བཙན་བྱོལ་བ་འཇམ་དབྱངས་སྦྱིན་པ།
ཕྱི་ལོ་༢༠༢༡ཟླ༡༠ཚེས༩ཉིན།
གང་ཞིག་ལ་ངང་སྒུག་བྱས་རྗེས། བསམ་པའི་དོན་འགྲུབ་སྟེ་གཏམ་བཟང་གིས་དྲ་ལམ་བཀང་དུས་འགོག་མེད་ཀྱི་དགའ་ཚོར་ཞིག་ངང་གིས་སྐྱེས་ཡོང་།
སྤྱིར་ན་ཆེས་མཐོའི་ཁྲིམས་ཞིབ་ཁང་ནས། སྤྱི་འཐུས་རྒྱུན་ལས་རྣམ་པར་འོས་འདེམས་ཀྱི་ཐོབ་ཐང་བཀག་པ་ནས་ད་བར་ནང་ཁུལ་རྩོད་རྙོག་རིང་མོ་ཞིག་ནར་མར་བྱུང་ཞིང་། ལྷག་དོན་སྐབས་བཅུ་བདུན་པའི་སྤྱི་འཐུས་གྲོས་ཚོགས་གསར་འཛུགས་མ་ཐུབ་པར་ཟླ་ངོ་བཞི་ཙམ་སོང་བའི་རིང་། ནང་ཁུལ་འདུམ་འགྲིག་ལྟ་ཅི་ད་དུང་གླེང་ཤུགས་ཆེ་རུ་སོང་སྟེ། ཕྱོགས་དང་རིས་སུ་ཆད་ནས་དགྲ་དགའ་གཉེན་སྡུག་གི་ལས་ངན་ཇི་སྙེད་ཅིག་བསགས་པ་ནི་ང་དང་ཁྱོད་ཀྱི་སེམས་ལ་གསལ་བ་དེ་རེད། རི་ལུག་པ་ཐག་པས་མི་འདུམས་པའི་དཔེ་ལྟར་ཕྱོགས་གཉིས་ཀར་འདུམ་པའི་ནུས་པ་ཡོངས་སུ་ཟད་པ་ན། ༸གོང་ས༸སྐྱབས་མགོན་ཆེན་པོར་མཛད་དཀའ་བཟོས་ཤིང་ཐུགས་ཕམ་འབྱུང་གཞིའི་ལས་ལ་མི་ཞུགས་ག་མེད་གྱུར། འདི་ནི་བོད་པ་བཙན་བྱོལ་བ་ཚོ་རང་གི་སྤུན་ཟླར་ངོ་གནོངས་དགོས་ཤིང་ལོ་རྒྱུས་ཀྱིས་ཐར་བར་མི་གཏོང་བའི་བྱུང་བ་ཞིག་ཡིན།
དེ་ལྟ་ན་ཡང་། ཕྱོགས་གཅིག་ནས་ད་ལན་བདམས་ཐོན་སྤྱི་འཐུས་ཚོས་རང་གི་འདོད་མོས་ཡོད་མེད་ལ་མ་ལྟོས་པར། ཀ་ཀོར་མེད་པར་སྤྱི་མོས་ཐོག་མང་གཙོའི་ཁྲིམས་སྒྲིག་གཞི་ལ་བཞག་པའི་༸རྒྱལ་བའི་ལམ་སྟོན་བཀའ་དགོངས་འོག་ཤར་བསྐྱོད་གནང་ཐུབ་པ་འདི་ནི། ང་ཚོའི་གཟི་བརྗིད་དང་སྤོབས་པ་བྱེད་འོས་པའི་རྒྱལ་ཁ་ཆེན་པོ་ཞིག་སྟེ། གཞིས་བཞུགས་སྤུན་ཟླའི་སེམས་ཁམས་གསོ་བར་དོན་དམ་གྱི་ལེགས་སྐྱེས་ཕུལ་བ་ཞིག་ཀྱང་ཆགས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་ཆབ་ཀྱི་ཐིགས་པ་གཅིག་གིས། རྭ་ལྟར་མཁྲེགས་ཅིང་ཀོ་ལྟར་གྱོང་བའི་མི་སེམས་ཡོད་ཚད་ཞི་བར་མཛད། གནད་འདི་ལས་༸གོང་ས་མཆོག་ནི་རང་རེའི་བོད་མི་ཚོའི་དད་གུས་དང་ཡིད་ཆེས། རེ་བ་དང་མགོན་སྐྱབས་ཞུ་ས་བླ་ན་མ་མཆིས་པ་དེ་ཡིན་པ་བསྟན་ཡོད་ལ། ཁོང་གི་ཐུགས་རྗེ་ལ་བརྟེན་ནས་རང་རེར་ཆིག་སྒྲིལ་གྱི་རྟེན་གཞི་གསར་བ་ཞིག་གི་གཞི་བཏིང་ཡོད། འདིའི་ལྡོག་ཕྱོགས་ནས་གལ་ལ་ཐུག་དུས་བོད་མི་ཚོ་རྡོག་གཅིག་ཏུ་བསྒྲིལ་ཏེ་༸རྒྱལ་བའི་བཀའ་དགོངས་ཐད་ཤར་སྐྱོད་བྱེད་ཀྱི་ཡོད་པའི་བརྡ་ལན་གསལ་པོ་ཞིག་རྒྱ་དམར་གཞུང་ལའང་འཕྲོད་པར་བྱས་ཡོད།
འདས་པའི་དུས་རབས་ཕྱེད་ཀའི་རིང་༸རྒྱལ་བའི་བཀའ་དྲིན་ལ་བརྟེན་ནས་ཆོལ་གསུམ་གོང་བུ་གཅིག་གྱུར་སྔར་མ་གྲགས་པ་ཞིག་བྱུང་ཡང་། ལོ་ཤས་གོང་ནས་བཟུང་བཙན་བྱོལ་བོད་མིའི་ཆིག་སྒྲིལ་གྱི་ནུས་པ་ཉམས་དམས་སུ་འགྲོ་བཞིན་པའི་མཐོང་སྣང་ཞིག་རང་ཉིད་ཚུད་པའི་མི་མང་པོ་ཞིག་ལ་འབྱུང་གི་ཡོད། འདི་ནི་རྒྱུ་མཚན་མེད་པ་ཞིག་མིན་ལ་དེའི་རྒྱུ་རྐྱེན་ཡང་ཕྱོགས་མང་པོ་ཞིག་དང་འབྲེལ་ནས་ཡོད། རུམ་ན་ཅི་ཡོད་ལག་པར་ཆ་ཡོད་ཡིན་པས་ང་ཚོས་གབ་སྦས་དང་སྤམ་མདོག་སྟོན་དགོས་པར་མ་མཐོང་། གང་ན་ཆིག་སྒྲིལ་མེད་ན་དེར་བཀྲ་མི་ཤིས་པ་འབྱུང་བ་ཆོས་ཉིད་ཡིན། འདི་ནི་ང་ཚོར་རང་རེའི་ལོ་རྒྱུས་ཀྱིས་ཡང་ཡང་དམར་ཁྲིད་བྱས་པའི་བསླབ་བྱ་གཙོ་བོ་དེའང་ཡིན། དཔེར་ན། ༸གོང་ས་སྐྱབས་མགོན་བཅུ་གསུམ་པ་ཆེན་པོ་སྐུ་མྱ་ངན་ལས་འདས་ནས་ཉིན་ཤས་ལས་མ་སོང་བར་གྲོང་དྲག་དམག་སྒར་འཐོར་ཞིག་ཏུ་སོང་བ་དང་། གཞུང་གི་ལས་འཛིན་ཚོས་ནང་ཁུལ་སྐྱོན་འདོགས་རེས་བྱས་ཏེ་ཆིག་སྒྲིལ་བྱེད་མ་ཐུབ་པ་ལ་བརྟེན་ནས་ཡོད་ཚད་ཤོར་བའི་སྟ་གོན་བྱས་ཡོད་པ་ནི། སྲིད་དོན་རྒྱལ་རབས་སོགས་ལོ་རྒྱུས་ཡིག་ཆ་དག་གིས་ཁ་གྲགས་ཡོང་གི་ཡོད།
