འདས་པའི་ཆུ་ཚོད་ ༢༤ ནང་པེ་ཅིང་ཨོ་རྩེད་ནང་མཉམ་ཞུགས་བྱེད་མཁན་རྩེད་འགྲན་པ་སོགས་མི་གྲངས་ ༣༤ ཚུད་པའི་རྒྱལ་ཡོངས་ནང་ཏོག་དབྱིབས་ནད་པ་གསར་པ་ ༥༨ བྱུང་ཡོད་པ་དང་ལྷག་པར་དུ་ཉིན་གཅིག་ནང་པེ་ཅིན་གྲོང་ཁྱེར་ནང་ཏོག་དབྱིབས་ནད་པ་གསར་པ་ ༢༠ བརྒལ་བ་བྱུང་སྟེ་འདས་པའི་ཟླ་ ༡༨ རིང་གི་ནད་པའི་གྲངས་འབོར་མང་ཤོས་དེ་ཆགས་ཡོད་འདུག
ཁ་སང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ཏུ་དགུན་དུས་ཨོ་ལིམ་ཕིག་རྩེད་འགྲན་འཚོག་པར་ཉིན་གྲངས་ ༢ ཙམ་ལས་མེད་པའི་སྐབས་འདིར། འདས་པའི་ཆུ་ཚོད་ཉེར་བཞིའི་ནང་རྒྱ་ནག་ཏུ་ནད་པ་གསར་བ་མི་གྲངས་ ༥༨ བྱུང་ཡོད་འདུག་ལ། སྤྱིར་བཏང་པེ་ཅིན་གྲོང་ཁྱེར་གྱི་གནད་འགག་ས་གནས་ཁག་ཏུ་ཐེམ་སྤང་བཀག་རྒྱ་བསྒྲགས་ཏེ་དམ་དྲག་ཆེན་པོ་བྱེད་བཞིན་ཡོད་ཀྱང་། ཚད་བཀག་ས་ཚིགས་ནང་རོལ་དུ་ཡོད་པའི་རྩེད་འགྲན་པ་དང་བྱེད་ལས་བཅས་མི་གྲངས ༣༤ ལ་ཏོག་དབྱིབས་ནད་རྟགས་ཐོན་ཡོད་ཀྱང་། རྒྱ་ནག་གཞུང་འབྲེལ་མི་སྣས་ཏོག་ནད་འགོས་པའི་ནད་པ་དེ་དག་གི་ཁྲོད་དུ་ཕྱི་ནས་ཡོང་བའི་རྩེད་འགྲན་པ་དང་གཞུང་འབྲེལ་མི་སྣ་ ༡༣ ཚུད་ཡོད་སྐོར་འགྲེལ་བརྗོད་པ་དང་སྦྲགས། ཏོག་དབྱིབས་རིམས་ནད་འགོས་པའི་རྩེད་འགྲན་པ་སོགས་ཟུར་བཀག་ཏུ་བསྡད་རིང་ཆུ་ཚོད་ ༢༤ ནང་ཚུད་དུ། ཏོག་དབྱིབས་རིམས་ནད་ཀྱི་བརྟག་དཔྱད་ཐེངས་གཉིས་བྱས་ཏེ། ཏོག་ནད་འགོས་མེད་པའམ་ནད་རྟགས་མེད་པའི་གྲུབ་འབྲས་ཐོན་མཚམས་ཚད་བཀག་ས་ཁོངས་སུ་འགྲོ་སྐྱོད་ཆོག་གི་ཡོད་ལུགས་དང་། ཕྱི་རྒྱལ་ཁག་གི་རྩེད་འགྲན་པ་སོགས་མཉམ་ཞུགས་བྱེད་མཁན་རྣམས་ཆེད་མངག་གནམ་གྲུ་བརྒྱུད་རྒྱ་ནག་ཏུ་བསླེབ་དགོས་པ། ཕྱིར་མ་ལོག་བར་དུ་གོ་སྒྲིག་བྱས་པའི་ས་ཚིགས་ལས་བརྒལ་མི་ཆོག་པ་དང་། མགྲོན་ཁང་དང་རྩེད་འགྲན་ར་བའི་བར་དུ་སྐྱོད་སྐབས་ཨོ་རྩེད་གོ་སྒྲིག་ཚོགས་ཆུང་གི་རླངས་འཁོར་དང་མེ་འཁོར་མ་གཏོགས་གཞན་གང་གི་ནང་དུའང་སྐྱོད་མི་ཆོག་པ་སོགས་ཀྱི་སྒྲིག་གཞི་བཟོས་ཡོད་འདུག
