རྒྱ་གར་ནང་རིམས་ནད་ཀྱི་གནས་སྟངས་ཇེ་ལེགས་སུ་འགྲོ་ཡི་འདུག

འདས་པའི་བདུན་ཕྲག་གཅིག་རིང་བོད་མི་ ༣༣ ཙམ་ལ་ཏོག་དབྱིབས་རིམས་ནད་འགོས་ཡོད་ཀྱང་། བོད་མི་གཅིག་ཀྱང་རྐྱེན་འདས་སུ་ཕྱིན་མེད་པ་རེད་འདུག

ཁ་སང་ཉིན་རྒྱབ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསར་བསྒྲགས་ཐེངས་ ༨༤ སྤེལ་བ་ལྟར་ན། འདས་པའི་བདུན་ཕྲག་ནང་རྒྱ་གར་ནང་གི་ས་གནས་ ༩ དང་བལ་ཡུལ་གྱི་ས་གནས་གྲངས་ ༡ ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༦༠ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༡༤༥ བཅས་ཁྱོན་བསྡོམས་ཟུར་བཀག་ཏུ་སྡོད་མཁན་མི་གྲངས་ ༢༠༥  ཡོད་པ་དང་། རྒྱ་གར་ནང་བོད་མི་ ༣༣ ཙམ་ལ་ཏོག་དབྱིབས་རིམས་ནད་འགོས་ཡོད་རེད་པ་འདུག

གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། བོད་མི་རྣམས་ཀྱིས་སོ་སོ་དང་། ནང་མི། སྤྱི་ཚོགས་སོགས་ཀྱི་བདེ་འཇགས་དང་ཁེ་ཕན་གྱི་སླད་དུ། ཁ་རས་གྱོན་པ་དང་། སྤྱི་ཚོགས་རྒྱང་སྐྱེད་སོགས་བྱས་ཏེ་ནད་ཡམས་ལ་སྔོན་འགོག་བྱ་དགོས་པ་དང་། སྤྱོད་ལམ་དང་ཟས་རིགས་བརྟེན་ཚུལ་གྱི་དབང་གིས་ནད་རིགས་མང་པོ་ཞིག་བྱུང་གི་ཡོད་སྟབས། ཀུན་སྤྱོད་ལེགས་པོ་དང་དམིགས་བསལ་ཟས་རིགས་ལེགས་པོར་རོལ་དགོས་པ། དེ་བཞིན་འཕྲོད་བསྟེན་གྱི་སླད་དུ་དུས་ཐོག་གཉིད་ཉལ་དགོས་པ་དང་། ལུས་ཕུང་སོགས་དུས་ཐོག་ཏུ་གཙང་བཀྲུ་བྱས་ནས་རིམས་ནད་ལ་དོགས་ཟོན་དགོས་སྐོར་སོགས་ཀྱི་ལམ་སྟོན་གནང་སོང་།

ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། རྒྱ་གར་ནང་ཏོག་དབྱིབས་རིམས་ནད་ཀྱི་གནས་སྟངས་ཇེ་ལེགས་སུ་འགྲོ་མུས་ཡིན་ཡང་། ང་ཚོས་ནད་ཡམས་རྩ་མེད་དུ་བཏང་ཐུབ་མེད་པའི་ཁར། ཉེ་ལམ་ཨུ་རུ་སུ་སོགས་ནས་ནད་ཡམས་ཁྱབ་གདལ་ཤུགས་ཆེན་ཕྱིན་ཏེ། འགོག་ཁབ་མ་བརྒྱབ་པའི་མི་མང་པོ་ཞིག་རྐྱེན་འདས་སུ་འགྲོ་མུས་ཡིན་སྟབས། བོད་མིའི་ཁྲོད་དུ་སྔོན་འགོག་སྨན་ཁབ་མ་བརྒྱབ་པའི་རིགས་ཀྱིས། གང་མགྱོགས་སྔོན་འགོག་སྨན་ཁབ་བརྒྱག་རྒྱུ་གཙོ་བོ་ཡིན་པ་དང་། རིམས་ནད་ཀྱི་སྔོན་འགོག་གཞིར་བཟུང་ནས། རང་ཉིད་ཀྱི་སྡོད་གནས་སོགས་སུ་མཁའ་རླུང་གཙང་མའི་ཁོར་ཡུག་དགོས་གལ་ཆེ་བ་དང་། བོད་མི་མང་པོ་ཞིག་དགུན་ཚོང་ལ་སྐྱོད་མུས་ཡིན་པས། དགུན་ཚོང་ལ་སྐྱོད་མཁན་བོད་མི་ཚོས་ནད་ཡམས་སོགས་ལ་དོགས་ཟོན་བྱས་ཏེ། གལ་ཏེ་ནད་རྟགས་སོགས་ཐོན་ཚེ། གང་མགྱོགས་སྨན་ཁང་ལ་བརྟེན་གཏུགས་བྱ་དགོས་སྐོར་གྱི་ལམ་སྟོན་སོགས་གནང་བྱུང་།

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་  ༦༧༦༩ བྱུང་བའི་ཁྲོད་དྲག་སྐྱེད་ཟིན་པ་ ༦༥༧༩ དང་། རྐྱེན་འདས་སུ་ཕྱིན་པ་༡༥༥ ། ད་ལྟ་ཏོག་ནད་ཀྱིས་མནར་བཞིན་པའི་བོད་མི་  ༣༥ ཡོད་འདུག དེ་བཞིན་རྒྱ་གར་ནང་ཏོག་དབྱིབས་འགོག་ཁབ་གཉིས་ཀ་བརྒྱབ་ཟིན་པའི་མི་གྲངས་  ༤༤༥༣༤  དང་། དང་པོ་བརྒྱབ་ཟིན་པའི་མི་གྲངས་ ༦༧༧༢ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པའི་མི་  ༦༩༨༠ ཡོད་འདུག དང་པོ་བརྒྱབ་ཟིན་པའི་མི་གྲངས ༤༨ ཙམ་ཡོད་པ་རེད་འདུག

གསར་འགོད་པ། དཔལ་ལྡན།