མདུན་ངོས།
About Us
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
No Result
ཆ་ཚང་གཟིགས།

ལྷ་གཞུང་འཁྲབ་སྟོན་པ་ཚོས་བོད་ཀྱི་རིག་གཞུང་དར་སྤེལ་ཐད་ཞབས་འདེགས་རླབས་ཆེན་བཞག་སྐོར་གསུངས།

བོད་ཀྱི་དུས་བབ།
༢༠༢༢/༠༤/༡༣
Share on FacebookShare on TwitterShare on EmailShare on Whatsapp

བོད་ཀྱི་ཞོ་སྟོན་ཐེངས་ ༢༥ པའི་ཉིན་མཐའ་མར་སྐུ་མགྲོན་གཙོ་བོ་མཁན་པོ་བསོད་ནམས་བསྟན་འཕེལ་མཆོག་ནས་ལྷ་མོ་ཚོགས་པ་ཁག་དང་གཞོན་སྐྱེས་རྣམས་ཀྱིས་ཆ་ཤས་བཞེས་ཐུབ་ན་ཏན་ཏན་མ་འོངས་པར་ང་ཚོའི་རིག་གཞུང་དར་སྤེལ་དང་མུ་མཐུད་གནས་ཐུབ་རྒྱུར་ཁྱད་པར་བཟོ་ངེས་ཡིན་སྐོར་གསུངས་སོང་།

དེ་རིང་བཞུགས་སྒར་དྷ་རམ་ས་ལར་འདས་པའི་ཉིན་གྲངས་ ༨ རིང་འཚོགས་པའི་བོད་ཀྱི་ཞོ་སྟོན་ཐེངས་ ༢༥ པའི་ཉིན་མཐའ་མར་བོད་ཀྱི་ཟློས་གར་ཚོགས་པས་ལྷ་གཞུང་ཆོས་རྒྱལ་ནོར་བཟང་གཟིགས་འབུལ་ཞུས་པའི་ཐོག སྐུ་མགྲོན་གྱི་གཙོ་བོར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ཕེབས་ཏེ། ལྷ་མོ་ཚོགས་པ་རྣམས་ཀྱིས་དཀའ་ངལ་ཁྱད་བསད་ཀྱིས་ལྷ་གཞུང་འཁྲབ་སྟོན་གནང་བ་དེ་བོད་ཀྱི་རིག་གཞུང་དར་སྤེལ་ཐད་ཞབས་འདེགས་རླབས་ཆེན་བཞག་ཡོད་སྐོར་གསུངས་སོང་།

དེ་ཡང་སྐུ་མགྲོན་གཙོ་བོ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསར་འགོད་པར་ཞོ་སྟོན་དང་འབྲེལ་ནས། ད་ལན་ཕྱོགས་མཐའ་ཁག་ནས་ཕེབས་པའི་ལྷ་མོའི་ཚོགས་པ་རྣམས་དངོས་ནས་སྐུ་ལས་ཆེན་པོ་ཡོད་རེད་དེ། འདི་ལ་དཀའ་ངལ་ཁྱད་དུ་བསད་ནས་ང་ཚོའི་རིག་གཞུང་ལ་ཞབས་འདེགས་ཆེན་པོ་ཆགས་ཡོད་རེད་བསམ་གྱི་འདུག ཐེངས་འདིར་མཉམ་ཞུགས་བྱེད་མཁན་གཞོན་སྐྱེས་ཧ་ཅང་མང་པོ་འདུག དེ་ཚོའི་ཐོག་ནས་མ་འོངས་པར་ང་ཚོའི་རིག་གཞུང་དང་ལྷག་པར་དུ་རྣམ་ཐར་དང་ཟློས་གར་གྱི་རིག་གཞུང་མུ་མཐུད་གནས་ཐུབ་པའི་སྙིང་སྟོབས་གསར་པ་ཞིག་མཚོན་གྱི་ཡོད་པ་རེད། བོད་ནང་རྒྱ་ནག་གཞུང་གིས་ཆོས་དང་རིག་གཞུང་རྣམས་འཆར་གཞི་དང་ལྡན་པའི་ཐོག་ནས་རྩ་མེད་བཟོ་རྒྱུ་དང་། ལྷག་པར་དུ་བོད་ཀྱི་རིག་གཞུང་རྣམས་རྒྱ་ནག་གི་རིག་གཞུང་གི་ངོ་བོར་སྒྱུར་ཐབས་བྱེད་བཞིན་པའི་རྣམ་པ་ཐོན་གྱི་འདུག དེར་བརྟེན་ང་ཚོ་བཙན་བྱོལ་ནང་དུས་ནས་དུས་སུ་ཞོ་སྟོན་འཚོག་ཐུབ་རྒྱུ་དང་། དེའི་ནང་ལྷ་མོ་ཚོགས་པ་ཁག་དང་གཞོན་སྐྱེས་རྣམས་ཀྱིས་ཆ་ཤས་བཞེས་ཐུབ་ན། ཏན་ཏན་མ་འོངས་པར་ང་ཚོའི་རིག་གཞུང་དར་སྤེལ་དང་མུ་མཐུད་གནས་ཐུབ་རྒྱུར་ཁྱད་པར་བཟོ་ངེས་ཡིན་པ་རེད། ཅེས་གསུངས་སོང་།

