༧གོང་ས་སྐྱབས་མགོན་ཆེན་པོའི་འདས་པའི་ལོ་གཅིག་ལྷག་གི་མཛད་འཕྲིན་གལ་ཆེན་ཁག

གོ་ལའི་ཚ་དྲོད་རྒྱས་པའི་ཛ་དྲག་གི་གནས་སྟངས་སྐོར་ལ་གསུང་གླེང་མཛད།

ཕྱི་ལོ་ ༢༠༢༡ ཟླ་ ༡ ཚེས་ ༡༠ ཉིན་སེམས་དང་སྲོག་བསྟི་གནས་ཁང་གི་གོ་སྒྲིག་འོག ༧གོང་ས་རྒྱལ་བ་རིན་པོ་མཆོག་ནས་དྲ་ལམ་བརྒྱུད་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་ལས་འགུལ་བ་གྲགས་ཅན་སི་ཝེ་ཌན་གྱི་གཞོན་ནུ་མ་གྷེ་རེ་ཊ་ཐུན་བྷག་གིས་གཙོས་ཚན་རིག་པ་སྐོར་ཞིག་དང་ལྷན་གོ་ལའི་ཚ་དྲོད་ཀྱི་ཛ་དྲག་གནས་སྟངས་སྐོར་ལ་གསུང་གླེང་གནང་ཡོད་ཅིང་། སྐབས་དེར་གཞོན་ནུ་མ་ཐུན་བྷག་གིས་༸རྒྱལ་བ་རིན་པོ་ཆེ་མཆོག་གིས་ང་ཚོར་གནམ་གཤིས་འགྱུར་ལྡོག་དང་འབྲེལ་བའི་ཕྱག་ཡིག་ཅིག་གནང་སྟེ་རྒྱབ་སྐྱོར་གནང་བར་ཧ་ཅང་དགའ་སྤོབས་དང་སྙིང་སྟོབས་ཆེན་པོ་གནང་བྱུང་། ཐུན་མོང་དུ་༸རྒྱལ་བ་རིན་པོ་ཆེ་དང་ང་ཚོར་འཛམ་གླིང་གི་གནམ་གཤིས་དང་ཁོར་ཡུག་སྲུང་སྐྱོབ་ཐད་ལ་བསམ་ཚུལ་མཐུན་པོ་ཡོད་པ་རེད། ཅེས་བརྗོད་ཡོད་ཅིང་། དེར་མགོན་པོ་མཆོག་གིས། ཐུན་བྷག་གིས་གོ་ལའི་གནམ་གཤིས་དང་འབྲེལ་བའི་སྐོར་ནས་ཕྱག་ལས་གནང་བཞིན་པ་གོ་ཡོང་དུས་མ་འོངས་པར་དངོས་གནས་རེ་བ་ཞིག་མཐོང་བ་དང་། གཞོན་སྐྱེས་ཚོས་ཁོར་ཡུག་གིས་མཚོན་པའི་འཛམ་གླིང་གི་དཀའ་ངལ་ཐོག་ལ་སེམས་ཁུར་ལེན་བཞིན་པ་ཐོས་དུས་ཧ་ཅང་ཐུགས་དགྱེས་པོ་ཡོང་གི་ཡོད་པ་དང་། ད་ལྟ་མི་རབས་རྒན་པ་དེ་ཚོ་རྫོགས་འགྲོ་ཡི་ཡོད་ནའང་། རེ་བ་བྱ་ས་དེ་མི་རབས་གཞོན་པ་དེ་ཚོ་ཡིན་སྐོར་གྱི་བཀའ་སློབ་བཀའ་དྲིན་སྩལ།

ཨ་རིའི་དམིགས་བསལ་བོད་དོན་འབྲེལ་མཐུད་པར་མཇལ་ཁ་སྩལ།

ཕྱི་ལོ་ ༢༠༢༡ ཟླ་ ༡ ཚེས་ ༡༣ ཉིན་ཨ་རིའི་སྲིད་འཛིན་ཊོམ་ཕུ་མཆོག་གི་ལས་ཡུན་རྫོགས་ལ་ཉེ་བའི་སྐབས་དེར་བསྐོ་གཞག་བྱས་པའི་ཨ་རིའི་ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས་དང་ཁོང་གི་ཕྱག་རོགས་ལས་བྱེད་རྣམས་ཀྱིས་དྲ་ལམ་བརྒྱུད་༧གོང་ས་མཆོག་ལ་མཇལ་མོལ་ཞུས་ཡོད་ཅིང་། མཇལ་མོལ་གྲོལ་རྗེས་སྐུ་ཞབས་རོ་བྷར་ཊི་ཌེ་སི་ཊོ་རོ་ལགས་ཀྱིས་སྒེར་གྱི་ཊུ་ཝི་ཊར་དྲ་བའི་སྟེང་། ༧གོང་ས་རྒྱལ་བ་རིན་པོ་ཆེ་མཆོག་དང་གླེང་མོལ་ཞུ་རྒྱུ་བྱུང་བ་དེ་ནི་ཆེ་མཐོང་ལྡན་པ་ཞིག་རེད། ངས་སྔར་ནས་ཁོང་གིས་བོད་བརྒྱུད་ནང་བསྟན་སློབ་ཁྲིད་གནང་བཞིན་པའི་ཆོད་སེམས་དེར་ཡིད་སྨོན་སྐྱེ་ཡི་ཡོད། ང་ཚོས་ཆོས་ལུགས་སྡེ་ཁག་རྣམས་ཀྱི་རང་གི་མགོ་འཁྲིད་འདེམས་རྒྱུའི་རང་དབང་ལ་ཚད་བཀག་བཟོ་མཁན་གྱི་སྲིད་གཞུང་སུ་རུང་ལ་ངོ་རྒོལ་བྱེད་ཀྱི་ཡོད། ཅེས་བརྗོད་ཡོད་པ་རེད།

རྒྱ་གར་ཉེན་རྟོག་པར་འཚེ་མེད་ཞི་བ་དང་བྱམས་སྙིང་རྗེའི་སྐོར་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༢ ཚེས་ ༡༧ ཉིན་རྒྱ་གར་གྱི་ཉེན་རྟོག་པའི་དགེ་རྩས་ཇི་ལྟར་གསོལ་འདེབས་ཞུས་དོན་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་གཞི་རྩའི་ཐོག་ནས་ཉེན་རྟོག་པ་ཚོ་མིའི་བཟང་སྤྱོད་དང་དམངས་གཙོ། རང་དབང་སྲུང་སྐྱོབ་བྱེད་མཁན་ཆགས་ཀྱི་ཡོད་ཀྱང་། སྐབས་རེར་ཏོག་ཙམ་དྲག་རྩུབ་ཀྱི་སྒོ་ནས་རྣམ་འགྱུར་སྟོན་དགོས་པ་དེ་འདྲ་ཡོང་གི་ཡོད་པ་དེ་འགྲིག་གི་ཡོད་སྐོར་དང་། ངོས་རང་གི་མི་ཚེ་ཆ་ཚང་ཉེན་རྟོག་པས་མཐའ་བསྐོར་ནས་བསྐྱལ་བ་རེད། བོད་ནང་དུའང་ལོ་དགུའི་རིང་རྒྱ་མིའི་ཉེན་རྟོག་པས་བསྐོར་ནས་བསྡད་པ་རེད། ཕྱི་ལོ་ ༡༩༥༩ ནས་རྒྱ་གར་གྱི་ཉེན་རྟོག་པས་སྲུང་སྐྱོབ་གནང་ནས་བཞུགས་པ་རེད། ཕྱོགས་གཉིས་ཀས་ངོས་རང་ལ་སྲུང་སྐྱོབ་གནང་གི་ཡོད་པ་ནི་ངོས་ནས་དོ་སྣང་བྱུང་སོང་། རྒྱ་ནག་དམར་ཤོག་གི་ཉེན་རྟོག་པ་ཚོར་འགན་གཉིས་ཡོད་པ་འདྲ་བོ་འདུག  གཅིག་ངོས་རང་ལ་སྲུང་སྐྱོབ་བྱ་རྒྱུ་དང་གཞན་དེ་སོ་བ་བྱ་རྒྱུའི་ལས་འགན་ཡོད་པ་འདྲ་བོ་འདུག  རྒྱ་གར་གྱི་ཉེན་རྟོག་པ་ཡིན་ན་ལྷག་བསམ་རྣམ་དག་རེད། ཅེས་གསུངས་འདུག་པ་མ་ཟད། རྒྱ་གར་འདི་འཛམ་གླིང་ནང་ནས་དམངས་གཙོ་ཆེ་ཤོས་གྲས་ཆགས་བསྡད་ཡོད་རེད། དེར་བརྟེན་ལུང་པ་སྲུང་སྐྱོབ་བྱེད་རྒྱུ་ལབ་ཡོང་དུས་ས་མཚམས་སྲུང་སྐྱོབ་བྱས་པ་ཙམ་མིན་པར་རྒྱ་གར་གྱི་ལོ་ངོ་སྟོང་ཕྲག་ནས་ཡོད་པའི་གནའ་རབས་ཀྱི་རིག་གཞུང་སྲུང་སྐྱོབ་བྱ་རྒྱུ་འདི་རྒྱལ་ཁབ་སྲུང་སྐྱོབ་བྱས་པ་ཆགས་ཀྱི་ཡོད་རེད། རྒྱ་གར་གྱི་གནའ་རབས་ཀྱི་རིག་གཞུང་འདི་འཛམ་གླིང་སྤྱི་ལ་དགོས་མཁོ་ཡོད་པ་ཞིག་རེད། ཅེས་སོགས་གསུངས།

