སྤོག་ར་བཀྲ་ཤིས་གླིང་གི་རུམ་གདན་བཟོ་གྲྭའི་འགན་འཛིན་སྐབས་བཞི་བ་དང་ལྔ་བའི་རྩོད་རྙོག་བྱུང་སྟེ་ཆེས་མཐོའི་ཁྲིམས་ཞིབ་ཁང་ལ་གཏུགས་ཡོད་ཀྱང་ཁ་མཆུ་དེབ་སྐྱེལ་བྱེད་ཐུབ་མི་འདུག
འདི་གའི་གསར་འགོད་པས་ཁ་པར་བརྒྱུད་བལ་ཡུལ་སྤོག་ར་བཀྲ་ཤིས་གླིང་ཁུལ་གྱི་བོད་མི་ཁག་ཅིག་ལ་བཀའ་འདྲི་ཞུས་ནས་ཤེས་རྟོགས་བྱུང་བའི་གནས་ཚུལ་ལྟར་ན། འདས་ལོའི་ཕྱི་ཟླ་ ༡ པོའི་ནང་བལ་ཡུལ་སྤོག་ར་བཀྲ་ཤིས་གླིང་གི་རུམ་གདན་བཟོ་གྲྭའི་སྐབས་ལྔ་བའི་འགན་འཛིན་གྱི་འོས་མི་ཀརྨ་བསོད་ནམས་དང་སྐབས་བཞི་བའི་རུམ་གདན་བཟོ་གྲྭའི་འགན་རྡོ་རྗེ་དགྲ་འདུལ་ལགས་གཉིས་བར་འོས་བསྡུ་བྱེད་སྐབས། རྡོ་རྗེ་དགྲ་འདུལ་ལགས་སུ་འོས་གྲངས་ ༨༧ ཐོབ་པ་དང་། ཀརྨ་བསོད་ནམས་ལགས་སུ་འོས་གྲངས་ ༩༩ བཅས་ཆགས་ཏེ། དངོས་གཞིའི་སྐབས་མང་མོས་ཐོག་ནས་ཀརྨ་བསོད་ནམས་ལགས་སུ་འོས་བསྡུའི་རྒྱལ་ཁ་ཐོབ་ཡོད་ཀྱང་། རྡོ་རྗེ་དགྲ་འདུལ་ལགས་ཀྱིས་འོས་བསྡུ་དྲང་པོ་བྱུང་མེད་སྐོར་བརྗོད་ནས། ས་གནས་རུམ་གདན་བཟོ་གྲྭའི་འགན་འཛིན་གྱི་གོ་གནས་རྩིས་སྤྲོད་མ་བྱས་ནས་ད་ལྟ་ལོ་གཅིག་ལྷག་འགྲོ་ཡི་འདུག
གཞིས་མི་ཀརྨ་བསོད་ནམས་དང་རྡོ་རྗེ་དགྲ་འདུལ། སྤོག་ར་བཀྲ་ཤིས་གླིང་གཞིས་མགོ་བཅས་ནས་ཁ་མཆུ་དེ་ཆེས་མཐོའི་ཁྲིམས་ཞིབ་ཁང་ལ་གཏུགས་ཟིན་ཡོད་སྐོར་འགྲེལ་བརྗོད་བྱས་པ་ལྟར། ཕྱི་ཟླ་ ༢ ཚེས་ ༡༧ ཉིན་འདི་གའི་གསར་འགོད་པས་ཆེས་མཐོའི་ཁྲིམས་ཞིབ་ཁང་ལ་འབྲེལ་བ་ཞུས་ཏེ། འབྲེལ་ཡོད་ནས་ཁ་མཆུ་དེ་ཁྲིམས་ཞིབ་ཁང་ལ་གཏུགས་ཟིན་ཡོད་སྐོར་བརྗོད་པ་དེ་བདེན་མིན་བཀའ་འདྲི་ཞུས་ཀྱང་བཀའ་ལན་གནང་མ་སོང་ཡང་། དེ་རིང་ཕྱི་ཟླ་ ༣ ཚེས་ ༧ ཉིན་ཆེས་མཐོའི་ཁྲིམས་ཞིབ་ཁང་ནས་འདི་ག་གསར་ཁང་དུ་ཁ་མཆུ་དེ་དང་འབྲེལ་བའི་གསལ་བཤད་ཡིག་ཆུང་ཞིག་འབྱོར་བའི་ནང་དུ། བལ་ཡུལ་སྤོག་ར་བཀྲིས་གླིང་གཞིས་མི་ཀརྨ་བསོད་ནམས་ནས་འདི་ལས་སུ་ཞུ་སྙན་ཕུལ་བའི་ཐད། འདི་ནས་དོ་བདག་ལ་སྤྱི་མང་གཏུགས་བཤེར་གྱི་འགྲོ་ལུགས་རྩ་འཛིན་ཁྲིམས་ཡིག་གཞིར་བཟུང་ཁྲིམས་གཏུགས་དགོས་པའི་ལམ་སྟོན་སོང་ཡོད་པ་ལས་ཁ་མཆུ་དེབ་སྐྱེལ་བྱུང་མེད། ཅེས་གསལ་བཤད་གནང་བྱུང་།
འདི་གའི་གསར་འགོད་པས་ཁ་པར་བརྒྱུད་སྤོག་ར་བཀྲ་ཤིས་གླིང་གི་ས་གནས་གཞིས་མགོ་དང་ས་གནས་འོས་བསྡུའི་འགན་འཛིན་ཡེ་ཤེས་ཆོས་སྒྲོན་ལགས་སུ། གནད་དོན་དེའི་ཐད་དགོངས་འཆར་དང་ལམ་སྟོན་ག་རེ་གནང་ཡོད་མེད་དྲིས་པར་ཁོང་གིས། ད་ལྟ་ཕྱོགས་གཉིས་ཀྱི་ངོས་ནས་ཁྲིམས་ཁང་ལ་གཏུགས་ཚར་བ་ཡིན་གསུངས་བྱུང་བས། ད་ལྟ་ང་ཚོའི་ངོས་ནས་དམིགས་བསལ་གསལ་བཤད་གང་ཡང་ཞུ་རྒྱུ་མི་འདུག ཅེས་དང་། འགན་འཛིན་གྱི་གོ་གནས་རྩིས་སྤྲོད་མ་བྱུང་བའི་ཐད་ཁོང་གིས། ཁོང་གིས་(རྡོ་རྗེ་དགྲ་འདུལ) འོས་བསྡུ་དྲང་པོ་བྱུང་མ་སོང་ཞེས་རྩིས་སྤྲོད་གནང་གི་མེད་གསུང་གི་ཡོད་པ་རེད། འོས་བསྡུའི་འགན་འཛིན་ངོས་ནས་སོ་སོའི་ལས་འགན་བསྒྲུབས་བཞག་ཡོད། ད་དེ་གཙང་མ་ཞིག་བཟོ་དགོས་ཀྱི་ཡོད་པ་རེད། སྤྱིར་བཏང་བཟོ་གྲྭ་དེ་ས་གནས་ཀྱི་བཟོ་གྲྭ་ཡིན་དུས། བཟོ་གྲྭའི་འགན་འཛིན་ལྷན་ཚོགས་ལ་འགན་དམིགས་བསལ་ཞིག་ཡོད་པ་རེད་ལ། བཟོ་གྲྭ་དེ་ཐད་ཀར་ས་གནས་མགོ་འཛིན་ལས་ཁུངས་འོག་མེད་པ་དང་། ད་ལྟ་གནས་ཚུལ་དེ་ཁྲིམས་ལ་གཏུགས་ཚར་བ་ཞིག་ཆགས་ཀྱི་ཡོད་དུས་ཁྲིམས་ཐོག་རང་ནས་ཐག་གཅོད་དགོས་པ་ཞིག་ཆགས་ཀྱི་ཡོད། ཅེས་བརྗོད་བྱུང་།