དེའི་ཕྱིར། ཆིག་སྒྲིལ་ནི་ང་ཚོའི་རེ་བ་དང་སྟོབས་ཤུགས་ཀྱི་འབྱུང་ཁུངས་ཡིན་ལ། ཆིག་སྒྲིལ་ནི་ང་ཚོའི་འཐབ་རྩོད་ཀྱི་གོ་ཆ་དང་རང་དབང་གི་ལྡེ་མིག་ཡིན། དོན་གྱི་གནད་འདི་གཟིགས་ནས། ༸གོང་ས་རྒྱལ་བའི་དབང་བོས་ཀྱང་བོད་མི་ཚོར་བཀའ་སློབ་གནང་སྐབས་ཆིག་སྒྲིལ་སྐོར་གཙོ་འདོན་གྱིས་ནན་གསུངས་གནང་གི་ཡོད་ལ། གཞིས་བཞུགས་གངས་ཅན་པའི་དཔའ་རྒོད་ཚོས་ཀྱང་ཆེས་མཐའ་མཇུག་གི་དམར་ལམ་ལམ་གྱི་མེ་ལྕེའི་དབུས་ནས་ཆིག་སྒྲིལ་ལ་རེ་འབོད་དང་ཁ་གཡང་བསྒྲགས་ཡོད། དཔེར་ན། དཔའ་བོ་ཆོས་འཕགས་སྐྱབས་དང་བསོད་ནམས་(༢༠༡༢།༤།༡༩)རྣམ་གཉིས་ཀྱིས། རང་ཚུགས་མ་ཤོར་བར་རྡོག་རྩ་གཅིག་བསྒྲིལ་བྱས་ན་ངེད་གཉིས་ཀྱི་རེ་བ་འགྲུབ་པ་ཡིན། ངེད་གཉིས་ཀྱི་ཁ་ཆེམས་ལྟར་བསྒྲུབ་པར་སྙིང་ནས་རེ་བ་ཡིན། ཞེས་དང་། དེ་བཞིན་དཔའ་བོ་ངག་དབང་ནོར་འཕེལ་དང་བསྟན་འཛིན་མཁས་གྲུབ་(༢༠༡༢།༦།༢༠)རྣམ་གཉིས་ཀྱིས། ཚང་མས་རྡོག་རྩ་གཅིག་སྒྲིལ་གྱིས། བོད་མི་རིགས་ཀྱི་ལ་རྒྱ་འཛིན་ཐུབ་རྒྱུའི་རེ་བ་དང་ཡིད་ཆེས་ཡོད། ཅེས་ཞལ་ཆེམས་ནང་བཀོད་ཡོད་པ་སོགས་མང་དུ་སྣང་ངོ་།། འོན་ཀྱང་། ང་ཚོས་གསུང་གསེར་ནག་གི་རི་འདྲ་བ་འདི་ཚོར་ཉམས་ལེན་དང་བདག་གཅེས་ཅི་ཙམ་བྱས་ཡོད་དམ། འདི་ནི་རང་གིས་རང་ལ་འདྲི་དགོས་པའི་དྲི་བ་ཞིག་གོ།།
མདོ་དོན་ད་ལན་རྙོག་གླེང་རིང་མོ་ཞིག་གི་མཇུག་ཡོངས་སུ་རྫོགས་ཏེ། ནམ་མཁའ་གཡའ་དག་དང་ས་གཞི་རྡུལ་དག་ཅེས་པའི་དཔེ་ལྟར་ལོ་རྒྱུས་ཀྱི་ཤོག་ལྷེ་གསར་བ་ཞིག་གི་ཁ་ཕྱེ་ཡོང་གི་ཡོད་པས། ཁ་སང་སྤྱི་འཐུས་ཞེ་ལྔ་བོ་ཐུན་མོང་ནས་རྒྱ་ཆེའི་མང་ཚོགས་ལ་འབོད་སྐུལ་གནང་བའི་ནང་། སྤྱི་པའི་རྩ་དོན་ཐོག་ནུས་པ་མཉམ་སྤུངས་དང་རྡོག་རྩ་གཅིག་སྒྲིལ་དགོས་པར་གསུངས་པ་ཡི་རང་གི་གནས་སུ་ཆེ་ཡང་། དེ་ནི་སྔར་རྒྱུན་བཞིན་ཁ་ཆོས་སུ་སོང་བ་དང་ཤོག་སྟེང་དུ་མཛེས་པ་ཙམ་གྱིས་འགྲིག་ཐབས་གཏན་ནས་མེད་པས། གཞུང་མང་གཉིས་ཀའི་ནུས་པའི་གཟོང་ཁ་གཅིག་ཏུ་བསྒྲིལ་ཏེ་ཆིག་སྒྲིལ་གྱི་ནུས་པ་མཐོར་འདེགས་ཀྱིས་སྤྱི་ཚོགས་ཚགས་ཚུད་དུ་གཏོང་ཐབས་སུ། དམིགས་བསལ་ཚོགས་འདུ་བསྐོང་བ་དང་། མི་མང་གི་མངོན་འདོད་ཤེས་རྟོགས་ཆེད་བསམ་ཚུལ་བསྡུ་ལེན་བྱེད་པ་སོགས་འབད་རྩོད་དང་བྱ་ཐབས་གསར་བ་སྒོ་གང་ས་ནས་བསྟེན་ཏེ། རྐྱེན་མ་ཡོང་གོང་གི་བཟློག་པ་ཞེས་པའི་དཔེ་ལྟར་ད་ལྟའི་ཉམས་མྱོང་གཞི་ལ་བཞག་ནས་སླད་ཕྱིན་༸རྒྱལ་བ་དོན་གྱི་བདག་པོར་མཛད་དཀའ་དང་ཐུགས་ཕམ་འབྱུང་གཞི། བོད་རིགས་གཞིས་བྱེས་མི་མང་ཡིད་ཐང་ཆད་པའི་ལས་རིགས་བསྐྱར་དུ་མི་འབྱུང་བར་དགོངས་པ་གཏིང་ཟབ་བཞེས་དགོས།
མང་ཚོགས་ཁྲོད་ཡིན་ནའང་གནའ་བཤད་ད་ལ་མི་རེ་བ་དང་། ཟས་བཤད་ལྟོ་ལ་མི་རེ་བའི་གཏམ་བཤད་དེ་རྒྱ་མིར་དགོས་པའི་ལས་ཀ་བསམ་བཞིན་དང་བསམ་བཞིན་མ་ཡིན་པའི་སྒོ་ནས་བསྒྲུབས་ཤིང་། རང་རེའི་སྤྱི་ཚོགས་དང་རང་གི་ཉེ་འཁོར་ལ་མི་བདེ་བ་བཟོ་བའི་ལས་ངན་རིགས་ངེེས་པར་མཚམས་འཇོག་བྱེད་འོས་སུ་མཐོང་། རང་རེའི་ཁ་སྟབས་སྐྱོ་བོ་འདིར་ཤ་ཚ་དང་སྙིང་རྗེ་ཅུང་ཡོད་ན། ང་ཚོ་མི་རེ་ངོ་རེ་ནས་རང་གི་བྱ་སྤྱོད་ཆུང་ཚེགས་རིགས་ལའང་འགན་ཁུར་ཏེ་རང་ངོས་ནས་འགྱུར་བ་གཏོང་བའི་དུས་ཚོད་ཅིག་ལ་ཕྱི་དྲགས་པ་ལས་སྔ་གཏན་ནས་མེད།