པེ་ཅིང་གི་ཉེ་འཁྲིས་སུ་ཡོད་པའི་ཕིན་ཐའེ་( Fengtai) རྫོང་སོགས་སུ་ཏོག་དབྱིབས་རིམས་ནད་འགོས་པའི་ནད་པ་མང་པོ་བྱུང་ཡོད་སྟབས། རྒྱ་ནག་གཞུང་གིས་ཁུལ་དེའི་མི་གྲངས་ས་ཡ་གཉིས་ཙམ་ལ་རིམས་ནད་བརྟག་དཔྱད་བྱ་རྒྱུ་དང་། རྒྱ་ནག་གཞུང་གིས་རྒྱ་ནག་ཏུ་ཏོག་ནད་གཅིག་ཀྱང་མེད་པའི་སྲིད་ཇུས་ཀྱི་འོག་ནས་མི་དམངས་ཀྱི་འགྲོ་འདུག་སོགས་ཚོད་འཛོན་བྱེད་མུས་ཡིན་པ་ལྟར། རྩེད་འགྲན་པ་རྣམས་ཨོ་རྩེད་གོ་སྒྲིག་ཚོགས་ཆུང་གིས་བཀོད་སྒྲིག་བྱས་པའི་ས་ཚིགས་ལས་བརྒལ་ནས་འགྲོ་སྐྱོད་བྱ་མི་ཆོག་ཅིང་། ཕྱི་ཟླ ༡ ཚེས་ ༡༩ ཉིན་རྒྱ་ནག་གཞུང་གིས་རྒྱལ་སྤྱིའི་རྩེད་འགྲན་པ་དག་རྒྱ་ནག་གི་སྒྲིག་ཁྲིམས་དང་འགལ་ཚེ་ཉེས་ཆད་གཅོད་རྒྱུ་མ་ཟད། ལུས་རྩལ་བ་ཚང་མའི་ཁ་པར་ནང་རྒྱ་ནག་གིས་བཟོས་པའི་མཉེན་ཆས་ཤིག་ཕབ་ལེན་བྱེད་དུ་བཅུག་སྟེ། ཁོང་ཚོའི་འགྲོ་འདུག་སྤྱོད་གསུམ་ལ་ལྟ་རྟོག་ནན་མོ་བྱེད་ཀྱི་ཡོད་པར་ངོས་འཛིན་བྱེད་བཞིན་ཡོད་པ་རེད།
པེ་ཅིན་ཨོ་རྩེད་འགྲན་ཚོགས་ཀྱི་གནས་ཚུལ་ལྟར་ན། རྩེད་འགྲན་དེ་ཟླ་འདིའི་ཕྱི་ཚེས ༤ ནས་ ༢༠ བར་འཛམ་གླིང་གི་རྩེད་འགྲན་པ་མི་གྲངས་ ༢༦༠༠ ལྷག་གིས་མཉམ་ཞུགས་བྱ་འཆར་ཡོད་སྐོར་དང་། རྩེད་འགྲན་མགོ་འཛུགས་ཐོག་འཛམ་གླིང་རྒྱལ་ཁབ་ ༣༢ གི་མགོ་ཁྲིད་ཚོས་མཉམ་ཞུགས་བྱ་རྒྱུ་ཡིན་ཚུལ་བསྒྲགས་འདུག་ཀྱང་། ད་སྔ་བར་ཨ་རི་གཙོ་བྱས་པའི་ཁེ་ན་ཌ་དང་དབྱིན་ཇི། ཨོ་གླིང་དང་ཉི་ཧོང་། ཐའེ་ཝན་སོགས་འཛམ་གླིང་རྒྱལ་ཁབ་ཁྱོན་ ༡༢ ལྷག་གིས་རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་བཅས་སུ་མི་རིགས་རྩ་མེད་དང་འགྲོ་བ་མིའི་ཐོབ་ཐང་རྡོལ་རོལ་ཚབས་ཆེན་གཏོང་བཞིན་པར་ངོ་རྒོལ་གྱིས། རྒྱལ་ཁབ་སོ་སོའི་ཕྱི་འབྲེལ་མི་སྣ་དང་གཞུང་འབྲེལ་སྐུ་ཚབ་རྣམས་པེ་ཅིན་དུ་མངག་གཏོང་བྱ་རྒྱུ་མིན་པའི་ཐག་གཅོད་བྱས་ཡོད་འདུག
གསར་འགོད་པ། དཔལ་ལྡན།