ཡང་ཚོགས་གཙོ་མཆོག་གིས། འདི་ལོའི་ལྷ་མོ་འཁྲག་སྟོན་པ་ཁག་ཅིག་མ་གཏོགས་མང་ཆེ་བ་མི་རབས་རྒན་པ་ཆགས་ཡོད་པ་དང་། མི་རབས་རྒན་པ་རྣམས་ཀྱིས་སྐུ་ལས་བསྐྱོན་པ་ཞིག་ཡིན་པ་དང་། ལྷ་མོའི་རིག་གཞུང་འཁྲབ་པར་ལུས་ངག་གི་གར་དང་རྣམ་འགྱུར། ཕྱག་རྒྱ་སོགས་ལ་སྦྱངས་པ་མི་དམན་པ་ཞིག་དགོས་ཀྱི་ཡོད་པར་བརྟེན། ད་ལན་འཁྲབ་སྟོན་པ་རྣམ་པས་དངོས་སུ་འཁྲབ་སྟོན་བྱེད་ཐུབ་པ་དེ་ནི་བོད་ཀྱི་རིག་གཞུང་ལ་ཞབས་འདེགས་རླབས་ཆེན་ཞིག་བཞག་ཡོད་པ་དང་། མ་འོངས་པར་མུ་མཐུད་ནས་སེམས་ཤུགས་མ་ཆག་པར་རང་གི་རིག་གཞུང་དར་སྤེལ་གནང་ཐུབ་པ་དགོས་སྐོར་གསུངས་སོང་།

འདི་ལོའི་ཞོ་སྟོན་ཐོག་བོད་ཀྱི་ཟློས་གར་ཚོགས་པ་ཚུད་པའི་ལྷ་མོའི་ཚོགས་པ་བརྒྱད་མཉམ་ཞུགས་ཐུབ་ཡོད་ཅིང་། ཞོ་སྟོན་གྱི་ཉིན་དང་པོར་༧སྐྱབས་རྗེ་ཡོངས་འཛིན་མཆོག་སྤྲུལ་གླིང་རིན་པོ་ཆེ་མཆོག་གིས་གཙོས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཨ་རུ་ན་ཅལ་མངའ་སྡེའི་རིག་གཞུང་འགན་འཛིན་བཅས་ཕེབས་ཏེ། ལྷ་མོ་ཚོགས་པ་ཁག་གིས་ལྷ་གཞུང་བསྡུས་པ་རེ་གཟིགས་ཕུད་ཞུས་ཡོད་པ་རེད། འདི་ལོར་མ་སུ་རི་བོད་ཁྱིམ་སློབ་གྲྭས་ལྷ་གཞུང་ཁྱེའུ་པདྨ་འོད་འབར་དང་། པོན་ཊ་ལྷ་མོ་ཚོགས་པས་ལྷ་གཞུང་གཟུགས་ཀྱི་ཉི་མ། ཨ་རི་ནས་ལྕགས་ཟམ་པ་བོད་ཀྱི་ལྷ་མོའི་གླུ་གར་ཚོགས་པས་ལྷ་གཞུང་ཆོས་རྒྱལ་ནོར་བཟང་། ཀ་སྦུག་བོད་མིའི་ལྷ་མོ་ཚོགས་པས་ལྷ་གཞུང་སྣང་ས་འོད་འབུམ། བྷན་རྡ་ར་ལྷ་མོའི་ཚོགས་པས་ལྷ་གཞུང་འགྲོ་བ་བཟང་མོ། ཀོ་ལི་གྷལ་ལྷ་མོ་ཚོགས་པས་ལྷ་གཞུང་གཅུང་པོ་དོན་ཡོད་དོན་གྲུབ། དེ་བཞིན་བལ་ཡུལ་བོད་ཀྱི་ལྷ་མོ་ཚོགས་པས་ལྷ་གཞུང་སྣང་ས་འོད་འབུམ་བཅས་གཟིགས་འབུལ་ཞུས་ཡོད་འདུག

