ཟླ་འདིའི་ཕྱི་ཚེས་ ༩ ནས་དེ་རིང་ཕྱི་ཚེས་ ༡༢ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་མཚོ་མཐའི་མངའ་སྡེ་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་དང་མན་སྤར་ཕན་བདེ་གླིང་གཞིས་ཆགས། བྷན་རྡ་ར་ནོར་རྒྱས་གླིང་བཅས་སུ་གཞུང་འབྲེལ་འཚམས་གཟིགས་སུ་ཕེབས་བཞིན་ཡོད་པ་རེད།
དེ་ཡང་ཁ་སང་ཕྱི་ཚེས་ ༡༡ ཉིན་སྲིད་སྐྱོང་མཆོག་གི་ཨོ་རི་ས་གཞིས་ཆགས་ཀྱི་གཞུང་འབྲེལ་འཚམས་གཟིགས་གྲུབ་མཚམས་མན་སྤར་ཕན་བདེ་གླིང་བོད་མིའི་གཞིས་ཆགས་སུ་ཕེབས་འབྱོར་གྱིས་གཞིས་ཆགས་ཀྱི་དགོན་ཁག་ལ་མཆོད་མཇལ་དང་འབྲེལ། ས་གནས་འཐུས་ཚོགས་ཀྱི་ལས་ཁུངས་དང་ཚོགས་ཁང་། ས་གནས་མགོ་འཛིན་ལས་ཁུངས། རང་བདེན་ཚོགས་ཆུང་སོགས་ནང་གཟིགས་ཞིབ་ཆེད་ཕེབས་ཡོད་ཅིང་། དེ་རིང་སྔ་དྲོར་གཞིས་མི་བྱིངས་ལ་གསུང་བཤད་དང་དྲི་བ་དྲིས་ལན་གནང་འདུག་ལ། གཞིས་ཆགས་ཀྱི་གཞོན་སྐྱེས་ཁག་གཅིག་ལ་ཟུར་དུ་ཐུག་འཕྲད་གནང་སྟེ། དེ་རིང་ཕྱི་དྲོར་མར་སྤར་ནས་བྷན་རྡ་ར་ནོར་རྒྱས་གླིང་བོད་མིའི་གཞིས་ཆགས་སུ་ཕྱོགས་ཕེབས་གནང་གི་ཡོད་འདུག
བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་ཚིགས་སྟེང་འཁོད་པའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༨ ཉིན་སྲིད་སྐྱོང་སྤེན་པ་ཚེ་རིང་མཆོག་དྷ་ས་ནས་ཕེབས་ཐོན་གྱིས་ཨོ་རི་སར་བདེ་འབྱོར་བྱུང་རྗེས། དེ་གའི་གཞིས་མི་རྣམས་ལ་ཡུན་རིང་ནས་རོགས་སྐྱོར་གནང་མཁན་ཨོ་ཌི་ཤཱ་མངའ་སྡེའི་སྤྱི་ཁྱབ་དྲུང་ཆེ་ལས་འཕར་སྐུ་ཞབས་ཨེས་པི་ཋཱ་ཀུར་ (Shri S.P. Thakur) ལགས་དང་མཇལ་འཕྲད་གནང་འདུག་ཅིང་། ཕྱི་ཚེས་ ༩ ཉིན་གྱི་ཕྱི་དྲོར་སྲིད་སྐྱོང་མཆོག་ནས་གཞིས་ཆགས་ཀྱི་གཞོན་སྐྱེས་གྲངས་ ༣༠ ཙམ་དང་ལྷན་ཟུར་དུ་ཐུག་འཕྲད་ཀྱིས་གཞིས་ཆགས་ཁག་སྲ་བརྟན་ཡོང་བར་ས་གནས་ཀྱི་གཞོན་སྐྱེས་ངོས་ནས་འགན་འཁུར་དང་མཉམ་ཞུགས་གནང་དགོས་གལ་ཆེ་བའི་སྐོར་དང་། གཞོན་སྐྱེས་རྣམས་ཀྱིས་ལག་ཤེས་སློབ་སྦྱོང་དང་སྦྱོང་བརྡར་བྱེད་དགོས་པ། གཞིས་ཆགས་སུ་ཚོང་ལས་ཀྱི་ལས་འཆར་གསར་པ་བརྩམ་རྒྱུ་དང་། ཚོང་ལས་དེ་དག་ཀྱང་ཕུགས་འཕེལ་དང་སྤྱི་སྒེར་ཚང་མར་ཕན་རླབས་ཇི་ཙམ་ཡོད་མེད་སོགས་ཀྱི་ཐད་ཉམས་ཞིབ་དང་བསམ་བློ་ཡག་པོ་གཏོང་དགོས་པ། ལས་འཆར་ཡག་པོ་ཡོད་ཚེ་བོད་མིའི་སྒྲིག་འཛུགས་ནས་བུན་གཡར་སོགས་གནང་རྒྱུའི་དགོངས་པ་ཡོད་ཚུལ་སོགས་གསུངས་ཡོད་འདུག