ས་གནས་འོས་བསྡུའི་འགན་འཛིན་ཡིན་པའི་ངོས་ནས་ཡེ་ཤེས་ཆོས་སྒྲོན་ལགས་ཀྱིས། ས་གནས་མགོ་འཛིན་ལས་ཁུངས་ཀྱི་སྒྲིག་གཞིའི་ནང་གསལ་ལྟར། ད་སྔ་བར་ས་གནས་འོས་བསྡུ་ལས་ཁུངས་ཀྱིས་སྤོག་ར་བཀྲ་ཤིས་གླིང་གི་རུམ་གདན་བཟོ་གྲྭའི་འགན་འཛིན་སྐབས་རིམ་པའི་འོས་བསྡུར་མཐུན་འགྱུར་སྦྱར་ཡོད་པ་ལྟར། ད་རེས་ཀྱང་འོས་བསྡུའི་མཐུན་འགྱུར་སྦྱར་བ་ཙམ་ལས་འོས་བསྡུ་དྲང་པོ་བྱུང་མ་སོང་ཞུ་བའི་གནད་དོན་དེ་གཙང་མ་བཟོ་བའི་འགན་ཆ་ཚང་རུམ་གདན་བཟོ་གྲྭའི་འགན་འཛིན་ལྷན་ཚོགས་ལ་ཡོད་པ་དང་། འོས་བསྡུ་ལས་ཁང་ངོས་ནས་འགན་ཡོད་པ་གཞིར་བཟུང་མཐུན་འགྱུར་ཞུས་ནས་ལས་འགན་བསྒྲུབས་པ་ཙམ་མ་གཏོགས། འོས་བསྡུ་ལས་ཁུངས་རང་གི་ཐག་གཅོད་ཐོག་མཐའ་གཅིག་ཏུ་འགྲོ་དགོས་ཀྱི་མེད་པ་དང་། བཟོ་གྲྭའི་འགན་འཛིན་ལྷན་ཚོགས་ཀྱིས་ཐག་གཅོད་ག་རེ་བྱས་ན་དེའི་ཐོག་འགྲོ་རྒྱུ་ཡིན་སྐོར་དང་། ད་རེས་དཀའ་རྙོག་བྱུང་སྐབས་འགན་ཁུར་མཁན་གཅིག་ཀྱང་ཡོང་གི་མེད་པ་དང་ཆེས་མཐོའི་ཁྲིམས་ཞིབ་ཁང་ལ་གཏུགས་ན་མ་གཏོགས་ཐར་ལམ་གཅིག་ཀྱང་མེད་དུས། མ་འོངས་པར་རུམ་གདན་བཟོ་གྲྭའི་འགན་འཛིན་ལྷན་ཚོགས་རང་ངོས་ནས་འོས་བསྡུའི་ཚོགས་ཆུང་བཙུགས་ནས་འོས་བསྡུ་བྱ་དགོས་ཀྱི་ཡོད་པ་ལས། ས་གནས་འོས་བསྡུ་ལས་ཁང་ནས་རུམ་གདན་བཟོ་གྲྭའི་འགན་འཛིན་གྱི་འོས་བསྡུར་མཐུན་སྦྱོར་བསྐྲུན་རྒྱུ་མཚམས་འཇོག་དགོས་པའི་གནས་སྟངས་ཤིག་ཏུ་ལྷུང་ཡོད་སྐོར་སོགས་བརྗོད་བྱུང་།
གསར་འགོད་པས་ཁ་པར་བརྒྱུད་རྡོ་རྗེ་དགྲ་འདུལ་ལགས་སུ་རྩིས་སྤྲོད་རྩིས་ལེན་མ་གནང་བའི་རྒྱུ་མཚན་གང་ཡིན་སྐོར་འདྲི་སྐབས། གནས་ཚུལ་ཆ་ཚང་ཆེས་མཐོའི་ཁྲིམས་ཞིབ་ཁང་དང་ཚོགས་དྲུང་ལས་ཁུངས། དབུས་འོས་བསྡུ་ལས་ཁུངས་དང་ནང་སྲིད་སོགས་ཚང་མར་ཕུལ་ཚར་བ་རེད། དངོས་གཞིའི་སྐབས་རོགས་པ་འཁྲིད་ཆོག་གི་མེད་ཀྱང་། མི་ཞིག་ལ་རོགས་པ་བཏང་ནས་བཙན་གྱིས་འོས་བླུག་བཅུག་པ་རེད། ཁོང་གིས་ང་ལ་འོས་བསྡུ་དྲང་པོ་བྱུང་མ་སོང་ཞེས་ལབ་བྱུང་། ཞེས་བརྗོད་བྱུང་བ་དང་། རྡོ་རྗེ་དགྲ་འདུལ་ལགས་ཀྱིས་འོས་བསྡུའི་སྐབས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༡༩ དང་ ༢༤ གཉིས་ལ་འགལ་ཡོད་སྐོར་བརྗོད་དེ་རྩིས་སྤྲོད་རྩིས་ལེན་བྱས་མེད་འདུག
ཡང་གསར་འགོད་པས་ཀརྨ་བསོད་ནམས་ལགས་སུ་དེའི་འབྲེལ་ཐད་སྐད་ཆ་འདྲི་སྐབས། ས་གནས་འོས་བསྡུ་ལས་ཁུངས་ཀྱི་གོ་སྒྲིག་འོག་འོས་བསྡུ་བྱས་ཏེ་མི་མང་གི་འོས་དེ་ང་ལ་ཐོབ་པ་རེད། ཕྱི་ཟླ་ ༢ ཚེས་ ༡༥ ཉིན་སྐབས་བཞི་བའི་འགན་འཛིན་གྱི་ལས་ཡུན་རྫོགས་ཀྱི་ཡོད་པ་ལྟར། ཕྱི་ཟླ་ ༢ ཚེས་ ༡༤ ཉིན་འོས་བསྡུ་ལས་ཁུངས་ནས་ང་ལ་སྐབས་ལྔ་བའི་རུམ་གདན་བཟོ་གྲྭའི་འགན་འཛིན་གྱི་འོས་བསྡུར་རྒྱལ་ཁ་ཐོབ་པའི་ཡི་གེ་འབྱོར་བྱུང་། འོན་ཀྱང་། རྡོ་རྗེ་དགྲ་འདུལ་ལགས་ཀྱིས་འོས་བསྡུ་དང་པོ་བྱུང་མ་སོང་ལབ་ནས་རྩིས་སྤྲོད་རྩིས་ལེན་མ་བྱས་པ་དང་ཏོག་དབྱིབས་གཉན་རིམས་ཀྱི་རྐྱེན་པས་ཟླ་གསུམ་བཞི་ཙམ་རིང་ལུས་པ་རེད། དེ་ནས་ང་ཚོ་ནང་སྒྲིག་བྱེད་རྩིས་བྱས་པ་རེད་དེ། རྡོ་རྗེ་དགྲ་འདུལ་ལགས་ཀྱིས་དེ་འགྲིག་གི་མི་འདུག་གསུངས་པ་རེད། ཕྱི་ཟླ་ ༧ ཚེས་ ༡༥ ཉིན་རྩིས་ཞིབ་ཚར་གྱི་ཡོད་སྟབས། དེ་དུས་ནང་སྒྲིག་བྱ་རྒྱུ་བྱས་པ་རེད་དེ་བཟོ་གྲྭའི་འགན་འཛིན་ལྷན་ཚོགས་ནང་ཁུལ་མ་འཆམ་ནས་རྩིས་སྤྲོད་རྩིས་ལེན་བྱུང་ཡོད་པ་མ་རེད། དེར་བརྟེན། ང་དང་ས་གནས་མགོ་འཛིན། རྡོ་རྗེ་དགྲ་འདུལ་ལགས་བཅས་འཛོམས་ནས་གྲོས་བསྡུར་བྱས་པ་རེད། རྩིས་སྤྲོད་རྩིས་ལེན་མ་བྱས་ན་ལས་ཀ་འཐུས་ཤོར་འགྲོ་ཡི་ཡོད་པ་རེད། ང་རང་མི་མང་གིས་བདམས་པ་ཡིན་དུས་རྩིས་སྤྲོད་རྩིས་ལེན་མ་བྱས་ན་ཁྲིམས་ཞིབ་ཁང་ལ་གཏུག་གི་ཡིན་ལབ་དུས། རྡོ་རྗེ་དགྲ་འདུལ་ལགས་ཀྱིས་གཏུགས་ཤོག་གསུངས་པ་རེད། ཅེས་དང་། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་ཆེས་མཐོའི་ཁྲིམས་ཞིབ་ཁང་སོགས་ལ་སྙན་ཞུ་རིམ་པར་ཕུལ་ཏེ་བཀའ་ལན་ལམ་སྟོན་གནང་བ་ལྟར། ཆེས་མཐོའི་ཁྲིམས་ཞིབ་ཁང་ལ་གཏུགས་དགོས་བྱུང་ཡོད་སྐོར་བརྗོད་བྱུང་།
གཞན་ཡང་། གསར་འགོད་པས། བལ་ཡུལ་སྤོག་ར་བཀྲ་ཤིས་གླིང་གི་འབྲེལ་ཡོད་བོད་མི་ཁག་ཅིག་ལ་སྐད་ཆ་འདྲི་སྐབས། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གཞུང་འབྲེལ་སྤྱི་འཐུས་ཕྱོགས་ཕེབས་གནང་སྲོལ་ཡོད་པ་ལྟར། ཕྱི་ཟླ་ ༡ ཚེས་ ༣ ནས་ ༡༧ བར་བོད་མི་མང་སྤྱི་འཐུས་རྣམ་རྒྱལ་སྒྲོ་དཀར་མཆོག་དང་སྤྱི་འཐུས་རིག་འཛིན་ལྷུན་གྲུབ་མཆོག་རྣམ་གཉིས་བལ་ཡུལ་ཁུལ་དུ་གཞུང་འབྲེལ་ཕྱོགས་ཕེབས་གནང་སྐབས། སྤོག་ར་བཀྲ་ཤིས་གླིང་བོད་མིའི་གཞིས་ཆགས་ཀྱི་གནས་སྟངས་སྤྱིའི་སྐོར་ལ་གཟིགས་ཞིབ་གནང་ཡོད་པ་དང་། ཉིན་དེར་རུམ་གདན་བཟོ་གྲྭའི་འགན་འཛིན་གྱི་དབང་ཆ་རྩིས་སྤྲོད་མ་བྱུང་བའི་ཐད། འོས་ཐོབ་མཁན་ཀརྨ་བསོད་ནམ་ལགས་ནས་སྤྱི་འཐུས་རྣམ་གཉིས་དང་ཐུག་འཕྲད་ཀྱིས་རུམ་གདན་བཟོ་གྲྭའི་འགན་འཛིན་གྱི་གོ་གནས་རྩིས་སྤྲོད་རྩིས་ལེན་མ་ཞུས་པའི་གནས་སྟངས་ཡར་ཞུ་དང་སྦྲགས་སྙན་ཞུ་བཅས་ཕུལ་ཡོད་པ་དང་། འོས་བསྡུ་དྲང་པོ་བྱུང་མ་སོང་གསུང་མཁན་རུམ་གདན་བཟོ་གྲྭའི་སྐབས་བཞི་བའི་འགན་འཛིན་རྡོ་རྗེ་དགྲ་འདུལ་ལགས་ཉིན་དེར་ལས་ཁུངས་སུ་ཕེབས་མེད་པ་མ་ཟད། འོས་བསྡུ་དྲང་པོ་བྱུང་མེད་སྐོར་དང་འབྲེལ་ནས་སྤྱི་འཐུས་རྣམ་པ་གཉིས་ལ་ཐུག་འཕྲད་དང་གསལ་བཤད་སོགས་གང་ཡང་གནང་མེད་སྐོར་སོགས་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