ཟླ་འདིའི་ཕྱི་ཚེས་ ༧ ཉིན་ཐེག་ཆེན་གཙུག་ལག་ཁང་གི་ཆོས་རའི་ནང་དུ་ལྷ་མོའི་ཚོགས་པ་ཁག་དང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་བཅར་བ་རྣམས་ལ་མཇལ་ཁ་བཀའ་སློབ་གནང་སྐབས། ང་ཚོ་བཙན་བྱོལ་བ་རེད་དེ་བོད་མི་རིགས་ཀྱི་ཆོས་དང་རིག་གཞུང་དེ་དག་དམ་འཛིན་བྱེད་ཀྱི་ཡོད་རེད། དེར་བརྟེན་ང་ཚོའི་ཟློས་གར་ནི་བོད་པའི་རིག་གཞུང་གི་ཆ་ཤས་ཆགས་ཀྱི་ཡོད་རེད། ང་ཚོས་རྒྱ་མི་ལ་འཁྲུག་པ་བརྒྱབ་ནས་ཡོང་ཐུབ་རྒྱུ་ཡོད་མ་རེད། ང་ཚོ་ལ་དགོས་པ་དེ་རང་སྐྱོང་མིང་དོན་མཚུངས་པ་ཞིག་དང་བོད་ཀྱི་སྐད་ཡིག་གཙོ་བོར་གྱུར་བའི་བོད་པའི་རིག་གཞུང་དེ་དག་བོད་པས་བདག་པོ་ཆ་ཚང་བརྒྱག་ཐུབ་དགོས་ཀྱི་ཡོད་རེད། ཅེས་དང་། དེ་རོང་ཁྱེད་རང་ཚོས་རྣམ་ཐར་བཏང་བ་དང་ངོས་རང་ཆུང་དུས་སྐབས་ཀྱི་ཞོ་སྟོན་གྱི་ཚོར་བ་དེ་བསླེབས་སོང་ཞེས་སོགས་བཀའ་སྩལ་ཡོད་པ་རེད།

གསར་འགོད་པ། པ་སངས་ཚེ་རིང་།

འབྲེལ་ཡོད་གསར་འགྱུར།

༸གོང་ས་མཆོག གསར་འགྱུར།

ཕལ་ཆེར་ལོ་ཁ་ཤས་ནང་སྦྱོར་ལམ་གྱི་རྟོགས་པ་སྐྱེ་ཡོང་བསམ་པའི་རེ་བ་བྱེད་བཞིན་ཡོད་ཅེས་གསུངས།

༢༠༢༣/༠༥/༢༧
ཁྲི་ཟུར་ཟམ་གདོང་རིན་པོ་ཆེ་མཆོག་ནས་སཱི་ཤེས་ཡོན་སློབ་གསོའི་སྐོར་ལ་གསུང་བཤད་གནང་། ༢༠༢༣།༠༥།༢༥ དྲ་བརྙན་གྱི་པར།
Mobile App

སཱི་ཤེས་ཡོན་སློབ་གསོ་ནི་ཧ་ཅང་གཏིང་ཟབ་པའི་རིག་པའི་གཞུང་ལུགས་ཤིག་རེད་ཅེས་གསུངས།

༢༠༢༣/༠༥/༢༦
Mobile App

རྒྱ་ནག་གཞུང་གིས་མཐའ་མཚམས་སུ་གྲོང་ཚོ་གསར་པ་ཞིག་འཛུགས་སྐྲུན་བྱེད་བཞིན་འདུག

༢༠༢༣/༠༥/༢༦
A medical worker chooses medicinal materials at the provincial hospital of Tibetan medicine in Xining, northwest China's Qinghai Province, Feb. 26, 2020. (Xinhua/Zhang Long)
Mobile App

རྒྱ་དཀར་ནག་གཉིས་ལ་བོད་ཀྱི་གསོ་རིག་གི་བདག་དབང་མེད།

༢༠༢༣/༠༥/༢༦
རྔ་བ་ཀིརྟི་དགོན་གྱི་དགེ་བཤེས་བསོད་ནམས་རྒྱ་མཚོ་ལགས། འགྲེལ་ཡོད་ཀྱིས་འདི་གར་བོད་ནས་མཁོ་སྤྲོད་བྱས།
Mobile App

ཆབ་སྲིད་བཙོན་ཟུར་གཅེན་གཅུང་གཉིས་ཀྱི་གཟུགས་གཞིའི་གནས་སྟངས་ཧ་ཅང་སྐྱོ་བོ་ཆགས་འདུག  

༢༠༢༣/༠༥/༢༦
རྒྱ་ནག་གཞུང་གིས་མགོ་ལོག་ཁུལ་རྨ་སྟོད་རྫོང་ཁོངས་སུ་བཙུགས་པའི་གཏན་འཇགས་སློབ་གྲྭ་ཞིག་གི་འཛིན་ཁང་། ༢༠༢༢།༠༥ པར་བོད་ནས་འདི་གར་མཁོ་སྤྲོད་བྱས།
Mobile App

བོད་ལྗོངས་ཀྱི་གོང་འཕེལ་གླེང་སྟེགས་ཟེར་བའི་ཐོག་རྒྱ་ནག་གཞུང་གིས་འཁྱོག་བརྗོད་ཆེན་པོ་བྱས།

༢༠༢༣/༠༥/༢༥

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist