ནད་ཡམས་ཁྲོད་འདས་གྲོངས་སུ་ཕྱིན་པ་རྣམས་ཀྱི་ནང་མིར་གུན་གསབ་ཧིན་སྒོར་ཁྲི་ལྔ་རེ་སྤྲོད་འཆར་འདུག

ཁ་སང་ཕྱི་ཚེས་ ༤ ཉིན་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ངོས་ནས་རྒྱ་གར་བ་ཏོག་དབྱིབས་གཉན་རིམས་ཀྱི་རྐྱེན་པས་འདས་གྲོངས་སུ་གྱུར་བའི་མི་རྣམས་ཀྱི་ཤུལ་ལུས་ནང་མི་ལ་གུན་གསབ་ཧིན་སྒོར་ཁྲི་ ༥ རེ་སྤྲོད་རྒྱུའི་ལས་གཞི་དེར་ཆོག་མཆན་སྤྲད་ཡོད་འདུག

ཆེས་མཐོའི་ཁྲིམས་ཞིབ་ཁང་གི་བཀའ་ཁྱབ་དེའི་ནང་། གུན་གསབ་མ་དངུལ་དེ་མངའ་སྡེ་སོ་སོའི་གོད་ཆག་ངལ་སེལ་མ་དངུལ་ (Disaster Relief Funds) ནས་གཏོང་དགོས་པ་དང་། གུན་གསབ་སྦྱིན་ཡུལ་གྱི་འདས་པོའི་ཚེ་འདས་ལག་འཁྱེར་སྟེང་ཏོག་དབྱིབས་གཉན་རིམས་ཀྱི་རྐྱེན་པས་འདས་གྲོངས་སུ་ཕྱིན་པ་ཞེས་འཁོད་དགོས་སྐོར་དང་། དེ་ཡང་འབྲེལ་ཡོད་ལས་ཁུངས་ཁག་གིས་འདས་པོའི་ནང་མིའི་གུན་གསབ་སྙན་ཞུ་འབྱོར་རྗེས་ཉིན་གྲངས་ ༣༠ ནང་ཚུད་ལ་སྤྲད་ཟིན་པ་དགོས་སྐོར་བརྗོད་འདུག་ལ། ཡང་མངའ་སྡེ་རྣམས་ཀྱིས་འདས་པོའི་ཚེ་འདས་ལག་འཁྱེར་སྟེང་ཏོག་དབྱིབས་གཉན་རིམས་འཁོད་མེད་པ་ཙམ་གྱི་རྒྱུ་མཚན་སྟེང་ནས་གུན་གསབ་བཀག་མི་ཉན་པར། འབྲེལ་ཡོད་ལས་ཁུངས་ངོས་ནས་ཞིབ་འཇུག་གིས་ཡིག་ཆར་ཁྲིམས་མཐུན་བཟོ་བཅོས་བྱ་དགོས་སྐོར་གྱི་ལམ་སྟོན་ཡང་བྱས་ཡོད་འདུག དེ་བཞིན་ཆེས་མཐོའི་ཁྲིམས་ཞིབ་ཁང་གིས་གུན་གསབ་མ་དངུལ་དེ་འབྱུང་འགྱུར་འདས་གྲོངས་སུ་འགྱུར་སྲིད་པའི་མི་རྣམས་ལའང་འཐོབ་དགོས་སྐོར་བརྗོད་འདུག

ཏོག་དབྱིབས་གཉན་རིམས་ཀྱི་རྐྱེན་པས་འདས་གྲོངས་སུ་གྱུར་བ་རྣམས་ལ་གཞུང་ངོས་ནས་གུན་གསབ་སྤྲོད་རྒྱུའི་ལས་གཞི་དེ་ནི་ཐོག་མར་གཞུང་ཕྱོགས་ནས་སྤེལ་བ་ཞིག་མིན་པར། འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་ཁྲིམས་རྩོད་པ་གྷོ་རབ་ཀུ་མར་བྷན་སལ་ (Gaurav Kumar Bansal) དང་རི་པག་ཀན་སལ་ (Reepak Kansal) གཉིས་ཀྱིས་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ལ་ཞུ་གཏུག་བྱས་པ་ལས་བྱུང་བ་ཞིག་ཡིན་པ་དང་། ཁྲིམས་རྩོད་པ་གཉིས་ཀྱི་ཞུ་གཏུག་ནང་། རྒྱ་གར་གྱི་དབུས་སའི་གཞུང་གིས་གཞུང་འབྲེལ་གྱི་ཐོག་ནས་ཏོག་དབྱིབས་གཉན་རིམས་འདི་བཞིན་གོད་ཆག་ཅིག་ལ་ངོས་འཛིན་བྱེད་ཀྱི་ཡོད་པར་བརྟེན། རྒྱ་གར་གྱི་ཕྱི་ལོ་ ༢༠༠༥ ལོའི་གོད་ཆག་སྟངས་འཛིན་ཁྲིམས་ཡིག་ (Disaster Management Act of 2005) གཞིར་བཟུང་གཞུང་ངོས་ནས་གོད་ཆག་གི་རྐྱེན་པས་འདས་གྲོངས་སུ་ཕྱིན་པའི་མི་རྣམས་ལ་ཧིན་སྒོར་འབུམ་ ༤ རེ་གུན་གསབ་སྤྲོད་དགོས་པའི་རེ་འདུན་བཏོན་ཡོད་པ་རེད།

