སྤྱི་འཐུས་ཚོགས་གཙོ་མཆོག་ནས་ཉི་ཧོང་གི་སྲིད་བློན་གསར་པར་འཚམས་འདྲི་གནང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཉི་ཧོང་གི་སྲིད་བློན་གསར་པ་སྐུ་ཞབས་ཧྥུ་མིའོ་ཀི་ཤི་ཌ་མཆོག་དང་ཁོང་གི་འགྲོ་བ་མིའི་ཐོབ་ཐང་གི་དམིགས་བསལ་སློབས་སྟོན་པ་སྐུ་ཞབས་ན་ཀ་ཏ་ནི་ལགས་སུ་འཚམས་འདྲི་གནང་འདུག

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཉེ་ཆར་ཉི་ཧོང་གི་སྲིད་བློན་སྐུ་ཞབས་ཀི་ཤི་ཌ་མཆོག་གིས་ཡུལ་དེའི་རྒྱལ་སྲུང་བློན་ཆེན་ཟུར་པ་སྐུ་ཞབས་ན་ཀ་ཏ་ནི་(Gen Nakatani) ལགས་སྲིད་བློན་མཆོག་གི་འགྲོ་བ་མིའི་ཐོབ་ཐང་གི་དམིགས་བསལ་སློབ་སྟོན་པར་བསྐོ་གཞག་གནང་བར་འཚམས་འདྲི་གནང་བའི་ནང་། སྐུ་ཉིད་ཧི་ཧོང་སྲིད་བློན་མཆོག་གི་དམིགསལ་བསལ་འགྲོ་བ་མིའི་ཐོབ་ཐང་གི་སློབ་སྟོན་པར་བསྐོ་གཞག་གནང་བར་ངས་དགའ་ཚོར་ཆེན་པོའི་ངང་འཚམས་འདྲི་ཞུ་རྒྱུ་ཡིན། སྐུ་ཉིད་བསྐོ་གཞག་གནང་བ་དེས་ཉི་ཧོང་གིས་འགྲོ་བ་མིའི་ཐོབ་ཐང་གི་གནད་དོན་ཐོག་འགན་ཁུར་གནང་གི་ཡོད་པ་མཚོན་ཡོད་པ་དང་། དེས་བོད་གཙོས་པའི་བཙན་གནོན་འོག་སྡུག་པོ་མྱངས་དང་མྱོང་བཞིན་པའི་འཛམ་གླིང་མི་མང་ས་ཡ་མང་པོར་རེ་བ་བྱིན་ཡོད། ཅེས་དང་། སྐུ་ཉིད་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་གི་ཉམས་མྱོང་དང་། མཁྱེན་ཡོན་རྣམས་གཞིར་བཞག་ཐོག སྐུ་ཉིད་ནས་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཙམ་མིན་པར། འགྲོ་བ་མིའི་ཆེ་མཐོང་དང་། ཐོབ་ཐང་གོང་སྤེལ་གཏོང་རྒྱུའི་རེ་བ་ཆེན་པོ་ཡོད། དེ་ནི་རང་དབང་དང་། དྲང་བདེན། ཞི་བདེའི་རྩ་བ་རེད། ཅེས་གསུངས་འདུག

གཞན་ཡང་ཁ་སང་ཕྱི་ཚེས་ ༣ ཉིན་སྤྱི་འཐུས་ཚོགས་གཙོ་མཆོག་ནས་ཉེ་ཆར་བདམས་ཐོན་བསྐོ་གཞག་བྱུང་བའི་ཉི་ཧོང་གི་སྲིད་བློན་གསར་པ་སྐུ་ཞབས་ཧྥུ་མིའོ་ཀི་ཤི་ཌ་ (Fumio Kishida) མཆོག་ལ་འཚམས་འདྲི་ཞུས་པའི་ནང་། ངས་འཛམ་གླིང་ཡུལ་གྲུ་གང་སར་གནས་པའི་བོད་མི་ཡོངས་དང་བོད་མི་མང་སྤྱི་འཐུས་སྐབས་ ༡༧ པའི་ཚབ་ཞུས་ཏེ་སྐུ་ཉིད་ཀྱིས་སྲིད་བློན་གྱི་འགན་འཁུར་བླངས་པར་སྙིང་ཐག་པ་ནས་འཚམས་འདྲི་ཞུ་ཡི་ཡོད་ཅེས་གསུངས་འདུག

