དེ་རིང་ནས་བཟུང་ཧི་མ་ཅལ་གྱི་འཛིན་རིམ་བརྒྱད་པའི་སློབ་མ་རྣམས་དངོས་སུ་སློབ་ཞུགས་མགོ་འཛུགས་བྱེད་ཀྱིན་ཡོད་ནའང་། བོད་ཕྲུག་ཁྱིམ་སྡེ་དང་སམ་བྷོ་ཊའི་ཁྱབ་ཁོངས་སློབ་གྲྭ་ཁག་གི་འཛིན་རིམ་བརྒྱད་པའི་སློབ་མ་རྣམས་ད་དུང་སློབ་ཞུགས་ཐུབ་ཀྱི་མེད་པ་རེད་འདུག
འདས་པའི་ལོ་ཤས་གོང་ནས་རྒྱ་གར་ནང་ཏོག་དབྱིབས་གཉན་རིམས་འགོས་ཁྱབ་ཇེ་ཆེར་ཕྱིན་སྟབས། ལོ་གཅིག་དང་ཕྱེད་ཀ་ལྷག་གི་རིང་ལ་སློབ་མ་རྣམས་འཛིན་གྲྭར་ཚང་འཛོམས་ཀྱིས། འཛིན་གྲྭར་དངོས་སུ་འཚོགས་ཐུབ་མེད་ཀྱང་། དེང་སྐབས་རྒྱ་གར་མངའ་སྡེ་ཁག་གི་ནང་དུ་ཏོག་དབྱིབས་རིམས་ནད་ཀྱི་ཁྱབ་གདལ་ཇེ་ཉུང་དུ་འགྲོ་མུས་ཡིན་པ་དང་། ལྷག་པར་རྒྱ་གར་བྱང་ཕྱོགས་ཀྱི་ཧི་མ་ཅལ་མངའ་སྡེའི་ཁུལ་དུ་ནད་པ་ཇེ་ཉུང་དུ་འགྲོ་མུས་ཡིན་པ་ལྟར། དེ་རིང་ནས་བཟུང་ཧི་མ་ཅལ་གྱི་ནང་དུ་ཡོད་པའི་རྒྱ་གར་གཞུང་གི་ལོ་རིམ་བརྒྱད་པའི་སློབ་མ་བརྒྱ་ཆ་ ༤༩ ལྷག་དངོས་སུ་སློབ་གྲྭར་མཉམ་ཞུགས་ཀྱིས་འཛིན་གྲྭ་འཚོགས་ཡོད་པ་དང་། ད་བར་ཧི་མ་ཅལ་གྱི་ནང་དུ་ཡོད་པའི་རྒྱ་གར་གཞུང་གི་སློབ་གྲྭ་ཁག་གི་འཛིན་རིམ་བརྒྱད་པ་ནས་བཅུ་པ་བར་གྱི་སློབ་མ་གྲངས་ ༢༢༡༧༤༧ ལྷག་གིས་དངོས་སུ་འཛིན་གྲྭར་མཉམ་ཞུགས་བྱས་ཐུབ་ཡོད་པ་རེད་འདུག
ཧི་མ་ཅལ་མངའ་སྡེ་གཞུང་གི་བཀོད་ཁྱབ་ལྟར། དེ་རིང་ནས་ཧི་མ་ཅལ་ཁུལ་གྱི་འཛིན་རིམ་བརྒྱད་པའི་སློབ་མ་རྣམས་དངོས་སུ་འཛིན་གྲྭར་ཞུགས་ཀྱི་ཡོད་ཀྱང་། བོད་ཁྱིམ་སློབ་གྲྭ་ཁག་གིས་ཏོག་དབྱིབས་གཉན་རིམས་ཀྱི་གནས་སྟངས་ལ་གཞིགས་ཏེ། འཛིན་གྲྭ་འཚོགས་དགོས་མིན་བལྟ་འཆར་ཡོད་འདུག
འདི་གའི་གསར་འགོད་པས་བོད་ཁྱིམ་སློབ་གྲྭའི་དབུ་འཛིན་ཚུལ་ཁྲིམས་རྡོ་རྗེ་ལགས་སུ་བོད་ཁྱིམ་སློབ་གྲྭའི་འཛིན་གྲྭ་འཚོགས་ཕྱོགས་སོགས་ཀྱི་སྐོར་ལ་དྲིས་སྐབས། སྤྱིར་རྒྱ་གར་གཞུང་གིས་སློབ་གྲྭ་ཁག་ལ་འཛིན་གྲྭ་འཚོགས་ཕྱོགས་ཀྱི་ཐད་ལ་ལམ་སྟོན་གནང་མུས་ཡིན་ཡང་། རྒྱ་གར་གྱི་སློབ་གྲྭ་མང་ཆེ་བ་ནི་ཉིན་སློབ་ཡིན་