རྒྱལ་སྤྱིའི་ནང་པའི་ལྷན་ཚོགས་ཀྱི་བསླབ་པ་གསུམ་གྱི་བགྲོ་གླེང་ལ་བཀའ་སློབ་སྩལ་བ།

སིང་ག་པོར་གྱི་བོད་བརྒྱུད་ནང་པའི་ཆོས་ཚོགས་གཙོས་པའི་ཚོགས་པ་ཁག་ནས་ཇི་ལྟར་གསོལ་བ་བཏབ་པ་ལྟར། ཕྱི་ལོ་ ༢༠༡༢༡ ཟླ་ ༣ ཚེས་ ༥ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་ཆེན་གྱི་ནང་པའི་ལྷག་པའི་བསླབ་པ་གསུམ་གྱི་བརྗོད་གཞིའི་ཐོག་ཉིན་གསུམ་རིང་གི་བགྲོ་གླེང་དབུ་འཛུགས་ཐོག་བཀའ་སློབ་སྩལ་དོན། སངས་རྒྱས་པའི་ཆོས་དེ་ལོ་ ༢༥༠༠ ལྷག་ཕྱིན་པའི་ཆོས་བརྒྱུད་ཅིག་ཆགས་ཡོད། དེང་སང་འཛམ་གླིང་འདིར་དེ་སྔ་ནང་པ་མིན་པ་ཚོས་ཀྱང་བརྟག་དཔྱད་བྱེད་སྐབས་དམིགས་བསལ་ཞིག་ཡོད་པ་དང་། མདོར་ན་ཚན་རིག་པའི་ནང་ནས་ཀྱང་དོ་སྣང་བྱེད་མཁན་ཡོང་གི་འདུག ང་ཚོས་ནམ་རྒྱུན་ཐེག་པ་ཆེན་པོ་དང་ཐེག་པ་ཆུང་ངུ་ཞེས་བརྗོད་ཀྱི་ཡོད་པ་རེད། ཚིག་དེ་ཡག་པོ་མི་འདུག ངོས་ཀྱིས་ནམ་རྒྱུན་ལེགས་སྦྱར་གྱི་ཆོས་བརྒྱུད་དང་པཱ་ལིའི་ཆོས་བརྒྱུད་ཅེས་སྐད་ཡིག་གི་ཐོག་ནས་དབྱེ་བ་ཕྱེ་ཡི་ཡོད། ཅེས་དང་། པཱ་ལིའི་གཞུང་ནི་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད་སྐོར་དང་། བོད་ལ་མཚོན་ན་ཚད་མ་རིག་པའི་གཞུང་དག་གལ་ཆེན་པོར་རྩི་ཡོད་པ་དང་། ལུང་ཙམ་ལ་མ་བརྟེན་པར་རིགས་པ་ལ་བརྟེན་ནས་འགྲོ་དགོས་སྐོར་དང་། བཀའ་འགྱུར་པོ་ཏི་བརྒྱ་ཡོད་པའི་ནང་དུ་འདུལ་བའི་སྐོར་པོ་ཏི་བཅུ་གསུམ་དང་། མདོ་སྡེ་སྐོར་མང་པོ་ཡོད་པ་རེད། མངོན་པའི་སྐོར་ལས་ཤེར་ཕྱིན་གྱི་གཞུང་ཧ་ཅང་མང་པོ་ཡོད་པ་རེད། ཁྱོན་བསྡོམས་པོ་ཏི་བརྒྱ་ཡོད་པ་རེད། དེའི་དགོངས་འགྲེལ་ཀླུ་སྒྲུབ་དང་ཐོགས་མེད་སོགས་ཀྱིས་མཛད་པ་བོད་ཡིག་ནང་དུ་ཡོད་པ་བསྟན་འགྱུར་པོ་ཏི་ཉིས་བརྒྱ་ཙམ་ཡོད་པ་རེད། དེ་ཚང་མ་བོད་སྐད་ནང་དུ་ཐོས་བསམ་སྒོམ་བསམ་བྱེད་བཞིན་པ་རེད། ཅེས་སོགས་གསུངས།

ཏོག་དབྱིབས་སྔོན་འགོག་གི་སྨན་ཁབ་བསྒྲོན་པ།

ཕྱི་ལོ་ ༢༠༢༠ ལོའི་ལོ་མགོ་ཙམ་ནས་འཛམ་གླིང་ཡུལ་ལུང་གང་སར་ཏོག་དབྱིབས་གཉན་རིམས་འགོས་ཁྱབ་བྱུང་བ་དང་། རྒྱལ་ཁབ་ཁག་གི་སྲིད་གཞུང་ནས་སྔོན་འགོག་སྨན་ཁབ་ཛ་དྲག་ངང་རྒྱག་པའི་ལས་གཞི་ཚ་ཚ་འུར་འུར་གྱིས་སྤེལ་ཡོད་པ་ལྟར། ཕྱི་ལོ་ ༢༠༢༡ ཟླ་ ༣ ཚེས་ ༦ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་ནས་ཆིབས་ཐོན་མཛད་དེ། དྷ་སའི་འདབས་རོལ་དུ་ཡོད་པའི་རྒྱ་གར་གཞུང་གི་སྨན་ཁང་ཛོ་ནལ་(Zonal)ནས་༧མགོན་པོ་གང་ཉིད་མཆོག་དང་སྐུ་འཁོར་ཞབས་ཞུ་བ་ ༡༠ ལ་ཨེས་ཏྲ་ཛེ་ནེ་ཁ་ (AstraZeneca) དང་ཨོག་སི་ཧྥོར་ཌི་གཉིས་ཀྱིས་བཟོས་པའི་ཀོ་ཝི་ཤིལ་ཌི་ (Covishield) ཡི་ཏོག་དབྱིབས་སྔོག་འགོག་སྨན་ཁབ་ཐོག་མ་དེ་བསྒྲོན་ཡོད་ཅིང་། སྐབས་དེར་མགོན་པོ་མཆོག་གིས། ངོས་ཀྱི་བློས་ཐུབ་ཀྱི་གྲོགས་པོ་དང་སྨན་པ་ཡིས་སྔོན་འགོག་སྨན་ཁབ་འདི་རྒྱག་དགོས་སྐོར་བརྗོད་བྱུང་། ཛ་དྲག་གི་དཀའ་ངལ་སེལ་ཐབས་སུ་འགོག་ཁབ་འདི་བརྒྱབ་ཚེ་ཧ་ཅང་ཕན་ཐོགས་ཆེན་པོ་ཡོད་པ་རེད། དེར་བརྟེན་ནད་པ་ཚོས་ཀྱང་ཕྱོགས་ཡོངས་ཀྱི་ཁེ་ཕན་གྱི་ཆེད་དུ་འགོག་ཁབ་འདི་བརྒྱབ་རྒྱུ་ཧ་ཅང་གལ་ཆེན་པོ་ཡིན་སྟབས། ངོས་ཀྱིས་འགོག་ཁབ་འདི་བརྒྱབས་པ་ཡིན། མི་མང་པོ་ཞིག་ལ་འགོག་ཁབ་འདི་རྒྱག་པའི་བློ་སྤོབས་ཡོང་བར་ངོས་ཀྱིས་སྐུལ་མ་བྱེད་འདོད་བྱུང་། ཞེས་གསུངས་ཡོད་པ་དང་། ཕྱི་ལོ་ ༢༠༢༡ ཟླ་ ༤ ཚེས་ ༢༦ ཉིན་སྔོན་འགོག་སྨན་ཁབ་གཉིས་པ་དེ་༧རྒྱལ་བའི་ཕོ་བྲང་དུ་ཆེད་བཅར་ཞུས་ཏེ་བསྒྲོན་ཡོད་པ་རེད།