རང་ཅག་མཐོ་དམན་ཚང་མས་བྱིན་རླབས་ཀྱི་དྲོད་ཁོལ་མ་ཡལ་བའི་ཆིག་སྒྲིལ་གྱི་རྟེན་གཞི་གསར་བ་འདིའི་རིན་ཐང་དང་ཁྱད་ཆོས་ངོ་ཤེས་པའི་སྒོ་ནས་འདི་ལ་སྲུང་སྐྱོབ་དང་གཅེས་སྤྲས་བྱེད་འོས། འདི་ནི་ང་ཚོའི་རེ་བ་དང་རྨི་ལམ་མངོན་གྱུར་བྱེད་པའི་རྟེན་གཞི་དེ་ཡིན་ཞིང་། སུ་ལའང་ངོམ་དུ་ཆོག་པའི་ང་རྒྱལ་དང་སྤོབས་པ་དེའང་ཡིན། འདི་ལྟར་མཛུབ་མོ་ལྔ་བཅིངས་ཁུ་ཚུར་གྱི་ལམ་ནས་མདུན་དུ་བསྐྱོད་ཚེ་ང་ཚོས་བྱ་བཞག་གང་བརྩམ་ཡར་ཟླའི་དཔལ་ལ་འགྲན་པར་ཐེ་ཚོམ་མེད་ཅིང་། ཆོལ་གསུམ་ཐུན་མོང་ནས་རེ་ཞིང་སྒུག་པའི་༸རྒྱལ་བའི་གོ་སྟོན་ཆེན་མོ་དེ་ཡང་རང་སྐྱིད་མི་སྨོན་དང་། ༸རྒྱལ་བ་ཐུགས་མཉེས་པའི་མཆོད་པ་ངོ་མ་ཞིག་ཆགས་རྒྱུ་ཡིན་པ་བསྙོན་དུ་མེད་དོ།།
མཆན། གོང་འཁོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་རིང་གི་རྙོག་དྲ་འདི་ང་ཚོའི་འགོ་གཙོ་རྣམས་ཀྱིས་མ་འཇོན་པའི་འབྲས་བུ་ཡིན་པ་ཉག་གཅིག་རེད། གནད་དོན་འདི་རིགས་ལ་སེལ་རྒྱུའི་ང་ཚོའི་འགོ་གཙོ་རྣམས་ལ་འཇོན་ཐང་མེད་ན་རྒྱ་དམར་ལ་ཁ་གཏད་ཇི་ལྟར་གཅོག་རྒྱུ་ཡིན་ནམ། ཞབས་འདྲེན་རེད་བཙན་བྱོལ་གཞུང་གི་ལས་ཀྱི་སྣེ་མོ་བ་རྣམས། རྙོག་དྲ་ཚང་མ་ཁྱེད་ཚོས་བཟོས་པས་མ་ཚད། ༸གོང་ས་མཆོག་ལ་མཛད་དཀའ་བཟོས། ད་ནས་བཙན་བྱོལ་གཞུང་གི་ལས་ཀྱི་སྣེ་མོ་རྣམས་ཀྱི་མི་འཇོན་ན། ས་མིག་བཀག་ནས་ཕན་ཐོགས་མེད། དགོངས་པ་ཞུ་དགོས། མི་མ་རབས་སྤྱི་ཚོགས་ཚང་མའི་ནང་ན་ཡོད། འོན་ཀྱང་སྤྱི་ཚོགས་དེ་ཡི་འགོ་གཙོ་རྣམས་ནས་འགན་འཁྱེར་ཏེ་དེ་དག་གཙང་མ་བཟོས་ཤིང་མ་འོངས་པར་འབུར་རྒྱུ་མེད་པ་བཟོ་དགོས་རེད་ཀྱང་། སྐབས་འདིར་མཐོང་རྒྱུ་མ་བྱུང་། བོད་དང་བོད་མིར་བརྩེ་སེམས་དངོས་གནས་ཡོད་ན་ལས་ཀ་བྱེད་སྟངས་འདི་འདྲ་མ་རེད་དོ།།
དེ་རིང་འདི་ནམ་མཁའ་གཡའ་དག་དང་ས་གཞི་རྡུལ་དག་པ་ཐེངས་མ་ག་ཚོད་དེ་རེད།
