བཙན་བྱོལ་བོད་མིའི་སྤྱི་ཚོགས་ཀྱི་གནས་སྟངས་ཡར་རྒྱས་ཕྱིན་ཡོད་ནའང་ཉམ་ཐག་ཇེ་མང་དུ་འགྲོ་ཡི་འདུག་ཟེར་བའི་གནས་སྟངས་དེར་ཞིབ་འཇུག་ཆེད་ཁྱིམ་ཚང་རེ་རེའི་ནང་དུ་འཛུལ་ཏེ་ཞིབ་འཇུག་གནང་མུས་ཡིན་པས་མ་འོངས་པར་སྙན་ཐོ་རྒྱས་པ་ཞིག་གྲོས་ཚོགས་ལ་འབུལ་ངེས་ཡིན་སྐོར་གསུངས་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་ ༣ པའི་ཞོགས་པའི་ཚོགས་ཐུན་སྟེང་། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཕྱི་ལོ་ ༢༠༢༠ ཟླ་ ༤ ཚེས་ ༡ ནས་ཕྱི་ལོ་ ༢༠༢༡ ལོའི་ཟླ་ ༣ ཚེས་ ༣༡ བར་གྱི་ལོ་འཁོར་ལས་བསྡོམས་ཐོག་བགྲོ་གླེང་གནང་སྐབས། སྲིད་སྐྱོང་སྤེན་པ་ཚེ་རིང་མཆོག་ནས་ཉེ་ལམ་ནང་སྲིད་ལས་ཁུངས་ཀྱིས་རྒྱ་གར་དང་བལ་ཡུལ་ནང་སྡོད་ཁྱིམ་མེད་པའི་བོད་མིའི་གྲངས་འབོར་བསྡུ་རུབ་ཀྱི་ལས་གཞི་ཞིག་སྤེལ་ཡོད་པའི་དགོས་དམིགས་དང་མ་འོངས་འཆར་གཞིའི་སྐོར་གསལ་བཤད་གནང་སྐབས། བཀའ་ཤག་གི་དུས་ཡུན་འདིའི་ནང་ཁང་པ་མེད་མཁན་ཚོར་ཁང་པ་བརྒྱ་ཆ་བརྒྱ་ཐམ་པ་སྤྲོད་ཐུབ་པའི་རེ་བ་བྱེད་ཀྱི་མེད་ནའང་། ཡོང་རྒྱུའི་ལོ་གཉིས་ནང་ས་ཆ་གང་མང་མང་མཁོ་སྒྲུབ་བྱ་རྒྱུ་ཡིན་སྐོར་གསུངས་སོང་།
དེ་ཡང་ཁ་སང་ཉིན་རྒྱབ་སྲིད་སྐྱོང་སྤེན་པ་ཚེ་རིང་མཆོག་ནས་ཉེ་ཆར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ངོས་ནས་རྒྱ་གར་དང་བལ་ཡུལ་ནང་གནས་སྡོད་བྱེད་མཁན་བོད་མིའི་ཁྲོད་དུ་རང་བདག་ཁང་ཁྱིམ་མེད་པའི་གྲངས་འབོར་བསྡུ་རུབ་ཅིག་བྱས་པ་དེའི་གནས་སྟངས་ཐད་གསལ་བཤད་གནང་ཡོད་པ་ལྟར། དེ་རིང་གི་སྔ་དྲོའི་ཚོགས་ཐུན་སྟེང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས། འཛིན་སྐྱོང་ངོས་ནས་བཙན་བྱོལ་བོད་མིའི་སྤྱི་ཚོགས་ཀྱི་ཁང་ཁྱིམ་མེད་པ་ཚང་མའི་དཀའ་ངལ་སེལ་ཐབས་ཆེད། ལོ་དུས་ནུས་པ་ག་ཚོད་དགོས་ཀྱི་ཡོད་མེད་དང་། དེའི་ཆེད་དུ་ཨ་སྒོར་ས་ཡ་ ༣༠ ལྷག་ཐབས་ཤེས་གནང་རྒྱུ་དེ་སྟབས་བདེ་མིན་ནའང། དེའི་ཐད་དགོངས་བཞེས་གནང་བ་དེར་བསྔགས་བརྗོད་ཞུ་ཡི་ཡོད་སྐོར་དང་། དྷ་རམ་ས་ལ་ལྟ་བུར་མཚོན་ན་བོད་མི་གསར་འབྱོར་མང་སའི་ས་གནས་ཤིག་ཡིན་སྟབས། ས་ཆ་དང་ཡུལ་ཁྲིམས་ཀྱི་དཀའ་ངལ་ལ་མ་ལྟོས་པར་ས་གནས་སུ་ཡོད་པའི་བོད་ཁྱིམ་གྱི་སློབ་གྲྭ་དྷ་ཤོད་བོད་ཁྱིམ་ལྟ་བུར་འཛིན་རིམ་ལྔ་པ་མན་ཆད་མ་གཏོགས་མེད་སྟབས། འཛིན་སྐྱོང་བཀའ་ཤག་ངོས་ནས་བོད་ཁྱིམ་དང་གོ་བསྡུར་བྱས་ཏེ་རག་ཐབས་ཡོད་མེད་སྐོར་དགོངས་ཚུལ་བཏོན་སོང་།
དེའི་ཐད་སྲིད་སྐྱོང་སྤེན་པ་ཚེ་རིང་མཆོག་གིས། བཀའ་ཤག་གི་དུས་ཡུན་འདིའི་ནང་ཁང་པ་མེད་མཁན་ཚོར་ཁང་པ་བརྒྱ་ཆ་བརྒྱ་ཐམ་པ་སྤྲོད་ཐུབ་པའི་རེ་བ་བྱེད་ཀྱི་མེད་ནའང་། ཡོང་རྒྱུའི་ལོ་གཉིས་ནང་ས་ཆ་གང་མང་མང་མཁོ་སྒྲུབ་བྱ་རྒྱུ་ཡིན་པ་དང་། འཛིན་སྐྱོང་ངོས་ནས་ཁང་པ་མེད་མཁན་གྱི་ཐོ་གཞུང་རེ་རེ་ལ་ཞིབ་འཇུག་བྱས་ཏེ། མཐར་ཁང་པ་མེད་པའི་ཐོ་གཞུང་གཏན་འབེབ་ཟིན་རྗེས། ཐོ་གཞུང་དེ་བོད་མིའི་སྤྱི་ཚོགས་ནང་དགྲམ་རྒྱུ་ཡིན་ལ། གང་ལྟར་ཞིབ་འཇུག་ཚད་ལྡན་བརྒྱུད་ཁང་པ་ཐོབ་མི་དགོས་པ་ལ་ཐོབ་འདུག་ཟེར་བ་དང་། ཐོབ་དགོས་པ་ལ་ཐོབ་མི་འདུག་ཟེར་བའི་སྐད་ཆ་དེ་མེད་པ་བཟོ་ཐབས་བྱ་ངེས་ཡིན་སྐོར་དང་། ཁང་པའི་གནད་དོན་ཐད་སྤྱི་འཐུས་ནང་དོགས་པ་འདྲ་བྱུང་ཚེ། སྤྱི་འཐུས་ལྷན་ཚོགས་ངོས་ནས་ཚོགས་ཆུང་ཞིག་བཙུགས