འབའ་ཐང་རྫོང་སློབ་འབྲིང་གི་སློབ་གཙོ་བཀྲ་ཤིས་ཚེ་རིང་ཟེར་བ་ཞིག་གིས་གཞུང་དངུལ་གཡོ་ལེན་དང་ལྐོག་རྔན་འབུལ་རྟེན་བླངས་བ་སོགས་ཀྱི་ཉེས་མིང་འོག་འཛིན་བཟུང་བྱས་ཏེ། ཞིབ་དཔྱོད་ལས་ཁུངས་ཟེར་བས་ཞིབ་བཤེར་བྱེད་ཀྱིན་ཡོད་འདུག
རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། འབའ་ཐང་རྫོང་སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་ཁུངས་ཟེར་བས། འབའ་ཐང་རྫོང་སློབ་འབྲིང་གི་བོད་རིགས་སློབ་གཙོ་བཀྲ་ཤིས་ཚེ་རིང་ཟེར་བ་ཞིག་ལ་ཞིབ་བཤེར་བྱེད་སྐབས། བཀྲ་ཤིས་ཚེ་རིང་གིས་སྐོར་ཞིབ་ལས་དོན་ལ་གནོད་སྐྱེལ་བ་དང་། རྩ་འཛུགས་ཀྱི་ཞིབ་བཤེར་ལ་ངོ་རྒོལ་བྱེད་པ། ཆབ་སྲིད་དང་རྒྱ་ནག་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ཟེར་བ་ལས་འགལ་ཏེ། མི་གཞན་དང་ལྐོག་འབྲེལ་ཁ་མཐུན་གྱིས། གཞུང་དངུལ་གཡོ་ལེན་དང་ལྐོག་རྔན་འབུལ་རྟེན་བླངས་བ་སོགས་ཁྲིམས་འགལ་གྱི་ཉེས་པ་བསགས་ཡོད་སྐོར་བསྒྲགས་འདུག
དེ་འབྲེལ་གནས་ཚུལ་ནང་ད་སྔ་བར་བཀྲ་ཤིས་ཚེ་རིང་ལ་ཁྲིམས་ཐག་བཅད་པའི་གནས་ཚུལ་བཀོད་མེད་ཀྱང་། བཀྲ་ཤིས་ཚེ་རིང་གིས་སྒྲིག་འགལ་ཁྲིམས་འགལ་ཚབས་ཆེན་བྱས་ཞེས་ཉེས་པ་ཆེན་པོ་བཟོས་ཡོད་སྐོར་དང་། སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་ཁུངས་ཟེར་བས། གྱོད་དོན་ཐོ་འགོད་བྱས་ཏེ་ཞིབ་བཤེར་བྱས་པ་བརྒྱུད། བཀྲ་ཤིས་ཚེ་རིང་གིས་མི་སྒེར་གྱི་ཕྱིར་སྐྱོད་དོན་དག་སྦ་གསང་བྱས་ནས་སྙན་སེང་མི་ཞུ་བ། སྤྱོད་གཙང་གི་སྒྲིག་ལམ་དང་འགལ་ནས་མི་གཞན་གྱིས་སྤྲད་པའི་འབུལ་རྟེན་བླངས་བ། རྒྱལ་ཁབ་ཀྱི་ཁྲིམས་ལུགས་ཁྲིམས་སྲོལ་དང་འགལ་ནས་ལྐོག་ཏུ་མི་སྒེར་གྱི་དངུལ་མཛོད་ཆུང་ཆུང་བཟོས་པ། གོ་གནས་བེད་སྤྱད་ཀྱིས་སློབ་མ་དང་དམག་སྦྱོང་གི་གྱོན་ཆས་སོགས་ཉོ་སྒྲུབ་དངུལ་ཁྲིམས་འགལ་ངང་ལྐོག་ཟ་བྱས་པ་དང་། འབྲེལ་ཡོད་ཚོང་པར་ཁེ་ཕན་གཉེར་རོགས་བྱས་པ་མ་ཟད་རྒྱུ་དངོས་ཀྱང་བླངས་ཡོད་སྐོར་དང་། བཀྲ་ཤིས་ཚེ་རིང་གིས་ཏང་གི་ཆབ་སྲིད་ཀྱི་སྒྲིག་ཁྲིམས་དང་། རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས་བཅས་ལས་འགལ་ནས་དབང་ཆ་ལོག་སྤྱོད་ཀྱི་ཁྲིམས་འགལ་ཉེས་པ་ཚབས་ཆེ་བསགས་ཡོད་སྐོར་བརྗོད་འདུག
དེ་བཞིན། རྒྱ་ནག་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག་དང་། མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་དང་གཞུང་གི་ལས་དོན་མི་སྣའི་སྲིད་དོན་ཆད་གཅོད་བཅའ་ཁྲིམས་ཟེར་བ་བཅས་ལས་འགལ་བའི་ཉེས་མིང་འོག བཀྲ་ཤིས་ཚེ་རིང་ཏང་གི་སྐྱིད་སྡུག་དང་ལས་གནས་ནས་ཕྱིར་ཕུད། འབའ་རྫོང་གི་ཏང་གི་འཐུས་མི་ཚོགས་ཆེན་ཐེངས་བཅུ་གཉིས་པའི་འཐུས་མིའི་ཐོབ་ཐང་མཚམས་འཇོག་དང་། ཁྲིམས་འགལ་ལུགས་འགལ་གྱིས་ཐོབ་པའི་རྒྱུ་དངོས་རྩིས་ལེན་བྱས་ཏེ། ཞིབ་དཔྱོད་ལས་ཁུངས་ནས་ཁྲིམས་ལྟར་ཞིབ་བཤེར་དང་ཁྲིམས་སྦྱོར་གྱིས་གྱོད་འབྲས་ལྟར་ཐག་གཅོད་བྱ་རྒྱུ་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
