བཙན་བྱོལ་ནང་གི་བོན་གྱི་བཙུན་དགོན་ཐོག་མ་རཏྣ་སྨན་གླིང་བཙུན་དགོན་གྱི་བཙུན་མ་ལྔ་བསླབ་པ་མཐར་སོན་ཏེ་དགེ་བཤེས་མའི་ཕྱག་འཁྱེར་བཞེས་ཡོད་འདུག
ཟླ་འདིའི་ཕྱི་ཚེས་ ༨ ནས་ཉིན་བཞིའི་རིང་གཡུང་དྲུང་བོན་གྱི་རཏྣ་སྨན་གླིང་བཙུན་དགོན་དུ་སྐབས་དང་པོའི་དགེ་བཤེས་མ་ཐོན་པའི་མཛད་སྒོའི་སྟེང་། ༧སྐྱབས་རྗེ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གིས་གཙོས་པའི་སྨན་རིའི་དཔོན་སློབ་རིན་པོ་ཆེ། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང། མཁན་པོ་དགེ་བཤེས། གྲྭ་བཙུན་སོགས་ཀྱིས་ལྷན་འཛོམས་གནང་སྟེ། ༧སྐྱབས་རྗེ་སྨན་རི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གིས་སྐབས་དང་པོའི་དགེ་བཤེས་མ་ཐོན་མཁན་བཙུན་མ་ལྔ་ལ་ཕྱག་འཁྱེར་སྩལ་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་དགེ་བཤེས་གྱེར་ནག་ཚང་ལ་དེ་འབྲེལ་གནས་ཚུལ་དྲིས་པར་ཁོང་གིས། བཙུན་མ་དེ་དག་གིས་གཞུང་བཀའ་པོད་དྲུག་སྦྱངས་ཏེ། ད་ལོ་སྨན་གླིང་བཙུན་དགོན་གྱི་དགེ་བཤེས་མའི་མཛད་སྒོ་ཐེངས་དང་པོ་ཉིན་བཞིའི་རིང་འཚོགས་ཡོད་པ་རེད། སྤྱིར་བཏང་གིས་སྨན་གླིང་བཙུན་དགོན་ནང་བཙུན་མ་ ༨༠ ལྷག་ཡོད་པ་རེད། ད་ལྟའི་ཆར་གཏན་འཁེལ་མེད་ཀྱང་། ༧སྐྱབས་རྗེ་སྨན་རི་ཁྲི་འཛིན་ ༣༤ པའི་དགོངས་གཞི་ལྟར་ན། ལོ་གཉིས་རེའི་མཚམས་ནས་དགེ་བཤེས་མའི་མཛད་སྒོ་ཐེངས་རེ་རེ་འཚོག་རྒྱུའི་དགོངས་གཞི་ཡོད་སྐོར་སོགས་གསུངས་བྱུང་།
ཕྱི་ལོ་ ༢༠༠༡ ཟླ་ ༤ ཚེས་ ༡༡ ཉིན་༧སྐྱབས་རྗེ་༧སྨན་རིའི་མཁན་ཆེན་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་གིས་རཏྣ་སྨན་གླིང་བཙུན་དགོན་ཕྱག་བཏབ་གནང་ཡོད་པ་དང་། བཙུན་དགོན་དེ་ནི་བཙན་བྱོལ་ནང་གི་བོན་གྱི་བཙུན་དགོན་ཐོག་མ་དེ་ཆགས་ཀྱི་ཡོད་ཅིང་། ད་ལྟའི་ཆར་བཙུན་མ་ ༨༠ ལྷག་ཙམ་ཡོད་པ་རེད་འདུག ཕྱི་ལོ་ ༢༠༡༠ ཟླ་ ༡༢ པའི་ཚེས་ ༢༠ ཉིན་༧སྐྱབས་རྗེ་རྒྱལ་བ་སྨན་རིའི་མཁན་ཆེན་ཁྲི་འཛིན་ ༣༣ པ་རིན་པོ་ཆེ་མཆོག་གིས་རྒྱ་གར་དུའང་བཙུན་མ་རྣམས་ཀྱི་ཆེད་དུ། གཡུང་དྲུང་བོན་གྱི་བཤད་སྒྲུབ་བསྟན་པའི་སྲོལ་བཏོད་པའི་རྟེན་འབྲེལ་གྱི་མཛད་སྒོ་གནང་སྟེ། ཕྱི་ལོ་ ༢༠༡༢ ཟླ་ ༡༢ ཚེས་ ༢༢ ཉིན། ༧སྨན་རིའི་སློབ་དཔོན་འཕྲིན་ལས་ཉི་མ་རིན་པོ་ཆེ་མཆོག་གིས་ཀུན་མཁྱེན་ཉི་མ་བསྟན་འཛིན་མཆོག་གིས་མཛད་པའི་ཐུན་མོང་བསྡུས་གྲྭ་ནས་དཔེ་ཁྲིད་དབུ་འཛུགས་ཀྱི་རྟེན་འབྲེལ་ལེགས་པར་གནང་རྗེས། བཙུན་དགོན་རཏྣ་སྨན་གླིང་གི་མཁན་པོ་དགེ་བཤེས་བསྟན་འཛིན་ཀུན་ཁྱབ་ནས་བཤད་གྲྭ་འདིའི་ཐུགས་འགན་ཡོངས་རྫོགས་བཞེས་ནས། སྡུད་གྲྭ་ནས་བཟུང་མདོ་སྔགས་རྫོགས་གསུམ་གྱི་གཞུང་ཆེན་བཀའ་པོད་དྲུག་དང་མིང་གཞི་སྙན་ངག རྩིས་དཀར་ནག སྐུ་གདུང་དཀྱིལ་འཁོར། གཟུངས་བཞུགས་འབུལ་ཐབས་ཕྱག་ལེན་སོགས། ལོ་ངོ་དུ་མའི་རིང་ཁོང་གཅིག་པུས་འཆད་ཁྲིད་གནངས་ནས། ད་ལོར་གཞི་ནས་སྐབས་དང་པོའི་དགེ་བཤེས་མ་གཏོང་ཐུབ་ཡོད་པ་རེད་འདུག
གསར་འགོད་པ། བསྟན་འཛིན་ཕུར་བུ།
ངོ་མ་རླབས་ཆེན་རྨད་བྱུང་གི་མཛད་བཟང་ཞིག་ཡིན་ལགས་པས། བོད་མི་རིགས་ཀྱི་ལོ་རྒྱུས་དེབ་ཐེར་ནང་འཁོད་དགོས་པའི་གཏམ་བཟང་ཞིག་ལོས་ཡིན། གུས་པ་བསེ་རུ་ཟང་ཐལ་དུ་འབོད་པས། སྔར་བྱོན་ཟིན་པའི་གཡུང་དྲུང་བོན་ཀྱི་༧བསྟན་འཛིན་གྱི་སྐྱེས་བུ་དམ་པ་སྤྱི་དང་། ད་ལྟ་ས་ཕྱོགས་གང་ན་འཚོ་བཞུགས་འབྲེལ་ཡོད་བསྟན་འཛིན་གྱི་སྐྱེས་བུ་དམ་པ་རྣམས་དང་། རྗེས་འཇུག་གདུལ་བྱ་སྐྱ་སེར་ཕོ་མོ་ཡོངས་ལ་དགའ་བསུའི་འཚམས་འདྲི་བཀྲིས་བདེ་ལེགས་ཡོད། ལྷག་པར་དུ་སྐབས་དང་པོའི་བསླབ་པ་ཐར་སོན་གཡང་དྲུང་བོན་གྱི་དགེ་བཤེས་མ་ལྔ་ལ་དམིགས་བསལ་ཡི་རངས་དང་འཚམས་འདྲིའི་བཀྲིས་བདེ་ལེགས་གྲངས་མེད་ཞུ།། །།