་ཏེ་སྐབས་དང་དུས་སུ་ནང་སྲིད་ལས་ཁུངས་དང་ལྷན་དུ་ལས་གཞིའི་གནས་སྟངས་སྐོར་གོ་བསྡུར་བྱ་ཆོག་པ་མ་ཟད། སྤྱི་འཐུས་རྣམ་པ་ལོ་གཉིས་དང་ཕྱེད་ཀའི་ནང་ཚུད་ས་གནས་ཁག་ལ་ཕེབས་ཀྱི་ཡོད་སྟབས། འཛིན་སྐྱོང་ངོས་ནས་ས་གནས་རེ་རེའི་ལས་འཆར་ཁག་སྤྱི་འཐུས་རྣམས་ལ་ཕུལ་ཏེ། སྤྱི་འཐུས་རྣམ་པས་ས་གནས་ཁག་གི་ལས་འཆར་གྱི་གནས་སྟངས་ལ་གཟིགས་རྒྱུ་ཡོད་སྐོར་དང་། ཁང་པ་མཁོ་སྤྲོད་ཀྱི་ལས་གཞི་དེ་བང་ཡག་པོ་མ་བསྒྲིག་པ་ཡིན་ན། ལས་གཞི་རེ་རེ་ལ་བལྟས་ནས་ཐག་གཅོད་ལེན་སྐབས། སྤྱི་སྙོམས་ཀྱི་སྲིད་ཇུས་དང་འཆར་གཞི་ལྡན་པ་ཞིག་ཡོང་གི་མི་འདུག་ཟེར་བ་ལས། ད་ལྟ་བར་གནང་བཞག་པ་རྣམས་ཡག་པོ་མ་རེད་ཟེར་གྱི་མེད། བཀའ་ཤག་སྔོན་མས་དགོངས་པ་བཞེས་པ་ལ་བརྟེན་ནས་ང་ཚོས་མུ་མཐུད་ནས་ལམ་ཁ་བཟོས་བཞག་པ་དེ་རྒྱ་ཆེ་རུ་དང་འཆར་གཞི་ལྡན་པ་ཞིག་བཟོ་ཐུབ་ན། ད་ལྟ་ང་ཚོར་དཀའ་ངལ་འཕྲད་བཞིན་པ་དེ་སེལ་རྒྱུའི་རེ་བ་ཡོད་པ་རེད། ཅེས་དང་། གལ་ཏེ་ད་ལྟའི་བཀའ་ཤག་ངོས་ནས་ལས་གཞི་ཆ་ཚང་བ་སྒྲུབ་མ་ཐུབ་ནའང་། འཆར་གཞི་ལྡན་པ་ཞིག་བཟོ་ཐུབ་ན་བཀའ་ཤག་རྗེས་མ་རྣམས་ལ་སྟབས་བདེ་པོ་ཡོང་རྒྱུའི་རེ་བ་ཡོད་སྐོར་ལན་འདེབས་གནང་སོང་ལ། སློབ་གྲྭའི་ས་ཆ་སྐོར་དེ་བསམ་བློ་གཏོང་ཡུལ་ཞིག་ཡིན་ནའང་། སློབ་གྲྭའི་ས་ཆ་དེ་དག་ཐོག་མར་མངའ་སྡེ་གཞུང་ནས་ཤེས་ཡོན་བསྟི་གནས་ཀྱི་ངོ་བོའི་ཐོག་ནས་ཞུས་པའམ་ཉོས་པ་ཞིག་ཡིན་སྟབས། ད་ལྟ་སྡོད་ཁང་གི་ངོ་བོར་བསྒྱུར་བ་དེས་འབྱུང་རྒྱུར་མུ་མཐུད་དཀའ་ངལ་ནང་ལྷག་རྒྱུའི་ཉེན་ཁ་ཡོད་པ་དང་། ས་ཆའི་རྙོག་དྲ་རིགས་སེལ་རྒྱུ་དེར་དུས་ཚོད་མང་པོ་འགོར་གྱི་ཡོད་སྐོར་འགྲེལ་བརྗོད་གནང་སོང་ལ། རྩ་བའི་སྡོད་ཁང་མེད་མཁན་རྣམས་ས་ཆ་བྱེ་བྲག་པ་ཞིག་ལ་འགྲོ་རྒྱུའི་འདོད་པ་ཡོད་ནའང་། ད་ལན་སྲིད་ཇུས་གཅིག་གི་འོག་ནས་སོ་སོའི་གནས་བབ་དང་བསྟུན་ནས་ས་ཆ་ཞིག་མི་འདེམས་ཐབས་མེད་ཡིན་པ་ལས། ང་དེ་ལ་འགྲོ་རྒྱུ་མིན་ཟེར་བ་དང་། ཡང་རྗེས་སུ་ང་ལ་སྡོད་ཁང་མེད་ཟེར་བ་དེ་འགྲིག་གི་མེད་སྐོར་སོགས་གསུངས་སོང་།
ཁ་སང་གྲོས་ཚོགས་ཀྱི་ཉིན་རྒྱབ་ཚོགས་ཐུན་སྟེང་སྲིད་སྐྱོང་སྤེན་པ་ཚེ་རིང་མཆོག་གིས། བཀའ་ཤག་གིས་འབྲེལ་ཡོད་ནང་སྲིད་ལས་བྱེད་ལ་སྡོད་ཁང་མེད་པའི་ཐོ་ཆ་ཚང་ལེན་ཤོག་ཟེར་དུས། སྐབས་དེ་དུས་ཁོ་ཚོས་ཐོ་བླངས་པ་ཡིན་ན་གཅིག་རག་རྒྱུ་ཡོད་རེད་བསམ་གྱི་རེད་གསུངས་སོང་། རག་རྒྱུ་ཡོད་ནའང་འདྲ། རག་རྒྱུ་མེད་ནའང་འདྲ། བཀའ་ཤག་གིས་ཐབས་ཤེས་བྱེད་ཀྱི་ཡིན། འོན་ཀྱང་ག་ཚོད་ལ་རོགས་པ་བྱེད་དགོས་ཀྱི་ཡོད་མེད་ང་ཚོས་ཧ་མ་གོ་ན། ཞུ་མཁན་གཅིག་པུ་ལ་སྤྲོད་རྒྱུ་ཙམ་ལས། ཁྱོན་ཡོངས་ལ་ལྟ་སྐྱོང་བྱེད་ཐུབ་ཀྱི་མི་འདུག་ཟེར་ནས་ནང་སྲིད་ལས་ཁུངས་ཀྱིས་ཟླ་བ་གཉིས་ཙམ་གོང་ལ་ཐོ་གཞུང་བསྡུས་པ་ལྟར་ན། རྒྱ་གར་དང་བལ་ཡུལ་གཉིས་ནང་མི་ཚང་ ༡༩༥༠ ནང་མི་གྲངས་ ༥༠༠༠ ལྷག་གི་གྲངས་ཐོ་ཞིག་འབྱོར་བ་རེད། དེའི་ནང་ཏན་ཏན་དྷ་སའི་ཁུག་ཀྱོག་ལ་བསྡད་ནས་ཡོངས་ཁྱབ་གསལ་བསྒྲགས་མ་ཐོས་པ་དེ་འདྲ་ཏན་ཏན་ཡོད་སྟབས། ཡང་བསྐྱར་ཕྱི་ཚེས་ ༡༦ བར་གསལ་བསྒྲགས་ཤིག་སྤེལ་བ་ལྟར་ན། ཕལ་ཆེར་མི་ཚང་ ༢༥༠༠ དང་མི་ ༦༠༠༠ ནས་ ༧༠༠༠ ལྷག་བར་ལ་ཁང་པ་སྤྲོད་དགོས་པའི་གནས་སྟངས་ཆགས་འདུག ང་ཚོས་རོབ་རྩིས་བྱས་ན་ཨ་སྒོར་ས་ཡ་ ༣༢ ཙམ་དགོས་པའི་གནས་སྟངས་ཆགས་འདུག