སོག་རིགས་གཞོན་སྐྱེས་ཚོར་ནང་ཆོས་དང་ཚན་རིག་གི་སྐོར་སོགས་ལ་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༣ ཚེས་ ༡༡ ནས་ ༡༣ བར་ཉིན་གྲངས་གསུམ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་བའི་ཕོ་བྲང་ནས་དྲ་ལམ་བརྒྱུད་སོག་པོའི་གཞོན་སྐྱེས་དང་དད་ལྡན་རྣམས་ལ་ཚན་རིག་དང་ནང་ཆོས་སྐོར་ལ་བཀའ་སློབ་དང་། པན་གྲུབ་བདུན་བདུན་གྱི་གསོལ་འདེབས་དང་། རྗེ་ཙོང་ཁ་པའི་ལམ་གཙོ་རྣམ་གསུམ་གྱི་ཆོས་འབྲེལ་བཀའ་དྲིན་བསྐྱངས་ཡོད་ཡོད་པ་རེད། དེ་ཡང་སོག་པོའི་གཞོན་སྐྱེས་རྣམས་ལ་མགོན་པོ་མཆོག་གིས། ང་རང་ཚོ་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་བོད་དང་སོག་པོ་ཚོ་ཚན་རིག་པའི་མཉམ་དུ་འགྲོ་ཐུབ་པ་ཞིག་ངོས་རང་གི་ཉམས་མྱོང་ཐོག་ནས་བཤད་ན་ཏན་ཏན་འདུག དེར་བརྟེན། ཁྱོད་རང་སོག་རིགས་ཚོས་ཚན་རིག་སློབ་སྦྱོང་བྱེད་པ་དང་ཆབས་ཅིག་ཏུ་སངས་རྒྱས་པའི་ཚད་མའི་གཞུང་གི་སེམས་ཁམས་རིག་པའི་ལྟ་གྲུབ་དེ་འདྲ་ཟུང་འབྲེལ་གྱིས་སློབ་སྦྱོང་བྱེད་རྒྱུ་བྱུང་ན་ཧ་ཅང་ཡག་པོ་ཡོང་གི་རེད། ཅེས་གསུངས་ཡོད་ཅིང་། བཀའ་ཆོས་ཀྱི་ཉིན་གཉིས་པ་དང་གསུམ་པའི་སྐབས་མགོན་པོ་མཆོག་གིས། རྗེ་རིན་པོ་ཆེས་ལེགས་བཤད་པོ་ཏི་བཅོ་བརྒྱད་མཛད་པ་ནི་རྗེས་འཇུག་གདུལ་བྱའི་ཆེད་དུ་མཛད་པ་རེད། རྗེ་རིན་པོ་ཆེའི་ཐུགས་རྒྱུད་ལ་ཡོད་པའི་རྟོགས་པའི་ཡོན་ཏན་དེ་འདྲ་ཞིག་ང་ཚོའི་རྒྱུད་ལ་ཡོང་བར་པོ་ཏི་བཅོ་བརྒྱད་ལ་ཞིབ་འཇུག་བྱས། སློབ་སྦྱོང་བྱས། བསྒོམ་བརྒྱབ་ནས་ཐོས་བསམ་སྒོམ་གསུམ་ཡ་མ་བྲལ་བར་འགྲོ་ཐུབ་པ་ཞིག་དགོས་པ་རེད། ཅེས་སོགས་བཀའ་སློབ་སྩལ།

གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ལྷན་དུ་གསུང་གླེང་མཛད།

ཕྱི་ལོ་ ༢༠༢༡ ཟླ་ ༤ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྦོལ་ཊིག་མཚོ་བརྒྱུད་ཀྱི་རྒྱལ་ཁབ་ཁག་གི་གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ཁག་གཅིག་དང་ལྷན་དུ། ད་ལྟ་དང་མ་འོངས་པའི་ཡ་རབས་དང་སྤྱོད་བཟང་སྐོར་གསུང་གླེང་གནང་སྐབས། འགྲོ་བ་མི་ཐེར་འབུམ་བདུན་རྣམས་མཆེད་གྲོགས་ཕོ་མོའི་འདུ་ཤེས་དགོས་པ་ནི་ང་ཚོའི་བདེ་དོན་ལ་ཧ་ཅང་ཕན་ཐོགས་ཆེན་པོ་ཡོད། ང་ཚོ་ཚང་མ་བེད་སྐྱིད་ངང་ནས་འཚོ་བ་སྐྱེལ་ཐུབ་ཚེ་ཡག་པོ་ཡོད། ངོས་ཀྱིས་དུས་རྒྱུན་དུ་སེམས་པ་བཟང་པོ་བྱེད་དགོས་སྐོར་བཤད་ཀྱི་ཡོད། ད་ཆ་ང་ཚོར་གོ་ལའི་ཚ་དྲོད་རྐྱེན་པས་གནས་གཤིས་འགྱུར་ལྡོག་གི་དཀའ་ངལ་ཤུགས་ཆེ་འཕྲད་ཀྱི་ཡོད། མིའི་སྤྱི་ཚོགས་སྤྱི་ལ་དཀའ་ངལ་དེ་འདྲ་ཞིག་འཕྲད་བཞིན་ཡོད་པའི་སྒང་ལ་དམག་འཁྲུག་སོགས་བརྒྱུད་སྡུག་བསྔལ་དང་དཀའ་ངལ་འཕར་མ་བཟོ་དགོས་རྒྱུ་མེད། ཅེས་དང་། ངོས་ཀྱིས་དུས་རྒྱུན་བཟང་སྤྱོད་སྐོར་ཤོད་སྐབས་རྒྱ་གར་གྱི་གནའ་རབས་རིག་གཞུང་ཆོས་ལུགས་རིས་མེད་ཀྱི་བཟང་སྤྱོད་སྐོར་ནས་ཞུ་གི་ཡོད། དེ་ཡང་རྒྱུ་མཚན་ལ་གཙོ་བོ་བརྟེན་པ་ཞིག་རེེད། འགྲོ་བ་མིའི་གནས་སྟངས་སྐོར་ཞུ་ཚེ། འཛམ་གླིང་འདིའི་སྟེང་འགྲོ་བ་མི་ཐེར་འབུམ་བདུན་ལྷག་ཙམ་ཡོད་པ་དེ་དག་འགྲོ་བ་མི་གཅིག་གྱུར་གྱི་འདུ་ཤེས་འཛིན་དགོས་ཀྱི་ཡོད་པ་མ་ཟད། ཚང་མ་མཉམ་རུབ་ཐོག་གནས་དགོས་པ་ནི་དངོས་ཡོད་གནས་ཚུལ་ཡང་རེད། འདས་པའི་ལོ་རྒྱུས་ནང་དམག་འཁྲུག་དང་དྲག་སྤྱོད་ཀྱི་དཀའ་ངལ་མང་དག་ཅིག་བྱུང་ཡོད། གོ་མཚོན་བཟོ་སླད་དུས་ཚོད་དང་དཔལ་འབྱོར་གྱི་འགྲོ་སོང་ཕོན་ཆེ་བཏང་བ་ནི་ཧ་ཅང་ཐབས་སྐྱོ་པོ་རེད། ཅེས་སོགས་གསུངས།

