བོད་ཀྱི་མཐོ་རིམ་སློབ་མའི་ཚོགས་ཆེན་སྐབས་ ༡༥ པའི་ཐོག་དགོན་སྡེ་དང་མཐོ་སློབ་ཁག་མི་འདྲ་བ་ ༢༦ ནས་ཚོགས་བཅར་བ་ ༩༠ ལྷག་མཉམ་འཛོམས་ཀྱིས་བོད་མིའི་ཤེས་ཡོན་དང་ལོ་རྒྱུས། ཆབ་སྲིད་སོགས་དང་འབྲེལ་བའི་བརྗོད་གཞི་མི་འདྲ་བ་ ༡༣ གྱི་ཐོག་གཏམ་བཤད་དང་བགྲོ་གླེང་བྱེད་ཀྱི་ཡོད་འདུག
ཟླ་འདིའི་ཕྱི་ཚེས་ ༡༠ ནས་༡༥ བར་རྒྱ་གར་གྱི་བྱང་ཕྱོགས་མངའ་སྡེ་ཧི་མ་ཅལ་དུ་རྟེན་གཞི་བྱས་པའི་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རི་གླིང་དུ་བོད་ཀྱི་མཐོ་རིམ་སློབ་མའི་ཚོགས་ཆེན་སྐབས་བཅོ་ལྔ་པ་དེ་ཉིད་འཚོག་གི་ཡོད་ཅིང་། འདི་ལོའི་ཚོགས་ཆེན་ཐོག་དགོན་སྡེ་དང་མཐོ་སློབ་ཁག་མི་འདྲ་བ་ ༢༦ ནས་ཚོགས་བཅར་བ་ ༩༠ ལྷག་མཉམ་འཛོམས་ཀྱིས་བོད་མིའི་ཤེས་ཡོན་དང་ལོ་རྒྱུས། ཆབ་སྲིད་སོགས་དང་འབྲེལ་བའི་བརྗོད་གཞི་མི་འདྲ་བ་ ༡༣ གྱི་ཐོག་གཏམ་བཤད་དང་བགྲོ་གླེང་བྱེད་ཀྱི་ཡོད་འདུག
སྐབས་བཅོ་ལྔའི་བོད་ཀྱི་མཐོ་རིམ་སློབ་མའི་ཚོགས་ཆེན་གྱི་སྤྱི་ཁྱབ་འབྲེལ་མཐུད་པ་ཐུབ་བསྟན་རབ་བརྟན་ལགས་ཀྱིས་འདི་གའི་གསར་འགོད་པར། སྤྱིར་ལོ་ལྟར་འཚོག་མུས་ཡིན་པའི་བོད་ཀྱི་མཐོ་རིམ་སློབ་མའི་ཚོགས་ཆེན་འདིའི་འབོད་ཚིག་ཙོ་བོ་དེ་རང་ངོ་རང་ཤེས། རང་འགན་རང་འཁུར་ཡིན་ཡང་། སྐབས་སྔ་མའི་བོད་ཀྱི་མཐོ་རིམ་སློབ་མའི་ཚོགས་ཆེན་སྟེང་དུ་བོད་ཀྱི་གདོད་མའི་ཆོས་ལུགས་གཡུང་དྲུང་བོན་གྱི་ལོ་རྒྱུས་དང་། དེ་བཞིན་དགོན་པའི་གནས་སྟངས་སོགས་རྒྱུས་ལོན་བྱ་རྒྱུའི་དམིགས་ཡུལ་བཟུང་སྟེ། གཡུང་དྲུང་བོན་གྱི་མ་དགོན་སྨན་རི་གླིང་དུ་འཚོག་རྒྱུའི་མང་མོས་ཐག་གཅོད་བྱས་ཡོད་སྐོར་དང་། ད་ལན་གྱི་ཚོགས་ཆེན་སྟེང་ཕྱི་ནས་མཁས་པའི་གཏམ་བཤད་ཀྱི་ལས་རིམ་རིགས་མེད་པར། སྔར་རྒྱུན་ཚོགས་བཅར་བ་རྣམས་ཚུགས་ཆུང་ ༨ ལ་བགོས་ཏེ་རང་རང་གི་བརྗོད་གཞིའི་ཐོག་གཏམ་བཤད་སྤེལ་རྒྱུ་དང་། དེའི་ཐོག་སྨན་རི་གླིང་གི་དཔེ་འཁྲིད་དགེ་རྒན་རྣམ་པས་གཏམ་བཤད་སྤེལ་རྒྱུ་ཡིན་སྐོར་འགྲེལ་བརྗོད་བྱས་བྱུང་།
