དེ་རིང་ཕྱི་ཚེས་ ༢༥ ཉིན་ནས་བཟུང་གནས་སྐབས་རིང་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་ཕྱིར་སྐྱོད་གཞུང་ལམ་ཁག་ཅིག་བཀག་སྡོམ་བྱས་ཏེ་གསར་དུ་ཐོན་པའི་ཏོག་དབྱིབས་རིམས་ནད་ལ་སྔོན་འགོག་དང་ཏོག་དབྱིབས་ནད་རྟགས་ཐོན་པའི་ཡུལ་སྐོར་བ་ཚོར་འབྲེལ་འདྲིས་བྱུང་བ་རྣམས་ལ་བརྟག་དཔྱད་བྱེད་བཞིན་ཡོད་འདུག
དེ་རིང་རྒྱ་ནག་གཞུང་ཕྱོགས་ནས་སྤེལ་བའི་གནས་ཚུལ་ལྟར་ན། རྒྱ་ནག་ནང་ཏོག་དབྱིབས་པ་གསར་པ་ ༣༩ ལྷག་ཐོན་ཏེ་བསྐྱར་དུ་སྔོན་འགོག་ཤུགས་སྣོན་དང་འགྲོ་སྐྱོད་བཀག་སྡོམ་བྱེད་བཞིན་ཡོད་པ་ལྟར། ཟླ་འདིའི་ཚེས་ ༢༡ ཉིན་རྒྱ་ནག་གིས་དབྱེ་བགོས་བྱས་པའི་མཚོ་སྔོན་ཞིང་ཆེན་མཚོ་ཤར་གྲོང་ཁྱེར་ཕིན་ཨན་ཁུལ་ནས་ཏོག་དབྱིབས་རིམས་ནད་ཕོག་པའི་ནད་པ་གཅིག་ཐོན་ཡོད་པར་བརྟེན། རིམས་ནད་ཅན་ལ་འབྲེལ་འདྲིས་བྱུང་ཡོད་མེད་རྩད་གཅོད་དང་སྔོན་འགོག་བྱ་བར་བསྐྱར་དུ་ཤུགས་སྣོན་བྱེད་བཞིན་ཡོད་འདུག
དེ་ཡང་མཚོ་སྔོན་བརྙན་འཕྲིན་ཁང་གིས་གནས་ཚུལ་བསྒྲགས་པ་ལྟར་ན། དེ་རིང་ཕྱི་ཚེས་ ༢༥ ཉིན་ནས་བཟུང་ཟི་ལིང་མཁར་གྱི་གཞུང་ལམ་གཙོ་བོ་དང་རྫོང་ཁོངས་གཏོགས་ཀྱི་རྒྱལ་ཁབ་དང་ཞིང་ཆེན་རིམ་པའི་གཞུང་ལམ་ནས་གནས་སྐབས་འགྲིམ་འགྲུལ་བཀག་སྡོམ་བྱེད་རྒྱུ་དང་། གཞུང་ལས་རླངས་འཁོར་དང་དངོས་ཟོག་སྐྱེལ་འདྲེན་རླངས་འཁོར་ལས་གཞན་གླ་གཏོང་རླངས་འཁོར་དང་ཐག་རིང་འགྲུལ་སྐྱེལ་རླངས་འཁོར། སྤྱི་སྐྱོད་རླངས་འཁོར། ཡུལ་སྐོར་བའི་སྐྱེལ་འདྲེན་རླངས་འཁོར་སོགས་གནས་སྐབས་སུ་གཏོང་མཚམས་འཇོག་རྒྱུ་ཡིན་ལ། རྫོང་མཁར་ནང་ལོག་གི་མི་སྒེར་གྱི་རླངས་འཁོར་དང་སྦག་སྦག་སོགས་དོན་དག་ཆེན་པོ་མེད་ན་འགྲོ་འོང་མ་བྱས་ན་ལེགས་པའི་ལམ་སྟོན་བྱས་འདུག་ལ། དེ་བཞིན་དེ་རིང་ཕྱི་ཚེས་ ༢༥ ཉིན་ནས་བཟུང་ཟི་ལིང་ནས་ན་གོར་མོ་དང་། ལྷ་ས། ཧྲང་ཧེ། ཁྲིན་ཏུའུ། ཁྲུང་ཆིན་སོགས་སུ་འགྲོ་མཁན་འགྲུལ་སྐྱེལ་མེ་འཁོར་ཁག་ཅིག་གནས་སྐབས་རིང་སྐྱོད་མཚམས་འཇོག་གི་ཡོད་འདུག
