༸སྐྱབས་རྗེ་༸ཟམ་གདོང་རིན་པོ་ཆེ། ངེས་དོན་གྱི་བེེཌཱུརྱའི་བུམ་པ་ཞིག

ལྷ་རུའི་བུ །(ལ་དྭགས།)

ལུགས་གཉིས་བསྟན་པའི་གསལ་བྱེད་མཧཱ་པཎྜི་ཏ་བདག་ཉིད་ཆེན་པོ་༸ཟམ་གདོང་སྐུ་ཕྲེང་ལྔ་པ་རྗེ་བཙུན་བློ་བཟང་བསྟན་འཛིན་ཆོས་ཀྱི་རྒྱལ་མཚན་རིན་པོ་(༡༩༣༩ལོར་འཁྲུངས།)མཆོག་དགུང་གྲངས་གྱ་གཉིས་ལ་ཕེབས་པའི་༸སྐུའི་འཁྲུངས་སྐར་ཉིན། དགའ་སྤྲོས་བརྟས་པའི་དྭངས་གཙང་སེམས་ཀྱིས་བཀྲ་ཤིས་སྨོན་འདུན་དང་། ཤ་རུས་གདོས་བཅས་ཀྱིས་གྲུབ་པའི་འདོམ་གང་ལུས་ཀྱིས་ལྷ་ཕྱག་གྲངས་མེད་ཀྱིས་གུས་འདུད་ཀྱི་འཚམས་འདྲི་ཞུ་བ་དང་མཉམ། གང་ཉིད་བསྟན་དང་ཉམ་ཐག་འགྲོ་བའི་དོན་དུ་སྐུ་ཚེ་མི་ཤིགས་བསྐལ་བརྒྱའི་བར་དུ་བརྟན་ཅིང་། སྒོས་སུ་གངས་ཅན་ལྗོངས་ཀྱི་སྐྱེ་དགུ་རྣམས་སྔོན་བསགས་དཀར་མིན་ལས་ངན་གྱི་འབྲས་བུས་མནར་བཞིན་པའི་སྒང་འདིར། འཕགས་མཆོག་ཕྱག་ན་པདྨོའི་མདུན་ན་འདོན་གྱི་ཚུལ་དུ་མཛད་བཟང་མཚུངས་ཟླ་མ་མཆིས་པ་བསྐྱངས་དང་སྐྱོང་མུས་ཐོག ད་དུང་གང་ཉིད་སྔར་ལྷག་རྒྱལ་སྲས་བྱང་ཆུབ་སེམས་པའི་འཇིགས་བྲལ་ཞུམ་མེད་ཀྱི་སྙིང་སྟོབས་ཐུགས་སུ་བཅངས་ནས། ༸རྒྱལ་བའི་སྐུ་ཚེ་དང་མཉམ་པའི་སྐུ་ཚེ་བརྟན་བཞུགས་དགོས་པ་གནད་ཀྱི་དོན་པོར་མཐོང་། དེའི་ཆེད་དུ་བདག་སོགས་རྗེས་འབྲངས་པ་རྣམས་ཀྱིས་ལུས་ཀྱི་འཁྲི་ཤིང་ས་ལ་ཕབ་ཏེ་ལྷ་ཕྱག་གྲངས་མེད་ཞབས་ཀྱི་པདྨོར་རབ་ཏུ་བཏུད་ནས་སྐུ་ཚེ་ཡུན་དུ་བཞུགས་པའི་གསོལ་བ་ཕུར་ཚུགས་སུ་འདེབས་པ་ལགས་ན། དེ་དེ་བཞིན་དུ་དགོངས་སུ་གསོལ།།

སྤྱིར་སྨྲ་ཤེས་ཤིང་དོན་གོ་བའི་མིའི་མཚན་ཉིད་འཛོམས་པའི་མི་ཞིག་གིས་མིག་གིས་བལྟས་ན། ཟམ་གདོང་རིན་པོ་ཆེ་ནི། སློབ་མ་བཟང་པོ་དང་། དགེ་རྒན་བཟང་པོ། མགོ་ཁྲིད་བཟང་པོ།  བླ་མ་བཟང་པོ་ཞིག་ཡིན་པ་མཐོ་དམའ་ཀུན་ལ་གྲགས་ཤིང་ཐམས་ཅད་ལ་མཐུན་སྣང་དུ་གྲུབ། ངས་ཉིན་འགའི་སྔོན་ང་དང་ང་ཚོའི་སྔོན་བསགས་ལས་དབང་བཟང་པོས་བླ་མ་ཡིད་བཞིན་ནོར་བུ་དང་སློབ་མ་རྣམ་དཔྱོད་ཀྱི་བློ་མིག་གསལ་བའི་༸ཟམ་གདོང་རིན་པོ་ཆེ་ལྟ་བུ་ཞིག་མཇལ་རྒྱུ་འབྱུང་བ་ནི། རྙེད་དཀའི་བེེཌཱུརྱའི་བུམ་པ་ཞིག་སྙིགས་དུས་ལས་ངན་གྱི་སེམས་ཅན་ཞིག་གིས་ལག་ཏུ་ལེན་རྒྱུ་འབྱུང་བ་དང་གཉིས་སུ་མ་མཆིས། དེ་རིང་ཁོང་རིན་པོ་ཆེའི་འཁྲུངས་སྐར་གྱི་ཉིན་བཟང་ལ་རང་ཉིད་ཀྱི་ཚོགས་གསག་སྒྲིབ་སྦྱོང་གི་སླད་དུ་རྒྱ་མཚོ་ལྟ་བུའི་མཛད་འཕྲིན་ལས་ཆུ་རྡུལ་ཙམ་ཞིག་ཡིད་ལ་དྲན་ཁུལ་དང་སྦྲགས། བསྐལ་བ་ཀུན་ཏུ་བླ་སློབ་ཁྱེད་གཉིས་ཀྱི་ཞབས་པད་དུ་སྐྱེ་ཞིང་ལུགས་གཉིས་གདམས་པའི་ཉིང་བཅུད་ཀྱིས་ཞོ་ཤས་འཚོ་བའི་གདུལ་བྱ་ལས་སྐལ་ཅན་རྣམས་ཀྱི་དབུས་སུ་སྤྱི་འགྲེ་སྤྱི་མཚུངས་བཞིན་སྐྱེ་བའི་སྨོན་ལམ་ཞུས།།

  (༡)
ས་གཞུང་དགའ་ལྡན་ཕོ་བྲང་(༡༦༤༢–༢༠༡༡)ནི། ༸རྒྱལ་མཆོག་ལྔ་པ་ཆེན་པོ་ནས་༸རྒྱལ་མཆོག་བཅུ་བཞི་པ་ཆེན་པོའི་བར་གྱི་ཏཱ་ལའི་བླ་མ་སྐུ་ཕྲེང་རིམ་བྱོན་གྱིས་ལེགས་པར་བསྐྱངས་པའི་ཡང་དག་པའི་སྲིད་གཞུང་ཞིག་ཡིན།  སྲིད་གཞུང་དེ་ཉིད་ཀྱི་བཀའ་བློན་ཁྲི་པ་མཐའ་མ་དང་།  ད་ལྟའི་འོས་བསྡུའི་ལམ་ནས་བདམས་པའི་བཙན་བྱོལ་བོད་མིའི་ཡང་དག་པའི་མང་གཙོའི་སྲིད་གཞུང་གི་བཀའ་ཁྲི་དང་པོ་ནི། ༸སྐྱབས་རྗེ་ཟམ་གདོང་སྐུ་ཕྲེང་ལྔ་པ་རྗེ་བཙུན་བློ་བཟང་བསྟན་འཛིན་ཆོས་ཀྱི་རྒྱལ་མཚན་དཔལ་བཟང་པོ་ལགས།   སྔོན་ཆད་ས་ཕག་རིན་གཙང་སོགས་ཀྱི་གཞུང་སྲིད་སྔ་ཕྱི་གཉིས་ཀྱི་འཕོ་འགྱུར་མཚམས་སྦྱོར་དུས་སྐབས་སུ། སྤྱི་ཚོགས་ནི་ཟང་ཟིང་དང་ཡ་ཡོར་གྱི་བརྡབ་གསིག་འོག  གཞུང་འབངས་སྐྱེ་འགྲོ་ཡོངས་ལ་དུས་བདེ་ཞོད་འཇགས་མེད་པའི་གནས་སྟངས་བྱུང་གི་ཡོད་ནའང་། གཞུང་ས་དགའ་ལྡན་ཕོ་བྲང་དང་། བདེན་པ་དང་འཚེ་བ་མེད་པ། ཡང་དག་པའི་མང་གཙོ་ལ་བརྟེན་པའི་བོད་མིའི་སྒྲིག་འཛུགས་གཉིས་ཀྱི་གཞུང་འཛིན་འཕོ་འགྱུར་གྱི་དུས་རིམ་ནི། སྔོན་ཆད་བོད་ཀྱི་བྱུང་རབས་ལོ་རྒྱུས་ནང་གྲགས་མྱོང་མེད་པའི་བཀྲ་ཤིས་ལོ་ལེགས་ཀྱི་ལེའུ་གསར་པ་ཞིག་བྱུང་ཡོད། དེ་ནི་༸གོང་ས་ཐམས་ཅད་མཁྱེན་པའི་ཟབ་མོའི་དགོངས་བཞེད་དང་། དེ་ཉིད་འཇུག་སྐྱོང་བྱེད་མི་དཔྱོད་ཤེས་ཀྱི་རྣམ་དཔྱོད་ཤིན་ཏུ་ཡངས་པའི་༸སྐྱབས་རྗེ་ཟམ་གདོང་རིན་པོ་ཆེ་ལྟ་བུ་ཞིག་ཡོད་པས་ཡིན། མཛད་བཟང་གི་དོན་དེ་ཉིད་ཁོ་ན་ལ་བསམ་ནའང་༸སྐྱབས་རྗེ་རིན་པོ་ཆེ་ཁོང་གི་འཁྲུངས་སྐར་ནི། ང་ཚོའི་མི་ཚེའི་ཁྲོད་ཀྱི་གལ་ཆེའི་ཆ་ཤས་ཤིག་ཆགས་ནས་ཡོད་པས། ཅི་ནས་ཀྱང་སྲུང་གཙི་དགོས་པ་ཞིག་ཏུ་མཐོང་།།

(༢)

བོད་མིའི་སྤྱི་ཚོགས་ཀྱི་ནང་ལ་བླ་སྤྲུལ་དགེ་བཤེས་ཀྱི་མཚན་གནས་འཛིན་པ་མང་པོ་ཡོད་ནའང་། དེ་དག་གི་ཁྲོད་ལ་༸གོང་ས་མཆོག་སྐུ་རྐྱང་དུ་བཞག་ནས་བོད་ཀྱི་ཆབ་སྲིད་ཀྱི་བདེན་དོན་ནི། འཇིག་རྟེན་པའི་བྱ་བ་ཞིག་དང་། སྤྱིར་བཏང་བཤད་སྒྲོས་བཞིན་ཆབ་སྲིད་ཡོངས་རྫོགས་ནག་པོར་རྩིས་ནས། ཐུགས་སྣང་མི་གནང་མཁན་ཇི་སྙེད་ཡོད་པ་དང་། ཁོང་ཚོས་རང་གི་བླ་བྲང་དང་གྲྭ་ཚང་དགོན་པ་བཅས་གཙིགས་ཆེན་དུ་བཟུང་ནས་བོད་འབངས་བསྟན་སྲིད་མི་རིགས་གཉན་འཕྲང་ཅན་གྱི་གནས་སྟངས་དངོས་སྣང་མེད་དུ་བསྐྱུར་བའི་བྱ་བྱེད་དེ་དག་དང་མི་འདྲ་བར། རིན་པོ་ཆེ་ནི་༸རྒྱལ་དབང་ཐམས་ཅད་མཁྱེན་པས་མཛད་པའི་༸ཟམ་གདོང་རིན་པོ་ཆེའི་ཞབས་བརྟན་སྨོན་ལམ་གྱི་མཛད་བྱང་དུ་”ངོས་ཀྱིས་བོད་བསྟན་སྲིད་ཆེད་གང་བསྒོ་བར་ཤར་བསྐྱོད་དང་། ལུས་ངག་ཡིད་གསུམ་ངོས་ཀྱི་ཅི་ཟེར་ལ་བཏང་ནས་བོད་བསྟན་འགྲོའི་བདེ་ཐབས་ལ་དཀའ་བ་དུ་མ་སྤྱད་ཡོད་”ཅེས་གསུངས་པ་བཞིན། རིན་པོ་ཆེ་གང་ཉིད་ཀྱིས་བྱེས་སུ་བླ་བྲང་གསར་བཞེངས་དང་དགོན་པ་གྲྭ་ཚང་གི་སྣོད་བཅུད་རྒྱ་བསྐྱེད་སོགས་ལ་དུས་སྐད་ཅིག་ཙམ་ཡང་བཏང་བར་མ་བྱེད་ནས། ༸རྒྱལ་དབང་དོན་གྱི་བདག་པོའི་དགོངས་པ་ལྟར། བོད་འབངས་བདེ་ཐབས་དང་བོད་རྒྱ་མི་རིགས་གཉིས་ཀྱི་གནས་སྟངས་འགྲིག་ཆགས་ཀྱི་དོན་དུ་སྤྱི་ཚོགས་ཀྱི་ད་ལྟ་དང་མ་འོངས་པའི་གནས་སྟངས་ལ་རྔོ་ཐོགས་པའི་ཕྱག་ལས་རྒྱ་ཆེ་གནང་དང་གནང་བཞིན་ཡོད་པ་ནི། བླ་སྤྲུལ་དགེ་བཤེས་ཀྱི་མཚན་གནས་བཞེས་མཁན་འདྲ་འདྲའི་ནང་གི་མ་འདྲ་བ་ཆེ་ཤོས་དེ་ཡིན་པ་ཙམ་དུ་མ་ཟད།    གཉུག་མར་གནས་པའི་བོད་མི་གཞིས་བཞུགས་པ་དང་། གློ་བུར་ཕྱི་ཡུལ་དུ་ལྷགས་པའི་བྱེས་བཞུགས་བོད་མི་མཆིས་སོ་ཅོག་ལ་ཁྱེད་ལས་ལྷག་པའི་༸གོང་ས་ཐམས་ཅད་པའི་མཁྱེན་པའི་དབུ་འོག་དཔུང་འདེགས་བྱེད་མི་རྩམ་ཟན་པ་ཞིག་སྲིད་ན་བཙལ་ཀྱང་རྙེད་དཀའ་པས། ཁྱེད་ཉིད་ཡོད་ན་གཞིས་བྱེས་བོད་མི་རྣམས་བློ་བདེ། ཅི་སྟེ་ཁྱེད་ཉིད་མེད་ན་བློ་གཏད་བྱ་ས་དཀོན་པས། གཞིས་བྱེས་གཉིས་ལ་བསམས་ནའང་༸སྐུ་ཚེ་བརྟན་བཞུགས་དགོས་པ་གལ་འགངས་ཆེ་བས། དེ་དེ་བཞིན་དགོངས་སུ་གསོལ།།

(༣)
ཡང་ང་ཚོ་བོད་འབངས་ཡོངས་ཀྱིས་འཇིག་རྟེན་ཀུན་དང་མཐུན་པའི་མང་གཙོའི་ཆབ་སྲིད་ཀྱི་ཉིན་གཞོན་གསར་བ་ཞིག་སླར་ཡང་སྤྱོད་རྒྱུའི་སྐལ་བཟང་འབྱུང་བ་ནི། བླ་སློབ་གཉིས་ཀྱི་རྣམ་དཔྱོད་ཀྱི་རྩལ་དང་ཐུགས་རྗེས་བོད་འབངས་བརྩེ་བས་མ་འདོར་བར་དྲིན་གྱིས་བསྐྱངས་པ་ཞིག་ཡིན་པ་ནི་གོར་མ་ཆག  འོན་ཀྱང་དེང་སྙིགས་དུས་ཀྱི་སེམས་ཅན་གཏི་མུག་པ་ལ་ལས། བྱས་པ་ཅན་ལ་དྲིན་དུ་མི་ཚོར་ཞིང་། དྲིན་ཅན་གྱི་ལག་པ་རྡོ་བས་བརྡུངས་བའི་དཔེ་ལྟར། མཛད་བཟང་ལ་ལོག་རྟོག་དང་ཚུལ་མིན་འགྲེལ་ལོག་བྱེད་པའི་ངང་ཚུལ་ནི། མཁྲིས་ནད་ཅན་གྱིས་གངས་དཀར་ལྷུན་པོ་སེར་པོར་སྣང་བ་དང་གཉིས་སུ་མ་མཆིས། ༸ཟམ་གདོང་རིན་པོ་ཆེས་གཞིས་དགོན་དགའ་ལྡན་བདེ་ཆེན་གླིང་དུ་དགུང་ལོ་ལྔར་སོན་སྐབས་ཁྲི་གསོལ་མཛད་ཅིང་། དགུང་གྲངས་བཞི་གསུམ་བཅུ་གཉིས་ལ་ཕེབས་སྐབས། དབུས་ཀྱི་གདན་ས་ཆེན་པོ་དཔལ་ལྡན་འབྲས་དཀར་སྤུངས་པར་སྒྲིག་ཞུགས་ཡང་དག་མཛད་ནས། དེར་བགྲང་བྱ་ཧྲིལ་པོ་བརྒྱད་རིང་སློབ་གཉེར་གྱི་བགྱི་སྒོ་མཐའ་དག་ཚུལ་བཞིན་མཛད། ཁོང་གིས་༸རྒྱལ་བའི་གསེར་ཞལ་ཐོག་མར་མཇལ་བའི་དུས་ཚོད་ནི། ཕྱི་ལོ་༡༩༥༢ལོའི་ལྷ་སའི་སྨོན་ལམ་ཆེན་མོའི་སྐབས་སུ་ཡིན་ལ་༸རྒྱལ་དབང་གི་སྐུ་མདུན་ནས་ཞུས་པའི་ཆོས་ཀྱི་བདུད་རྩིའི་ཐོག་མ་ནི་སྐྱེས་རབས་སོ་བཞི་ཡིན།  