དེ་རིང་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཉེ་བའི་ཟླ་གསུམ་ལྷག་རིང་གི་བོད་དོན་གོ་རྟོགས་ཀྱི་སྐོར་སྐྱོད་ལས་འགུལ་མཇུག་སྒྲིལ་གནང་སོང་།
དེ་རིང་ཉིན་རྒྱབ་ཆུ་ཚོད་ ༣ སྟེང་བཞུགས་སྒར་དྷ་རམ་ས་ལའི་ (Club House) གསོལ་མགྲོན་ཁང་གི་ཚོགས་ཁང་དུ། ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་བོད་དོན་འཐབ་རྩོད་པ་དང་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས། ཉིན་གྲངས་ ༡༢༧ རིང་ཧི་མ་ལ་ཡའི་རི་བརྒྱུད་དུ་ཆགས་པའི་རྒྱ་གར་གྱི་མངའ་སྡེ་ ༥ ནང་བོད་དོན་ལས་འགུལ་མཇུག་སྒྲིལ་བའི་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་།
བསྟན་འཛིན་བརྩོན་འགྲུས་ལགས་ཀྱི་གསལ་འགོད་བསྒྲགས་གཏམ་ནང་། འདི་ལོའི་ཕྱི་ཟླ་ ༨ ཚེས་ ༡༤ ཉིན་ནས་མགོ་འཛུགས་ཀྱིས་ཧི་མ་ལ་ཡའི་རི་བརྒྱུད་ཀྱི་རྒྱ་གར་མངའ་སྡེ་ཧི་མ་ཅལ་གྱི་གཙོས་ཨོ་ཊར་ཁན་དང་འབྲས་ལྗོངས། ཨ་རུ་ན་ཅལ་དང་ཨ་སམ་བཅས་ཀྱི་ནང་བོད་དོན་གོ་རྟོགས་སྤེལ་ཐབས་ཀྱི་སྐོར་སྐྱོད་ལས་འགུལ་སྤེལ་ཡོད་པ་དང་། སྐོར་སྐྱོད་སྐབས་བརྩོན་འགྲུས་ལགས་ཀྱིས། རྒྱ་གར་གྱིས་བཟོ་བསྐྲུན་བྱས་པའི་སྐུ་མདུན་ཞེས་པའི་གློག་བརྙན་ཞིག་གཟིགས་འབུལ་གྱིས་ཏེ། རྒྱ་ནག་གིས་བོད་ལ་བཙན་བཟུང་བྱས་པའི་ལོ་རྒྱུས་ཀྱི་བརྒྱུད་རིམ་ངོ་སྤྲོད་དང་། ཡང་མཚམས་རེར་གཞོན་སྐྱེས་རྣམས་ལ་རྩོམ་ཡིག་འབྲི་ཐབས་འཁྲིད་པ་དང་ཡང་ན་སྙན་ངག་གྱར་འདོན་སོགས་བོད་དོན་དང་འབྲེལ་བའི་ལས་འགུལ་སྤེལ་ཡོད་སྐོར་དང་།
ཉིན་གྲངས་ ༡༢༧ རིང་གི་བོད་དོན་སྐོར་སྐྱོད་ཀྱི་འགྲུལ་བཞུད་དེའི་ཁྲོད། བསྟན་འཛིན་བརྩོན་འགྲུས་ལགས་སུ་ས་མཚམས་ཀྱི་མི་མང་དཀྱུས་མ་ཚོར་རྒྱ་ནག་གི་མངའ་ཁོངས་རྒྱ་སྐྱེད་དང་ས་མཚམས་ཀྱི་འགུལ་སྐྱོད་རིགས་ཀྱི་སྐོར་ལ་གོ་རྟོགས་ཞེ་དྲགས་མེད་པའི་མྱོང་ཚོར་བྱུང་ཡོད་སྐོར། དེ་བཞིན། ཧི་མ་ལ་ཡའི་རི་བརྒྱུད་ཀྱི་མི་ཕལ་མོ་ཆེས་རྒྱ་གར་དང་འབྲེལ་བའི་ཧི་མ་ལ་ཡའི་ས་མཚམས་ཟེར་དུས། ཚང་མས་ཁ་གཅིག་གྲགས་ཐོག་རྒྱ་གར་དང་བོད་ཀྱི་ས་མཚམས་ཟེར་གྱི་ཡོད་སྐོར་སོགས་བརྗོད་འདུག
བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཉིན་གྲངས་ ༡༢༧ རིང་བོད་དོན་སྐོར་ལ་གོ་རྟོགས་སྤེལ་ཐབས་ཀྱི་སྐོར་སྐྱོད་གནང་བའི་ཁྲོད། རང་ཉིད་ཀྱི་མྱོང་ཚོར་སྐོར་ལ། ཧི་མ་ལ་ཡའི་རི་བརྒྱུད་ཀྱི་མི་ཚང་མར་ལྡན་ཞིང་། རང་ཉིད་ཀྱི་རིག་གཞུང་ལ་དགའ་སྤོབས་ཆེ་ནའང་། ཁོ་ཚོ་ཕལ་ཆེ་བར་རང་ཉིད་དེང་རབས་ཀྱི་རྗེས་ཟིན་གྱི་མེད་པའི་མྱོང་ཚོར་ཡོད་པ་དང་། དམིགས་བསལ་ཧི་མ་ལ་ཡའི་རི་བརྒྱུད་ཀྱི་ས་གནས་ཁག་གི་ཕ་སྐད་ལ་འགྱུར་བ་ཤུགས་ཆེན་ཐེབས་ཏེ། མ་འོངས་ལོ་རབས་འགའི་ནང་ཁོ་ཚོའི་ཕ་སྐད་འཇིག་སྲིད་པའི་སེམས་འཚབ་ཡོད་སྐོར་དང་། ཧི་མ་ལ་ཡའི་རི་བརྒྱུད་ཀྱི་མི་རྣམས་འགྲུལ་བཞུད་དང་ཁ་པར་སོགས་དེང་རབས་ཀྱི་རྗེས་ཟིན་གྱི་མེད་ནའང་། ཁོ་ཚོར་རྒྱ་གར་གྱི་རྒྱལ་ཞེན་ཧ་ཅང་ཆེ་བ་དང་ས་མཚམས་ཁུལ་གྱི་རྒྱ་ནག་གི་འཛུགས་སྐྲུན་དང་མི་མང་གནས་སྤོ་སོགས་བདེ་འཇགས་མིན་པའི་ཁོར་ཡུག་བསྐྲུན་པ་ལ་བརྟེན་ནས། ཧི་མ་ལ་ཡའི་ས་མཚམས་ཀྱི་མི་རྣམས་རྒྱ་གར་དམག་གིས་རྒྱལ་མཚམས་སྲུང་སྐྱོབ་བྱེད་པར་མཐའ་གཅིག་ཏུ་རྒྱབ་སྐྱོར་བྱེད་ཀྱི་ཡོད་སྐོར་སོགས་བཀོད་འདུག
བསྒྲགས་གཏམ་གྱི་མཇུག་ཏུ། ད་རེས་ཁོང་གི་བོད་དོན་དྲིལ་བསྒྲགས་ཀྱི་སྐོར་སྐྱོད་ལས་འགུལ་དེ་ལ་རྒྱབ་སྐྱོར་གནང་མཁན་གྱི་ཚོགས་སྡེ་ཁག་དང་མི་སྒེར། དམིགས་བསལ་ཧི་མ་ལ་ཡའི་རི་བརྒྱུད་ཀྱི་ངོ་ཤེས་པ་དང་མི་ཤེས་པ་དག་གིས་རྒྱབ་སྐྱོར་གནང་བར་ཐུགས་ཆེ་ཞུས་འདུག
གསར་འགོད་པ། སྐལ་བཟང་སྦྱིན་པ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
