དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་ལྷོ་ནུབ་མངའ་སྡེ་ཁུལ་དུ་རླུང་འཚུབ་དྲག་པོ་(Tornado)གཡུགས་པའི་རྐྱེན་གྱིས་མི་གྲངས་ ༡༠༠ ལྷག་འདས་གྲོངས་སུ་ཕྱིན་པ་དང་། རྒྱུ་དངོས་ཕོན་ཆེན་རྩ་བརླག་ཏུ་སོང་བར་ཐུགས་གསོའི་གསུང་འཕྲིན་སྩལ་གནང་མཛད་འདུག
དེ་ཡང་༧གོང་ས་མཆོག་གིས་ཨ་རིའི་སྲིད་འཛིན་ཇོ་བྷའེ་ཌིན་ (Joe Biden) གྱི་མཚན་ཐོག་ལ་ཕུལ་བའི་གསུང་འཕྲིན་ནང་། ངོས་ནས་ཨ་རིའི་དབུས་གཞུང་དང་གོད་ཆག་འབྱུང་ཡུལ་གྱི་མངའ་སྡེའི་སྲིད་གཞུང་རྣམས་ཀྱིས་གང་ཐུབ་ཅི་ཐུབ་ཀྱིས་གནོད་འཚེ་ཕོག་པའི་མི་རྣམས་ལ་འཕྲལ་དུ་ངལ་སེལ་དང་རོགས་སྐྱོར་གནང་བཞིན་པར་བསྔགས་བརྗོད་ཞུ་ཡི་ཡོད། ཅེས་དང་། ངོས་རང་དེ་སྔ་གནོད་འཚེ་ཕོག་ཡུལ་གྱི་མངའ་སྡེའི་ཁྲོད་ནས་རེ་ཤས་ནང་བསྐྱོད་རྒྱུའི་གོ་སྐབས་བྱུང་ཡོད། ངོས་ནས་ད་ལན་གྱི་རླུང་འཚུབ་དྲག་པོའི་རྐྱེན་གྱིས་འདས་གྲོངས་སུ་ཕྱིན་པ་རྣམས་ཀྱི་ཤུལ་ལུས་ནང་མི་དང་། གོད་ཆག་ཀྱིས་ཕོག་ཐུག་བྱུང་བའི་མི་ཐམས་ཅད་ལ་སེམས་གསོ་ཞུ་ཡི་ཡོད། ཅེས་གསུངས་འདུག
རྒྱལ་སྤྱིའི་གསར་ལམ་ཁག་ཏུ་ཐོན་བཞིན་པའི་གནས་ཚུལ་ལྟར་ན། ཁེ་ཉིན་ཕྱི་ཚེས་ ༡༡ ཉིན་གྱི་ཨ་རིའི་མཚན་གུང་ཙམ་ལ་ཡུལ་དེའི་ལྷོ་ནུབ་མངའ་སྡེ་ཨར་ཀེན་སེ་སི་(Arkansas)དང་། ཨི་ལི་ནོ་ཨི་སི་(Illinois)། ཀེན་ཊ་ཀི (Kentucky)། མི་སོ་རི་(Missouri)། ཊེ་ནེ་སི་(Tennessee) བཅས་ནང་ཉུང་མཐར་རླུང་འཚུབ་ཆེ་ཆུང་ ༣༠ ལྷག་གཡུགས་ཏེ། གནོད་འཚེ་ཆེ་ཤོས་ཕོག་ཡུལ་གྱི་ཀེན་ཊ་ཀི་མངའ་སྡེའི་མེ་གསོད་རུ་ཁག་གི་ལས་ཁུངས་དང་། ཉེན་རྟོག་ལས་ཁུངས། བཟོ་གྲྭ་སོགས་གཞུང་སྒེར་གྱི་ཁང་ཁྱིམ་ཕལ་ཆེ་བ་རྩ་མེད་བཏང་སྟེ། ད་བར་ཉུང་མཐར་མི་གྲངས་ ༨༠ ལྷག་འདས་གྲོངས་སུ་ཕྱིན་ཡོད་འདུག་ལ། མི་གྲངས་དེ་ལས་མང་བ་གར་སོང་ཆ་མེད་དུ་གྱུར་ཡོད་འདུག
