བོད་དང་བོད་ཀྱི་ཆུ་མོ་ལ་བརྟེན་ཞིང་འཚོ་བའི་མི་དང་ཚོགས་སྡེ་རྒྱལ་ཁབ་ཚང་མས་མཉམ་རུབ་ཀྱི་ཐོག་ནས་བོད་མཐོ་སྒང་གི་གནམ་གཤིས་འགྱུར་ལྡོག་ལ་ཚོད་འཛིན་དོ་དམ་བྱེད་མཁན་གྱི་རྩ་འཛུགས་སམ་ཡང་ན་སྒྲིག་ལམ་ཞིག་ཕྱི་གསལ་ནང་གསལ་གྱིས་གཏན་འབེབ་གནང་གལ་ཆེ་བའི་འབོད་སྐུལ་ལས་འགུལ་སྤེལ་བཞིན་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་གནམ་གཤིས་ལྷན་ཚོགས་འཚོག་ལ་ཉེ་བ་དང་བསྟུན། དེ་རིང་འཛམ་གླིང་ཁྱོན་ཡོངས་སུ་ངོ་རྒོལ་ལས་འགུལ་སྤེལ་བཞིན་ཡོད་པ་ལྟར། བཞུགས་སྒར་ཁུལ་དུ་རྟེན་གཞི་བྱས་པའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ ༧ ཐུན་མོང་ནས་མེག་གྷན་ཁྲོམ་གཞུང་དུ་བོད་ཀྱི་གནམ་གཤིས་འགྱུར་ལྡོག་གི་དཀའ་རྙོག་སྐོར་དྲིལ་བསྒྲགས་དང་འབྲེལ། དེ་རིང་ཕྱི་དྲོའི་ཆུ་ཚོད་ ༥ པའི་བར་མིང་རྟགས་བསྡུ་རུབ་ཀྱི་ལས་འགུལ་ཞིག་ཀྱང་སྤེལ་གྱིན་ཡོད་འདུག
གནམ་གཤིས་ལས་འགུལ་གོ་སྒྲིག་བྱེད་མཁན་གྲས་སུ་ཡོད་པའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས་ཀྱིས་འདི་གའི་གསར་འགོད་པར། དེ་རིང་འཛམ་གླིང་ཡོངས་ནང་གནམ་གཤིས་འགྱུར་ལྡོག་དང་འབྲེལ་བའི་ལས་འགུལ་སྤེལ་གྱི་ཡོད་པར་བརྟེན། ང་ཚོ་བོད་པ་ཡིན་ནའང་རྒྱལ་སྤྱིར་གནམ་གཤིས་འགྱུར་ལྡོག་གི་དཀའ་ངལ་འཕྲད་བཞིན་པའི་ནང་མཉམ་ཞུགས་བྱས་པ་རེད། དེ་ལྟར་བྱས་དོན་གཙོ་བོ་ནི། སྤྱིར་འཛམ་གླིང་ཡོངས་ལ་གནམ་གཤིས་འགྱུར་ལྡོག་གི་དཀའ་ངལ་འཕྲད་ཀྱི་ཡོད་རེད་དེ། རྒྱལ་སྤྱིའི་སྡིངས་ཆའི་ཐོག་བོད་དང་འབྲེལ་བའི་གནམ་གཤིས་གནད་དོན་ཐོག་སྐད་ཆ་བཤད་མཁན་ཧ་ཅང་དཀོན་པོ་ཡིན་པར་བརྟེན། ང་ཚོ་བོད་པ་རང་གིས་སོ་སོའི་གནད་དོན་རྒྱལ་སྤྱིའི་ཐོག་འཁྱེར་ཐུབ་རྒྱུར་དམིགས་པ་ཞིག་རེད། ཅེས་དང་། ཕྱོགས་གཅིག་ནས་ཟླ་འདིའི་ཕྱི་ཚེས་ ༣༡ ནས་ཕྱི་ཟླ་ ༡༡ ཡི་ཚེས་ ༡༢ བར་འཛམ་གླིང་གི་གནམ་གཤིས་འགྱུར་ལྡོག་གི་ཚོགས་འདུ་འཚོག་གི་ཡོད་སྟབས། ཚོགས་འདུ་དེའི་ནང་བོད་ནང་གི་གནམ་གཤིས་འགྱུར་ལྡོག་གི་དཀའ་ངལ་རྣམས་འཁྱེར་ཐུབ་པ་བྱ་རྒྱུ་དང་། རྒྱལ་སྤྱིའི་གནམ་གཤིས་ཚོགས་འདུའི་ནང་བོད་པ་མཉམ་ཞུགས་བྱ་ཐུབ་པ་དང་། བོད་ནང་ལ་མཚོན་ནའང་རྒྱ་ནག་གཞུང་གི་ཁོར་ཡུག་དང་འཛུགས་སྐྲུན་གྱི་སྲིད་ཇུས་ཁག་ནང་བོད་མིའི་མངོན་འདོད་མཚོན་ཐུབ་པ་ཞིག་ཡོང་རྒྱུའི་དགོས་འདུན་འདོན་བཞིན་ཡོད་སྐོར་སོགས་བརྗོད་བྱུང་།