མཚོ་སྔོན་ཞིང་ཆེན་གྱི་ཡུལ་སྐོར་སྤྲོ་འཆམ་གྱི་ས་ཚིགས་དང་། གནས་མཇལ་ཁུལ་མང་པོ་ཞིག་ཀྱང་གནས་སྐབས་རིང་བཀག་སྡོམ་བྱེད་བཞིན་པ་ལྟར། ཟླ་འདིའི་ཕྱི་ཚེས་ ༢༢ ཉིན་སྐུ་འབུམ་བྱམས་པ་གླིང་གིས་ནད་ཡམས་སྔོན་འགོག་སླད། ཡུལ་སྐོར་སྤྲོ་འཆམ་པ་དང་། དད་ལྡན་མང་ཚོགས་རྣམས་ལ་གནས་སྐབས་རིང་མཆོད་མཇལ་སོགས་མཚམས་འཇོག་གནང་ཡོད་པའི་གསལ་བརྡ་བཏང་གནང་འདུག
དེ་བཞིན་རྒྱ་ནག་གཞུང་གིས་དབྱེ་བགོས་བྱས་པའི་ཀན་སུའུ་ཞིང་ཆེན་ཐེ་བོ་རྗོང་གིས་གནས་ཚུལ་སྤེལ་བ་ལྟར། ཡུན་ནན་ནས་ཡོང་བའི་ཡུལ་སྐོར་བ་སྤྲོ་འཆམ་པ་ ༢༠ ཙམ་ལན་ཀྲུའུ་གྲོང་ཁྱེར་དུ་ཡོང་སྟེ་ཕྱིས་སུ་བརྟག་དཔྱད་བྱེད་སྐབས། དེའི་ཁྲོད་ཀྱི་མི་དྲུག་ཙམ་ལ་ཏོག་དབྱིབས་ནད་ཡམས་འགོས་ཡོད་པ་མ་ཟད། མི་ ༤ ཙམ་མཛོད་དགེ་རྫོང་ཁོངས་སུ་ཕྱིན་ཡོད་འདུག དེའི་སྐོར་ལ་འདི་གའི་གསར་འགོད་པར་མཛོད་དགེ་སྟག་ཚང་ལྷ་མོ་ནས་ཡིན་པའི་བོད་མི་ཞིག་གིས། ནད་པ་དེ་ཚོ་ཐོན་རྗེས་སྟག་ཚང་ལྷ་མོ་རུ་ཡོད་པའི་ཚོང་ཁང་ཟ་ཁང་སོགས་སྒོ་བརྒྱབ་ཏུ་བཅུག་ནས་བརྟག་དཔྱད་བྱས་ཡོད་ཀྱང་། བོད་མིར་རིམས་ནད་འགོས་པའི་གནས་ཚུལ་གོ་ཐོས་བྱུང་མེད་སྐོར་དང་། ས་གནས་ཀྱི་ཚོང་ཁང་ཟ་ཁང་སོགས་མུ་མཐུད་སྒོ་བརྒྱབ་ཡོད་པ་མ་ཟད། ས་གནས་བོད་མི་ཚོས་ངེས་པར་ནད་ཡམས་ལ་དོགས་གཟོན་དང་། གོང་རིམ་འབྲེལ་ཡོད་ཚན་པའི་བཀའ་བཀོད་ལྟར་སྔོན་འགོག་གི་བྱ་བར་ནན་ཏན་གྱིས་ཞུགས་དགོས་པའི་ལམ་སྟོན་བྱས་ཡོད་སྐོར་བརྗོད་བྱུང་།
ཕྱི་ལོ་ ༢༠༡༩ ལོའི་ལོ་མཇུག་ཏུ་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་ཡུལ་ལུང་གང་སར་ཁྱབ་གདལ་དུ་ཕྱིན་ཡོད་པ་ལྟར། ད་བར་འཛམ་གླིང་གི་མི་གྲངས་ས་ཡ་ ༢༤༤ (༢༤༤༥༣༡༨༦༣) ལྷག་ལ་ཏོག་དབྱིབས་ནད་ཡམས་འགོས་པའི་ཁྲོད། མི་འབུམ་ ༤༩ (༤༩༦༥༦༨༢ )ལྷག་རྐྱེན་འདས་སུ་ཕྱིན་ཡོད་དང་། ད་ལྟ་མི་གྲངས་འབུམ་ ༡༨༠ (༡༨༠༢༤༧༦༧)ལྷག་ཏོག་དབྱིབས་ཀྱིས་མནར་མུས་ཡིན་འདུག ཡིན་ནའང་། རྒྱ་ནག་གཞུང་གིས་ད་བར་དུ་རྒྱ་ནག་ནང་དང་རྒྱའི་བཙན་འོག་ཏུ་ཡོད་པའི་ས་ཁུལ་བཅས་ཁྱོན་ཡོངས་སུ་ཏོག་དབྱིབས་ནད་པ་ ༩༦༧༩༧ ལྷག་བྱུང་ཡོད་པའི་ཁྲོད་ནས། མི་ ༤༦༣༦ ལྷག་ལས་འདས་གྲོངས་སུ་ཕྱིན་མེད་པ་དང་། ད་ལྟ་ན་བཞིན་པ་མི་ ༥༧༣ ལས་མེད་སྐོར་བརྗོད་ཀྱི་ཡོད་པ་དེར་འཛམ་གླིང་གི་གནད་དོན་དབྱེ་ཞིབ་པ་མང་པོས་དོགས་སློང་ཆེན་པོ་བྱེད་བཞིན་ཡོད་པ་རེད།
གསར་འགོད་པ། དཔལ་ལྡན།