མི་སྒེར་གྱི་ཞུ་གཏུག་དེ་ལ་བརྟེན་ནས་ཕྱི་ཟླ་ ༦ ཚེས་ ༣༠ ཉིན་ཆེས་མཐོའི་ཁྲིམས་ཞིབ་ཁང་ནས། རྒྱ་གར་གཞུང་གིས་འདས་པོ་རྣམས་ལ་གུན་གསབ་མ་དངུལ་སྤྲོད་དགོས་སྐོར་ཙམ་ལས་མ་དངུལ་ཇི་ཙམ་སྤྲོད་དགོས་མིན་དེ་གཞུང་གི་ལག་ཏུ་བཞག་ཡོད་ལ། རྒྱ་གར་གྱི་རྒྱལ་ཡོངས་གོད་ཆག་སྟངས་འཛིན་ཚན་པའི་ (National Disaster Management Authority) ངོས་ནས་བདུན་ཕྲག་དྲུག་ནང་འདས་པོ་རྣམས་ལ་གུན་གསབ་སྤྲོད་ཕྱོགས་ཀྱི་ཡིག་ཆ་ཞིག་བཟོ་སྒྲིག་དགོས་སྐོར་བཀའ་བཏང་བ་མ་ཟད། རྒྱ་གར་གཞུང་ངོས་ནས་ད་བར་འདས་པོ་རྣམས་ལ་གོད་ཆག་སྟངས་འཛིན་ཁྲིམས་ཡིག་གཞིར་བཟུང་གུན་གསབ་སྤྲད་མ་ཐུབ་པར་ལྷོད་གཡེང་འཐུས་ཤོར་བཏང་བ་དེ་རང་འགན་མ་འཁུར་བ་ཞིག་ཡིན་སྐོར་གྱི་སྐྱོན་བརྗོད་ཀྱང་བྱས་ཡོད་འདུག འོན་ཀྱང་རྒྱ་གར་དབུས་གཞུང་གིས་ཆེས་མཐོའི་ཁྲིམས་ཞིབ་ཁང་ལ། རྒྱ་གར་གྱི་མངའ་སྡེ་དག་ལ་ལོ་རེའི་དངུལ་རྩིས་ཀྱི་ཐོག་ནས་འདས་པོ་རྣམས་ལ་ཧིན་སྒོར་འབུམ་ ༤ རེ་སྤྲོད་ཐབས་རྩ་བ་ནས་མེད་པའི་གནས་སྟངས་ཐོག ད་ལྟ་ཡོད་པའི་མ་དངུལ་རྣམས་གཉན་རིམས་འགོག་རྒོལ་གྱི་ལས་གཞི་གཞན་གྱི་ཆེད་དུའང་གཏོང་དགོས་སྐོར་བརྗོད་ཡོད་པ་རེད།

India has officially recorded more than 449,000 Covid-19 deaths so far. Photo: Reuters

ཁ་སང་ཆེས་མཐོའི་ཁྲིམས་ཞིབ་ཁང་གིས་རྒྱ་གར་གཞུང་གི་ཐག་གཅོད་ལ་ངོས་ལེན་ཆོག་མཆན་སྤྲད་པ་དང་བསྟུན། གཏུག་བཤེར་བྱེད་མཁན་གྱི་ཁྲིམས་རྩོད་པ་གྷོ་རབ་ཀུ་མཱར་བྷན་སལ་གྱིས། ང་ཚོས་གཞུང་གིས་གཉན་རིམས་འགོག་རྒོལ་གྱི་ཆེད་དུ་དངུལ་ཕོན་ཆེན་བཏང་ཡོད་པ་ཤེས་ཀྱི་ཡོད། འོན་ཀྱང་ང་ཚོས་ད་དུང་གཞུང་ངོས་ནས་ཁྲིམས་སྒྲིག་གཞིར་བཟུང་འདས་པོ་རྣམས་ཀྱི་ཤུལ་ལུས་ནང་མི་རྣམས་ལ་ཧིན་སྒོར་འབུམ་ ༤ རེ་སྤྲོད་དགོས་ཀྱི་ཡོད་པ་མཐོང་གི་འདུག དེ་ལྟར་མ་བྱུང་ནའང་། དབུལ་ཕོངས་ནང་མི་རྣམས་ལ་དངུལ་མང་བ་དང་ཁྱིམ་ཚང་ཏོག་ཙམ་དྲག་པ་རྣམས་ལ་དངུལ་ཉུང་བ་སྤྲད་ན་ཆོག་གི་ཡོད་པ་རེད། ཅེས་གཞུང་གི་ཐག་གཅོད་དེར་འདོད་བློ་མ་ཁེངས་པའི་རྣམ་འགྱུར་བསྟན་ཡོད་འདུག

