འདས་ལོར་རྒྱལ་སྤྱིའི་གློག་བརྙན་ཁྲོམ་རར་འགྲེམས་སྤེལ་ཞུས་པའི་༧གོང་ས་མཆོག་དང་ཆོས་དཔོན་དམ་པ་ཌ་སེ་མོན་ཌེ་ཊུ་ཊུ་རྣམ་གཉིས་ཀྱི་དངོས་བཤུས་གློག་བརྙན་བདེ་སྐྱིད་ཀྱི་འཆར་གཞི་(Mission: JOY)ཞེས་པ་བྷི་བྷི་སི་ཡི་ BBC Four ནས་རྒྱང་སྲིང་གཟིགས་འབུལ་ཞུ་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༣ ཉིན་གྱི་དགོང་མོའི་ཆུ་ཚོད་ ༡༠ ཐོག་རྒྱལ་སྤྱིའི་གསར་ཁང་ཆེ་གྲས་བྷི་བྷི་སི་ཡི་ BBC Four ཞེས་པའི་བརྙན་འཕྲིན་བརྒྱུད་ལམ་སྟེང་། ཕྱི་ལོ་ ༢༠༡༥ ལོར་ལྷོ་ཨ་ཧྥེ་རི་ཁའི་ཆོས་དཔོན་དམ་པ་ཌ་སེ་མོན་ཌེ་ཊུ་ཊུ་མཆོག་དྷ་རམ་ས་ལར་ཆེད་ཕེབས་ཀྱིས་བདུན་ཕྲག་གཅིག་ལྷག་གི་རིང་༧གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་བདེ་སྐྱིད་ཅེས་པའི་བརྗོད་གཞིའི་ཐོག་གླེང་མོལ་གནང་བའི་སྐོར་གྱི་དངོས་བཤུས་གློག་བརྙན་བདེ་སྐྱིད་ཀྱི་འཆར་གཞི་ (Mission: JOY) ཞེས་པ་རྒྱང་སྲིང་ཞུ་རྒྱུ་ཡིན་འདུག
བྷི་བྷི་སི་གསར་ཁང་གི་དྲ་བའི་སྟེང་དངོས་བཤུས་གློག་བརྙན་དེའི་སྐོར་གྱི་ངོ་སྤྲོད་འཁོད་དོན། ཧ་ཅང་སེམས་འགུལ་ཐེབས་ཤིང་དགོད་བྲོ་བའི་དངོས་བཤུས་གློག་བརྙན་འདི་བརྒྱུད་ལྟ་མཁན་རྣམས་ལ་༧གོང་ས་མཆོག་དང་ཡེ་ཤུའི་ཆོས་དཔོན་དམ་པ་ཌེ་སི་མན་ཊུ་ཊུ་གཉིས་དབར་གྱི་མཛའ་བཤེས་ལ་རྒྱུས་ལོན་གཏིང་ཟབ་ཞུ་ཐུབ། རྒྱལ་སྤྱིའི་གཟེངས་རྟགས་ཐོབ་པའི་གློག་བརྙན་ཕབ་སྐྲུན་རུ་ཁག་ཅིག་གིས་ཉིན་གྲངས་ལྔ་རིང་ཁོང་རྣམ་གཉིས་ནས་གཅེན་གཅུང་པྲ་ཚགས་ཏུ་འབོད་པའི་སྐྱེས་ཆེན་གཉིས་དབར་གྱི་སྔར་མཐོང་དུ་མེད་པའི་ཡིད་ཆེས་དང་། དྲང་བདེན། ལྷག་ཏུ་བདེ་སྐྱིད་བཅས་ལས་གྲུབ་པའི་མཛའ་བཤེས་བརྙན་དུ་བླངས་ཡོད། ཅེས་དང་། དངོས་བཤུས་གློག་བརྙན་དེའི་ནང་སྐྱེས་ཆེན་རྣམ་གཉིས་ཀྱིས་རང་གི་སྐུ་ཚེའི་ནང་མྱངས་པའི་དཀའ་སྡུག་གི་ལོ་རྒྱུས་རྣམས་གསུང་གླེང་གནང་ཡོད་སྐོར་འཁོད་འདུག
༧གོང་ས་མཆོག་དང་ཆོས་དཔོན་ཊུ་ཊུ། རྩོམ་པ་པོ་ཌོག་ཨབ་རམ་སི་ (Doug Abrams) བཅས་ཀྱིས་བརྩམས་གནང་ཞིང་། འཛམ་གླིང་ཐོག་རྒྱུག་ཆེ་ཤོས་གྲས་སུ་ཚུད་པའི་བདེ་སྐྱིད་ཀྱི་ཕྱག་དེབ་ (The Book of Joy) གཞི་ལ་བཞག་སྟེ་ཕབ་སྐྲུན་བྱས་པའི་དངོས་བཤུས་གློག་བརྙན་དེས་གཙོ་བོ་གཉན་འཕྲང་དང་དཀའ་སྡུག་གི་དུས་སྐབས་སུ་བདེ་སྐྱིད་འཚོལ་ཐབས་སྐོར་གྱི་བརྗོད་དོན་གཙོ་བོར་བཟུང་སྟེ་ཕབ་སྐྲུན་བྱས་པ་ཞིག་ཡིན་འདུག་ལ། གློག་བརྙན་ནང་གཙོ་བོ་༧མགོན་པོ་མཆོག་དང་ཉེ་ཆར་སྐུ་གྲོངས་པའི་སྐུའི་མཛའ་གྲོགས་ཆེན་པོ་ཊུ་ཊུ་མཆོག་གཉིས་དབར་གསུང་གླེང་གནང་བ་དང་འབྲེལ། ཁོང་རྣམ་གཉིས་ལ་རྒྱུས་མངའ་ཆེ་བའི་ཆོས་དཔོན་ཊུ་ཊུ་མཆོག་གི་བུ་མོ་(Mpho Tutu van Furth)། དེ་བཞིན་རྩོམ་པ་པོ་ཌོག་དང་སྐུའི་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་བཅས་ཀྱིས་རང་གི་མྱོང་བའི་ཐོག་ནས་སྐྱེས་ཆེན་རྣམ་གཉིས་ཀྱི་མཛད་པ་དང་ལོ་རྒྱུས་ལ་ཕྱིར་དྲན་ཞུས་ཡོད་འདུག
སྤྱིར་གློག་བརྙན་འཁྲབ་ཁྲིད་པ་ལྕམ་པེ་གི་ཁེ་ལཱ་ཧན་ (Peggy Callahan) དང་ལུ་ཡི་སི་ཧོ་ཡོ་སི་ (Louie Psihoyos) རྣམ་གཉིས་ཀྱིས་ཕབ་སྐྲུན་བྱས་པའི་དངོས་བཤུས་གློག་བརྙན་དེ་ཉིད་ཕྱི་ལོ་ ༢༠༡༥ ཟླ་ ༤ ཚེས་ ༡༨ ཉིན་ཆོས་དཔོན་དམ་པ་ཊུ་ཊུ་མཆོག་དྷ་སའི་གྷ་གྷལ་གནམ་ཐང་དུ་འབྱོར་སྐབས་༧གོང་ས་རྒྱལ་བ་རིན་པོ་ཆེ་མཆོག་ཆེད་མངགས་གནམ་ཐང་ལ་ཆིབས་ཐོན་གྱིས་ཕེབས་བསུ་མཛད་པ་ནས་བཟུང་། དེའི་རྗེས་ཀྱི་ཉིན་གྲངས་ ༧ ཙམ་གྱི་རིང་བཞུགས་སྒར་ཕོ་བྲང་དུ་གསུུང་གླེང་གནང་བ་དང་། དྷ་རམ་ས་ལའི་རྡ་སྟེང་བོད་ཁྱིམ་གྱི་སིལ་སྤོལ་ཐང་དུ་སློབ་མ་དང་མང་ཚོགས་སྟོང་ཚོ་གཅིག་ལྷག་གི་ཁྲོད་དུ་ཆོས་དཔོན་ཊུ་ཊུ་མཆོག་གི་འཁྲུངས་སྐར་སྲུང་གཙི་གནང་བའི་སྐོར་སོགས་ཡོད་འདུག
སྤྱིར་དངོས་བཤུས་གློག་བརྙན་དེ་ཉིད་འདས་ལོའི་ཕྱི་ཟླ་ ༦ ཚེས་ ༡༢ ཉིན་དངོས་སུ་ཁྲོམ་རར་བསྟན་ནས་ད་བར་རྒྱལ་སྤྱིའི་གློག་བརྙན་དུས་སྟོན་མི་ཉུང་བའི་ནང་མིང་འདོན་དང་གཟིགས་འབུལ་ཞུ་ཐུབ་པ་བྱུང་ཡོད་འདུག་ཅིང་། བྷི་བྷི་སིའི་བརྙན་འཕྲིན་ལེ་ཚན་ནང་རྒྱང་སྲིང་བྱས་རྗེས་ BBC iplayer ཞེས་པའི་ནང་མུ་མཐུད་གཟིགས་རྒྱུ་ཡོད་པ་དང་། གཞན་ཡང་ད་ལྟའི་ཆར་དངོས་བཤུས་གློག་བརྙན་དེ་ཉིད་ Vimeo ཞེས་པའི་གློབ་བརྙན་དྲ་ཚིགས་(https://vimeo.com/674979350)སྟེང་འགོད་སྤེལ་བྱས་ཏེ། གསང་གྲངས་ BBCJOY བཅུག་སྟེ་རིན་མེད་ཐོག་གཟིགས་ཐུབ་ཀྱི་ཡོད་པ་རེད་འདུག
གསར་འགོད་པ། པ་སངས་ཚེ་རིང་།
