སྲིད་སྐྱོང་མཆོག་གིས་ང་དགུ་ལོ་ནས་བོད་མིའི་མི་འབོར་ས་ཡ་དྲུག་ཡིན་པ་དང་ད་ལྟའང་དེ་ག་རང་ཡིན་པས། བོད་ཀྱི་སྲིད་ཇུས་ཉམས་ཞིབ་ཁང་གིས་བོད་ནང་གི་བོད་མིའི་མི་འབོར་འཚོལ་ཞིབ་དང་ལོ་རྗེས་མ་ནས་བཙན་བྱོལ་བོད་མིའི་མི་འབོར་གྱི་གྲངས་ཚད་བསྡུ་ལེན་གནང་རྒྱུ་ཡིན་སྐོར་གསུངས་སོང་།
དེ་རིང་སྔ་དྲོ་ཆུ་ཚོད་ ༩ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། ནང་སྲིད་ལས་ཁུངས་ཀྱི་གོ་སྒྲིག་འོག བཙན་བྱོལ་བོད་མིའི་ས་གནས་མགོ་འཛིན་རྣམ་པའི་འཛིན་སྐྱོང་ཚོགས་ཆེན་ ༡༤ པ་དབུ་འཛུགས་ཞུས་སོང་བ་དང་། མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་པའི་རྒྱ་བལ་འབྲུག་གསུམ་ནང་བཙན་བྱོལ་བོད་མིའི་ས་གནས་མགོ་འཛིན་གྲངས་ ༤༤ ཡོད་པ་ལས་ས་གནས་མགོ་འཛིན་དང་འཐུས་ཚབ་གྲངས་ ༤༣ གྱིས་མཉམ་ཞུགས་དང་། ནང་སྲིད་ལས་ཁུངས་ཀྱི་དྲུང་ཆེ་དང་ཟུང་དྲུང་། དེ་བཞིན།་སྲི་ཞུའི་ལས་བྱེད་དང་གསར་འགོད་པ་བཅས་འཛོམས་ཡོད་པ་རེད།
སྐབས་དེར་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས། ཚོགས་ཆེན་དབུ་འཛུགས་ཀྱི་གསུང་སྐབས། སྤྱིར་བཏང་ནང་སྲིད་ལས་ཁུངས་ཀྱི་ཁྱབ་ཁོངས་བཙན་བྱོལ་བོད་མིའི་ས་གནས་མགོ་འཛིན་རྣམ་པའི་འཛིན་སྐྱོང་གི་ཚོགས་ཆེན་དེ་བཞིན། ལོ་རེའི་མཚམས་སུ་འཚོགས་གཏན་འཁེལ་ཡོད་པ་ལྟར་ཚོགས་པ་ཞིག་ཡིན་པ་དང་། ས་གནས་མགོ་འཛིན་རྣམ་པའི་ཚོགས་ཆེན་དེ་ནི་བོད་མིའི་སྒྲིག་འཛུགས་ཀྱི་ལས་དོན་ཚགས་ཚུད་དང་འཕེལ་རྒྱས་འགྲོ་བར་ཕན་ཐོགས་ཆེ་བས། ལོ་གཅིག་ཀྱང་ཆད་ལྷག་མེད་པར་ཚོགས་ཆེན་བསྡུ་སྐོང་བྱས་ཤིང་། འདས་ལོར་ཏོག་དབྱིབས་གཉན་རིམས་ཀྱི་ཛ་དྲག་གི་དཀའ་ངལ་འཕྲད་ཀྱང་དྲ་ལམ་བརྒྱུད་ནས་ཚོགས་ཆེན་ཚོགས་ཡོད་པའི་རྒྱབ་ལྗོངས་སོགས་ངོ་སྤྲོད་དང་སྦྲགས། ད་རེས་ཀྱི་ཚོགས་ཆེན་ལ་གྲུབ་འབྲས་གཡུར་དུ་སྨིན་པའི་སྨོན་ལམ་བཅས་ཞུས་གནང་སོང་།
སྲིད་སྐྱོང་སྤེན་པ་ཚེ་རིང་མཆོག་གིས། ས་གནས་མགོ་འཛིན་རྣམ་པ་ནི་ནང་སྲིད་ཙམ་དུ་མ་ཟད། བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་ཚང་མའི་ཚབ་བྱས་ཏེ། ཉིན་རེར་མི་མང་དང་འབྲེལ་འདྲིས་ཀྱིས་དཀའ་ངལ་སེལ་བའི་ཕྱག་ལས་གནང་དགོས་ཡོད་དུས་ལས་སླ་པོ་མེད་ལ། ལས་ཀ་ཁག་པོ་རེད། འོན་ཀྱང་། ཁྱེད་རྣམ་པ་སོ་སོ་རང་ཉིད་ཀྱིས་དང་དུ་བླངས་ནས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པར་ཞུགས་པ་དང་། ད་སྔ་བར་རང་ཉིད་ཀྱི་ཤེས་འཇོན་གཉིས་ལ་དཔག་པའི་མི་མང་གི་དཀལ་ངལ་སེལ་སླད་སྐུ་ལས་མང་པོ་བསྐྱོན་ཡོད་པ་དང་ད་དུང་ཡང་ཕྱག་ལས་གནང་རྒྱུ་མང་པོ་ལྷག་བསྡད་ཡོད་ཅེས་དང་། ད་རེས་ཀྱི་ཚོགས་ཆེན་ནི་བཀའ་ཤག་སྐབས་བཅུ་དྲུག་པའི་ས་གནས་མགོ་འཛིན་རྣམ་པ་དང་ལྷན་དུ་ཚོགས་འདུ་ཐོག་མ་ཆགས་ཀྱི་ཡོད་སྟབས། རྒྱ་གར་ནང་གི་གཞིས་ཆགས་ཁག་ཏུ་སྲིད་སྐྱོང་གཙོས་པའི་འབྲེལ་ཡོད་བཀའ་བློན་རྣམ་པ་སྔ་ཕྱི་བསླེབས་ཐུབ་པ་དང་། བལ་ཡུལ་དང་འབྲུག་ནང་འགྲོ་རྒྱུ་ཁག་པོ་ཡིན་སྟབས། ད་རེས་ཚོགས་ཆེན་གྱི་སྔ་དགོང་གང་རུང་ཞིག་ནས་དུས་ཚོད་བཏོན་ཏེ། བལ་ཡུལ་དང་འབྲུག་གི་ས་གནས་མགོ་འཛིན་གཉིས་ལ་ཟུར་དུ་ཐུག་འཕྲད་ཀྱིས་བཀའ་མོལ་གནང་རྒྱུ་ཡིན་སྐོར་དང་། གཞན་ཡང་ས་གནས་ཀྱི་དཀའ་ངལ་བྱེ་བྲག་པ་དེ་ལོ་ཁོར་མོ་ཡུག་གི་ལས་དོན་ཞིག་ཆགས་ཀྱི་ཡོད་སྟབས། ད་རེས་ཚོགས་ཆེན་སྟེང་ས་གནས་རེ་རེའི་དཀའ་ངལ་གྱི་སྐོར་ཞུ་མ་དགོས་པར་གནང་རྒྱུ་དང་། ད་རེས་གཙོ་བོ་བཀའ་ཤག་སྐབས་བཅུ་དྲུག་པའི་ལས་དོན་ཚགས་ཚུད་ཡོང་སླད་དབུས་ས་གཉིས་ཀྱི་འགྲོ་ལུགས་འགྲོ་སྟངས་ཡག་པོ་ཞིག་བཟོ་རྒྱུ་ཡིན་སྐོར་སོགས་གསུངས་སོང་།