བཞུགས་སྒར་དྷ་སའི་ས་གནས་མགོ་འཛིན་ལས་ཁུངས་ཀྱི་ཁོར་ཡུག་སྡེ་ཚན་དང་། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ལས་ཁང་། ལྷ་སྤྱི་ཚོགས་ཞབས་ཞུ་ཁང་། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། བོད་ཀྱི་བུད་མེད་ལྷན་ཚོགས་བཅས་ཀྱིས་སྤེལ་བའི་མཉམ་འབྲེལ་བསྒྲགས་གཏམ་ནང་། འཚོག་ལ་ཉེ་བའི་རྒྱལ་ཚོགས་ཀྱི་གནམ་གཤིས་འགྱུར་ལྡོག་གི་ཚོགས་ཆེན་ངོས་ནས་བོད་མཐོ་སྒང་དེ་ཉིད་འཛམ་གླིང་གི་ཁོར་ཡུག་གལ་གནད་ཅིག་ལ་ངོས་འཛིན་བྱ་དགོས་པ་མ་ཟད། གོ་ལའི་གནམ་གཤིས་འགྱུར་ལྡོག་གི་བགྲོ་གླེང་གང་འདྲ་ཞིག་ཡིན་རུང་བོད་མཐོ་སྒང་དེ་གཙོ་གནད་དུ་འཛིན་དགོས་སྐོར་དང་། བོད་མི་དང་། ལྷག་པར་དུ་བོད་ཀྱི་འབྲོག་པ་རྣམས་ལ་རང་གི་འཚོ་གནས་དང་འཚོ་ཐབས་དེ་རྩྭ་ཐང་སྟེང་དུ་བསྐྱལ་རྒྱུའི་རང་དབང་དང་། རང་གི་རིག་གནས་དང་འཚོ་ཐབས་ཀྱི་རྒྱབ་ལྗོངས་སྟེང་ནས་གནམ་གཤིམ་འགྱུར་ལྡོག་ལ་བསྟུན་འགྱུར་བྱ་རྒྱུའི་གཞི་རྩའི་འགྲོ་བ་མིའི་ཐོབ་ཐང་ཡོད་པ་དང་། བོད་དང་བོད་ཀྱི་ཆུ་མོ་ལ་བརྟེན་ཞིང་འཚོ་བའི་མི་དང་ཚོགས་སྡེ་རྒྱལ་ཁབ་ཚང་མས་མཉམ་རུབ་ཀྱི་ཐོག་ནས་བོད་མཐོ་སྒང་གི་གནམ་གཤིས་འགྱུར་ལྡོག་ལ་ཚོད་འཛིན་དོ་དམ་བྱེད་མཁན་གྱི་རྩ་འཛུགས་སམ་ཡང་ན་སྒྲིག་ལམ་ཞིག་གཏན་འབེབ་བྱ་དགོས་ཤིང་། རྩ་འཛུགས་དེ་ཡང་ཕྱི་གསལ་ནང་གསལ་དང་། འབྲེལ་ཡོད་ཚང་མ་ཚུད་ཐུབ་པ། ཕུགས་རྒྱང་རིང་པོར་གནས་ཐུབ་པ་ཞིག་དགོས་གལ་ཆེ་སྐོར་བཅས་འཁོད་འདུག
ཟླ་འདིའི་ཕྱི་ཚེས་ ༣༡ ནས་ཟླ་རྗེས་མའི་ཕྱི་ཚེས་ ༡༢ བར་དབྱིན་ཇིའི་མངའ་ཁོངས་སི་ཁོ་ཊི་ལན་ཌིའི་གྲོང་ཁྱེར་གྷ་ལ་སི་ཁོ་རུ་འཚོག་གཏན་འཁེལ་བའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་གི་ཚོགས་ཆེན་དེ་བཞིན་ཧ་ཅང་གལ་གནད་ཆེན་པོ་ཆགས་ཡོད་པ་རེད། དེ་ཡང་ཕྱི་ལོ་ ༢༠༡༥ ལོའི་གནམ་གཤིས་འགྱུར་ལྡོག་གི་ཚོགས་ཆེན་ཐེངས་ ༢༡ པའི་སྟེང་། ཚོགས་ཞུགས་རྒྱལ་ཁབ་རྣམས་ཀྱིས་གོ་ལའི་གནམ་གཤིས་འགྱུར་ལྡོག་གི་དཀའ་ངལ་ལ་གདོང་ལེན་ཆེད་དུ་གོ་ལའི་སྤྱི་སྙོམས་ཚ་ཚད་བྱུང་ན་ ༡།༥ ལས་མི་བརྒལ་རྒྱུ་དང་། དེ་ལྟར་མ་བྱུང་ནའང་ཚ་ཚད་ ༢ འོག་ལ་འཇོག་རྒྱུའི་རྒྱལ་སྤྱིའི་རང་བཞིན་གྱི་པེ་རི་སི་གནམ་གཤིས་སྤྱི་ཆིངས་ (Paris Agreement) དེ་ཉིད་བཞག་ཡོད་ཅིང་། ད་ལན་གྱི་ཚོགས་ཆེན་སྟེང་རྒྱལ་ཁབ་རྣམས་ཀྱིས་སོ་སོའི་གནས་སྟངས་ལ་དཔག་སྟེ་འཛམ་གླིང་གི་ཚ་དྲོད་གཅོག་ཐབས་ཀྱི་སྲིད་ཇུས་ཅི་ཞིག་སྤེལ་འཆར་ཡོད་མེད་བཤད་དགོས་ཀྱི་ཡོད་ཅིང་། སྲིད་ཇུས་དེ་དག་གིས་ང་ཚོའི་ཉིན་རེའི་འཚོ་བར་འགྱུར་བ་ཆེན་པོ་ཐེབས་སྲིད་པ་ཞིག་ཡིན་སྐོར་རྗོད་ཀྱིན་འདུག་ལ། རྒྱལ་སྤྱིའི་སྟེང་གི་ཁོར་ཡུག་ལས་འགུལ་བ་དང་ཚོགས་སྡེ་ཁག་གིས་ཚོགས་ཆེན་དེར་ངང་སྒུག་བྱེད་ཀྱིན་ཡོད་པ་རེད་འདུག
གསར་འགོད་པ། པ་སངས་ཚེ་རིང་།
