རྒྱ་ནག་གི་གནམ་གྲུ་ཞིག་ལ་བརྡབ་སྐྱོན་བྱུང་སྟེ་མི་གྲངས་ ༡༣༢ རྐྱེན་འདས་སུ་ཕྱིན།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གི་གནམ་གྲུ་ཞིག་ལ་བརྡབ་སྐྱོན་བྱུང་ནས་མི་གྲངས་ ༡༣༢ རྐྱེན་འདས་སུ་ཕྱིན་པར་ཐུགས་གསོ་གནང་།

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་རྒྱ་ནག་གི་ལྷོ་ཕྱོགས་གྲོང་ཁྱེར་ཀོང་མིན་ (Kunming) ནས་ཀང་ཀྲུའུ་ (Guangzhou) གྲོང་ཁྱེར་དུ་འཕུར་སྐྱོད་བྱེད་བཞིན་པའི་གནམ་གྲུ་ (China Eastern Flight MU5735) ཞིག་ལ་མཐོ་ཚད་ཧྥི་ཊུ་ཁྲི་ ༣ གྱི་བར་སྣང་ནས་གློ་བུར་ཆགས་སྐྱོན་བྱུང་སྟེ། ཀཱང་ཤི་ས་ཁུལ་གྱི་ནགས་ཚུལ་ཞིག་ཏུ་ལྷུང་རྗེས།  གནམ་གྲུ་དང་གནམ་གྲུའི་ཁ་ལོ་བ་གཙོས་ཞབས་ཞུ་བ་དང་། འགྲུལ་བཞུད་པ་ཁྱོན་མི་གྲངས་ ༡༣༢ བཅས་གར་སོང་ཆ་མེད་དུ་གྱུར་ཡོད་པ་མ་ཟད། གནམ་གྲུ་བརྡབ་སྐྱོན་བྱུང་ཡུལ་གྱི་ནགས་ཚལ་ལ་མེ་སྐྱོན་ཤོར་ཡོད་སྟབས། གནམ་གྲུའི་ནང་གི་མི་ཚང་མ་འདས་གྲོངས་སུ་ཕྱིན་པའི་གནས་ཚུལ་ཐོན་འདུག

རྒྱ་ནག་གི་ལྷོ་ཕྱོགས་ཁུལ་དུ་འགྲིམ་འགྲུལ་བ་ ༡༣༢ ཡོད་པའི་གནམ་གྲུ་ཞིག་དེར་བརྡབ་སྐྱོན་བྱུང་བའི་གནས་ཚུལ་དང་འབྲེལ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྒེར་གྱི་ཊུ་ཝི་ཊར་སྟེང་། རྒྱ་ནག་ནང་གནམ་གྲུ་བརྡབ་སྐྱོན་བྱུང་བའི་ཡིད་སྐྱོའི་གནས་ཚུལ་ཐོས་པར་བློ་ཕམ་བྱུང་། དེར་བརྟེན་བོད་མིའི་སྒྲིག་འཛུགས་དང་བོད་མི་མང་ཡོངས་ཀྱི་ཚབ་ཞུས་ཏེ། རྐྱེན་འདས་ཕྱིན་པའི་ནང་མི་དང་གྲོགས་པོ་ཡོངས་ལ་ཐུགས་གསོ་ཞུ་རྒྱུ་དང་སྨོན་ལམ་འདེབས་ཀྱི་ཡིན། ཞེས་བརྗོད་འདུག

གནམ་གྲུ་བརྡབ་སྐྱོན་གྱི་དོན་རྐྱེན་བྱུང་མ་ཐག་རྒྱ་ནག་ཤར་ཕྱོགས་ཀྱི་མཁའ་སྐྱོད་འགྲུལ་ལམ་ཡོངས་བཀག་སྡོམ་བྱས་ཡོད་པ་མ་ཟད། རྒྱ་ནག་གི་སྲིད་འཛིན་ཞི་ཅིན་ཕིན་གྱིས། གནམ་གྲུ་བརྡབ་སྐྱོན་གྱི་དོན་རྐྱེན་དེའི་ཐོག་ལ་འཕྲལ་དུ་རྟོག་ཞིབ་དགོས་པའི་བཀའ་བཏང་བ་དང་འབྲེལ། གནམ་གྲུ་བརྡབ་སྐྱོན་བྱུང་ཡུལ་དུ་མྱུར་སྐྱོབ་པ་ ༦༠༠ ལྷག་བཏང་ཡོད་པ་དང་། དོན་རྐྱེན་བྱུང་ཡུལ་དུ་ཐོག་མར་མེ་གསོད་རུ་ཁག་འབྱོར་ནས་ནགས་ཚལ་གྱི་མེ་སྐྱོན་དཀའ་ངལ་སེལ་ཐུབ་ཡོད་ཀྱང་། དེ་རིང་ད་དུང་ཀྱང་མེར་འཚིག་པའི་གནམ་གྲུའི་ཆ་ཤས་ཅུང་ཙམ་རེ་དང་འགྲུལ་བ་ཁག་ཅིག་གི་འཛིན་བྱང་དང་དངོས་པོ་ཆུང་ངུ་ཙམ་ལས་གནམ་གྲུའི་ནང་གི་མི་གཅིག་ཀྱང་རྙེད་སོན་བྱུང་མེད་པ་རེད་ལ། དེ་རིང་ཆེད་དུ་རྒྱ་ནག་སྲིད་བློན་གཞོན་པ་ལོའུ་ཧེ་ཟེར་བ་དོན་རྐྱེན་བྱུང་སའི་ཡུལ་དངོས་སུ་སོང་ནས་རྟོག་ཞིབ་བྱས་ཡོད་སྐོར་རྒྱ་ནག་གཞུང་འབྲེལ་གོ་ལའི་དུས་བབ་སྟེང་གསལ་འདུག

ད་ལྟ་གནམ་གྲུ་དེ་བརྡབ་སྐྱོན་བྱུང་བའི་རྒྱུ་རྐྱེན་ཅི་ཡིན་གསལ་རྟོགས་ཐུབ་ཀྱི་མེད་ནའང་། དེ་འབྲེལ་ཐད་རྒྱ་ནག་གཞུང་འབྲེལ་གོ་ལའི་དུས་བབ་(Global Times) ཀྱི་རྩོམ་སྒྲིག་པ་ (Wang Yan’an) ཡིས། གནམ་གྲུ་འཕུར་སྐྱོད་བྱེད་བཞིན་པའི་སྐབས་གློག་མེད་པར་ཆགས་པས། གནམ་གྲུའི་ཁ་ལོ་བས་གནམ་གྲུ་སྟངས་འཛིན་བྱེད་མ་ཐུབ་པར་བརྡབ་སྐྱོན་བྱུང་ཡོད་སྲིད་སྐོར་བརྗོད་ཡོད་པ་དང་། ཁ་སང་གནམ་གྲུ་བརྡབ་སྐྱོན་བྱུང་ཡུལ་ཁུལ་དུ་གནམ་གཤིས་ལེགས་པོ་མེད་པ་ཡིན་འདུག

ཕྱི་ལོ་ ༢༠༡༠ ཟླ་ ༨ པའི་ནང་གནམ་གཤིས་གནས་སྟངས་ཡག་པོ་མེད་པའི་དཀའ་ངལ་འོག་རྒྱ་ནག་ (Harbin) ནས་བྱང་ཤར་ཁུལ་གྱི་ (Yichun) ས་ཁུལ་དུ་འཕུར་སྐྱོད་བྱེད་བཞིན་པའི་གནམ་གྲུ་ཞིག་བརྡབ་སྐྱོན་བྱུང་སྟེ་མི་ ༤༢ རྐྱེན་འདས་སུ་ཕྱིན་ཡོད་འདུག

གསར་འགོད་པ། བསྟན་འཛིན་ཕུར་བུ།