ཡང་སྲིད་སྐྱོང་མཆོག་གིས། ད་རེས་ཚོགས་ཆེན་སྟེང་མི་མང་ལ་དངོས་སུ་ཐུགས་ཕན་གསོ་བ་དང་དགོས་མཁོ་སྒྲུབ་ཐུབ་པའི་འཆར་གཞི་སྒྲིག་དགོས་པ་དང་། ལྷག་པར་དུ་ནང་སྲིད་དང་ས་གནས་མགོ་འཛིན་རྣམ་པས་ཉམ་ཐག་དང་ནད་བཅོང་། རྒས་འཁོགས་སོགས་ལ་ལྟ་སྐྱོང་གནང་རྒྱུ་ཧ་ཅང་གལ་ཆེན་ཡིན་པ་དང་ཉམ་ཐག་གི་ཐོའི་ནང་མ་ཚུད་པ་རྣམས་ཚུད་པར་བྱ་དགོས་པ་དང་། ཉམ་ཐག་གི་གྲངས་འབོར་ཇེ་ཉུང་དུ་འགྲོ་ཡི་མེད་པ་དེས་ཉམ་ཐག་གི་ལས་དོན་ག་འདྲ་འགྲོ་ཡི་ཡོད་མེད་ཀྱི་དོགས་གཞི་ཆགས་ཡོད་པས། ནད་པ་དང་ཉམ་ཐག་ཁག་ཅིག་ལ་ཉམ་ཐག་ལས་ལྷག་གི་རོགས་པ་བྱ་དགོས་སྐོར། དེང་སང་བོད་པའི་སྤྱི་ཚོགས་ནང་སྔར་མེད་པའི་ནད་གཞི་མང་པོ་ཡོང་གི་ཡོད་པ་དང་། བོད་མིའི་སྒྲིག་འཛུགས་དང་མི་སྒེར་གཉིས་ནས་སྔོན་འགོག་སློབ་གྲྭ་དང་ཏོག་དབྱིབས་སྨན་གཅོས་ལྟ་སྐྱོང་། སྨན་ཁང་སོགས་བཙུགས་ཏེ། མི་མང་པོ་ཞིག་དེའི་ནང་ཚུད་ཀྱི་ཡོད་ཀྱང་། ད་དུང་ཡང་དེ་དག་གི་ནང་མ་ཚུད་པ་དང་བོད་མིའི་སྒྲིག་འཛུགས་ངོས་ནས་མཐུན་སྦྱོར་ཚད་ལྡན་སྦྱོར་མ་ཐུབ་པའི་གནས་སྟངས་དག་ཚད་དང་ལྡན་པ་བཟོས་ཏེ། ཉམ་ཐག་དང་དབང་པོ་སྐྱོན་ཅན་གྱི་གྲངས་ཐོ་ཚད་དང་ལྡན་པ་དགོས་སྐོར། རང་བཙན་ལྡན་པའི་རྒྱལ་ཁབ་གང་ཞིག་ཡིན་རུང་ལོ་བཅུ་རེའི་མཚམས་སུ་རང་གི་མི་འབོར་ཞིབ་བཤེར་བྱས་ཏེ་མི་འབོར་གྱི་གྲངས་ཚད་ཏག་ཏག་ཡོད་པ་དང་། ང་ཚོ་བོད་མི་སྐྱབས་བཅོལ་དུ་འབྱོར་ནས་ལོ་ངོ་དྲུག་ཅུ་འཁོར་བསྡད་པ་དང་། ཕྱི་ལོ་ ༡༩༥༩ ལོར་བོད་པའི་མི་འབོར་ས་ཡ་དྲུག་དང་ཕྱི་ལོ་ ༢༠༢༡ ལོར་ས་ཡ་དྲུག་བྱས་ནས་བསྡད་ཡོད་པར་བརྟེན། བོད་ཀྱི་སྲིད་ཇུས་ཉམས་ཞིབ་ཁང་བརྒྱུད་བོད་ནང་གི་བོད་མིའི་མི་འབོར་གྱི་གྲངས་ཚད་ལེན་ཐབས་བྱེད་ཀྱི་ཡོད་པ་དང་ལོ་རྗེས་མའི་ནང་བཙན་བྱོལ་ནང་གི་མི་འབོར་གྱི་གྲངས་ཚད་ལེན་རྒྱུ་ཡིན་སྟབས། ས་གནས་མགོ་འཛིན་ཚང་མས་བོད་མི་གཅིག་ཀྱང་མ་ལུས་པར་གྲངས་ཐོ་བསྡུ་རྒྱུ་གལ་ཆེན་ཡིན་སྐོར་སོགས་གསུངས་སོང་།