འབྱུང་འགྱུར་ལོ་ལྔ་ལྷག་ནང་ཚང་མ་བཟོ་ཐུབ་མིན་མི་ཤེས་ཀྱང་། ད་ལོའི་སྔོན་རྩིས་ནང་ལ་ཁོང་ཚོར་སྡོད་ཁང་སྤྲོད་ཡུལ་གྱི་ས་ཆ་མཁོ་སྒྲུབ་ཀྱི་ཆེད་དུ་དངུལ་རྩིས་བཀའ་འཁྲོལ་ཞུས་ཡོད། དེ་བཀའ་འཁྲོལ་ཐོབ་པ་ཡིན་ན། གཞིས་ཆགས་ཆེ་ཁག་ནང་ས་ཆ་ག་ཚོད་ཐོན་གྱི་ཡོད་མེད་ལ་དཔག་པའི་འཆར་གཞི་ལྡན་པའི་ཐོག་ནས། རྩ་བ་ནས་མེད་ན་མ་གཏོགས་དངུལ་འབོར་ཕྱེད་ཀའམ་ཆ་ཚང་སོ་སོས་སྤྲོད་དགོས་པ་སོགས་ས་ཆའི་རིན་ཐང་ལ་དཔག་པའི་འཆར་གཞི་བཟོས་ཡོད། ཅེས་འགྲེལ་བརྗོད་གནང་སོང་།
སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་རང་ཉིད་ངོས་ནས་ནང་སྲིད་བཀའ་བློན་རིམ་པ་ལ་བཙན་བྱོལ་བོད་མིའི་སྤྱི་ཚོགས་ཀྱི་ཉམ་ཐག་གི་གནས་བབ་ཐོག་ལ་ཞིབ་འཇུག་ཚད་ལྡན་དགོས་པའི་འབོད་སྐུལ་ཞུས་པ་ལྟར་གང་ལ་གང་འཚམ་གྱིས་སྐུ་ལས་བསྐྱོན་ཡོད་ནའང་། འདོད་བློ་ཁེངས་པ་ཞིག་གནང་ཐུབ་མེད་པ་དང་། ཉམ་ཐག་རྙིང་པ་རྣམས་མུ་མཐུད་ཉམ་ཐག་གི་ཐོ་གཞུང་ནང་ཡོད་པ་དང་། ཉམ་ཐག་གསར་པ་རྣམས་ཐོ་གཞུང་ནང་ཞུགས་མི་ཐུབ་པའི་དཀའ་ངལ་མུ་མཐུད་ལྷག་ཡོད་པ་མ་ཟད། ས་གནས་འགའ་ཤས་ནང་གྲོང་སྡེའི་མི་ཕྱུག་ཤོས་དེ་ཉམ་ཐག་གི་ཐོ་གཞུང་ནང་ཡོད་པའི་གནས་ཚུལ་གོ་ཐོས་ཡོད་པར་བརྟེན། ད་ལྟའི་བཀའ་ཤག་ངོས་ནས་ཉམ་ཐག་གི་གནས་སྟངས་སྤྱི་ཡོངས་ལ་ཞིབ་འཇུག་ཚད་ལྡན་ཞིག་ཡོང་ཐུབ་པར་འབད་བརྩོན་ཞུ་རྒྱུའི་འབོད་སྐུལ་ཞུས་པར་སྲིད་སྐྱོང་སྤེན་པ་ཚེ་རིང་མཆོག་གིས། སྤྱིར་ཉམ་ཐག་གི་སྒྲིག་གཞིའི་ནང་ལོ་གཉིས་རེའི་མཚམས་ལ་ཞིབ་འཇུག་དགོས་སྐོར་འཁོད་ཡོད་ནའང་། བཀའ་ཤག་ངོས་ནས་ལོ་ལྔའི་མཚམས་ལ་ཞིབ་འཇུག་ཚད་ལྡན་ཞིག་བྱ་རྒྱུའི་འདོད་པ་ཡོད་སྐོར