ཁ་སང་ཕྱི་ཚེས་ ༢༡ ཉིན་བོད་ནང་གི་ཆབ་སྲིད་བཙོན་ཟུར་གྲགས་ཅན་ངག་དབང་རྒྱལ་མཚན་ལགས་བོད་ཀྱི་རྒྱལ་ས་ལྷ་སར་འདས་གྲོངས་སུ་ཕྱིན་ཡོད་འདུག
ད་ལྟ་དྷ་སར་གནས་འཁོད་བོད་ཀྱི་ཆབ་སྲིད་བཙོན་ཟུར་རྒན་ངག་དབང་འོད་འབར་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། དེང་སང་རྒྱ་ནག་གཞུང་གིས་བོད་ཀྱི་ལོ་གསར་དང་གསུམ་བཅུའི་དུས་དྲན་སླེབ་ལ་ཉེ་བའི་སྐབས་འདིར། ཏོག་དབྱིབས་གཉན་རིམས་ལ་ཁག་དཀྲིས་ནས་ལྷ་ས་ཁུལ་དུ་མི་མང་གི་འདུ་འཛོམས་རིགས་ལ་དམ་དྲག་བྱེད་བཞིན་པ་སོགས་ལ་བརྟེན་ནས། བོད་ནང་སྐད་ཆ་བཤད་རྒྱུར་དོགས་ཟོན་བྱ་དགོས་འཁེལ་གྱི་ཡོད་པ་དང་། བོད་ཀྱི་ཆབ་སྲིད་བཙོན་ཟུར་ངག་དབང་རྒྱལ་མཚན་ལགས་ཁ་སང་བོད་ནང་གི་ཕྱི་དྲོའི་ཆུ་ཚོད་ ༥།༣༠ ཙམ་ལ་འདས་གྲོངས་སུ་ཕྱིན་ཡོད་པ་དངོས་བདེན་ཡིན་ཡང་། དམ་པ་ཁོང་རྒྱུ་རྐྱེན་གང་ལ་བརྟེན་ནས་གྲོངས་མིན་དང་སྨན་ཁང་དང་རང་ཁྱིམ་སོགས་གང་དུ་གྲོངས་ཡོད་མེད་ཤེས་རྟོགས་བྱུང་མེད་སྐོར་འགྲེལ་བརྗོད་གནང་བྱུང་ལ། སྐུ་ཞབས་དམ་པ་ཁོང་ལོ་ ༡༧ རིང་རྒྱ་ནང་གི་བཙོན་ཁང་ནང་སྡུག་སྦྱོང་མནར་གཅོད་མྱངས་ནས་རང་བཞིན་གྱིས་ལུས་པོ་ནད་གཅོང་ལྟ་བུ་ཆགས་པའི་རྐྱེན་གྱིས་གྲོངས་ཡོད་སྲིད་སྐོར་བརྗོད་བྱུང།
བོད་ཀྱི་ཆབ་སྲིད་བཙོན་ཟུར་འཇམ་དཔལ་སྨོན་ལམ་ལགས་ནས་བརྩམས་པའི་ <<མི་རབས་གསར་པའི་ལང་ཚོའི་མདུན་ལྗོངས་>> ཞེས་པའི་ནང་། ཆབ་སྲིད་བཙོན་ཟུར་སྐུ་ཞབས་ངག་དབང་རྒྱལ་མཚན་ལགས་ནི་ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་ལྷ་སའི་འབྲས་སྤུངས་དགོན་པའི་དགེ་འདུན་པ་ ༢༡ གི་སྣེ་ཁྲིད་འོག་རྒྱ་ནག་གཞུང་ལ་ངོ་རྒོལ་གྱི་ལས་འགུལ་ནང་མཉམ་ཞུགས་བྱས་པའི་རྐྱེན་གྱིས། ཉེན་རྟོག་པས་འཛིན་བཟུང་བྱས་ཏེ་དགུ་རྩ་བཙོན་ཁང་ནང་ཟླ་བ་ ༤ ཙམ་རིང་བཀག་ཉར་བྱས་པ་དང་། དེ་ནས་ཀློད་གྲོལ་བཏང་རྗེས་དམ་པ་ཁོང་གིས་བོད་རང་བཙན་གྱི་ཡིག་ཆ་འགྲེམས་སྤེལ་བྱས་པ་དང་། བོད་རང་བཙན་ཚོགས་པའི་ནང་མཉམ་ཞུགས་སོགས་ལས་འགུལ་འདྲ་མིན་སྤེལ་བའི་རྐྱེན་གྱིས། ཕྱི་ལོ་ ༡༩༨༩ ལོའི་ཟླ་ ༥ ཚེས་ ༡༣ ཉིན་རང་གི་རོགས་པ་དང་ལྷན་དུ་རྒྱ་གར་ལ་བཙན་བྱོལ་དུ་སྐྱོད་སྐབས། འགྲམ་འགག་སྒོ་ནས་རྒྱ་ནག་གི་ཉེན་རྟོག་པས་འཇུ་བཟུང་བྱས་ཡོད་འདུག
དམ་པ་ཁོང་བཀག་ཉར་བྱས་རྗེས་ཕྱི་ལོ་ ༡༩༨༩ ཟླ་ ༡༡ ཚེས་ ༢༨ ཉིན་ལྷ་ས་གྲོང་ཁྱེར་འབྲིང་རིམ་མི་མང་ཁྲིམས་ཁང་ནས་གྲོང་ཁྱེར་ལྷ་སའི་མི་མང་སྲིད་གཞུང་གི་ཚོགས་ཁང་དུ་མི་མང་ ༡༥༠༠ ལྷག་ཙམ་ཡོད་པའི་ཁྲིམས་རར་བཅད་ཁྲ་ཡོངས་བསྒྲགས་བྱས་ཏེ། ཁོང་ལ་ལོ་ ༡༧ གྱི་བཙོན་འཇུག་ཁྲིམས་ཐག་བཅད་པ་དང་། ཆབ་སྲིད་དབང་ཆ་ལོ་ ༥ བཙན་འཕྲོག་བྱས་ཡོད་ཅིང་། ཕྱི་ལོ་ ༢༠༠༥ དབར་གྲྭ་བཞི་བཙོན་ཁང་དུ་བཙོན་འཇུག་མནར་གཅོད་མྱངས་ཤིང་། བཙོན་འཇུག་དུས་ཡུན་རྫོགས་རྗེས་ལྷ་སའི་བཀའ་འགྱུར་པར་ཁང་དུ་དཔེ་ཆ་ཞུ་དག་བཏང་ནས་བཞུགས་ཡོད་པ་རེད་འདུག
བོད་ཀྱི་ཆབ་སྲིད་བཙོན་ཟུར་སྐུ་ཞབས་ངག་དབང་རྒྱལ་མཚན་ལགས་ནི་ལྷ་ས་གྲོང་ཁྱེར་སྟོད་ལུང་བདེ་ཆེན་རྫོང་ནས་ཡིན་ཞིང་། ཕྱི་ལོ་ ༡༩༨༤ ནང་གདན་ས་ཆེན་པོ་དཔལ་ལྡན་འབྲས་སྤུངས་དགོན་པར་ཆོས་ཞུགས་གནང་ཡོད་འདུག འདི་ལོ་ཁོང་དགུང་ལོ་ ༦༠ ཡས་མས་ཡིན་འདུག
གསར་འགོད་པ། པ་སངས་ཚེ་རིང་།
ད་ལྟ་དྷ་སར་གནས་འཁོད་བོད་ཀྱི་