ཐོག་མ་ཉིད་ནས་ ༸རྒྱལ་དབང་གི་གསལ་ཞིང་དག་པའི་གསུང་ཚངས་པའི་དབྱངས་ཀྱིས་ཐུགས་ཡིད་རབ་ཏུ་འཕྲོག་ནས། དུས་ད་ལྟའི་བར་༸རྒྱལ་དབང་གི་ཕེབས་རྗེས་སུ་ཕེབས་ནས་ལུས་ངག་ཡིད་གསུམ་གྱིས་འཕགས་པ་རྟག་ཏུ་ངུས་ཆོས་འཕགས་བསྟེན་པ་བཞིན་དགེ་བའི་བཤེས་གཉེན་དུ་བསྟེན་པའི་ཚུལ་ནི། བསླབ་པའི་གཞི་དང་འགལ་མེད་ལེགས་པར་བསྟེན་གནང་མཛད་ཡོད་པས། ཁ་བ་རི་པ་བ་བདག་ཅག་ཡོངས་ཀྱིས་ཀྱང་༸གོང་ས་ཐམས་ཅད་མཁྱེན་པས་བུ་སློབ་ཏུ་མ་འགྱུར་བ་ཞིག་རྩ་ནས་མེད་པས། བློ་སེམས་གཉིས་མེད་ཀྱིས་བླ་མ་ཡིད་བཞིན་ནོར་བུའི་ཐུགས་རྗེའི་བཀའ་དགོངས་སྙིང་དུ་བཅངས་ནས། ཁོང་༸སྐྱབས་རྗེ་རིན་པོ་ཆེ་དང་གཉིས་སུ་མ་མཆིས་པའི་༸རྒྱལ་བའི་བཀའ་དགོངས་བསྒྲུབ་ཤེས་པར་དགོས། ༸སྐྱབས་རྗེ་རིན་པོ་ཆེའི་༸རྒྱལ་བའི་བཀའ་དགོངས་སྒྲུབ་ཚུལ་ཁོ་ནར་ལྟ་ནའང་། མིག་དཔེ་ལྟ་རིན་ཆོག་པ་ཞིག་ཡོད་པས། ཁོང་གི་སྐུའི་འཁྲུངས་སྐར་ལ་རྟེན་འབྲེལ་ཞུས། །

(༤)
༸སྐྱབས་རྗེ་ཟམ་གདོང་རིན་པོ་ཆེ་ནི། སྐུ་ཚེ་ཡོངས་རྫོགས་བོད་མི་སོགས་ཤེས་ཡོན་གྱི་ལས་དོན་ཐད། འབད་པ་ཡོད་དགུ་རྩལ་སྤྲུགས་བསྐྱོན་གནང་མཁན་ཞིག་ཡིན། ཤེས་ཡོན་དེ་ཡང་གནའ་དེང་ཤེས་ཡོན་གྱི་ལམ་སྲོལ་ལས། གང་ལའང་ཆགས་ཞེན་དང་འཁོན་སྡང་གི་བག་ཆགས་ཀྱི་དྲི་མས་བསྲེ་ལྷད་མེད་པར་གང་ཞིག་འགྲོ་བའི་སེམས་རྒྱུད་ཀྱི་ཁྱད་པར་བའི་ཡོན་ཏན་གོང་དུ་སྤེལ་ཞིང་ཕྱི་ལུས་ཀྱི་འཚར་ལོངས་ལ་མཐའ་གཅིག་ཏུ་སྨན་པའི་ཤེས་ཡོན་གྱི་ལམ་སྲོལ་གྱི་རྨང་གཞི་སྤྱི་ཚོགས་ལ་གསལ་སྟོན་དང་། ད་ལྟའི་གཡོ་ཁྲམ་དང་རྒྱལ་ཕམ་འགྲན་རྩོད། ང་འཛིན་ཨ་འཐས་ཀྱི་སེམས་རྒྱུད་ཀྱི་གཉེན་པོ་མ་ཡིན་པའི་མིང་ཙམ་གྱི་ཤེས་ཡོན་ཏེ། རྣམ་པ་དགེ་ནའང་ངོ་བོ་རྐུན་ཇག་ཡིན་པ་རྣམས་ཀྱིས་སྤྱི་ཚོགས་ལ་ཕན་གནོད་རྗེས་འབྲེལ་གྱི་རང་བཞིན་གསལ་བར་བརྗོད་ནས་ཡོད། དེ་ལྟར་ལེགས་ཉེས་དཔྱོད་ཤེས་དང་སྨྲ་མཁས་ཀྱི་ཡོན་ཏན་ནི། ༸སྐྱབས་རྗེ་ཟམ་གདོང་རིན་པོ་ཆེ་ཁོ་ནའི་ཐུགས་གཤིས་སུ་མངའ་བ་ཞིག་ཡིན་ལགས། ཁོང་གིས་ཕྱི་ལོ་༢༠༠༤ལོར་བོད་མིའི་འཕྲལ་ཕུགས་ཀྱི་མདུན་ལམ་ལ་རྔོ་ཐོགས་པར་གཟས་ནས། སྐབས་༡༣པའི་གྲོས་ཚོགས་སུ་ཁྲིམས་ཐོག་ནས་སྤྱི་མོས་གཏན་འབེབས་བྱས་པའི་<<བཙན་བྱོལ་བོད་མིའི་ཤེས་ཡོན་སྲིད་བྱུས།>>ནི། རིག་པའི་གཞུང་ལུགས་ཀྱི་རྒྱབ་རྟེན་མཐུག་ཅིང་ངོ་བོ་དང་རྣམ་པ་དགེ་བའི་ཤེས་ཡོན་སྲིད་བྱུས་ཤིག་ཡིན་པ། སྐུ་ཚེ་ཡོངས་རྫོགས་ཤེས་ཡོན་དང་འབྲེལ་བའི་ལས་དོན་སྟེང་ཞིབ་འཇུག་བྱེད་མི་ཡོངས་རྫོགས་ཀྱིས་མགྲིན་གཅིག་དབྱངས་གཅིག་གིས་བསྟོད་པར་མཛད་བཞིན་ཡོད་པ་དག་ནི། ང་ཚོའི་མི་རིགས་ཀྱི་གཟི་བརྗིད་དང་ཟླ་མེད་ཀྱི་ཡོན་ཏན་ཞིག་ཏུ་འདུག་ན། དེ་རིང་འཁྲུངས་སྐར་ཉིན་སྐུ་དྲིན་དྲན་ཞིང་སྐུ་ཚེ་ཡུན་དུ་བརྟན་པའི་གསོལ་འདེབས་བྱ་རྒྱུ་ནི་ང་ཚོའི་ལས་འགན་དང་འོས་འགན་ཞིག་ཡིན།།

(༥)
ཕྱི་ལོ་༡༩༩༠ལོར་༸སྐྱབས་རྗེ་ཟམ་གདོང་རིན་པོ་ཆེས་དྷ་རམ་ས་ལའི་སྲིད་དོན་གྱི་གྲོས་རྭའི་དཀྱིལ་འཁོར་ཕེབས་པ་ནས་བཟུང་། བོད་མིའི་སྒྲིག་འཛུགས་དེ་ཉིད་ཁྲིམས་ཀྱི་དབང་བསྒྱུར་ལྡན་པའི་སྲིད་དོན་གྱི་སྒྲིག་འཛུགས་ཤིག་ཡོང་ཐབས་ལ་<<བཙན་བྱོལ་བོད་མིའི་བཅའ་ཁྲིམས་>>རིན་པོ་ཆེ་མང་གཙོའི་འགྲོ་ལུགས་དང་མཐུན་པའི་རྩ་འཛིན་སྲ་བརྟན་ལེགས་བཅོས་དང་། མང་གཙོའི་ཀ་བ་གསུམ་གྱི་དབང་ཚད་ལྗིད་མཉམ་སྟངས་འཛིན་གྱི་གནས་བབ་ཁ་གསལ། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་ལས་དོན་བྱེད་ཕྱོགས་དང་ཚོགས་འདུའི་འགྲོ་ལུགས་ཁྲིམས་མཐུན་གཏན་འབེབས་བྱེད་པ། འཛིན་སྐྱོང་བཀའ་ཤག་གི་བཀའ་བློན་ཁྲི་པའི་མཛད་འགན་བཞེས་སྐབས།  བོད་གཞུང་གི་དཔལ་འབྱོར་གྱི་གནས་བབ་བུན་ལོན་སྤྲོད་མཇལ་ལྷག་ལུས་སྐར་རྡོག་པོ་གཅིག་ཀྱང་མེད་པར་བཟོས་པ་མ་ཟད། ལྷན་ཁང་སོ་སོའི་མ་དངུལ་ཡོང་སོང་དང་། ཡུལ་ཁྲིམས་ཀྱི་ཆ་རྐྱེན་འོག་རྒྱུན་གནས་ཡོང་ཐབས་ལ་དེབ་སྐྱེལ་བྱེད་ཕྱོགས་རྣམས་ནི། ད་ལྟ་ང་ཚོས་ཕྱིར་བལྟས་དང་རྒྱང་ལྟ་བྱེད་ཚེ། ཕུགས་བསམ་ཅན་དང་རྣམ་དཔྱོད་ཀྱི་ཁོ་ལག་ཡངས་པའི་མི་སྣ་ཁྱད་པར་བ་རེ་ཟུང་གིས་གནང་ཐུབ་རྒྱུའི་ལས་དོན་ཞིག་ཡིན་པ་ལས་གཞན་སུས་ཀྱང་དྲན་ཡང་མི་ཐུབ་པ་ཞིག་ཏུ་སྣང་། དེ་དག་ལ་བསམ་ན་ཁོང་ནི་ང་ཚོའི་དབུ་ཁྲིད་བཟང་པོ་ཞིག་ཡིན་པས། ཁོང་གི་སྐུའི་འཁྲུངས་སྐར་ནི་ང་ཚོས་ཅི་ནས་ཀྱང་སྲུང་གཙི་བྱ་དགོས་ངེས་ཡིན།།

(༦)
༸སྐྱབས་རྗེ་ཕ་བོང་ཁ་བདེ་ཆེན་སྙིང་པོས་མཚུངས་མེད་འཕགས་པ་རབ་དགའ་ནས་རིམ་གྱིས་བསྟན་འགྲོའི་དོན་དུ་བྱོན་པའི་༸ཟམ་གདོང་སྐུ་ཕྲེང་བཞི་པ་ཚུལ་ཁྲིམས་རྒྱ་མཚོའི་ཡང་སྲིད་གང་དུ་འཁྲུངས་མིན་གྱི་ས་ཕྱོགས་སོགས་འཁྲུལ་བྲལ་ལུང་བསྟན་གནང་རྗེས་སྐུ་ཚེའི་འཕེན་པ་རྫོགས་ནའང་།  ཁོང་གི་ཐུགས་སྲས་རྣམས་ཀྱི་ཐུ་བོ་༸སྐྱབས་རྗེ་ཡོངས་འཛིན་སྐུ་གཞོན་ཁྲི་བྱང་རྡོ་རྗེ་འཆང་གང་ཉིད་ཀྱིས་ཡང་སྤྲུལ་ངོས་འཛིན་མཛད་རྗེས། ༸རྒྱལ་བའི་ཡོངས་འཛིན་རྣམ་གཉིས་སོགས་དགེ་བའི་བཤེས་གཉེན་དུ་མའི་ཞབས་ལ་གཏུགས་ནས། མདོ་རྒྱུད་ཀྱི་གསུང་རབ་མང་པོར་གོ་ལོ་ཙམ་དང་ཐོས་ལོ་ཙམ་ལ་མ་བཞག་པར་ཆོས་རབ་ཏུ་རྣམ་པར་དཔྱོད་པའི་ཤེས་རབ་ཀྱིས་དོན་ལ་སྒྲོ་འདོགས་མ་ཆོད་བར་དུ་བརྩད་ཅིང་དོན་འཚོལ་བའི་ཐུགས་གཤིས་ལ་སུས་ཀྱང་འགྲན་དུ་མི་བཟོད་པའི་རང་བཞིན་གྱིས། སྙིགས་དུས་ཆོས་སྨྲ་བ་མང་པོའི་དབུས་སུ་རྒྱལ་མཚན་གྱི་ཏོག་ལྟར་གཟི་བརྗིད་ཆེས་ཆེར་འཕགས་པ་དང་། རྗེས་འབྲངས་སྐྱེ་བོའི་ཁྲོད་དུ་བོད་རིགས་ཙམ་མ་ཟད། རྒྱ་ཧོར་ནུབ་གླིང་པ་སོགས་ས་ཆེན་པོའི་རྡུལ་དང་མཉམ་པའི་སློབ་མ་རིག་རྣོ་ཅན་ཇི་སྙེད་ཅིག་བྱུང་དང་འབྱུང་བཞིན་ཡོད། གསེར་གྱི་ཡང་ཞུན་ལྟ་བུའི་བོད་བརྒྱུད་ནང་བསྟན་གྱི་བསྟན་པ་རིན་པོ་ཆེའི་ཟབ་ཡངས་ཀྱི་ཁྱད་པར་མངོན་དུ་བཅུག་པའི་མཛད་བཟང་དག་གིས་ཉག་ཕྲ་བའི་བོད་ཀྱི་གནད་དོན་དང་། ཉམ་ཐག་པའི་བོད་མི་སྤྱི་བོ་གནམ་བསྟེན་པ་ཡོངས་ཀྱི་དོན་དམ་པའི་སེམས་ཤུགས་བླ་རུ་འདེགས་པའི་གཏིང་ནོན་དུ་འགྱུར་གྱིན་ཡོད། དོན་དེ་ལ་བསམ་ན། མགོན་མེད་རང་དབང་བྲལ་བའི་བོད་མགོ་ནག་ཅན་ཡོངས་ཀྱི་ཆེད་དུ་༸སྐུ་ཉིད་སྐུ་ཚེ་ཡུན་དུ་བཞུགས་དགོས་པ་ནི་དོན་གྱི་འགག་རྩ་ཞིག་ཡིན། །

(༧)
དེ་བཞིན་སྔོན་ཆད་གདན་ས་གསུམ་སོགས་རབ་བྱུང་ངུར་སྨྲིག་གི་སྤྱི་ཚོགས་སུ་ཐ་སྙད་རིག་པའི་གནས་ནི་གཞུང་ཆེན་གཟིགས་རྟོག་ལ་གེགས་སུ་དགོངས་ནས། སྒྲ་སྙན་མངོན་བརྗོད་སོགས་ཐ་སྙད་རིག་པའི་གནས་ལ་ཆེད་གཉེར་སློབ་སྦྱོང་གི་ལམ་སྲོལ་དཀོན་ནའང་།  བཤེས་གཉེན་དམ་པ་ངག་དབང་སྦྱིན་པ་དང་༸རྒྱལ་བའི་ཡོངས་འཛིན་རྣམ་གཉིས་བཅས་ཀྱི་དྲུང་ནས་སྔ་ཕྱིར་སུམ་རྟགས་སྙང་གཞུང་སོགས་ཀྱི་ལུང་ཞུ་དཔེ་ཁྲིད་ཀྱི་གོ་སྐབས་རྙེད་པའི་ཉེར་ལེན་གྱིས། རང་ཅག་བཙན་བྱོལ་གྱི་ཐོག་མའི་ལོ་བཅུ་ཕྲག་ཁ་ཤས་རིང་སློབ་གྲྭ་དང་མཐོ་སློབ་རྣམས་སུ་ཆོས་དགེ་དང་བོད་དགེ། དེ་བཞིན་སློབ་སྤྱི་དང་ངེས་སྟོན་པའི་མཚན་གནས་རིམ་བཞེས་གནང་རིང་། བཙན་བྱོལ་བའི་བོད་མིའི་སློབ་གྲྭ་དང་མཐོ་སློབ་རྣམས་སུ་ཐ་སྙད་རིག་པའི་མེ་རོ་སླར་གསོ་དང་། རྒྱུན་འཛིན་སོགས་༸རྒྱལ་དབང་ཐམས་ཅད་མཁྱེན་པའི་དབུ་འོག་དཔུང་འདེགས་ཀྱི་ཕྱག་ལས་ངོ་ལྐོག་མེད་པར་མཛད་པས། ད་ལྟའང་བོད་མིས་གཉེར་བཞིན་པའི་སློབ་གྲྭ་དང་མཐོ་སློབ་རྣམས་ཀྱིས་བོད་ཡིག་བོད་སྐད་དང་། ཐ་སྙད་རིག་གནས་ཀྱི་སློབ་ཁྲིད་གནང་ཕྱོགས་ཐད། གཞན་ལ་འགྲམ་ཆུ་ལྡང་མི་དགོས་པ་ཞིག་ཡོད་པ་ནི། རིན་པོ་ཆེ་ཁྱེད་ཉིད་སོགས་༸རྒྱལ་དབང་གི་བཀའ་དགོངས་ལ་ཞལ་ཞེ་གཉིས་མེད་ཀྱིས་ཤར་བསྐྱོད་ཀྱི་བློ་སྤོབས་ལྡན་པའི་སྐྱེས་མཆོག་རྣམས་ཀྱི་སྐུ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