུང་རྩ་གཏོར་གྱི་དྲག་གནོན་སོགས་བྱས་ཏེ། བོད་མི་རིགས་རྩ་མེད་གཏོང་གི་ཡོད། ཅེས་བརྗོད་ཡོད་འདུག

བོད་དོན་དྲིལ་བསྒྲགས་ཀྱི་འགྲེམས་སྟོན་དེའི་སྟེང་ཐའེ་ཝན་མང་གཙོ་འཕེལ་རྒྱས་ཚོགས་པའི་གྲོས་ཚོགས་འཐུས་མི་ཧྥན་ཡོན་ (Fan Yun) ལགས་དང་རྒྱལ་ས་ཐའེ་པེ་གྲོང་ཁྱེར་གྱི་སྤྱི་ཁྱབ་ཝོ་པེ་ཡེ་ (Wu Peiyi) ལགས་གཉིས་ཀྱི་གཙོས་ཐའེ་པེ་གྲོང་ཁྱེར་གྱི་གནད་ཡོད་མི་སྣ་ཁག་ཅིག་དང་མི་མང་། དེ་བཞིན། ཐའེ་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ཀྱི་གཙོས་དགེ་བཤེས་འཕྲིན་ལས་རྒྱ་མཚོ་ལགས། བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་ལས་འགུལ་ཁང་གི་འགན་འཛིན་བཀྲ་ཤིས་ཚེ་རིང་ལགས་བཅས་ཞུགས་ཡོད་འདུག་ལ། འགྲེམས་སྟོན་དེ་ཟླ་རྗེས་མའི་ཚེས་ ༩ བར་གཤོམ་གྱི་ཡོད་འདུག

གསར་འགོད་པ། སྐལ་བཟང་སྦྱིན་པ།