གོ་ལ་གཅིག་འགྱུར་གྱི་འདུ་ཤེས་སྤེལ་བར་ངོས་ལ་དཔུང་གྲོགས་གང་ཐུབ་གནང་རོགས།

ཕྱི་ལོ་ ༢༠༢༡ ཟླ་ ༤ ཚེས་ ༡༢ ཉིན་གྱི་སྔ་དྲོར། ༧གོང་ས་མཆོག་གིས་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་བརྗོད་གཞིའི་ཐོག་དྲ་ལམ་བརྒྱུད་བཅོས་བསྒྱུར་མཁན་དང་ཤུགས་རྐྱེན་ཆེ་བའི་ན་གཞོན་བཅུ་གཉིས་ལ་བཀའ་སློབ་སྩལ་ཡོད་པ་མ་ཟད། བཀའ་འདྲི་གནང་མཁན་ལས་འགུལ་བ་རྣམས་ནས་སྤྱི་ཚོགས་དང་། རེ་བ། སྙིང་རྗེ། གནམ་གཤིས་འགྱུར་ལྡོག་བཅས་ཀྱི་བརྗོད་གཞིའི་ཐོག་འགྲོ་བ་མི་རྣམས་འཇིག་རྟེན་སྤྱི་ལ་འགན་ཁུར་དང་དྲན་ཤེས་ཆེས་ཆེར་བསྟེན་ཐབས་སོགས་ཀྱི་སྐོར་བཀའ་འདྲི་ཞུས་པར། མགོན་པོ་མཆོག་ནས། ངོས་རང་ལོ་ ༨༦ ཆགས་ཡོད། ངོས་ཀྱི་མི་ཚེ་གང་བོའི་ཉམས་མྱོང་ཞུས་པ་ཡིན་ན། འཛམ་གླིང་དམག་ཆེན་དང་པོ་དང་གཉིས་པ། དེ་བཞིན་ས་ཆ་མང་པོར་ཕན་ཚུན་གསོད་རེས་དང་དྲག་རྩུབ་མང་པོ་བྱུང་བ་རེད། དེ་ཡི་མཐའ་མའི་གྲུབ་འབྲས་ནི་ཅི་ཞིག་བྱུང་བ་རེད་དམ་ཞེ་ན་མི་ལ་སྡུག་བསྔལ་མང་བ་དང་། ཁོང་ཁྲོ་ཤུགས་ཆེ་རུ་བཏང་བ་མ་གཏོགས་གང་ཡང་མེད། ཡུ་རོབ་སྤྱི་མཐུན་རྒྱལ་ཁབ་ནང་ཡོད་པའི་རྒྱལ་ཁབ་ཁ་ཤས་ཀྱིས་དམག་ཆེན་གཉིས་པའི་སྐབས་སུ་དགྲ་བྱས་ཏེ་འཛིང་རེས་བྱས་ཡོད་པ་རེད། འདས་པའི་སྐབས་སུ་སོ་སོའི་ཁྱིམ་མཚེས་རྒྱལ་ཁབ་དགྲར་བཟུང་བ་ཞིག་ཕྱིས་སུ་ཕན་ཐོགས་མེད་པ་ཤེས་ནས་ཡུ་རོབ་སྤྱི་མཐུན་རྒྱལ་ཁབ་བཙུགས་པ་རེད། ཅེས་གསུངས་འདུག་པ་མ་ཟད། གོ་ལའི་ཚ་དྲོད་འཕེལ་བཞིན་པའི་དཀའ་ངལ་དང་། ཆོས་ལུགས་དབྱེ་འབྱེད་ཀྱི་དཀའ་ངལ་ཡོད་པ་བཅས་ལ་འགྲོ་བ་མི་གཅིག་མཚུངས་ཡིན་པའི་འདུ་ཤེས་ཀྱི་ཐོག་ནས་གདོང་ལེན་གནང་དགོས་པའི་བཀའ་སློབ་ཟབ་མོ་སྩལ་གནང་ཡོད་འདུག

རྩོམ་པ་པོ་གྲགས་ཅན་ཕི་ཁཱོ་ཨཱ་ཡེར་དང་ལྷན་དུ་གསུང་གླེང་།

ཕྱི་ཟླ་ ༥ ཚེས་ ༡༩ ཉིན་ཨ་རིའི་མངའ་སྡེ་ཁེ་ལི་ཧྥོར་ནི་ཡ་སཱན་ཊ་བྷར་བྷ་ར་གཙུག་ལག་སློབ་གྲྭའི་ (the University of California Santa Barbara) ཕྱི་ལོ་ ༢༠༢༡ དང་ ༢༠༢༢ ལོའི་སྒྱུ་རྩལ་དང་རྩོམ་རིག་སྐོར་གྱི་མཁས་པའི་གསུང་བཤད་ཀྱི་ལས་འཆར་གྱི་ནང་ཚན་རེ་བ་སྐྲུན་པ་ (Creating Hope) ཞེས་པའི་སྟེང་། ༧གོང་ས་རྒྱལ་བ་རིན་པོ་ཆེ་མཆོག་གིས་འཛམ་གླིང་གི་རྩོམ་པ་པོ་གྲགས་ཅན་པི་ཁོ་ཨ་ཡེར་ (Pico Iyer)  དང་ལྷན་དུ་དྲ་ལམ་བརྒྱུད་གསུང་གླེང་གནང་སྐབས། རྩོམ་པ་པོ་པེ་ཁོ་ཨི་ཡེར་ལགས་ཀྱིས་མགོན་པོ་མཆོག་ལ་ནང་པའི་ལྟ་གྲུབ་ཀྱི་ངོས་ནས་རེ་བ་ཞེས་པར་ངོས་འཛིན་ཇི་ལྟར་བྱེད་ཀྱི་ཡོད་མེད་བཀའ་འདྲི་ཞུས་པའི་བཀའ་ལན་དུ། མི་ཚེ་མགོ་བཙུགས་པ་ནས་རེ་བའི་དབང་གིས་འཚོ་བ་ཞིག་ཆགས་ཡོད། རེ་བ་ཟེར་བ་ནི་བཟང་ཕྱོགས་ལ་ཡོད་པ་ཞིག་ཆགས་ཡོད་པ་དང་། ཐ་ན་ང་ཚོ་ཨ་མའི་མངལ་ནང་ཡོད་པའི་སྐབས་ཨ་མའི་སེམས་ནང་ཁོང་ཁྲོ་མེད་པ་དང་ཞི་བདེ་ལྡན་པ་ཞིག་ཡོད་ན། དེས་ཨ་མའི་མངལ་ནང་ཡོད་པའི་ཕྲུ་གུ་དེར་ཤུགས་རྐྱེན་བཟང་པོ་ཐེབས་ཀྱི་ཡོད་སྐོར་དང་། རེ་བ་ཞེས་པ་མ་འོངས་པར་གཞི་བཞག་ནས་བཤད་པ་རེད། མ་འོངས་པ་ནི་ངེས་གཏན་མེད་པ་ཞིག་རེད། འོན་ཀྱང་། ང་ཚོས་མ་འོངས་པའི་ཆེད་དུ་རེ་བ་རྒྱག་གི་ཡོད། སེམས་ལ་རེ་དོགས་བཅངས་ནས་བསྡད་ན་ཧ་ཅང་གནོད་སྐྱེལ་གྱི་ཡོད་ལ། ང་ཚོར་ནུས་པ་ཡོད་པ་དེ་ཏག་ཏག་བེད་སྤྱོད་ཀྱང་བྱེད་ཐུབ་ཀྱི་མ་རེད། རེ་བ་བཟང་ས་ཞིག་ལ་རྒྱག་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་ཟབ་མོ་སྩལ་གནང་ཡོད་པ་དང་། དེ་ནི་༧གོང་ས་མཆོག་གིས་གཙུག་ལག་སློབ་ཆེན་དེའི་རེ་བ་སྐྲུན་པ་ཞེས་པའི་ལས་རིམ་ནང་བཀའ་སློབ་སྩལ་བ་ཐེངས་ལྔ་པ་དེ་ཆགས་ཀྱི་ཡོད་འདུག

སྲིད་སྐྱོང་དམ་འབུལ་མཛད་སྒོར་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོགས་ཁང་དུ་འཚོགས་པའི་སྲིད་སྐྱོང་སྤེན་པ་ཚེ་རིང་མཆོག་གི་དམ་འབུལ་མཛད་སྒོའི་སྟེང་།  ༧གོང་ས་རྒྱལ་བ་རིན་པོ་ཆེ་མཆོག་བརྙན་ལམ་བརྒྱུད་ཆེད་ཕེབས་ཀྱིས། བོད་ནི་ཆོས་རྒྱལ་སྲོང་བཙན་སྒམ་པོའི་སྐབས་དང་ལྷག་པར་དུ་མངའ་བདག་ཁྲི་རལ་ནས་བཟུང་། རྒྱལ་དབང་སྐུ་ཕྲེང་རིམ་བྱོན་བར་ལོ་རྒྱུས་ཡུན་རིང་ལྡན་པའི་སྒྲིག་འཛུགས་ཤིག་ཡིན་སྟབས། བཙན་བྱོལ་ལ་འབྱོར་བའི་ལོ་དང་པོའམ་གཉིས་པ་ནས་བཟུང་། སྤྱི་འཐུས་འཛུགས་དགོས་པའི་འབོད་སྐུལ་ཞུས་པ་ལྟར་རྡོ་རྗེ་གདན་ལ་ཚོགས་འདུ་ཆེན་པོ་ཞིག་འཚོགས་ཡོད་པ་དང་། ད་ལྟ་སྒྲིག་འཛུགས་དེ་དམངས་གཙོའི་ལམ་ཁར་འགྲོ་བཞིན་པ་ཞིག་དང་། དེའང་འཁྲབ་པ་ཞིག་མིན་པར་ཁ་ཞེ་གཉིས་མེད་ཀྱི་ཐོག་ནས་དམངས་གཙོ་ཡང་དག་གི་ལམ་ལ་འགྲོ་བཞིན་པར་བརྟེན། རྒྱ་མི་གུ་དོག་པོ་རྣམས་ཀྱིས་དེར་ཞིང་བྲན་ལམ་ལུགས་དང་ལུགས་སྲོལ་རྙིང་པའི་ཐོག་ནས་སྐྱོན་བརྗོད་བྱེད་ཀྱི་ཡོད་ཀྱང་། དངོས་ཡོད་གནས་ཚུལ་ལ་བོད་ནང་དུ་རང་དབང་མེད་པ་དང་། བཙན་བྱོལ་ལ་ཡོད་པའི་བོད་མི་འབུམ་ལྷག་ཅིག་ཡོད་པ་དེར་རང་དབང་གང་ལ་གང་འཚམ་ཡོད་པས་དེའི་ཐོག་ནས་བཙན་བྱོལ་སྒྲིག་འཛུགས་ཤིག་ཡོད་པ་དང་། དེའང་དམངས་གཙོའི་ལམ་ཁ་མཐར་ཕྱིན་པ་ཞིག་ལ་འགྲོ་ཡི་ཡོད་པ་བཀའ་སློབ་སྩལ་བ་དང་འབྲེལ། སྲིད་སྐྱོང་གསར་པར་བཀྲ་ཤིས་བདེ་ལེགས་དང་། སྲིད་སྐྱོང་རྙིང་པར་ཐུགས་རྗེ་ཆེ་ཞེས་མ་འོངས་པར་མུ་མཐུད་བོད་སྤྱི་པའི་ལས་དོན་ཐོག་ཧུར་ཐག་གནང་དགོས་པའི་བཀའ་སློབ་སྩལ།

བོད་རིགས་གཞོན་སྐྱེས་ཚོར་རྟོགས་བརྗོད་འདུན་ལེགས་མའི་བཀའ་ཆོས་སྩལ།

ཕྱི་ལོ་ ༢༠༢༡ ཟླ་ ༦ ཚེས་ ༡ དང་ ༢ བར་ཉིན་གྲངས་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་བོད་རིགས་གཞོན་སྐྱེས་རྣམས་ལ་རྗེ་ཙོང་ཁ་པས་མཛད་པའི་རྟོགས་བརྗོད་འདུན་ལེགས་མའི་བཀའ་ཆོས་བསྩལ་བ་དང་། སློབ་མ་རྣམས་ཀྱི་བཀའ་འདྲིར་བཀའ་ལན་སྩལ་སྐབས། བར་སྐབས་ནས་ངོས་ཀྱིས་ཚན་རིག་པ་དང་མཉམ་དུ་འབྲེལ་བ་བྱས་པ་རེད། ང་ཚོར་དབུ་ཚད་ཀྱི་གཞུང་མེད་པར་འདུལ་བའི་འགྲོ་སྟངས་རྐྱང་བའི་ཐོག་ནས་ཕྱིན་པ་ཡིན་ན་ཚན་རིག་པ་དང་མཉམ་དུ་འབྲེལ་བ་བྱེད་རྒྱུ་ཕལ་ཆེར་མེད་པ་རེད། བོད་ལ་དབུ་ཚད་སེངྒེའི་མཇིང་བསྣོལ་ཞེས་གསུངས་པ་ནང་བཞིན་བོད་ཀྱི་སྐྱེས་བུ་དམ་པ་མང་པོ་ཞིག་གིས་ཆོས་རྒྱལ་ཚོའི་སྐབས་སུ་ང་ཚོར་ལམ་སྟོན་གནང་བ་དེ་མཐའ་འཁྱོངས་པ་གནང་བས་དེང་སང་བོད་ཀྱི་ནང་ཆོས་འདི་ཁྱད་དུ་འཕགས་པ་ཞིག་རེད། ཚན་རིག་པ་ཚོའི་མཉམ་དུ་གོ་བསྡུར་བྱེད་པའང་ང་ཚོར་སྤོབས་པ་ཡོད་པ་ཞིག་ཆགས་ཡོད། ཅེས་དང་། ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་བལ་བཟའ་ལ་འཁྲུངས་ས་སྐྱོན་པ་ཡིན་ནའང་། བོད་ལ་བོད་ཡིག་ཟུར་དུ་དགོས་ཀྱི་ཡོད་པ་དགོངས་པ་དེ་ནི་རླབས་ཆེན་པོར་གཟིགས་ཀྱི་ཡོད་སྐོར་དང་། ཁོང་ཁྲོ་ལངས་པའི་སྐབས་སུ་དེར་གདོང་ལེན་བྱེད་ཐབས་གཙོ་བོ་ནི་དུས་རྒྱུན་དུ་ནས་བྱམས་བརྩེའི་ཐད་ལ་བསམ་བློ་ཡང་ཡང་གཏོང་དགོས་པ་དང་། བྱང་ཆུབ་ཀྱི་སེམས་བསྒོམས་ན་འཕྲལ་ཕུགས་གཉིས་སུ་ཕན་རླབས་ཆེན་པོ་ཡོད་སྐོར་གྱི་བཀའ་སློབ་ཟབ་མོ་སྩལ།

རྒྱལ་སྤྱིའི་ཆོས་ལུགས་རང་དབང་གི་ཚོགས་འདུར་གསུང་འཕྲིན་སྩལ།

ཕྱི་ལོ་ ༢༠༢༡ ཟླ་ ༧ ཚེས་ ༡༥ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པས་གོ་སྒྲིག་བྱས་པའི་རྒྱལ་སྤྱིའི་ཆོས་ལུགས་རང་དབང་གི་ཚོགས་འདུའི་སྟེང་། ༧གོང་ས་རྒྱལ་བ་རིན་པོ་ཆེ་མཆོག་ནས་བརྙན་ལམ་བརྒྱུད་གསུང་འཕྲིན་ཞིང་སྩལ་ཡོད་པའི་ནང་། ཆོས་བྱེད་རྒྱུའི་རང་དབང་ནི་དོན་དངོས་ཐོག་ནང་སེམས་ཀྱི་བསམ་བློའི་རང་དབང་གི་རྣམ་པ་ཞིག་ཡིན་པ་དང་། ཆོས་ལུགས་མི་འདྲ་བར་ལྟ་གྲུབ་དང་ཉམས་ལེན་གྱི་སྟེང་ནས་མི་འདྲ་བའི་ཆ་ཡོད་ནའང་། ཚང་མས་བྱམས་བརྩེ་དང་བཟོད་བསྲན། འདོད་ཆུང་ཆོག་ཤེས། ཚུལ་ཁྲིམས་སོགས་བསླབ་བྱ་གཅིག་མཚུངས་སྟོན་གྱི་ཡོད་པ་དང་། བཟང་པོའི་ཡོན་ཏན་དེ་དག་ནི་ཆོས་མི་འདོད་མཁན་ཚོར་ཡང་དགོས་མཁོ་ལྡན་པ་ཞིག་ཡིན་སྐོར། དེ་བཞིན་ཆོས་ལུགས་དེ་སྐབས་འགར་ཆབ་སྲིད་ཀྱི་ལག་ཆར་གྱུར་ཏེ། ཕན་ཚུན་དབར་འཁྲུག་རྩོད་སོགས་འབྱུང་གི་ཡོད་ནའང་། ད་ལྟ་འདས་པའི་ཉམས་མྱོང་ལ་གཞིགས་ཏེ་ཕན་ཚུན་འཆམ་མཐུན་གྱི་ཐོག་ནས་མཉམ་གནས་ཡོང་ཐབས་དང་། ལྷག་པར་དུ་ད་ལྟའི་དུས་སྐབས་སུ་འཛམ་གླིང་འདིའི་སྟེང་གི་མི་ཐེར་འབུམ་ ༧ རྣམས་ཀྱིས་འགྲོ་བ་མིི་རིགས་གཅིག་ཡིན་པའི་འདུ་ཤེས་སྐྱེ་རྒྱུ་ཧ་ཅང་གལ་ཆེན་པོ་ཡིན་པའི་བཀའ་སློབ་སྩལ།