པ་དང་སློབ་མའི་གྲངས་འབོར་ཡང་ཅུང་ཉུང་བ་ཡིན། དེ་ལས་ལྡོག་ནས་བོད་ཁྱིམ་སློབ་གྲྭ་ཁག་ནི་གཏན་སློབ་ཡིན་པས། སློབ་མ་འབོར་ཆེན་ཞིག་མཉམ་དུ་གནས་སྡོད་བྱེད་ཀྱི་ཡོད་སྟབས། སྤྱི་ཁྱབ་ལས་ཁུངས་ཀྱི་ལམ་སྟོན་ལ་གཞིགས་ཏེ་འགན་འཛིན་ལྷན་ཚོགས་ཀྱིས་ཚོགས་འདུ་འཚོགས་ནས་ལག་བསྟར་བྱ་རྒྱུ་ཡིན་པ་དང་། དྷ་སྟེང་བོད་ཁྱིམ་དུ་སློབ་མ་ཕལ་མོ་ཆེ་སློབ་གྲྭར་ཡོད་པ་དང་། རྒྱ་གར་གཞུང་གིས་ལམ་སྟོན་བཞིན་འཛིན་རིམ་བཅུ་པ་དང་བཅུ་གཉིས་པའི་སློབ་མ་རྣམས་འཛིན་གྲྭར་དངོས་སུ་ཞུགས་ནས་འཛིན་གྲྭ་འཚོག་མུས་ཡིན་པ་རེད། དེ་བཞིན་འཛིན་རིམ་བཅུ་གཅིག་གི་སློབ་མ་རྣམས་ཀྱང་ད་ལྟ་སློབ་གྲྭར་འབྱོར་མེད་པ་དང་། བོད་ཁྱིམ་སློབ་གྲྭར་སློབ་མའི་གྲངས་འབོར་མང་བས། ནད་ཡམས་ཀྱི་གནས་སྟངས་སོགས་ལ་གཞིགས་ནས་ལག་བསྟར་བྱ་རྒྱུ་ཡིན་སྐོར་སོགས་གསུངས་བྱུང་།
ཡང་སམ་བྷོ་ཊའི་འགན་འཛིན་ཚེ་རིང་དོན་གྲུབ་ལགས་ཀྱིས། རྒྱ་གར་གྱི་ས་ཁུལ་ཁག་མང་པོར་སམ་བྷོ་ཊའི་སློབ་གྲྭ་ཡོད་སྟབས། སམ་བྷོ་ཊའི་སྤྱི་ཁྱབ་ནས་དམིགས་བསལ་གྱི་བཀོད་ཁྱབ་མེད་པར། རྒྱ་གར་གཞུང་དང་མངའ་སྡེ་ཁག་གིས་ལམ་སྟོན་དང་བཀོད་ཁྱབ་ལ་གཞིགས་ནས་ལག་བསྟར་བྱེད་མུས་ཡིན་པ་དང་། ད་ལྟའི་ཆར་རྒྱ་གར་གཞུང་གིས་ལམ་སྟོན་བཞིན་འཛིན་རིམ་བཅུ་པ་དང་བཅུ་གཉིས་གཉིས་ཀྱི་སློབ་མ་དངོས་སུ་འཛིན་གྲྭ་འཚོག་མུས་ཡིན་པ་དང་། སློབ་མ་གཞན་རྣམས་ཀྱིས་དྲ་ཐོག་ནས་འཛིན་གྲྭ་འཚོག་མུས་ཡིན་སྐོར་སོགས་གསུངས་བྱུང་།
དེ་བཞིན་དེ་སྔོན་ལ་དྭགས་རང་སྐྱོང་མངའ་སྡེ་ཁུལ་དུ་སློབ་མ་རྣམས་ལ་ཏོག་དབྱིབས་གཉན་རིམས་འགོས་ཁྱབ་བྱུང་བ་ལྟར། ཟླ་ ༩ ཚེས་ ༡༨ ནས་འཛིན་རིམ་བཅུ་གཉིས་བར་གྱི་སློབ་གྲྭ་ཚང་མ་སྒོ་བརྒྱབ་དགོས་བྱུང་ཡོད་ཀྱང་། ཁུལ་དེའི་གཞུང་འབྲེལ་དང་གཞུང་འབྲེལ་མ་ཡིན་པའི་འཛིན་རིམ་ ༩ ནས་ ༡༢ བར་གྱི་སློབ་གྲྭ་ཁག་ཟླ་འདིའི་ཚེས་ ༡༤ ནས་ཡང་བསྐྱར་སྒོ་འབྱེད་ཀྱིས་འཛིན་གྲྭ་འཚོག་འཆར་ཡོད་པ་རེད་འདུག
དཔལ་ལྡན།
