ཏོག་དབྱིབས་ཛ་དྲག་ལས་དོན་ཚོགས་ཆུང་གིས་བོད་པའི་སྤྱི་ཚོགས་ནང་ཏོག་དབྱིབས་གཉན་རིམས་འགོས་པའི་ནད་པ་ཅུང་མང་དུ་འགྲོ་ཡི་ཡོད་སྟབས་ཚང་མས་ཕྱི་ལོ་གསར་པའི་དགའ་སྟོན་འདུ་འཛོམས་སོགས་ཀྱི་སྐབས་སུ་རིམས་ནད་སྔོན་འགོག་ལ་དོགས་གཟོན་ནན་པོ་དགོས་སྐོར་འབོད་སྐུལ་གནང་འདུག
ཁ་སང་ཕྱི་དྲོར་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༢ པ་སྤེལ་སྐབས། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་ ༡༢ བྱུང་ཡོད་པ་དང་། རྒྱ་གར་ནང་གི་ས་གནས་ཁག་ ༦ དང་བལ་ཡུལ་ནང་གི་ས་གནས་གྲངས་ ༡ བཅས་སུ་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༨༣ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༥༤ བཅས་ཁྱོན་ཟུར་བཀག་ཁང་དུ་བོད་མི་ ༡༣༨ ཡོད་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། ཉེ་ལམ་འཛམ་གླིང་ས་ཕྱོགས་གང་སར་ཁྱབ་གདལ་འགྲོ་མུས་ཡིན་པའི་ཏོག་ནད་གསར་པ་ཨོ་མེ་ཁི་རོན་ལ་དོགས་གཟོན་ནན་མོ་བྱས་ཏེ། ཚང་མས་ཁ་རས་སོགས་གྱོན་དགོས་པ་དང་། སྤྱི་ཚོགས་རྒྱང་བཀྱེད་ཀྱི་བར་ཐག་འཇོག་དགོས། དེ་བཞིན་ད་བར་རྒྱ་བལ་འབྲུག་གསུམ་གྱི་ནང་དུ་ཡོད་པའི་བོད་མི་ཚོས་ཏོག་ནད་སྔོན་འགོག་སྨན་ཁབ་མང་པོ་ཞིག་བརྒྱབ་ཟིན་ཡོད་ཀྱང་། ད་དུང་སྨན་ཁབ་རག་མེད་པའི་རིགས་མང་པོ་ཞིག་འདུག་པས། ཚང་མས་རང་གཞན་ཚང་མའི་བདེ་འཇགས་དང་སྔོན་འགོག་གི་སླད་དུ། ཏོག་དབྱིབས་སྔོན་འགོག་སྨན་ཁབ་བརྒྱག་དགོས་པ་དང་། དེ་བཞིན་རིམས་ནད་དེས་གློ་བ་ལ་དཀའ་ངལ་འཕྲད་ཀྱི་ཡོད་སྟབས། ཆང་རག་དང་ཐ་མག་སྤྱོད་མཚམས་བཞག་པའམ་ཉུང་དུ་གཏོང་ཐབས་བྱས་ཏེ་རང་རང་གི་འཕྲོད་བསྟེན་སོགས་ལ་ཐུགས་སྣང་དགོས་པའི་རེ་སྐུལ་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། ཏོག་དབྱིབས་རིམས་ནད་ཀྱི་ནད་ཡམས་འདི་མཆེད་ནས་ད་བར་རྒྱལ་ཁབ་མང་པོ་ཞིག་ལ་དཀའ་ངལ་ཕྲད་དང་འཕྲད་མུས་ཡིན་པ་དང་། ཉེ་ལམ་ཏོག་ནད་ཀྱི་གཉན་སྲིད་གསར་པ་དེ་ཁྱབ་གདལ་ཤུགས་ཆེན་ཕྱིན་ནས། ཡུ་རོབ་ཀྱི་རྒྱལ་ཁབ་མང་ཆེ་བའི་ནང་དུ་མཚན་མོ་འགྲུལ་བཞུད་སོགས་བཀག་སྡོམ་བྱེད་མུས་ཡིན་ལ། རྒྱ་གར་གྱི་མངའ་སྡེ་གྲངས་ ༢༢ ཙམ་གྱི་ནང་དུ་ཏོག་ནད་གསར་པའི་ནད་ཡམས་ཁྱབ་གདལ་འགྲོ་མུས་ཡིན་ཡང་། ད་ལྟ་བོད་པའི་སྤྱི་ཚོགས་ཁྲོད་སློབ་མ་རྣམས་དགུན་ཁའི་གུང་སེང་བཏང་བ་དང། དགུན་ཚོང་དུ་སྐྱོད་མཁན་རིགས་གཞིས་ཆགས་སུ་ལོག་པ། དེ་བཞིན་སྤྱི་ལོ་གསར་པའི་དུས་སྟོན་སོགས་ཀྱི་དབང་གིས། འགྲུལ་བཞུད་ཧ་ཅང་ཆེ་བའི་དུས་ཚིགས་ཤིག་ཡིན་པས། ཚང་མས་ཏོག་ནད་ཀྱི་གཉན་རིམས་གསར་པར་ཡིད་གཟབ་བྱ་དགོས་པ་དང། སྔོན་འགོག་སོགས་ཀྱི་སླད་དུ་འཁྲུལ་ཐང་དང་རིན་ཆེན་རིལ་བུ་སོགས་བསྟེན་དགོས་པའི་ལམ་སྟོན་གནང་སོང་།
དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། ཉེ་ལམ་འཛམ་གླིང་ས་ཁོངས་གང་སར་ཏོག་དབྱིབས་རིམས་ནད་ཀྱི་ནད་ཡམས་ཁྱབ་གདལ་དུ་འགྲོ་མུས་ཡིན་པ་དང་། རྒྱ་གར་དུའང་ཏོག་དབྱིབས་རིམས་ནད་དང་ཏོག་ནད་ཀྱི་གཉན་སྲིན་གསར་པ་འགོས་པའི་ནད་པ་མང་དུ་འགྲོ་མུས་ཡིན་པ་རེད། དེ་བཞིན་ཉེ་ལམ་རྒྱ་གར་དབུས་གཞུང་གིས་གསལ་བསྒྲགས་བྱས་ཡོད་པ་ལྟར། ཕྱི་ཟླ་ ༡ ཚེས་ ༣ ནས་རྒྱ་གར་གཞུང་གིས་ཕྲུ་གུ་ལོ་ན་ ༡༥ ནས་ ༡༨ བར་ལ་ཏོག་དབྱིབས་སྔོན་འགོག་སྨན་ཁབ་བརྒྱག་འཆར་ཡོད་པ་དང་། དེ་བཞིན་སྨན་ཁང་གི་ལས་བྱེད་དང་། གདོང་མཆོང་སྨན་པ། ལོ་དྲུག་ཅུ་ཡན་གྱིི་ནད་པ་རྣམས་ལ་སྔོན་འགོག་སྨན་ཁབ་གསུམ་པ་དེ་བརྒྱག་འཆར་ཡོད་ཀྱང་། བོད་མི་ཚོས་ཏོག་ནད་ལ་སྣང་མེད་དུ་མ་བཞག་པར་ཕྱི་ལོ་གསར་པའི་དུས་སྟོན་སོགས་ལ་ཡིད་གཟབ་དང་སྔོན་འགོག་བྱ་དགོས་པའི་ལམ་སྟོན་སོགས་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་གྲངས་ ༦༩༨༨ བྱུང་བའི་ཁྲོད་དྲག་སྐྱེད་ཟིན་པ་ ༦༨༡༥ དང་། རྐྱེན་འདས་སུ་ཕྱིན་པ་ ༡༦༢། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༡༡ ཡོད་འདུག
དེ་རིང་རྒྱ་གར་དུས་བབ་གསར་ཁང་གིས་སྤེལ་བའི་གནས་ཚུལ་ལྟར་ན། འདས་པའི་ཆུ་ཚོད་ ༢༤ རིང་ལ་རྒྱ་གར་ནང་དུ་ཏོག་དབྱིབས་རིམས་ནད་འགོས་པའི་ནད་པ་གསར་པ་གྲངས་ ༡༦༧༦༤ བྱུང་ཡོད་པ་དང་། མི་གྲངས་ ༢༢༠ ཙམ་རྐྱེན་འདས་སུ་ཕྱིན་ཡོད་འདུག་ལ། ད་ལྟ་རྒྱ་གར་ནང་དུ་ཏོག་ནད་ཀྱི་གཉན་སྲིན་གསར་པ་འགོས་པའི་མི་གྲངས་ ༡༢༧༠ ལྷག་བྱུང་སྟེ། སླར་ཡང་ཏོག་དབྱིབས་རིམས་ནད་ཁྱབ་གདལ་ཤུགས་ཆེ་རུ་འགྲོ་བའི་མགོ་བཙུགས་འདུག
གསར་འགོད་པ། དཔལ་ལྡན།