་པ་ནི། ཟུར་བལྟས་ལེབ་མཐོང་གི་གནས་སྟངས་ཤིག་ཡིན་ན། མ་འོངས་པར་ཡང་དེ་བཞིན་རང་རེའི་སྤྱི་ཚོགས་འདི་ཐ་སྙད་རིག་གནས་སློབ་སྤེལ་གྱི་ངོ་ཐད་ནས་མི་སྨོན་རང་སྐྱིད་ཅིག་ཡོང་སླད། དུས་ནས་དུས་སུ་༸རྒྱལ་དབང་གི་བཀའ་དགོངས་དང་མཐུན་པའི་ལམ་སྟོན་གཞེན་སྐུལ་གནང་མཁན་རིན་པོ་ཁྱེད་ལྟ་བུ་ཞིག་སྤྱི་ཚོགས་ལ་ལྷག་ཏུ་དགོས་ངེས་ཆེ་བས། སྐུ་མཆོག་དགུང་ན་བགྲེས་ནའང་ཐུགས་སྤོབས་ཞུམ་མེད་ཀྱིས་ཡར་བླ་མ་རིན་པོ་ཆེ་དང་མར་བོད་འབངས་གཞིས་བྱེས་གཉིས་ལ་དགོངས་ནས་སྐུ་ཚེ་ཡུན་དུ་བརྟན་དགོས་པ་ནི། གལ་པོ་ཆེར་མཐོང་བས། ༸སྐུ་ཚེ་ཡུན་རིང་བཞུགས་པའི་གསོལ་འདེབས་རྒྱང་ནས་ཞུས།།

(༨)
བོད་རྒྱ་གཉིས་ཀྱི་དཀའ་ངལ་ནི་འདས་པའི་བགྲང་བྱ་བཅུ་ཕྲག་དྲུག་ལྷག་ཙམ་གྱི་རིང་ལ་བཟང་ཕྱོགས་དང་ངན་ཕྱོགས་ཀྱི་འགྱུར་ལྡོག་མང་ནའང་། རྩ་བའི་དཀའ་ངལ་ནི་ད་དུང་ཡིན་ནའང་དེ་མུར་འགྱུར་མེད་དུ་གནས་ནས་ཡོད། འབྱུང་འགྱུར་བོད་རིགས་དང་བོད་ཀྱི་ལེགས་བྱང་སྐད་ཡིག་སོགས་མིང་གི་ལྷག་མར་མི་འགྱུར་ཆེད། བོད་རྒྱ་གཉིས་ལ་སྨན་པའི་དབུ་མའི་ལམ་གྱི་ཆབ་སྲིད་ཀྱི་ལངས་ཕྱོགས་སམ། བོད་རིགས་ཡོངས་ལ་མིང་དོན་མཚུངས་པའི་མི་རིགས་ས་གནས་རང་སྐྱོང་ཀྱི་གནས་བབས་ཤིག་ཡོང་ཐབས་ལ་འབད་བརྩོན་བྱས་དང་བྱེད་བཞིན་ཡོད། དེང་ཁ་ཐོར་དགུ་ཐོར་ལ་གནས་པའི་རང་རེའི་སྤྱི་ཚོགས་ནང་། དབུ་མའི་ལམ་གྱི་སྲིད་བྱུས་ཀྱི་དགོངས་དོན་མཐིལ་ཕྱིན་རྟོགས་ཅིང་ཉམས་མྱོང་དང་། གསལ་འགྲེལ་ཐུབ་ངེས་ཀྱི་མི་ཞིག་དགོས་ན་ཁྱེད་ཉིད་ལས་གཞན་མ་མཆིས། རིན་པོ་ཆེས་བཀའ་ཁྲི་གནང་རིང་བོད་རྒྱ་གཉིས་ཀྱི་འབྲེལ་མོལ་ཐེངས་མང་བྱུང་ཞིང་། འབྲེལ་མོལ་གྱི་སྔ་ཕྱིའི་ཚིག་བརྗོད་གང་ལ་བལྟས་ཀྱང་། རང་ཕྱོགས་ཀྱིས་རང་ཚུགས་བརྟན་གནས་ཐོག རྒྱ་ཕྱོགས་ལ་བསྟུན་མཁས་དང་བསམ་དོན་མཐའ་དག་འཆུགས་མེད་ཆད་ལྷག་མེད་པར་གནང་ཐུབ་ཡོད་པ་ནི། བྱུང་རབས་ལོ་རྒྱུས་ཀྱི་དེབ་ཐེར་ནང་གསེར་གྱིས་བྲིས་ཀྱང་ཆུང་བའི་ཚོད་དུ་སྣང་། ཐ་ན་དབུ་མའི་ལམ་གྱི་སྲིད་བྱུས་དང་འབྲེལ་བའི་གཞུང་གི་ཡིག་ཆའི་ཁྲོད་ཀྱི་ཐ་སྙད་རྣམས་ཀྱང་སྣང་ཆུང་དང་འཆར་ཅན་བཞིན་མ་གཟིགས་པར། འབད་པ་ཆེན་པོས་རྒྱ་ནག་གི་རྩ་ཁྲིམས་སོགས་ལ་སྒོ་ཀུན་ནས་མཐུན་པར་བྱེད་པ་ནི། འགྲན་པར་དཀའ་བའི་ཐུགས་ཀྱི་རྣམ་པར་དཔྱོད་པའི་རྩལ་དང་ལྷག་བསམ་གྱིས་བོད་འབངས་ཡོངས་ལ་འཆི་མེད་བདུད་རྩིའི་ཆར་བ་བསྙིལ་བ་ཞིག་ཡིན་པས། དྲིན་གཟོའི་བཀའ་དྲིན་གསབ་ཐབས་དཀའ་བ་ཞིག་ཡིན། དེས་ན་སྐུ་ཉིད་སྐུ་ཚེ་ཡུན་དུ་བཞུགས་ཅིང་སྔར་བཞིན་འཆི་མེད་བདུད་རྩི་ཆར་ཆེན་བོད་འབངས་ཡོངས་ཀྱི་མདུན་དུ་མང་དུ་དབབ་པའི་སྨོན་ལམ་ཞུས།།

