བོད་རིགས་བསོད་ནམས་དབང་མོ་ལགས་སུ་ཨོ་གླིང་གཞུང་གི་ཆེ་བསྟོད་གཟེངས་རྟགས་ཐོབ།

བོད་རིགས་བསོད་ནམས་དབང་མོ་ལགས་ཀྱིས་འདས་པའི་ལོ་ངོ་ཉེར་ལྔའི་རིང་ཨོ་གླིང་ནང་སྤྱི་ཚོགས་ཞབས་ཞུའི་ལས་དོན་གཟེངས་སུ་ཐོན་པ་སྒྲུབ་པའི་ངོས་འཛིན་འོག ཨོ་གླིང་གཞུང་འབྲེལ་གྱི་ཆེ་བསྟོད་གཟེངས་རྟགས་ཤིག་ཐོབ་འདུག

ཟླ་འདིའི་ཕྱི་ཚེས་ ༢༦ ཉིན་ཨོ་གླིང་རྒྱལ་ཁབ་གསར་དུ་དབུ་བརྙེས་པའི་ཉིན་མོར། སིད་ནེ་གྲོང་ཁྱེར་གྱི་ (Northern Beaches Council) ས་གནས་ལྷན་ཁང་གིས། བོད་རིགས་བུ་མོ་བསོད་ནམས་དབང་མོ་ལགས་ནས་འདས་པའི་ལོ་ངོ་ཉེར་བཞིའི་རིང་། ས་ཁུལ་དེར་སྤྱི་ཚོགས་ཞབས་ཞུའི་ལས་དོན་གཟེངས་སུ་ཐོན་པ་སྒྲུབ་པར་ངོས་འཛིན་གྱིས། རྒྱལ་ཡོངས་རིང་བཞིན་གྱི་ཆེ་བསྟོད་གཟེངས་ཤིག་ཕུལ་ཡོད་འདུག

འདི་གའི་གསར་འགོད་པས་ཁ་པར་བརྒྱུད་བསོད་ནམས་དབང་མོ་ལགས་སུ་དེ་འབྲེལ་སྐོར་བཀའ་འདྲི་ཞུས་སྐབས། ང་ལ་འདས་པའི་ལོ་ངོ་ ༢༤ རིང་ཨོ་གླིང་གི་(New South Wales) མངའ་སྡེའི་ནང་གི་བོད་པའི་སྤྱི་ཚོགས་ལ་ཞབས་ཞུ་སྒྲུབ་རྒྱུའི་གོ་སྐབས་བྱུང་བ་ལ་བརྟེན་ནས། ད་རེས་བྱང་རྒྱུད་མཚོ་ཁའི་ལྷན་ཚོགས་ཀྱི་ཨོ་གླིང་(Northern Beaches Council Australia Day) ཉིན་མོ་གོ་སྒྲིག་ཚོགས་པས། ང་ལ་གཟེངས་རྟགས་འདི་འདྲ་ཞིག་གནང་བར་བཀའ་དྲིན་ཆེ་ཞུ་རྒྱུ་ཡིན་པ་མ་ཟད། ང་ལ་གཟེངས་རྟགས་འདི་ཐོབ་པར་ཧང་སང་བ་དང་སྤོབས་པའང་སྐྱེས་བྱུང་ལ། གཟེངས་རྟགས་འདི་ཉིད་ང་ཁོ་ན་ཙམ་མིན་པར་ཨོ་གླིང་སྤྱི་དང་འཛམ་གླིང་ཡུལ་གྲུ་གང་སར་བཞུགས་པའི་བོད་རིགས་སྤུན་ཟླ་ཚང་མར་ཕུལ་བ་ཞིག་ཆགས་ཀྱི་ཡོད། ཅེས་བརྗོད་བྱུང་།

ཡང་ཁོང་གིས་གཟེངས་རྟགས་དེ་ཉིད་གཙོ་བོ། ༧གོང་ས་རྒྱལ་བ་རིན་པོ་ཆེ་མཆོག་གིས། དུས་རྒྱུན་བོད་མི་རྣམས་ལ་འཚེ་མེད་ཞི་བ་དང་བྱམས་སྙིང་རྗེ་སོགས་ང་ཚོའི་ཉིན་རེའི་འཚོ་བའི་ཁྲོད་ལག་བསྟར་བྱ་ཆོག་པའི་བཀའ་སློབ་རིན་ཐང་བྲལ་བ་སྩལ་གནང་མཛད་པ་ལ་བརྟེན་ནས་བྱུང་བ་དང་། སིད་ནེ་གཙོ་བྱས་པའི་(New South Wales) མངའ་སྡེའི་བོད་མི་དག་ཁོ་མོའི་ཉིན་རེའི་འཚོ་བའི་ཆ་ཤས་སུ་གྱུར་ཏེ།  རང་ཉིད་ལ་སྤྱི་ཚོགས་ཞབས་ཞུ་སྒྲུབ་རྒྱུའི་གོ་སྐབས་ཕུལ་བ། དེ་བཞིན། མོ་རང་ཉིད་ཀྱི་དྲིན་ཆེན་ཕ་མ་གཉིས་ཀྱི་གཙོས་བཟའ་ཟླ་དང་བུ་མོ་གཉིས་བཅས་ཀྱིས། དུས་རྒྱུན་མོ་རང་ལ་སྤྱི་ཚོགས་ཞབས་ཞུའི་འགྲུལ་བཞུད་རིང་མོར་རྒྱབ་སྐྱོར་བླ་མེད་དུ་གནང་བ་སོགས་ལ་བརྟེན་གཟེངས་རྟགས་དེ་ཐོབ་པ་ཡིན་སྟབས། ཀུན་ལ་བཀའ་དྲིན་ཆེ་ཞུ་ཡི་ཡོད་སྐོར་སོགས་བརྗོད་བྱུང་།

བསོད་ནམས་དབང་མོ་ལགས་ཀྱིས། ད་ལྟ་ཨོ་གླིང་གི་(New South Wales) མངའ་སྡེའི་འཕྲོད་བསྟེན་ལས་ཁུངས་སུ་སེམས་ཁམས་འཕྲོད་བསྟེན་ཆེད་ལས་པའི་བྱ་བ་སྒྲུབ་ཀྱི་ཡོད་ཅིང་། ཁོ་མོས་ད་བར་བོད་མི་གཙོ་བྱས་པའི་ཨོ་གླིང་ནང་གཟེངས་སུ་ཐོན་པའི་སྤྱི་ཚོགས་ཞབས་ཞུ་སྒྲུབ་ཡོད་པར་བརྟེན། ད་བར་ཁྱོན་ཆེ་བསྟོད་གཟེངས་རྟགས་སུམ་ཅུ་ཡས་མས་ཐོབ་མྱོང་བ་དང་། ད་ལྟ་ཁོང་གིས་གཉེར་བཞིན་པའི་བོད་ཀྱི་གཞོན་སྐྱེས་ཀྱི་ལས་གཞིའི་ནང་ལོ་ན་ ༥ ནས་ ༢༨ བར་གྱི་བོད་རིགས་གཞོན་སྐྱེས་ ༧༠ ལྷག་ཡོད་ཅིང་། ཁོང་གིས་དུས་རྒྱུན་དུ་བོད་རིགས་གཞོན་སྐྱེས་དེ་དག་ལ་སེམས་ཁམས་གཙོ་བྱས་པའི་དཀའ་ཁག་ཅི་ཡོད་ཐད་ལམ་སྟོན་དང་། བོད་རིགས་གཞོན་སྐྱེས་ལས་གྲུབ་པའི་རྐང་སྤོལ་རུ་ཁག་བཙུགས་ཏེ། སྡིངས་ཆ་འདྲ་མིན་སྟེང་མཉམ་ཞུགས་བྱེད་པ་དང་གཞོན་སྐྱེས་ཕན་ཚུན་བར་རིག་གཞུང་གཙོ་བྱས་པའི་བསམ་ཚུལ་བརྗེ་རེས་དང་གྲོགས་པོ་སྒྲིག་པ། དེ་བཞིན། དྲ་ལམ་བརྒྱུད་ཡོ་ག་གམ་རླུང་སྦྱོང་སློབ་འཁྲིད་བྱེད་པ་དང་ཨོ་གླིང་ནང་གསར་དུ་འབྱོར་མཁན་རྣམས་ལ་ལས་ཀ་འཚོལ་བ་སོགས་ཀྱི་སྤྱི་ཚོགས་ཞབས་ཞུ་སྒྲུབ་བཞིན་ཡོད་པ་རེད།

བསོད་ནམས་དབང་མོ་ལགས་ནི་རྒྱ་གར་རྡེ་ར་ལྡུན་དོན་འགྲུབ་གླིང་བོད་མིའི་གཞིས་ཆགས་ནང་སྐྱེས་ཤིང་། རྒྱ་གར་ནང་སློབ་མཐར་སོན་རྗེས་ཨོ་གླིང་དུ་གནས་སྤོར་བྱས་ཏེ། ཕྱི་ལོ་ ༡༩༩༧ ནས་ ༡༩༩༩ བར་ཨོ་གླིང་བོད་རིགས་ཚོགས་པའི་རྒྱུན་ལས་གནང་ཞོར་དུ། འགྲོ་མིའི་བདེ་སྡུག་གི་གནས་བབ་འོག་ཨོ་གླིང་དུ་གཞིས་སྤོར་གནང་མཁན་ཐོག་མའི་གྲས་སྣེ་ལེན་ཞུ་མཁན་ཡིན་པ་དང་། ཕྱི་ལོ་ ༡༩༩༩ ལོར་ཁན་བྷི་ར་རྒྱ་ནག་གཞུང་ཚབ་མདུན་ནས་སིད་ནེ་རྒྱ་ནག་གཞུང་ཚབ་བར་ཉིན་གྲངས་ ༢༣ རིང་བོད་དོན་ཞི་བའི་གོམས་བགྲོད་གནང་མཁན་གྱི་གྲས་ཤིག་ཀྱང་ཡིན་པ་རེད།

གསར་འགོད་པ། སྐལ་བཟང་སྦྱིན་པ།