སེ་ལུ་ཀུ་བོད་ཁྱིམ་སློབ་གྲྭ་དེ་རྒྱ་གར་གྱི་སློབ་གྲྭ་ཁག་སུམ་སྟོང་ལྷག་གི་ཁྲོད་ནས་ཨོ་ཊར་ཁན་མངའ་སྡེ་དང་ལྡེ་ར་རྡུན་རྫོང་ཁོངས་ཀྱི་རྩེ་ཕུད་སློབ་གྲྭ་ཨང་དྲུག་པ་རེད་འདུག
ལོ་ལྟར་ཤེས་ཡོན་གྱི་འཇིག་རྟེན་ ( Education world) ཞེས་པའི་རྒྱ་གར་ནང་གི་སློབ་གྲྭ་ཁག་གི་ཤེས་ཡོན་གྱི་གནས་བབ་སོགས་མཚོན་པའི་སྙན་ཐོ་ཞིག་བཏོན་གྱི་ཡོད་པ་ལྟར། རྒྱ་གར་ནང་གི་སློབ་གྲྭ་ཁག་གི་ཕྱི་ལོ་ ༢༠༢༠ དང་ ༢༠༢༡ ལོའི་ཨང་རིམ་ཁྲོད། ལྡེ་ར་རྡུན་དུ་རྟེན་གཞི་བྱས་པའི་སེ་ལ་ཀུ་བོད་ཁྱིམ་དེ། ཨོ་ཊར་ཁན་མངའ་སྡེའི་སློབ་གྲྭ་ཁག་གི་ཁྲོད་ཨང་རིམ་ ༦ པ་དང་། ལྡེ་རུ་ལྡུན་རྫོང་ཁོངས་ཀྱི་ཨང་ ༦ པ། དེ་བཞིན་རྒྱ་གར་རྒྱལ་ཡོངས་ཀྱི་སློབ་གྲྭ་ཁག་གི་ཁྲོད་ནས་ཨང་རིམ་ ༡༣༦ པར་ཚུད་ཡོད་པ་རེད།
དེའི་ཐད་སེ་ལ་ཀུ་བོད་ཁྱིམ་སློབ་གྲྭའི་སློབ་སྤྱི་རྒན་འབྲུག་ཚེ་རིང་ལགས་སུ་བཀའ་འདྲི་ཞུས་སྐབས། སློབ་གྲྭ་རྩེ་ཕུད་འདེམས་ཕྱོགས་ནི་རྒྱ་གར་ནང་གི་སློབ་གྲྭ་ཁག་སུམ་སྟོང་ལྷག་ལ་གནད་དོན་མི་འདྲ་བ་ ༡༤ ཡི་ཐོག་ཞིབ་འཇུག་དང་ཉམས་ཞིབ་བྱས་ཏེ་བྱུང་བ་ཞིག་ཡིན་པ་དང་། དེ་ཡང་སློབ་གྲྭའི་བྱེད་སྒོ་རྣམ་གསུམ་དང་འབྲེལ་བའི་འགེངས་ཤོག་རིགས་བཀང་སྟེ། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་(CBSE) ལ་ཕུལ་དགོས་སྐོར་དང་། དེ་མིན་འབྲེལ་ཡོད་ལས་བྱེད་དམིགས་བསལ་སློབ་གྲྭར་ཡོང་ནས་ཞིབ་འཇུག་བྱས་པ་ཞིག་མིན་པ་དང་། སློབ་གྲྭ་ཁག་ལ་ཨང་རིམ་སྤྲོད་ཕྱོགས་དེ་ཡང་སློབ་གྲྭའི་ཡིག་རྒྱུགས་ཀྱི་གྲུབ་འབྲས་གཅིག་པུ་མིན་པར། སློབ་གྲྭའི་ཤེས་ཡོན་གྱི་གནས་བབ་སོགས་ཕྱོགས་ཡོངས་ཀྱི་བྱེད་སྒོ་ཁག་ལ་གཞི་བཞག་ནས་བརྒྱ་ཆ་སྤྲོད་ཀྱི་ཡོད་པ་ཞིག་ཡིན་སྐོར་བརྗོད་བྱུང་།
ལྡེ་ར་རྡུན་དུ་ཆགས་པའི་སེ་ལ་ཀུ་བོད་ཁྱིམ་ནི། ཕྱི་ལོ་ ༢༠༠༤ ལོར་ྋགོང་ས་རྒྱལ་བ་རིན་པོ་མཆོག་གི་སྐུའི་འཁྲུངས་སྐར་དང་བསྟུན་ནས་དབུ་འབྱེད་བྱས་ཡོད་ཅིང་། ལོ་ལྟར་བོད་ཁྱིམ་སློབ་གྲྭ་ཁག་གི་འཛིན་རིམ་ལྔ་པ་ཐོན་པའི་རྩེ་ཕུད་སློབ་མ་གྲངས་ ༥༠ འདེམས་སྒྲུག་བྱེད་མུས་ཡིན་པ་དང་། དེ་བཞིན་འཛིན་རིམ་བཅུ་པ་ཐོན་པའི་ཚན་རིག་གི་སློབ་མ་རྩེ་ཕུད་རྣམས་སློབ་གྲྭ་དེར་འཛུལ་ཞུགས་བྱ་ཐུབ་ཀྱི་ཡོད་པ་རེད་ལ། ད་ལྟ་སློབ་གྲྭ་དེར་སློབ་མ་གྲངས་ ༤༢༠ ཙམ་ཡོད་ཅིང་། ལས་བྱེད་ ༥༠ ལྷག་ཡོད་པ་རེད་འདུག
གསར་འགོད་པ། དཔལ་ལྡན།
དངོས་ནས་དགའ་པོ་བྱུང་། སེ་ལ་ཀུའི་བོད་ཁྱིམ་དགེ་ལེགས་ཡོངས་ལ་འཚམས་འདྲི་དང་ཐུགས་རྗེ་ཆེ་ཞེས་ཞུ་འདོད་བྱུང་།