༢༠༠༠ ལོའི་ཞི་བདེའི་ལྷན་ཚོགས་ཀྱི་ཚོགས་འདུ་ཐེངས་ ༢༥ ཐོག་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༡༠ ཚེས ༡༠ ཉིན་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པེ་རག་ལ་འཚོགས་པའི་ ༢༠༠༠ ལོའི་ཞི་བདེའི་ལྷན་ཚོགས་ (Forum 2000) ཐེངས་ ༢༥ པའི་སྟེང་། ༧གོང་ས་རྒྱལ་བ་རིན་པོ་ཆ་མཆོག་ནས་བརྙན་ལམ་བརྒྱུད། ལྷན་ཚོགས་འདི་ཉིད་གསར་འཛུགས་གནང་མཁན་ཡུལ་དེའི་སྲིད་འཛིན་ཟུར་པ་སྐུ་ཞབས་ཝག་ལབ་ཧ་ཝེལ་(Vaclav Havel) མཆོག་དང་མགོན་པོ་མཆོག་ཐོག་མར་མཇལ་འཕྲད་གནང་སྐབས་ཕན་ཚུན་དབར་ལ་དམིགས་བསལ་གྱི་ཚོར་བ་ཞིག་བྱུང་ཡོད་སྐོར་དང་། ཁོང་ལ་བརྩི་བཀུར་དང་དགའ་མོས་ཞུ་མཁན་ཚོར་དམ་པ་ཁོང་གི་དགོངས་བཞེད་དང་བྱམས་བརྩེ་མུ་མཐུད་རྒྱུན་སྐྱོང་དང་ལག་བསྟར་ཞུ་རྒྱུའི་འགན་ཡོད་པ་མ་ཟད། འཛམ་གླིང་མི་མང་ལའང་ཁོང་གི་དགོངས་བཞེད་དང་བྱམས་བརྩེ་དགོས་མཁོ་ཡོད་པ། དམ་པ་ཁོང་ད་ལྟ་སྐུ་འཚོ་བཞུགས་སུ་མེད་ནའང་། ཁོང་གིས་འཛམ་གླིང་མི་མང་གི་བདེ་སྡུག་སླད་དགོངས་བཞེད་གནང་བ་དེ་དུས་ད་ལྟ་ཡིན་ནའང་དགོས་གལ་ཆགས་ཡོད་སྟབས། མགོན་པོ་མཆོག་ཚུད་པའི་དམ་པ་ཁོང་ལ་ཡིད་སྨོན་ཞུ་མཁན་གྱི་སྐྱེ་བོ་ཚང་མ་ལ་ཁོང་གི་འཇིག་རྟེན་ཀུན་ཁྱབ་ཀྱི་འགན་འཁུར་དང་བྱམས་བརྩེ་རྒྱུན་སྐྱོང་དང་ལག་བསྟར་ཞུ་རྒྱུའི་འགན་ཡོད་སྐོར་བཀའ་བསྩལ།  (པར་རྙིང་ཞིག་བཞག་ན་འགྲིག)

རྒྱ་གར་དབུས་གཞུང་རྒྱལ་ཡོངས་གོད་ཆག་ཉེན་སྐྱོབ་ལྷན་ཁང་ལ་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༡༡ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་དབུས་ནང་སྲིད་ལྷན་ཁང་གི་རྒྱལ་ཡོངས་གོད་ཆག་དོ་དམ་ལས་ཁུངས་ཀྱི་ལས་བྱེད་རྣམས་ལ་སྙིང་རྗེ་དང་བརྩེ་བ་ཞེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་ཅིང་། སྐབས་དེར་མགོན་པོ་མཆོག་གིས། རྒྱ་གར་ལ་སངས་རྒྱས་ཀྱི་བཀའ་ཁོ་ནར་བཀའ་འགྱུར་པོད་བརྒྱ་ལྷག་དང་། དེའི་འགྲེལ་བར་རྒྱ་གར་གྱི་མཁས་གྲུབ་མགོན་པོ་ཀླུ་སྒྲུབ་དང་འཕགས་པ་ཐོགས་མེད་སོགས་ཀྱིས་མཛད་པའི་བསྟན་འགྱུར་པོད་ཉིས་བརྒྱ་ཙམ་ཡོད་ཅིང་། ཕྱིས་སུ་དེ་དག་བོད་ཡིག་ནང་བསྒྱུར་ཏེ་བོད་མིས་ཚད་མ་རིག་པའི་ཐོག་ལ་འབད་བརྩོན་ཆེན་པོ་བྱས་ཡོད་ཅིང་། རིག་གཞུང་དེའི་འབྱུང་ཁུངས་རྒྱ་གར་ཡིན་ནའང་། དབྱིན་ཇིས་རྒྱ་གར་ལ་དབང་བསྒྱུར་བྱས་རྗེས་དེང་རབས་ཤེས་ཡོན་ལམ་ལུགས་རྐྱང་པ་ལས་གནའ་རབས་ཀྱི་རིག་གནས་ཉམས་ཡོད་པས། ད་ལྟ་གནའ་བོའི་རིག་གཞུང་དེ་ཉིད་བསྐྱར་གསོ་གནང་ཐུབ་པ་ཡིན་ན་ཤེས་བྱའི་སྒོ་བརྒྱ་འབྱེད་པ་དང་། དམིགས་བསལ་གྱིས་ཕན་ནུས་ཆེན་པོ་ཡོང་རྒྱུ་ཡིན་པ་དང་། དེ་ཡང་མགོན་པོ་སྐུ་ཉིད་ལ་རྒྱ་གར་གྱི་གཙུག་ལག་སློབ་གཉེར་ཁང་དག་ཏུ་ཆོས་ལུགས་དང་མ་འབྲེལ་བའི་ཐོག་ནས་བགྲོ་གླེང་གནང་རྒྱུའི་ཐུགས་རེ་ཆེན་པོ་ཡོད་སྐོར་གྱི་བཀའ་སློབ་སྩལ་གནང་འདུག་ལ། གོད་ཆག་གི་དུས་སྐབས་སུ་བྱམས་དང་སྙིང་རྗེ་ཅི་ཙམ་གལ་འགངས་ཆེན་པོ་ཡིན་པ་སོགས་ཀྱི་སྐོར་གྱི་དྲི་བར་བཀའ་ལན་གནང་།

བྱམས་སྙིང་རྗེ་ནི་ཁ་ཡོད་ལག་ཡོད་ཀྱི་བཟང་པོའི་ཡོན་ཏན་ཞིག་ཆགས་ཀྱི་ཡོད།

ཕྱི་ལོ་ ༢༠༢༡ ཟླ་ ༡༢ ཚེས་ ༡ ཉིན་༧གོང་ས་མཆོག་གིས་དྲ་ལམ་བརྒྱུད་འཛམ་གླིང་ཡེ་ཤུའི་སྒོམ་སྒྲུབ་ཚོགས་སྡེ་ (World Community of Christian Meditation) ཞེས་པ་བཙུགས་ནས་ལོ་སུམ་ཅུ་འཁོར་བའི་དུས་དྲན་དང་བསྟུན། ཚོགས་པ་འཛུགས་མཁན་དང་དགེ་རྒན་ཡེ་ཤུའི་དགེ་འདུན་པ་ཧྥ་རྡར་ལོ་རེན་སི་ཧྥརི་མེན་ (Father Laurence Freeman) དང་ལྷན་དུ་གཅིག་འདུས་ཀྱི་ཤེས་པ། སེམས་གཅིག བློ་གཅིག (Unified Consciousness: One Mind and One Heart) ཅེས་ཡེ་ཤུ་པའི་བཞེད་སྲོལ་ཞིག་གི་བརྗོད་གཞིའི་ཐོག་བཀའ་སློབ་སྩལ་སྐབས། རྒྱ་གར་གྱི་ལོ་ངོ་སྟོང་ཕྲག་ནས་ཡོད་པའི་བྱམས་སྙིང་རྗེའི་ལྟ་གྲུབ་དེ་འཛམ་གླིང་སྤྱི་ལ་ཁྱབ་ཐུབ་རྒྱུའི་ཐོག་ལ་འབད་བརྩོན་བྱ་རྒྱུ་ནི་ཧ་ཅང་གིས་གལ་ཆེན་ཡིན་པ་དང་། ཆོས་ལུགས་ཀུན་དང་ལྷག་པར་དུ་ཡེ་ཤུའི་ཆོས་ལུགས་ནང་བྱམས་སྙིང་རྗེའི་བསླབ་བྱ་ཤུགས་ཆེན་པོ་གསུང་གི་ཡོད་པ། འཇིག་རྟེན་བཀོད་པ་པོ་འདོད་མཁན་ཡིན་པའི་ཆ་ནས་འཇིག་རྟེན་བཀོད་པ་པོ་ཕ་གཅིག་གིས་བཀོད་པའི་སེམས་ཅན་ཡིན་པ་གཅིག་གྱུར་གྱི་འདུ་ཤེས་བཅང་དགོས་རྒྱུའི་བསམ་བློའི་ཁྱེར་སོ་ཡོད་རེད་ལ། འཇིག་རྟེན་བཀོད་པ་པོ་སྙིང་རྗེ་ཚད་མེད་པའི་བདག་ཉིད་ཅན་ཡིན་པ་ཞིག་ལ་ངོས་འཛིན་ཞུ་ཡི་ཡོད་པར་བརྟེན། སྙིང་རྗེ་ཚད་མེད་པའི་བདག་ཉིད་ཅན་གྱི་འཇིག་རྟེན་བཀོད་པ་པོ་དེ་ཡིས་བཀོད་པའི་འགྲོ་བ་སེམས་ཅན་ཡིན་པ་གཅིག་གྱུར་ཡིན་པའི་ཆ་ནས། ཕན་ཚུན་གཉེན་བཤེས་ཀྱི་འདུ་ཤེས་དང་བྱམས་བརྩེའི་འདུ་ཤེས་བཅང་དགོས་པའི་རྒྱུ་མཚན་དེ་འདྲ་ལ་བལྟས་ན། འཛམ་གླིང་སྤྱི་ལ་ཁྱབ་ཐུབ་པའི་བྱམས་སྙིང་རྗེ་དེ་རང་བཞིན་གྱིས་ཡོང་ཐུབ་པ་ཞིག་ཡིན་སྐོར་དང་། ད་བར་དེང་དུས་ཤེས་ཡོན་གྱིས་མིའི་ཀླད་པ་སྤྱང་གྲུང་བཟོ་རྒྱུ་མ་གཏོགས་སེམས་པ་བཟང་པོ་ཡོང་རྒྱུར་འབད་བརྩོན་བྱས་མེད་སྐོར་དང་། དེང་སང་སློབ་སྦྱོང་ཤུགས་ཆེན་པོ་དར་བསྡད་ཡོད་པ་དང་མི་རྣམས་ཤེས་ཡོན་ཆེན་པོ་ཆགས་ཀྱི་ཡོད་པར་བརྟེན་མི་སྒེར་པ་གཅིག་གཉིས་དཔེར་ན་༧རྒྱལ་བ་རིན་པོ་ཆེ་ལྟ་བུ་དང་༧པཎ་ཆེན་རིན་པོ་ཆེ་ལྟ་བུ་རྩ་ཆེན་པོར་རྩིས་པ་དེ་དགོས་མཁོ་ཞེ་དྲགས་ཆགས་ཀྱི་མེད་སྐོར་གྱི་བཀའ་སློབ་ཟབ་མོ་སྩལ།