ཡང་ཚོགས་གཙོ་མཆོག་ནས། འཛམ་གླིང་གི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་ནང་ཉི་ཧོང་གི་བཀུར་འོས་གྲོས་ཚོགས་འཐུས་མི་ ༩༣ ཡོད་པ་དེས། ཉི་ཧོང་གིས་བོད་དོན་ཐོག་གཡོ་བ་མེད་པའི་རྒྱབ་སྐྱོར་ཡོད་པ་མཚོན་ནུས་པ་མ་ཟད། དེ་ནི་བོད་མི་མང་སྤྱི་འཐུས་ལྷན་ཚོགས་ལ་མཚོན་ན་དགའ་སྤོབས་འོས་པ་ཞིག་ཀྱང་རེད། སྐུ་ཉིད་ཀྱིས་སྐུ་ཞབས་ན་ཀ་ཏ་ནི་(Gen Nakatani) མཆོག་འགྲོ་བ་མིའི་ཐོབ་ཐང་གི་དམིགས་བསལ་སློབ་སྟོན་པར་བསྐོ་གཞག་གནང་པ་དེས་བོད་དོན་ཐད་རྒྱབ་སྐྱོར་ཇེ་བརྟན་དུ་བཏང་ཡོད་པར་ངོས་ནས་ཐུགས་རྗེ་ཆེ་ཞུ། ཞེས་དང་། ངས་མ་འོངས་པར་སྐུ་ཉིད་ནས་སོ་སོའི་ཐུན་མིན་ངོ་བོ་ལྡན་པའི་དམངས་གཙོ་དང་། ཁྲིམས་ཀྱི་དབང་བསྒྱུར། འགྲོ་བ་མིའི་ཆེ་མཐོང་བཅས་གོང་འཕེལ་གྱི་ཆེད་དུ་བོད་མི་མང་སྤྱི་འཐུས་ལྷན་ཚོགས་དང་ཉི་ཧོང་གི་མི་མང་དབར་གྱི་མཛའ་འབྲེལ་སྔར་བས་སྲ་བརྟན་དང་རྒྱ་བསྐྱེད་གནང་རྒྱུའི་རེ་བ་ཞུ་ཡི་ཡོད། ཅེས་གསུངས་འདུག

ཕྱི་ལོ་ ༢༠༢༠ ལོར་ཉི་ཧོང་གི་སྲིད་བློན་སྐུ་ཞབས་ཤིན་ཛོ་ཨ་བྷེ་མཆོག་སྙུང་གཞིའི་རྐྱེན་པས་སྲིད་བློན་གྱི་ལས་གནས་ནས་རྩ་དགོངས་ཞུས་རྗེས། ཁོང་གི་ཕྱག་གཡས་པ་ལྟར་གྱུར་བའི་སྐུ་ཞབས་ཡོ་ཤི་ཧེ་དྷི་སུ་གྷ་ (Yoshihide Suga) མཆོག་སྲིད་བློན་དུ་བསྐོས་ཏེ་ལོ་གཅིག་ལྷག་འགོར་བའི་སྐབས་དང་། ཉི་ཧོང་གི་རྒྱལ་ཡོངས་འོས་བསྡུ་སླེབས་ལ་ཉེ་བ་དང་བསྟུན། གཞུང་འཛིན་གུ་ཡངས་དམངས་གཙོ་ཚོགས་པའི་མགོ་འཁྲིད་ཀྱི་འོས་མིའི་ཁོངས་སུ་ཞུགས་རྒྱུ་མིན་པའི་གསལ་བསྒྲགས་གནང་བར་བརྟེན། ཕྱི་ཟླ་ ༩ ཚེས་ ༣༡ ཉིན་བསྡུས་པའི་གཞུང་འཛིན་ཚོགས་པའི་མགོ་འཁྲིད་ཀྱི་འོས་བསྡུ་ཁྲོད་སྐུ་ཞབས་ཧྥུ་མིའོ་ཀི་ཤི་ཌ་མཆོག་ལ་རྒྱལ་ཁབ་ཐོབ་སྟེ། ཕྱི་ཟླ་ ༡༠ ཚེས་ ༤ ཉིན་ནས་ཉི་ཧོང་གི་སྲིད་བློན་གྱི་འགན་འཁུང་བླངས་ཡོད་ཅིང་། དེའི་རྗེས་ཕྱི་ཟླ་ ༡༠ ཚེས་ ༣༡ ཉིན་ཉི་ཧོང་གི་རྒྱལ་ཡོངས་འོས་བསྡུའི་སྐབས་སུ་གུ་ཡངས་དམངས་གཙོ་ཚོགས་པར་རྒྱལ་ཁ་ཐོབ་པར་བརྟེན། སྐུ་ཞབས་ཧྥུ་མིའོ་ཀི་ཤི་ཌ་མཆོག་ནས་མུ་མཐུད་ཉི་ཧོང་གི་སྲིད་བློན་གྱི་འགན་འཁུར་བླངས་ཡོད་པ་རེད།

གསར་འགོད་པ། པ་སངས་ཚེ་རིང་།