ཀར་ན་ཊ་ཀ་(Karnataka) ཡིས་མཚོན་པའི་རྒྱ་གར་གྱི་མངའ་སྡེ་རེ་ཟུང་གིས་སྔར་ནས་རང་གི་མི་མང་རྣམས་ལ་གུན་གསབ་འབུམ་ ༡ རེ་སྤྲོད་རྒྱུའི་གསལ་བསྒྲགས་བྱས་ཟིན་པ་མ་ཟད། གསར་ལམ་ཁག་གི་གྲངས་ཐོ་ལྟར་ན། ད་བར་ཁྱིམ་ཚང་དབུལ་ཕོངས་ ༡༦ ལ་གུན་གསབ་སྤྲད་ཟིན་ཡོད་འདུག ཡིན་ནའང་ད་ལན་དབུས་གཞུང་གིས་གུན་གསབ་མ་དངུལ་དེ་མངའ་སྡེའི་གོད་ཆག་ངལ་སེལ་མ་དངུལ་ནས་གཏོང་དགོས་སྐོར་བརྗོད་པར་བརྟེན། ལྷོ་ཕྱོགས་ཀྱི་མངའ་སྡེ་ཀེ་ར་ལ་ (Kerala) དང་ར་ཇི་སི་ཐན་ (Rajasthan) གཉིས་ཀྱིས་གུན་གསབ་རྣམས་མངའ་སྡེ་སོ་སོས་སྤྲད་དགོས་བྱུང་ན། མངའ་སྡེའི་བང་མཛོད་ལ་དོ་ཕོག་ཆེན་པོ་ཐེབས་ངེས་ཡིན་པས་དབུས་གཞུང་གིས་སྤྲོད་དགོས་ཚུལ་བརྗོད་ཡོད་འདུག

རྒྱ་གར་ནི་འཛམ་གླིང་སྟེང་གི་ཏོག་དབྱིབས་གཉན་རིམས་ཀྱིས་གནོད་འཚེ་ཆེ་ཤོས་ཐེབས་སའི་རྒྱལ་ཁབ་ཅིག་ཡིན་ཞིང་། ལྷག་པར་དུ་འདི་ལོའི་ལོ་མགོར་རྒྱ་གར་རྒྱལ་ཡོངས་ནས་ཁྱབ་གདལ་སོང་བའི་ཏོག་དབྱིབས་ནད་རླབས་གསུམ་པ་དེས་མི་སྲོག་སྟོང་ཕྲག་བརྒལ་བ་འཕྲོག་ཡོད་པ་དང་། རྒྱ་གར་གྱི་གཞུང་འབྲེལ་གྲངས་ཐོ་ལྟར་ན། དེ་རིང་ཉིན་གུང་བར་རྒྱ་གར་རྒྱལ་ཡོངས་ནང་ཁྱོན་མི་གྲངས་ ༣༣,༨༥༣,༠༤༨ ལ་གཉན་རིམས་འགོས་པའི་ཁྲོད་ནས། མི་གྲངས་ ༤,༤༩,༢༦༠ འདས་གྲོངས་སུ་ཕྱིན་ཡོད་པ་རེད། འོན་ཀྱང་འཕྲོད་བསྟེན་མི་སྣ་དང་དབྱེ་ཞིབ་པ་རྣམས་ཀྱིས་རྒྱ་གར་ནང་གི་ནད་པའི་འདས་གྲངས་དེ་གཞུང་འབྲེལ་གྱི་གྲངས་ཐོ་ལས་ལྡབ་ ༡༠ ཡིས་མང་བ་ཡོད་སྐོར་གྱི་ཚོད་དཔག་བྱེད་ཀྱི་ཡོད་འདུག

གསར་འགོད་པ། པ་སངས་ཚེ་རིང་།