པ་རྡོ་རྗེ་ལ། རྒྱ་དམར་པ་ཁ་གཏད་གཅོག་རྒྱུ་དེ་ལས་སླ་པོ་ག་ནས་ཡོང་།་ཡིན་ཀྱང་ད་བར་མི་ལོ་ ༦༠ འདས་པའི་རིང་ལ་ཁ་གཏད་བཅགས་ནས་རྒྱ་སྐད་ངན་ཤོར་བ་བྱུང་ཡོད། བོད་དང་བོད་མིའི་ཁ་གཏད་དུ་རྒྱ་གཞུང་དངུལ་ག་ཚོད་འགྲོ་སོང་གཏོང་གི་མིན་འདུག་གམ། ཤེས་འཚོར་མ་བྱུང་བ་ནི་ཨ་ཡིན། ཡིན་ཀྱང་ད་ཆ་ང་ཚོ་མི་གཟབ་ན་ཉེན་ཁ་འདུག ང་རང་ཚོས་གནས་སྟངས་ང་རང་ཚོས་མ་ཤེས་པ་ལྟ་བུ་མིན་འདུག་གས། ད་ལམ་གྱི་རྙོག་ཁྲ་འདི་གཞུང་གི་ལས་ཀྱི་སྣེ་མོ་བས་བཟོས་མ་རེད་པ། དེ་བཟོ་མཁན་བོད་མི་མང་གི་འདམས་པའི་སྤྱི་འཐུས་བཅའ་ཁྲིམས་དགོངས་དོན་ལྟར་དམ་འབུལ་ཞུ་ཡི་མིན་ཟེར་མཁན་ཚོ་རེད་དོ་། རྟ་ཕོ་ལ་རྒྱུག་ཤེད་ཡོད་ན་བྱང་ཐང་སྟོང་ཡིན་པའི་སྔ་མོའི་དཔེ་དེ་ད་ལྟའང་བསིལ་དིང་ངེས་རེད་འདུག ལས་བྱེད་དགོས་པའི་གསལ་བསྒྲགས་མཐོང་རྒྱུ་མང་པོ་འདུག སེམས་ཤུགས། ཐེག་པ་དང་ཤེས་ལྗོན་ཡོད་ན་བེད་སྤྱོད་ས་དེ་མ་རེད་པས།
བཙན་བྱོལ་བ་འཇམ་དབྱངས་སྦྱིན་པ། ལགས་ནས་ང་ཚོ་བཙན་བྱོལ་བ་ཡིན་པའི་དྲན་བཀུལ་གནང་བར་ཐུགས་རྗེ་ཆེ། དེ་མིན་བཙན་བྱོལ་དུ་སྐྱེས་བ་རྣམས་ཀྱིས་བརྗེད་པ་མ་ཚད་ཕྱིས་སུ་བོད་བལ་ས་མཚམས་ནས་བྱས་རྡ་ས་སྣེ་ལེན་ཁང་བར་དང་དེ་ནས་གྲ་ས་དང་སློབ་གྲ་སོགས་རང་འདོད་ལྟར་དུ་སྣེ་ལེན་བྱུང་བའི་མི་རྒན་ཚོས་ཀྱང་བརྗེད་པ་མ་ཚད་སོ་སོའི་སྐྱེ་ཡུལ་ནས་མཐར་འབུད་གཏོང་མཁན་རྒྱ་དམར་པོ་ཡང་བརྗེད་པ་ལྟ་བུ་གནང་མ་སོང་ངམ། ཤིང་སྡོང་རྩ་བར་སྐྱོན་ཕོག་ན་ཡལ་གར་གཅེས་ཞེན་བགྱིས་པའི་ཕན་པ་མེད་པ་ཐུགས་འཇགས། རྩ་བ་རུལ་བའི་ཡལ་ག་ཞིག་ལ་ཇི་ལྟར་ཞེན་ནའང་ཤིང་སྡོང་རིལ་བའི་ཉིན་ཡལ་དེ་དང་ཐོག་ཏུ་ས་ལ་འདབ་ནས་མེད་པ་ཆགས་རྒྱུ་ལ་སོང་བོད་ཆོལ་ཁ་གསུམ་གྱི་རྩ་དོན་དེར་འགན་འཁུར་རྒྱུ་བོད་མི་མང་ལ་ཕན་བདེ་བསྒྲུབ་པའི་ཞབས་འདེགས་དེ་ཡིན་ནོ།།