བཀའ་ཤག་སྐབས་ ༡༦ པར་དྲ་ལམ་བརྒྱུད་མཇལ་ཁ་དང་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༡༡ ཚེས་ ༡༩ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་སྐྱོང་སྤེན་པ་ཚེ་རིང་མཆོག་གིས་དབུ་ཁྲིད་པའི་བོད་མིའི་སྒྲིག་འཛུགས་ཀྱི་བཀའ་ཤག་སྐབས་ ༡༦ པའི་བཀའ་བློན་ལྷན་རྒྱས་ལ་བརྙན་ལམ་བརྒྱུད་མཇལ་ཁ་བསྩལ་ཡོད་ཅིང་། སྐབས་དེར་སྲིད་སྐྱོང་མཆོག་ནས་ལས་བསྡོམས་དང་མ་འོངས་ལས་འཆར་སྙན་སེང་ཞུས་འདུག་ལ། ༧གོང་ས་མཆོག་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དགོས་པའི་སྐོར་དང་། ལྷག་པར་དུ་མགོན་པོ་གང་ཉིད་མཆོག་ནས་གོ་ལ་སྤྱི་ལ་ཕན་པའི་ཐུགས་ཁུར་རྒྱ་ཆེ་མཛད་བཞིན་ཡོད་པས། ཚང་མས་དོ་སྣང་དང་ཧུར་སྐྱེད་གནང་དགོས་པ་སོགས་ཀྱི་སྐོར་ནས་བཀའ་སློབ་བསྩལ།  ཡང་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཇེ་ལེགས་སུ་སོང་བ་དང་བསྟུན། འདས་ལོའི་ཕྱི་ཟླ་ ༡༢ ཚེས་ ༡༥ ཉིན་༧གོང་ས་མཆོག་ནས་སྲིད་སྐྱོང་སྤེན་པ་ཚེ་རིང་མཆོག་ནས་སྲིད་སྐྱོང་གི་ཐུགས་འགན་བཞེས་རྗེས་ཐེངས་དང་པོར་གཟིམ་ཆུང་མཇལ་ཁ་སྩལ་ཡོད་པ་དང་། སྲིད་སྐྱོང་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་པ་གང་ཡིན་པ་དེ་དག་སྙིང་ལ་བཅངས་པའི་ཐོག་ནས་ལས་ཀ་བྱེད་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད་སྟབས། དམ་བཅའ་དེ་དག་མ་དོར་བའི་ཐོག་ནས་བོད་སྤྱི་དང་མི་མང་གི་ཁེ་ཕན་སླད་མུ་མཐུད་ལས་ཀ་བྱེད་རྒྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པ་ཙམ་གྱིས་སྐུལ་འདེད་ཡོང་གི་འདུག་ཅེས་སོགས་གསུངས།

གཉན་འཕྲང་གི་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དྭང་དུ་ལེན་ཐབས།

ཕྱི་ལོ་ ༢༠༢༡ ལོའི་ཟླ་ ༡༢ ཚེས་ ༨ ཉིན་ཨ་རིའི་སེམས་དང་སྲོག་གི་ལྟེ་གནས་ཁང་གི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་ཁེ་ལི་ཧྥོར་ནི་ཡའི་གཙུག་ལག་སློབ་ཆེན་གྱི་སེམས་ཁམས་རིག་པ་བ་སློབ་དཔོན་ཆེན་མོ་ཨེ་ལའེ་སཱ་ཨེ་ཕེལ་ (Elissa Epel) ལགས་དང་།   ཨེ་རི་ཛོ་ནཱ་གཙུག་ལག་སློབ་གྲྭའི་ (Arizona State University)སློབ་དཔོན་ཆེན་མོ་མི་ཤལ་ཤའོ་ཊཱ་(Michelle “Lani”Shiota) ལགས་ཀྱིས་གཙོས་ཚན་རིག་པ་སྐོར་ཞིག་དང་ལྷན་དུ། གཉན་འཕྲང་ཅན་གྱི་དུས་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དྭང་དུ་ལེན་ཐབས་ཞེས་པའི་བརྗོད་གཞིའི་ཐོག་བགྲོ་གླེང་གནང་སྐབས། མགོན་པོ་མཆོག་གིས།དུས་ཚོད་ལ་ག་དུས་ཡིན་ཡང་འགྱུར་བ་འགྲོ་བཞིན་ཡོད། འགྱུར་བ་དེ་དག་གི་ནང་དུ་ང་ཚོས་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་སེམས་ཀྱི་ཞི་བདེ་མ་འཁྲུགས་པ་དང་། སྲ་བརྟན་དུ་གཏོང་བ་དང་། དེ་ལ་བརྟེན་ནས་སོ་སོའི་མི་ཚེ་དོན་ལྡན་དང་། སྤྱི་ཚོགས་ནང་ཞི་བདེ་བག་ཕེབས་ཡོད་པ་བཟོ་དགོས་པ་དང་། དེ་ལས་རྒྱ་བསྐྱེད་ན་ང་ཚོ་འགྲོ་བ་མི་ཚང་མས་འཛམ་གླིང་ཞི་བདེ་ཅན་ཞིག་བསྐྲུན་ཐུབ་པ་ཏན་ཏན་ཡོང་གི་རེད། མིའི་རང་བཞིན་ལྷན་སྐྱེས་ཀྱི་གཤིས་ཀ་དང་དེ་ལ་བརྟེན་ནས་རྒྱ་ཆེ་ས་ནས་བསམ་བློ་གཏོང་ཐུབ་པ་ཡིན་ན་འཛམ་གླིང་ཞི་བདེ་ཅན་དང་བདེ་སྐྱིད་དང་ལྡན་པ་ཞིག་ཏུ་ང་ཚོས་ཏན་ཏན་བསྒྱུར་ཐུབ་ཀྱི་རེད། ཅེས་དང་། ང་ཚོས་འགྲོ་མིའི་རིགས་ཚང་མ་གཅིག་གྱུར་ཡིན་པའི་འདུ་ཤེས་ཀྱི་ཐོག་ནས་འཛམ་གླིང་འདི་ཞི་བདེ་དང་བདེ་སྐྱིད་ལྡན་པ་ཞིག་ཏུ་བསྐྲུན་དགོས་སྐོར་གྱི་བཀའ་སློབ་ཟབ་མོ་སྩལ་གནང་མཛད།

ཧར་ཝ་ཌི་གཙོས་པའི་འཛམ་གླིང་སློབ་ཆེན་ཁག་ལ་བཀའ་སློབ་སྩལ།

ཕྱི་ལོ་ ༢༠༢༡ ཟླ་ ༡ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་འཛམ་གླིང་གི་སྙན་གྲགས་ཆེ་བའི་ཨ་རིའི་ཧ་ཝར་ཌི་གཙུག་ལག་སློབ་གྲྭ་ཆེན་མོའི་སློབ་མ་ལྷན་དུ་དབུ་འཁྲིད་དང་བདེ་སྐྱིད་ཅེས་པའི་བརྗོད་གཞིའི་ཐོག་གསུང་མོལ་དང་དྲི་བར་བཀའ་ལན་སྩལ། དེ་ཡང་མགོན་པོ་མཆོག་ནས་མགོ་འཁྲིད་གང་འདྲ་ཞིག་ཡོང་མིན་ཐད་ནས་ང་ཚོས་སློབ་གསོའི་ལམ་ལུགས་གཙོ་འདོན་བྱེད་དགོས་པ་རེད་ཅེས་སློབ་གསོའི་ལམ་ལུགས་ནི་གཞན་དོན་ཆེད་བློས་གཏོང་ཐུབ་ཅིང་བྱམས་བརྩེ་ཅན་གྱི་མི་ཞིག་བསྐྲུན་ཐུབ་པ་ཞིག་དགོས་སྐོར་དང་། ང་ཚོས་ཕྱི་དངོས་པོར་ཤུགས་ཆེན་པོ་བརྟེན་པའི་འཚོ་བ་ཞིག་ལ་རོལ་གྱི་ཡོད་ནའང་། ནང་སེམས་ཞི་བར་གནས་ཐབས་ཀྱི་གནས་ལུགས་དེ་ཤེས་རྟོགས་དགོས་རྒྱུ་ནི་སྣང་མེད་དུ་འཇོག་ཐབས་མེད་པ་ཞིག་ཡིན་སྐོར། དེ་བཞིན་སློབ་གྲྭ་ཆེན་མོ་དེའི་ངོས་ནས་འགྲོ་བ་མི་གཅིག་གྱུར་ཡིན་པའི་འདུ་ཤེས་གཙོར་བཟུང་གི་བསླབ་གཞི་ལ་ཤུགས་སྣོན་བརྒྱབ་སྟེ་འཛམ་གླིང་གི་སློབ་གཉེར་ཁང་གཞན་ལ་མིག་དཔེ་སྟོན་དགོས་སྐོར་སོགས་བཀའ་སློབ་ཟབ་མོ་སྩལ་གནང་ཡོད་འདུག སྤྱིར་ཏོག་དབྱིབས་གཉན་རིམས་ཀྱི་རྐྱེན་པས་༧གོང་ས་རྒྱལ་བ་རིན་པོ་ཆེ་མཆོག་དུས་རྒྱུན་ལྟར་སློབ་གྲྭ་ཆེན་མོ་ཁག་ཏུ་ཕེབས་རྒྱུ་བྱུང་མེད་ནའང་། ཕྱི་ལོ་ ༢༠༢༡ ལོ་གཅིག་པུར་རྒྱ་གར་གྱི་ཧ་རི་ཡ་ནིའི་འཛིན་སྐྱོང་སློབ་གཉེར་ཁང་ (the Indian Institute of Management (IIM) Rohtak) དང་། ཨ་རིའི་རྦོལ་ཌར་ས་གནས་ཀྱི་ཀོ་ལོ་ར་ཌོ་གཙུག་ལག་སློབ་ཆེན་གྱི་རི་ནི་ཁི་རཱོན་བདེ་གནས་སློབ་གཉེར་ཁང་(the Renee Crown Wellness Institute at the University of Colorado Boulder)། ཨ་རིའི་མོན་མའོ་ཐ་གཙུག་ལག་སློབ་ཆེན་ (Monmouth University)། དེ་བཞིན་ཨིན་ཌོ་ནེ་ཤི་ཡའི་ནང་པའི་ཆོས་ཚོགས་ཀྱི་གསོལ་འདེབས་བཞིན་སློབ་གཉེར་ཁང་འདྲ་མིན་གྱི་སློབ་མ་དང་། གཞན་ཡང་ཨུ་རུ་སུའི་གཙུག་ལག་སློབ་གཉེར་ཁང་ལྔ་ཡི་སློབ་མ་བཅས་ཨ་རིིའི་མོན་མའོ་ཐི་གཙུག་ལག་སློབ་ཆེན་(Monmouth University) སོགས་རྒྱལ་ནང་དང་རྒྱལ་སྤྱིའི་སློབ་གཉེར་ཁང་མང་པོར་བྱམས་བརྩེ་དང་ཞི་བདེ་གོང་སྤེལ་སོགས་ཀྱི་སྐོར་ལ་བཀའ་སློབ་སྩལ།

ཡུ་ཀེ་རེན་དང་ཨུ་རུ་སུའི་དམག་འཁྲུག་ཐད་གསུང་འཕྲིན་སྩལ།
ཕྱི་ལོ་ ༢༠༢༢ ཟླ་ ༢ ཚེས་ ༢༤ ཉིན་ནས་ཨུ་རུ་སུས་རང་གི་ལྷོ་ཕྱོགས་ཁྱིམ་མཚེས་རྒྱལ་ཁབ་ཡུ་ཀེ་རེན་ནང་ས་མཚོ་གནམ་གསུམ་ནས་དངོས་སུ་དཔུང་འཇུག་བྱེད་མགོ་བརྩམས་ཏེ། འཛམ་གླིང་སྤྱི་དང་ཡང་སྒོས་སུ་ཡུ་རོབ་གླིང་ཕྲན་གྱི་ཞི་བདེ་དང་བརྟན་ལྷིང་ལ་དོ་ཕོག་ཤུགས་ཆེར་ཐེབས་བཞིན་པའི་སྐབས་དེར། ཕྱི་ཟླ་ ༢ ཚེས་ ༢༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཡུ་ཀེ་རེན་གྱི་རྩོད་རྙོག་དེ་གྲོས་མོལ་གྱི་ལམ་ནས་སེལ་ཐབས་དགོས་སྐོར་གྱི་གསུང་འཕྲིན་ཞིག་སྩལ་ཡོད་འདུག གསུང་འཕྲིན་ནང་༧མགོན་པོ་གང་ཉིད་ཀྱིས། ཡུ་ཀེ་རེན་གྱི་རྩོད་རྙོག་དེས་ངོས་རང་ཐུགས་ཕམ་ཆེན་པོ་བྱུང་སོང་། ང་ཚོའི་འཛམ་གླིང་འདི་གཅིག་ལ་གཅིག་རྟེན་ཡིན་པའི་དབང་གིས། རྒྱལ་ཁབ་གཉིས་དབར་གྱི་འཐབ་འཁྲུག་གིས་འཛམ་གླིང་བྱིངས་ལ་ཤུགས་རྐྱེན་སྤྲོད་ཀྱི་ཡོད་པ་རེད། དམག་འཁྲུག་ནི་དུས་ཚོད་ཡོལ་ཟིན་པ་ཞིག་དང་འཚེ་བ་མེད་པ་ནི་ཐབས་ལམ་གཅིག་པུ་དེ་རེད། ང་ཚོས་གཞན་རྣམས་རང་གི་མིང་སྲིང་ཡིན་པའི་ངོས་འཛིན་ཐོག་ནས་མིའི་རིགས་གཅིག་ཡིན་པའི་འདུ་ཤེས་དེ་སྐྱེད་ཐབས་བྱ་དགོས། དེ་ལྟར་བྱས་ཚེ། ང་ཚོས་འཛམ་གླིང་འདི་སྔར་བས་ཞི་བདེ་ལྡན་པ་ཞིག་ཏུ་བསྐྲུན་ཐུབ། ཅེས་དང་། དཀའ་ངལ་དང་མི་མཐུན་པ་རྣམས་གྲོས་མོལ་གྱི་ལམ་ནས་སེལ་ཐུབ་ཀྱི་ཡོད། དོན་དམ་པའི་ཞི་བདེ་ནི་ཕན་ཚུན་ལ་བསམ་ཤེས་དང་ཕན་ཚུན་གྱི་བདེ་དོན་ལ་བརྩི་བཀུར་ཡོད་པའི་ཐོག་ནས་སླེབས་ཐུབ་པ་ཞིག་རེད། ང་ཚོས་ནམ་ཡང་རེ་བ་འདོར་རྒྱུ་མེད། དུས་རབས་ ༢༠ དེ་དམག་འཁྲུག་དང་ཁྲག་གི་དུས་རབས་ཤིག་ཆགས་ཡོད་ནའང་། དུས་རབས་ ༢༡ འདི་ངེས་པར་དུ་གྲོས་མོལ་གྱི་དུས་རབས་ཞིག་ལ་འགྱུར་དགོས། ངོས་ནས་ཡུ་ཀེ་རེན་ནང་གང་མྱུར་ཞི་བདེ་སླར་གསོ་ཡོང་རྒྱུར་སྨོན་ལམ་ཞུ་ཡི་ཡོད། ཅེས་གསུངས།

གསར་འགོད་པ་པ་སངས་ཚེ་རིང་གིས་ཕྱོགས་བསྡུས་ཞུས།