བོད་མགོ་ལོག་ཁུལ་དར་ལག་རྫོང་ཁོངས་ཀྱི་སེང་འབྲུག་སྟག་རྩེ་སློབ་གྲྭའི་དགེ་རྒན་ཟུར་པ་རིན་ཆེན་སྐྱིད་ལགས་ཀློད་གྲོལ་བཏང་ཡོད་པའི་གནས་ཚུལ་འབྱོར་བྱུང་ཡང་འགྲོ་འོང་ལ་རང་དབང་མེད་པར་ལྟ་སྲུང་ནན་པོ་བྱེད་བཞིན་ཡོད་འདུག
དེ་རིང་འདི་གར་བོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་ལ་ངོ་ལོག་བྱས་ལུགས་ཀྱི་ཉེས་མིང་འོག་འཛིན་བཟུང་བྱས་པའི་སེང་འབྲུག་སྟག་རྩེ་སློབ་གྲྭའི་དགེ་རྒན་ཟུར་པ་རིན་ཆེན་སྐྱིད་ལགས་ཀློད་གྲོལ་བཏང་ཡོད་ཀྱང་། ད་ལྟའི་ཆར་ལྟ་སྲུང་ནན་མོ་བྱེད་བཞིན་ཡོད་སྟབས། ཁོང་མོའི་སྐུ་གཟུགས་གནས་སྟངས་དང་འདས་པའི་ཟླ་བཅུ་ཙམ་གྱི་རིང་གང་དུ་བཀག་ཉར་བཙོན་འཇུག་བྱས་མིན་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག
མདང་དགོང་བོད་ནང་གི་ཆུ་ཚོད་༨ ཡས་མས་ཤིག་ལ། དགེ་རྒན་རིན་ཆེན་སྐྱིད་ཚང་གི་སྒོ་འགྲམ་དུ་རླངས་འཁོར་གཉིས་དང་ཉེན་རྟོག་པ་འགའ་བསླེབས་ཡོད་པ་དང་། རླངས་འཁོར་ནང་ནས་རིན་ཆེན་སྐྱིད་ལགས་མར་བབས་ཏེ་རང་ཁྱིམ་དུ་འཛུལ་སོང་བ་མཐོང་བྱུང་ཡང་། ཁོང་ཚང་ལ་མགྲོན་པོ་ཡོང་དུ་འཇུག་གི་མེད་པ་དང་བཟའ་མི་རྣམས་ཀྱང་ཕྱི་རུ་འགྲོ་སྐྱོད་དང་འབྲེལ་གཏུག་བྱེད་མི་འཇུག་པར་ལྟ་སྲུང་འོག་བཞག་སྟེ་དམ་དྲག་ཆེན་པོ་བྱེད་བཞིན་ཡོད་སྐོར་བརྗོད་བྱུང་།
དགེ་རྒན་རིན་ཆེན་སྐྱིད་ལགས་ལྟ་བུར་མཚོན་ན། ཕྱི་ལོ་ ༢༠༢༡ ཟླ་ ༧ ཚེས་ ༨ ཉིན་རྒྱ་ནག་གཞུང་གིས་བོད་མགོ་ལོག་ཁུལ་དར་ལག་རྫོང་དུ་རྟེན་གཞི་བྱས་པའི་སེང་འབྲུག་སྟག་རྩེས་མཚོན་པའི་བོད་མིའི་སྒེར་གཉེར་སློབ་གྲྭ་སྐོར་ཞིག་སྒོ་བརྒྱབ་པའི་རྐྱེན་གྱིས། ཁོང་མོས་སྔ་དགོང་གི་ཟས་མ་ཟོས་པར་ཉིན་བཅུ་གྲངས་ཤིག་ཕྱིན་ཏེ་གཟུགས་པོའི་གནས་སྟངས་ཧ་ཅང་ཞན་པོ་ཆགས་པར་བརྟེན། ཁོང་མོའི་ཕ་མ་དང་སྤུན་མཆེད་སོགས་ཀྱིས་སེམས་ཁུར་བྱས་ནས་སྨན་ཁང་དུ་འཁྲིད་ཐབས་བྱས་ཡོད་ཀྱང་འགྲོ་རོགས་བྱས་མེད་པ་དང་། ཕྱིས་སུ་ས་གནས་ཉེན་རྟོག་པ་ཡོང་ནས་རྒྱལ་ཁབ་ལ་ངོ་ལོག་བྱས་པའི་ཉེས་མིང་གཡོགས་ཏེ། ས་གནས་སྨན་ཁང་ཞིག་ཏུ་བཙན་འཁྲིད་བྱས་ནས་ཉིན་གྲངས་ ༢ རིང་བཀག་ཉར་བྱས་རྗེས། ཟི་ལིང་གི་ཞིང་ཆེན་སྨན་ཁང་དུ་འཇོག་རྒྱུ་ཡིན་ཚུལ་ཟེར་ནས་ད་བར་གར་ཡོད་ཆ་མེད་དུ་གྱུར་ཡོད་པ་རེད།
ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་པ་དྲུག་ནས་རྒྱ་ནག་གཞུང་ལ་དགེ་རྒན་རིན་ཆེན་སྐྱིད་ལགས་དང་རྩོམ་པ་པོ་དྷཱི་ལྷ་ལྡན། གླུ་བ་ལྷུན་འགྲུབ་གྲགས་པ་བཅས་ཀྱི་གནས་སྟངས་ཇི་ཆགས་འདྲི་རྩད་ནན་པོ་བྱས་ཡོད་ཀྱང་། རྒྱ་ནག་གཞུང་གིས་ལན་འདེབས་གསལ་བཤད་གང་ཡང་བྱས་མེད་པའི་གནས་ཚུལ་ཐོན་ཡོད་པ་རེད།
འབྲེལ་ཡོད་གནས་ཚུལ།
སེང་འབྲུག་སྟག་རྩེའི་སློབ་མ་རྣམས་སློབ་གྲྭ་གཞན་ནང་འཛུལ་ཞུགས་བྱེད་ཐུབ་ཀྱི་མེད་པ་རེད།
བོད་རིགས་དགེ་རྒན་ཞིག་གར་ཡོད་ཆ་མེད་དུ་གྱུར་ནས་ཟླ་གཉིས་ལྷག་འགྲོ་བཞིན་འདུག
སེང་འབྲུག་སྟག་རྩེ་སློབ་གྲྭའི་དགེ་རྒན་ཞིག་འཛིན་བཟུང་བྱས་ཡོད་འདུག
རྒྱལ་སྤྱིའི་ཚོགས་སྡེ་དྲུག་གིས་རྒྱ་ནག་གཞུང་ལ་འདྲི་རྩད་ནན་པོ་བྱས།
ས་གནས་གསར་འགོད་པ།