ཕྱི་ཚེས་ ༡༠ ཉིན་གྱི་ཚོགས་ཆེན་གྱི་དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོར་སྨན་རིའི་དཔོན་སློབ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་ས་གནས་འགོ་འཛིན་བསྟན་འཛིན་ཆོས་འཕེལ་ལགས། བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས། དེ་བཞིན་བོན་གཞིས་སཾ་བྷོ་ཊའི་ཉིན་སློབ་ཀྱི་སློབ་སྤྱི་རྣམ་རྒྱལ་ཡར་འཕེལ་ལགས་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་ཟུང་དྲུང་བཅས་གདན་འདྲེན་ཞུས་ཡོད་འདུག
འདི་ལོའི་ཚོགས་ཆེན་སྟེང་། བཙན་བྱོལ་གྱི་གཞོན་སྐྱེས་རྣམས་རྒྱལ་ཞེན་ཆུང་གྲངས་པའི་རྐྱེན་རྩ་ངོས་བཟུང་ནས་མི་རིགས་ལ་ཤ་ཞེན་གྱི་སེམས་ཚོར་རྣོན་པོ་ཡོང་ཐབས། ཞེས་པ་དང་། འབྱུང་འགྱུར་ཐ་སྙད་གསར་བཟོའི་ལས་འགུལ་རྒྱ་བསྐྱེད་བྱེད་ཚུལ་དང་བོད་གཞིས་བྱེད་གཉིས་ཀྱི་སྤྱི་ཚོགས་ཁྲོད་ཐ་སྙན་གསར་པ་རྣམས་གཅིག་གྱུར་ཡོང་ཐབས་ཇི་དགེའི་སྐོར། མཐོ་སློབ་འགྲིམ་བཞིན་པའི་སློབ་མ་ཚོར་དམིགས་བསལ་དཀའ་ངལ་ཆེ་ཁག་ལ་གདོང་ལེན་ཇི་ལྟར་དགོས་སྐོར། དེ་བཞིན་བོན་བལ་གྱི་ཡིག་ཆ་ཁག་ལས་བསྟན་པའི་ཁོར་ཡུག་གཙང་སེལ་བྱེད་ཕྱོགས་ཞེས་པ་དང་། ཆེས་ལས་རིགས་གཅིག་རྐང་འཛིན་པའི་ཐོན་ཁུངས་རྒྱ་བསྐྱེད་དགོས་པའི་གལ་གནད་སོགས་ཀྱི་སྐོར་གླེང་སློང་དང་གོ་བསྡུར་བྱ་རྒྱུ་ཡིན་པ་རེད་འདུག
བོད་ཀྱི་མཐོ་རིམ་སློབ་མའི་ཚོགས་ཆེན་འདི་བཞིན་ཐོག་མར་ཕྱི་ལོ་ ༢༠༠༦ ཟླ་ ༧ ཚེས་ ༡ ལ་སྐབས་དེའི་གྲོས་ཚོགས་དང་སྲིད་ཇུས་ཉམས་ཞིབ་ལྟེ་གནས་ཁང་གི་དྷ་ས་གངས་ཅན་སྐྱིད་གཤོངས་སུ་བོད་ཀྱི་མཐོ་རིམ་སློབ་གཉེར་བ་ ༥༡ ཙམ་ལ་ཟབ་སྦྱོང་ཞིག་གོ་སྒྲིག་ཞུས་ཡོད་ཅིང་། སྐབས་དེར་ཚོགས་བཅར་བའི་ཁྲོད་དུ་བོད་རིགས་མཐོ་རིམ་སློབ་གཉེར་བ་རྣམས་ལོ་རེར་ཐེངས་རེར་མཉམ་འཛོམས་དགོས་པའི་བསམ་ཚུལ་བྱུང་བ་ལྟར། ཕྱི་ལོ་ ༢༠༠༧ ལོར་རྒྱ་གར་གྱི་རྒྱལ་ས་ལྡི་ལིར་བོད་རིགས་མཐོ་རིམ་སློབ་མའི་ས་གནས་འཐུས་མི་རེ་ལྷན་འཛོམས་ཐོག་ཚོགས་ཆེན་གྱི་དགོས་དམིགས་དང་སྒྲིག་གཞི་ཁག་གཏན་འབེབས་བྱས་ཏེ། ཚོགས་ཆེན་སྐབས་དང་པོ་དེ་ཉིད་རྒྱ་གར་གྱི་གྲོང་ཁྱེར་མེང་གྷེ་ལོར་དུ་འཚོགས་ཡོད་པ་རེད་འདུག