ད་རེས་བཙན་བྱོལ་བོད་མིའི་ས་གནས་གཞིས་མགོ་ཁག་གི་འཛིན་སྐྱོང་ཚོགས་ཆེན་དེ་རིང་ནས་ཚེས་ ༡༡ བར་ཉིན་གསུམ་རིང་འཚོག་གི་ཡོད་ཅིང་། ཚོགས་ཆེན་སྟེང་གྲོས་གཞི་ ༡༢ ཡོད་པ་དག་ནི། ས་གནས་མགོ་འཛིན་རྣམ་པས་བོད་མིའི་སྒྲིག་འཛུགས་དང་ཁྱབ་ཁོངས་མི་མང་ལ་འགན་ཁུར་དང་ལན་འདེབས་གནང་ཕྱོགས་དང་། འབྲེལ་ཡོད་མངའ་སྡེ་གཞུང་མང་གཉིས་ལ་འབྲེལ་ལམ་དམ་ཟབ་འཇོག་ཕྱོགས། ས་གནས་བོད་མི་སྤྱི་ཡོངས་ཀྱི་གནས་སྟངས་དང་མི་འབོར་སྐྱེས་འདས་སོགས་ཀྱི་གྲངས་ཚད་ཉར་ཚགས་སྐོར། ས་ཁང་བདག་འཛིན་དང་འབྲེལ་བའི་དཀལ་ངལ་དང་སྒྲིག་གཞི་བསྐྱར་བཅོས་སྐོར། གཞིས་ཆགས་སྲ་བརྟན་དང་ས་གནས་མགོ་འཛིན་གྱི་ལས་ཁུངས་ཁག་རང་ཁ་རང་གསོ་ཐུབ་ཐབས་སོགས་ཀྱི་ལས་གཞི་གསར་རྩོམ་སྐོར།བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་ཇུས་དང་འབྲེལ་བའི་དཀའ་ངལ་སེལ་ཐབས། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པ་དྲ་ཐོག་འཛིན་སྐྱོང་(e-governance)གནང་ཕྱོགས་དང་འབྲེལ་དགོངས་ཚུལ་དང་དབུས་སའི་ལས་ཁུངས་ཁག་གི་ཡིག་ཆ་ཚད་ལྡན་དུ་ཉར་ཚགས་བྱེད་ཕྱོགས། ས་གནས་ལས་བྱེད་ཀྱི་སྒྲིག་གཞིའི་དཀའ་ངལ་སེལ་ཐབས། བོད་མི་སུད་ཚོང་བ་རྣམས་ལ་དགུན་ཚོང་དང་འབྲེལ་བའི་དཀའ་ངལ་སེལ་ཐབས་དང་གཞིས་ཆགས་ཁག་ཏུ་དཔལ་འབྱོར་འདུ་འགོད་ཀྱི་ལས་གཞི་རྩོམ་དགོས་པའི་རིགས། གཞིས་ཆགས་ཁག་གཞུང་སྒེར་གཉིས་ཀྱི་རྒས་གསོ་ཁང་དང་སེམས་ནད་བཅོས་ཁང་ཇི་ཡོད་ལ་ནང་སྲིད་ནས་གཅིག་མཚུངས་ཀྱི་གཟིགས་རྟོག་གནང་ཕྱོགས། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ས་མིག་གཏོད་ཕྱོགས་དང་ལས་བྱེད་སྒྲིག་བཀོད་གནང་ཕྱོགས། གཞིས་ཆགས་ཀྱི་ས་ཁང་སྟོང་པའི་གྲངས་ཐོ་བསྡུ་འགོད་ཀྱིས་སྡོད་ཁང་མེད་པའི་མི་རྣམས་ལ་གཞིས་ཆགས་ཀྱི་ས་ཁང་སྟོང་པ་སྤྲོད་རྒྱུ་དང་བགོ་འགྲེམས་གནང་ཕྱོགས་བཅས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
ས་གནས་ན་དཀའ་ངལ་ཆུང་བ་དག་ཞི་བ་དང་ཆེ་བ་དག་མེད་པར་གྱུར་ཅིག།