ཨ་རིའི་སྲིད་འཛིན་བྷའེ་ཌིན་མཆོག་ཀྱིས་ཀྱང་དབུས་གཞུང་ངོས་ནས་ད་ལན་རང་བྱུང་གོད་ཆག་འབྱུང་ཡུལ་གྱི་མངའ་སྡེ་ཁག་ལ་རོགས་སྐྱོར་གང་ཐུབ་གནང་རྒྱུ་ཡིན་སྐོར་གསུངས་འདུག་པ་མ་ཟད། ཀེན་ཊ་ཀི་མངའ་སྡེའི་ནང་ཛ་དྲག་གནས་སྟངས་གསལ་བསྒྲགས་བྱས་ཏེ། ད་ལྟའི་ཆར་དབུས་གཞུང་གི་རྒྱལ་ཡོངས་སྲུང་སྐྱོབ་མི་སྣ་ ༣༠༠ ལྷག་གནོད་འཚེ་ཕོག་ཡུལ་གྱི་ས་ཁུལ་ལ་མངག་གཏོག་བྱས་ཡོད་འདུག གཞན་ཡང་མངའ་སྡེའི་གཞུང་འཛིན་པ་སྐུ་ཞབས་བྷེ་ཤིར་(Beshear) གྱིས་གསར་འགོད་གསལ་བསྒྲགས་སྟེང་ད་ལན་གྱི་རླུང་འཚུབ་འདི་ནི་མངའ་སྡེའི་ལོ་རྒྱུས་ཁྲོད་ཀྱི་རླུང་འཚུབ་དོན་རྐྱེན་ཚབས་ཆེ་ཤོས་དེ་ཡིན་པ་དང་། ད་ལྟའི་ཆར་མངའ་སྡེ་དེའི་ནང་འདས་གྲོངས་སུ་ཕྱིན་པའི་མི་གྲངས་ ༨༠ མ་གཏོགས་མེད་ཀྱང་གྲངས་འབོར་དེ་ ༡༠༠ ལ་འཕར་ཉེན་ཡོད་པ་དང་། རླུང་འཚུབ་གཡུག་སའི་ཁུལ་དུ་རྩ་གཏོར་མ་སོང་བའི་ཁང་ཁྱིམ་གཅིག་ཀྱང་ལྷག་མེད་སྐོར་འགྲེལ་བརྗོད་བྱས་ཡོད་འདུག
The damaged courthouse and other buildings in downtown Mayfield are seen Saturday
དེ་ཡང་རླུང་འཚུབ་ཀྱི་གནོད་འཚེ་ཆེ་ཤོས་ཕོག་ཡུལ་ཀེན་ཊ་ཀི་མངའ་སྡེའི་མེ་ཧྥིལ་ཌི་(Mayfield) གྲོང་ཚོའི་ནང་ཡོད་པའི་བཞུ་མར་གྱི་བཟོ་གྲྭ་ཞིག་ཡོད་པ་དེར་རླུང་འཚུབ་དྲག་པོ་གཡུགས་ཏེ་བཟོ་གྲྭ་དེ་ཉིད་རྨེག་མེད་དུ་བཏང་ཡོད་ལ། རླུང་འཚུབ་གཡུག་པའི་སྐབས་དེར་བཟོ་གྲྭ་དེའི་ནང་ལས་མི་ ༡༡༠ ཡོད་པའི་ཁྲོད་ནས། མངའ་སྡེའི་གཞུང་འཛིན་པས་ད་བར་ལས་མི་ ༤༠ ལྷག་མ་གཏོགས་སྲོག་སྐྱོབ་ཐུབ་མེད་སྐོར་བཤད་ཡོད་ནའང་། བཟོ་གྲྭའི་མགྲིན་ཚབ་པ་ཞིག་གིས་རའོ་ཊར་(Reuters) གསར་ཁང་ལ། ལས་མིའི་ཁྲོད་ནས་མི་གྲངས་ ༨ འདས་གྲོངས་སུ་ཕྱིན་ཡོད་པ་དང་། ལས་མི་ ༨ ད་དུང་རྩད་གཅོད་ཐུབ་མེད་སྐོར་བརྗོད་ཡོད་པར་བརྟེན། འདས་གྲོངས་སུ་ཕྱིན་པའི་ལས་མིའི་གྲངས་འབོར་དེ་ཇེ་ཉུང་དུ་སོང་ཡོད་པ་རེད། དེ་བཞིན་ཨི་ལི་ནོ་ཨི་སི་མངའ་སྡེའི་ནང་མཚོན་ན། རླུང་འཚུབ་ཀྱི་རྐྱེན་པས་ཨེ་མེ་ཛོན་(Amazon) གྱི་ཚོང་ཟོག་འཇོག་ཁང་ཞིག་མར་བརྡིབས་ཏེ་ལས་མི་གྲངས་ ༦ རྐྱེན་འདས་སུ་ཕྱིན་འདུག་ལ། གཞན་ཡང་ཊེ་ནེ་སིས་དང་མངའ་སྡེ་གཞན་ནང་མི་གྲངས་རེ་ཟུང་རྐྱེན་འདས་དང་མང་པོ་ཞིག་གར་སོང་ཆ་མེད་དུ་གྱུར་ཡོད་འདུག
གསར་འགོད་པ། པ་སངས་ཚེ་རིང་།