དེ་བཞིན་སྲིད་སྐྱོང་མཆོག་ནས་གཞིས་མི་བྱིངས་ལ་གསུང་བཤད་གནང་སྐབས། གཞིས་མི་རྣམས་ལ་དགུན་དུས་སུད་ཚོང་སྐབས་ཚོང་སའི་དཀའ་ངལ་དང་། དེ་བཞིན་ཕྲུ་གུ་རྣམས་ལ་སྐྱབས་བཅོལ་ལག་དེབ་གསར་བཟོའི་དཀའ་ངལ་སེལ་ཐབས་དང་། ཚོང་ས་ཐོབ་ཐབས་སུ་ལྡི་ལིར་ཡོད་པའི་འཕགས་བོད་འབྲེལ་མཐུད་ལས་ཁུངས་སུ་ཆེད་མངགས་ལས་བྱེད་བཀོད་སྒྲིག་གནང་རྒྱུ་ཡིན་པ་སོགས་ཀྱི་སྐོར་གསུངས་ཡོད་འདུག
ཟླ་འདིའི་ཕྱི་ཚེས་ ༡༠ ཉིན་སྲིད་སྐྱོང་མཆོག་གིས་སཾ་བྷོ་ཊའི་སློབ་གྲྭར་གཟིགས་ཞིབ་གནང་རྗེས་མང་ཚོགས་དང་ལྷན་དུ་དྲི་བ་དྲིས་ལན་ཞུ་སྐབས། སྤྱི་ཡོངས་ནས་འདས་པའི་ཟླ་བ་ ༡༠ རིང་གི་བཀའ་ཤག་གིས་ལས་དོན་ཅི་གནང་དང་། ལྷག་པར་དུ་བོད་རྒྱ་གྲོས་མོལ་ཆེད་གཏན་འཇགས་ཐབས་ཇུས་ཚོགས་ཆུང་བཙུགས་པ་དང་། སྒྲིག་འཛུགས་ཀྱི་དབུས་སའི་ལས་བྱེད་ཀྱི་ས་མིག་སྒྲོམ་གཞི་ལ་བསྐྱར་སྒྲིག་གནང་ཡོད་པའི་སྐོར་གསུངས་འདུག་ལ། རྒྱ་གར་གཞུང་མང་གཉིས་ནི་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན་པ་དང་། གཞིས་མི་རྣམས་ནས་དུས་རྒྱུན་དུ་ཡུལ་མི་དང་ལྷན་འཆམ་མཐུན་དགོས་རྒྱུ་ཧ་ཅང་གལ་ཆེན་པོ་ཡིན་པ། དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་བོད་མི་རྣམས་ལ་མཚོན་ན་བཀའ་དྲིན་ཤིན་ཏུ་ཆེན་པོ་ཡིན་སྟབས། མགོན་པོ་གང་ཉིད་མཆོག་གི་དགོངས་གཞི་དང་ལམ་སྟོན་འོག་བོད་མི་ཚང་མས་ཤར་བསྐྱོད་གནང་དགོས་པའི་གལ་གནད་སྐོར་གསུངས་ཡོད་འདུག
སྤྱིར་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་ལས་འཁུར་ཞུས་རྗེས། ཐོག་མར་ལ་དྭགས་ཁུལ་དང་། དེའི་རྗེས་ཀ་རྡོར་སྒང་གསུམ། ཨུ་ཏྲ་ཁན་ཌི་ཁུལ་གྱི་བོད་མིའི་གཞིས་ཆགས་བཅས་སུ་གཟིགས་སྐོར་གནང་ཟིན་ཡོད་པ་དང་། ད་ལྟའི་ཆར་ཨོ་རི་ས་དང་། མན་སྤར། བྷན་རྡ་ར་བཅས་སུ་གཟིགས་སྐོར་གནང་གི་ཡོད་ཅིང་། རིང་མིན་ཕྱི་ཟླ་དྲུག་པ་ནང་ཚུད་ལ་རྒྱ་གར་བྱང་ཤར་ཁུལ་གྱི་བོད་མིའི་གཞིས་ཆགས་དང་། ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་བཅས་ལ་གཟིགས་སྐོར་གནང་འཆར་ཡོད་འདུག
གསར་འགོད་པ། པ་སངས་ཚེ་རིང་།
