ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་གིས་ཁྲིམས་ཞིབ་པ་ཆེ་བའི་འོས་མི་འཚོལ་ཐབས་གང་ཡོད་ཞུས་ཀྱང་བཅའ་ཁྲིམས་ནང་གསལ་ལྟར་འོས་ཆོས་ཚང་བའི་འོས་མི་ཞིག་རག་མེད་སྟབས། སྔོན་རྩིས་གྲོས་ཚོགས་སྐབས་ཁྲིམས་ཞིབ་པ་ཆེ་བ་དང་འབྲེལ་བའི་བཅའ་ཁྲིམས་བསྐྱར་བཅོས་བྱེད་པར་གོ་བསྡུར་བྱ་རྒྱུ་ཡིན་འདུག
དེ་རིང་སྲིད་སྐྱོང་སྤེན་པ་ཚེ་རིང་མཆོག་ནས་ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་གི་སྙན་ཐོ་གྲོས་ཚོགས་ལ་ཕུལ་ཡོད་པ་ལྟར། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྒྲོག་སྦྱང་གནང་བའི་ནང་། ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་ངོས་ནས་དངོས་དང་དྲ་ཐོག་བརྒྱུད་གོ་བསྡུར་དང་། ཁྲིམས་ཞིབ་པ་ཆེ་བའི་འོས་མི་ཆེད་ཐབས་ཤེས་ཡོད་རྒུ་ཞུས་ཀྱང་། བཅའ་ཁྲིམས་དོན་ཚན་ ༦༣ པའི་ནང་གསེས་དོན་ཚན་ ༡ དང་ ༢ སུ་གསལ་བའི་འོས་ཆོས་ཡོངས་སུ་ཚང་བའི་ཁྲིམས་ཞིབ་པ་ཆེ་བའི་འོས་མིའི་མཚན་གཞུང་ཞིག་འབུལ་ཐུབ་མེད་སྐོར་འཁོད་ཡོད་པ་ལྟར། སྤྱི་འཐུས་རྒྱུན་ལས་ངོས་ནས་སྔོན་རྩིས་གྲོས་ཚོགས་སྐབས་སུ་བཅའ་ཁྲིམས་བསྐྱར་བཅོས་གནང་ཐབས་ཐད་ལ་གོ་བསྡུར་ཞུ་རྒྱུ་ཡིན་སྐོར་གསུངས་སོང་།
བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ པའི་ནང་གསེས་དོན་ཚན་ ༡ དེ་ནི་གཙོ་བོ་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་ཀྱི་གོ་ཡུལ་སྟོང་པ་ཐོན་པའི་སྐབས་སུ་འདེམས་སྒྲུག་བྱེད་ཐབས་ཀྱི་བརྒྱུད་རིམ་སྐོར་ཡིན་ཞིང་། ནང་གསེས་དོན་ཚན་ ༢ པ་ནི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་ཀྱི་འོས་ཆོས་སྐོར་ལ་ཡིན་པ་རེད། དེ་ཡང་ནང་གསེས་དོན་ཚན་ ༢ པའི་ག་པར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་ནི། “ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་སུམ་ཅུའི་རིང་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་བསྐོ་གཞག་དགོས་རིགས་ནང་གསེས་འདིའི་ཆ་རྐྱེན་ཁག་ལ་བསྟུན་གནང་མི་དགོས།” ཞེས་འཁོད་ཡོད་ཅིང་། ད་ཡོད་བཙན་བྱོལ་བོད་མིའི་བཅའ་ཁྲིམས་འདི་བཞིན་ཕྱི་ལོ་ ༡༩༩༡ ཟླ་ ༦ ཚེས་ ༢༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཆོག་མཆན་སྩལ་ཏེ་གཏན་འབེབས་བྱས་པ་ཞིག་ཡིན་སྟབས། བཅའ་ཁྲིམས་ལ་བསྐྱར་བཅོས་མ་བྱས་བར་དུ་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་ལ། བཅའ་ཁྲིམས་དོན་ཚན་ ༦༣ པའི་ནང་གསེས་དོན་ཚན་ ༢ པའི་ག་པར་གསལ་བའི་འོས་ཆོས་ཚང་དགོས་པ་ཡིན་འདུག
སྤྱིར་འདས་ལོའི་ཕྱི་ཟླ་ ༡༠ པའི་ནང་ཚོགས་པའི་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་དང་པོའི་སྟེང་ཆེ་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་འོས་ཆོས་སྐོར་གྱི་བཅའ་ཁྲིམས་བསྐྱར་བཅོས་ཁྲིམས་འཆར་བཏོན་ཡོད་ནའང་། སྐབས་དེར་སྤྱི་འཐུས་མི་ཉུང་བ་ཞིག་གིས་བཅའ་ཁྲིམས་བསྐྱར་བཅོས་ལ་དགག་བྱ་བྱས་པ་མ་ཟད། བཅའ་ཁྲིམས་བསྐྱར་བཅོས་མ་བྱས་གོང་འཆར་འབུལ་ཚོགས་ཆུང་བསྐོ་གཞག་བྱས་ཏེ་འོས་ཆོས་ཚང་བའི་ཁྲིམས་ཞིབ་པ་ཆེ་བའི་འོས་མི་འཚོལ་ཐབས་དགོས་སྐོར་སོགས་ཀྱི་བསམ་ཚུལ་བཏོན་ཏེ་བཅའ་ཁྲིམས་བསྐྱར་བཅོས་ཕྱིན་ཐུབ་མེད་པ་རེད།
ད་ཐེངས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་གི་ཚོགས་མིའི་ཁོངས་སུ་ཁྲིམས་ཞིབ་པ་ཆེ་བ་ཟུར་པ་བློ་བཟང་དར་རྒྱས་མཆོག་དང་། བཀའ་ཟུར་རིན་ཆེན་མཁའ་འགྲོ་མཆོག བཀའ་ཟུར་ཐུབ་བསྟན་ལུང་རིག་མཆོག་བཅས་ཡོད་འདུག
གསར་འགོད་པ། པ་སངས་ཚེ་རིང་།