་དང་། བཀའ་ཤག་ངོས་ནས་འདས་ལོར་ཤེས་རིག་དང་ནང་སྲིད། འཕྲོད་བསྟེན་བཅས་ཀྱི་ཟུང་དྲུང་རེ་བཅས་གནས་རིམ་མཐོ་བའི་ལས་བྱེད་གསུམ་ལྷོ་ཕྱོགས་ཀྱི་གཞིས་ཆགས་ཆེ་ཁག་ལྔ་ལ་མངག་གཏོང་བྱས་ཏེ། ཉམ་ཐག་གི་ཐོ་གཞུང་ནང་ཡོད་པའི་མི་ཚང་རེ་རེའི་ནང་འཛུལ་བ་དང་ཁོང་ཚོའི་ཁྱིམ་མཚེས་ལ་འདྲི་རྩད་བྱས་ཏེ་ཞིབ་འཇུག་བྱས་ཡོད་སྐོར་དང་། ཉམ་ཐག་ཐོ་གཞུང་ནང་ཡོད་མེད་དེ་གཙོ་བོ་མི་སོ་སོས་དྲང་པོ་བྱ་དགོས་སྐོར་དང་། འཛིན་སྐྱོང་ངོས་ནས་ཉམ་ཐག་གི་ལོ་ཚོད་དང་ལྷན་ཁང་གང་གི་ཁྱབ་ཁོངས་སུ་གཏོགས་མིན་སོགས་ཀྱི་ཞིབ་འཇུག་གི་སྙན་ཐོ་རྒྱས་པ་དེ་གྲོས་ཚོགས་ལ་འབུལ་ཐུབ་པ་གནང་རྒྱུ་ཡིན་སྐོར་གསུངས་སོང་།
ཁ་སང་སྲིད་སྐྱོང་སྤེན་པ་ཚེ་རིང་མཆོག་ནས་ཉམ་ཐག་གི་གནས་བབ་དང་འབྲེལ་ནས་གྲོས་ཚོགས་ནང་བཙན་བྱོལ་སྤྱི་ཚོགས་འདི་སྤྱིར་བལྟས་པ་ཡིན་ན་གནས་སྟངས་ཡར་རྒྱས་ཕྱིན་ཡོད་ནའང་། དངོས་གནས་བྱས་ན་གནས་སྟངས་ཡར་རྒྱས་འགྲོ་སྐབས་ཉམ་ཐག་ཉུང་དུ་འགྲོ་དགོས་ཀྱི་ཡོད་ནའང་། ཉམ་ཐག་ཀྱང་ཇེ་མང་དུ་འགྲོ་ཡི་འདུག་ཟེར་གྱི་ཡོད་དུས་དངོས་ཡོད་གནས་སྟངས་ལ་ཞིབ་འཇུག་བྱེད་དགོས་ཀྱི་འདུག་བསམ་ཏེ། འདས་ལོར་ལྷོ་ཕྱོགས་གཞིས་ཆགས་ ༥ དང་ལྡི་ལི་བསམ་ཡས་གླིང་ལ་ཞིབ་འཇུག་བྱས་ཡོད་པ་རེད། སྐབས་དེའི་དུས་སྡོད་ཁང་མེད་མཁན་ལའང་ཞིབ་འཇུག་བྱས་པ་རེད། དེ་དང་མཉམ་དུ་ལུས་སེམས་ཐང་པོ་མེད་པའི་གྲངས་ཐོའང་བླངས་པ་རེད། ཧི་མ་ཅལ་ཁུལ་དུ་ཕྱི་ཟླ་ ༡༢ དང་ ༡ པོའི་ནང་ཚར་བ་རེད། དེ་ལྟར་བང་བསྒྲིགས་ནས་གང་ལྟར་ཟླ་བ་ཁ་ཤས་ནང་ལ་ཉམ་ཐག་ཞིབ་འཇུག་དེ་ཚར་བ་བྱ་རྒྱུ་ཡིན། ཞེས་གསུངས་ཡོད་པ་རེད།
དེ་བཞིན་དེ་རིང་གི་ཚོགས་ཐུན་སྟེང་བོད་མི་མང་སྤྱི་འཐུས་རིག་འཛིན་ལྷུན་གྲུབ་ལགས་ཀྱིས་ཁོང་དང་ཕྱག་རོགས་སྤྱི་འཐུས་བལ་ཡུལ་གྱི་ས་གནས་ཁག་ཏུ་སྐོར་སྐྱོད་དུ་ཕྱིན་སྐབས། ས་གནས་མི་མང་གིས་དུས་རྒྱུན་ང་ཚོས་རྒྱ་བལ་འབྲུག་གསུམ་ཟེར་ནས་དཀའ་ངལ་གཅིག་མཚུངས་ཡིན་པའི་དགོངས་པ་བཞེས་རྒྱུ་མེད་པའི་འབོད་སྐུལ་ཞུ་བཞིན་ཡོད་སྐོར་དང་། དུས་རྒྱུན་བལ་ཡུལ་ཟེར་དུས་རྒྱལ་ས་ཀ་ཐི་མན་གྲུ་ཁུལ་གྱི་བོད་མི་ཚོང་པ་འགའ་ཤས་ཀྱི་སྣང་བ་འཆར་གྱི་ཡོད་ནའང་། དོན་དངོས་ཐོག་གློ་ཚེ་རོགས་དང་ཤར་ཁུམ་བུ་ཁུལ་གྱི་ཁ་འཐོར་མི་མང་དང་། དེ་བཞིན་ཕྱིས་སུ་བལ་ཡུལ་མཆོད་རྟེན་བྱ་རུང་ཁ་ཤོར་ཉེ་འཁྲིས་སུ་འབྱོར་བའི་བོད་མི་རྣམས་ལ་དཀའ་ངལ་ཆེན་པོ་ཡོད་སྐོར་བརྗོད་སོང་ལ། སྲིད་སྐྱོང་སྤེན་པ་ཚེ་རིང་མཆོག་ནས་ཀྱང་བལ་ཡུལ་གྱི་གནས་སྟངས་དེར་གཟིགས་རྟོག་ལོགས་སུ་དགོས་ཀྱི་ཡོད་པ་དངོས་འབྲེལ་ཡིན་སྐོར་དང་། གྲོས་ཚོགས་ནང་བལ་ཡུལ་དང་འབྲུག་ནང་གི་གནས་སྟངས་སྐོར་གླེང་སློང་མང་པོ་བྱེད་པ་དེས། དེར་གནས་བོད་མི་རྣམས་ལ་དོ་ཕོག་འགྲོ་རྒྱུའི་ཉེན་ཁ་ཡོད་སྲིད་པས་དེ་ཙམ་གླེང་གི་མེད་པ་དང་། བལ་ཡུལ་ནང་དུའང་རྒྱལ་ས་འཕགས་ཤིང་དང་མཆོད་འབྱོར། ཇོ་ལ་ཁེལ་བཅས་ནང་གནས་སྟངས་འགྲིག་པོ་ཡོད་ནའང་། དུས་ཐུང་གི་ཚོང་ལས་ཆུང་ཆུང་ལ་བརྟེན་པའི་སྤོག་ར་ལ་འདས་པའི་ལོ་གཉིས་ནང་གཉན་རིམས་ཀྱི་རྐྱེན་པས་དཀའ་ངལ་མང་པོ་འཕྲད་ཡོད་པ་དང་། འཛིན་སྐྱོང་ངོས་ནས་བལ་ཡུལ་ནང་གི་བོད་མི་རྣམས་ལའང་སྡོད་ཁང་མཁོ་སྤྲོད་སོགས་ཀྱི་ཐད་ལ་ཞིབ་འཇུག་ཚད་ལྡན་གནང་རྒྱུ་ཡིན་སྐོར་གསུངས་སོང་།
གསར་འགོད་པ། པ་སངས་ཚེ་རིང་།