 (༩ )
བོད་བསྟན་སྲིད་མི་རིགས་མཐའ་དག་ལ་གནོད་ཅིང་འཚེ་བའི་འབྱུང་པོ་དམ་སྲི་དོལ་རྒྱལ་ནི། ༸རྒྱལ་དབང་ཡིད་བཞིན་ནོར་བུས་ལེན་གྲངས་དུ་མའི་རིང་བརྟག་དཔྱད་རྒྱུ་མཚན་ངེས་རྙེད་བྱུང་རྗེས། སྤང་བླངས་འཇུག་ལྡོག་དགོས་པའི་བཀའ་བསྒོ་ལམ་སྟོན་རྣ་བའི་བཅུད་དུ་ཕེབས་འཕྲལ། ཡིན་མིན་ཀ་ཀོར་དང་ཕྱི་ནང་ཞལ་ཞེ་གཉིས་མེད་ཀྱིས་དོལ་རྒྱལ་དམ་སྲི་ཡིན་པ་དང་། དེས་བོད་བསྟན་སྲིད་མི་རིགས་ལ་ཏིལ་འབྲུ་ཙམ་ཡང་མི་ཕན་པའི་སྙིང་སྟོབས་ཆེན་པོས་མགོན་མེད་རྨོངས་པ་རྣམས་ལ་གསལ་བཤད་རྒྱུ་མཚན་ངོ་སྤྲོད་དང་། ཕ་རོལ་བའི་མི་བསྲུན་གླང་སྤྱོད་ལ་འཇིགས་ཞུམ་ཆགས་སྡང་བྲལ་བའི་བདེན་པའི་གསུང་དབྱངས་རི་དྭགས་ཀྱི་རྒྱལ་པོ་སེངྒེའི་ང་རོ་ལས་ཀྱང་ལེན་གྲངས་དུ་མས་ལྷག་པར་མཛད་པའི་མཛད་སྤྱོད་ནི། ༸རྒྱལ་དབང་དགྱེས་པའི་མཆོད་སྤྲིན་དང་བདག་སོགས་མགོན་མེད་སྐྱབས་མེད་རྨོངས་པ་རྣམས་ལ་སེར་ཐུར་གྱིས་མིག་འབྱེད་པ་ལྟ་བུ་ཞིག་ཡིན་པས། ༸སྐྱབས་རྗེ་རིན་པོ་ཆེ་ཁྱེད་ཉིད་ཀྱི་བཀའ་དྲིན་ནམ་ཞར་ཡང་གསབ་ཐབས་མེད་པ་དང་སྐུ་ཉིད་སྐུ་ཚེ་ཡུན་དུ་བཞུགས་དགོས་པ་ནི་ང་དང་ངེད་ཅག་བོད་མི་ཡོངས་ཀྱི་མི་ཚེ་དོན་ལྡན་ཡོང་མིན་ལ་རགས་ལས་ནས་ཡོད་པ་ལགས་ན། སྐུ་ཚེ་རིང་དུ་བརྟན་པའི་གསོལ་འདེབས་ཕུར་ཚུགས་འདེབས་སོ།།

 (༡༠)
བོད་ལ་བླ་མ་དང་སྤྲུལ་སྐུ་མང་། ཟམ་གདོང་རིན་པོ་ཆེ་ནི་བླ་སྤྲུལ་གྱི་གྲས་ནས་གཅིག་ཡིན། དེའི་ཕྱིར་འཁྲུངས་སྐར་གྱི་དུས་བཟང་སྲུང་གཙི་བྱ་དགོས་སམ་ཞེ་ན། མང་པོར་ཡིན་ནའང་ང་ལ་དེ་ལྟར་མིན། ང་ལ་ནི་ཁོང་ནི་༸རྒྱལ་དབང་ཐམས་ཅད་མཁྱེན་པའི་བཀའ་དགོངས་ལ་ཤར་བསྐྱོར་བྱེད་མི་ཞིག་དང་། དགེ་སློང་སྙོམས་ཆུང་མང་ཐོས་འདུལ་འཛིན་པ། བོད་ཀྱི་ལུགས་གཉིས་གནས་སྟངས་ཉག་ཕྲ་བའི་སྐབས་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་བྱེད་མི། སྐད་རིགས་སྣ་ཚོགས་ལ་རྩེར་སོན་གྱི་བྱང་ཆ་ཡོད་པའི་ལོ་ཙཱ་བ་ཆེན་པོ། གཞུང་ལུགས་ཀྱི་ཟབ་ས་ནས་རྟོགས་ཅིང་སྨྲ་བ་ལ་དབང་འབྱོར་བ། སྙིགས་མའི་དུས་འདིར་མཁས་པའི་ཡོན་ཏན་དགུ་དང་ལྡན་པའི་འདྲེན་པའི་དབང་པོ།  སྤྱི་དོན་ལ་རུ་ངར་ཞིང་སྤྱི་རྟ་སྒལ་རལ་གཏོང་བསམ་བྱེད་མི་རྣམས་ལ་རྒོལ་བ་དང་ཚར་གཅོད་ཀྱི་སྙིང་སྟོབས་ལྡན་པ་སོགས་ཀྱི་ཡོན་ཏན་མངའ་བས། སྐུའི་འཁྲུངས་སྐར་མདུན་དུ་བསུ། དགའ་སྤྲོས་མདུན་དུ་བསུ་བཞིན་ཡོད། འཁྲུངས་སྐར་ལ་བཀྲ་ཤིས་བདེ་ལེགས། སྐུ་ཚེ་མི་ཤིགས་བསྐལ་བརྒྱར་བརྟན་དུ་བཞུགས་སུ་གསོལ་ལོ།།