སྲིད་སྐྱོང་མཆོག་གིས་ཨི་ཊ་ལིའི་གནད་ཡོད་མི་སྣར་བོད་དོན་གླེང་སློང་གནང་།

སྲིད་སྐྱོང་མཆོག་གིས་རང་དབང་དྲང་བདེན་དང་འགྲོ་བ་མིའི་ཐོབ་ཐང་སྲུང་སྐྱོབ་ལ་དགའ་མོས་ཡོད་མཁན་ཚང་མས་ནུས་པ་མཉམ་དུ་སྤུངས་བ་ཡིན་ན་བོད་ཙམ་མ་ཟད་འཛམ་གླིང་སྤྱི་ཡོངས་ལ་འཕྲད་བཞིན་པའི་དཀའ་ངལ་ཁག་ལ་ཕན་ཐོགས་ཆེན་པོ་ཡོང་རྒྱུ་ཡིན་སྐོར་གསུངས་ཡོད་འདུག

དེ་རིང་ཨི་ཊ་ལིའི་རྒྱལ་ས་རོམ་དུ་འཚོག་གི་ཡོད་པའི་རྒྱ་ནག་གཞུང་ལ་ཁ་གཏད་ཀྱི་རྒྱལ་སྤྱིའི་གྲོས་ཚོགས་འཐུས་མིའི་མནའ་འབྲེལ་ (Inter-Parliamentary Alliance on China) གྱི་ཚོགས་འདུའི་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཀྱང་མཉམ་ཞུགས་གནང་གི་ཡོད་པ་རེད།

སྲིད་སྐྱོང་མཆོག་གི་སྤྱི་ཚོགས་དྲ་ལམ་ངོ་དེབ་ཏུ་གནས་ཚུལ་ཐོན་པ་ལྟར་ན། ཁ་སང་སྲིད་སྐྱོང་སྤེན་པ་ཚེ་རིང་མཆོག་གི་ཕྱོགས་ཕེབས་ཉིན་གཉིས་པར་ལྷོ་ཊི་རོལ་ (South Tyrol) རང་སྐྱོང་མངའ་ཁུལ་གྱི་སྲིད་འཛིན་སྐུ་ཞབས་ (Dr. Arno Kompatscher) མཆོག་དང་མཇལ་འཕྲད་གནང་རྗེས། ཨི་ཊ་ལི་ཡི་ཞིང་ཆེན་(Trentino)སུ་ཕེབས་སྐབས་ཁུལ་དེའི་མགོ་འཁྲིད་ཟུར་པ་རོ་བྷིར་ཊོ་པིན་ཊིར་(Roberto Pinter) དང་བོད་དོན་རྒྱབ་སྐྱོར་ཚོགས་པ་ཁག་ནས་ཕེབས་བསུ་ཟབ་རྒྱས་ཞུས་ཤིང་། (Trentino)ཡི་གྲོང་སྡེའི་སྤྱི་ཁྱབ་གཞོན་པ་ (Vice Mayor Roberto Stanchina) ལགས་ལ་མཇལ་འཕྲད་གནང་སྟེ་བོད་དོན་ཐོག་གོ་སྡུར་གནང་ཡོད་འདུག

ཉིན་དེའི་ཉིན་རྒྱབ་ཏུ་སྲིད་སྐྱོང་སྤེན་པ་ཚེ་རིང་མཆོག་ཨི་ཊ་ལིའི་བྱང་ཕྱོགས་སུ་ཆགས་པའི་ (Rovereto) གྲོང་ཁྱེར་དུ་ཕེབས་ཏེ། དེ་སྔ་དམག་ཆེན་གཉིས་པའི་སྐབས་སུ་དམག་མཚམས་བཞག་ནས་ཞི་བདེ་གོང་སྤེལ་གྱི་མཚོན་དོན་རྗེས་དྲན་གྱི་དྲིལ་བུ་ (Bell of Peace) ཡོད་པ་དེར་བོད་ཀྱི་རྒྱལ་དར་སྒྲེང་འཛུགས་བྱས་ཡོད་པ་དེར་ཆེད་ཕེབས་ཀྱིས། གནད་ཡོད་མི་སྣ་དང་བོད་དོན་རྒྱབ་སྐྱོར་བ་ཁག་ཅིག་འཛོམས་ཏེ་མཛད་སྒོ་སྟབས་བདེ་ཞིག་ཀྱང་ཚོགས་ཡོད་འདུག  མཛད་སྒོའི་སྐབས་སུ་ (Vicereggente Campana di Rovereto Lorenzo Saiani) དང་གྲོང་སྡེ་སྤྱི་ཁྱབ་ (Francesco Valduga) ལགས། དེ་བཞིན་ཞི་བདེ་དང་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པའི་འགན་འཛིན་ (Arianna Miorandi) ལགས་དང་བསོད་རྒན་རི་པོ་ཆེ། ཐུབ་བསྟན་འོད་གསལ་གླིང་ཆོས་ཚོགས་ཨི་ཊ་ལི་བོད་རིགས་ཚོགས་པའི་ཙོགས་གཙོ་ལ་སོགས་པས་མཉམ་ཞུགས་གནང་ཡོད་འདུག

བོད་མིའི་སྒྲིག་འཛུགས་ཀྱི་དྲ་ཐོག་ཏུ་གནས་ཚུལ་སྤེལ་བ་ལྟར་ན།  སྐུ་ཞབས་ (Roberto Pinter) ལགས་དང་བོད་དོན་གོ་སྡུར་གནང་སྐབས་སྲིད་སྐྱོང་མཆོག་གིས། མི་ནི་སེམས་ཅན་གཞན་དང་མི་འདྲ་བར་བསམ་བློ་གཏོང་རྒྱུ་དང་ལས་ཀ་སྒྲུབ་ཐུབ་ཀྱི་ཡོད་པས་རང་དབང་དགོས་ཀྱི་ཡོད་ཀྱང་། རྒྱ་ནག་གཞུང་གིས་བོད་མི་ཚོར་ཐ་ན་སོ་སོའི་སྐད་ཡིག་སློབ་སྦྱོང་དང་ཆོས་དད་རང་དབང་སོགས་ཀྱང་གཏན་ནས་རྩ་མེད་དུ་གཏོང་ཐབས་བྱེད་ཀྱི་ཡོད་པ་དང་། བོད་ཀྱི་རིག་གཞུང་ལ་འཛམ་གླིང་སྟེང་ཞི་བདེ་བསྐྲུན་པར་ནུས་པ་ཆེན་པོ་ཡོད་སྟབས། བོད་སྐད་ཡིག་ལ་སྲུང་སྐྱོབ་བྱ་རྒྱུ་དེ་ཧ་ཅང་གལ་གནད་ཆེན་པོ་ཡིན་སྟབས། རང་དབང་དང་དྲང་བདེན། འགྲོ་བ་མིའི་ཐོབ་ཐང་སྲུང་སྐྱོབ་ལ་དགའ་མོས་ཡོད་མཁན་ཚོས་ནུས་པ་མཉམ་དུ་སྤུངས་བ་ཡིན་ན། བོད་ཙམ་མ་ཟད་འཛམ་གླིང་སྤྱི་ཡོངས་ལ་འཕྲད་བཞིན་པའི་དཀའ་ངལ་ཁག་ལ་ཕན་ཐོགས་ཆེན་པོ་ཡོང་རྒྱུ་ཡིན་སྐོར་གསུངས་ཡོད་འདུག

གསར་འགོད་པ། བསྟན་འཛིན་ཕུར་བུ།