བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཉིན་གྲངས་ ༢༨ རིང་ཡུ་རོབ་ཀྱི་རྒྱལ་ཁབ་དྲུག་ནང་བོད་དོན་སྐོར་སྐྱོད་གནང་སྟེ་དེ་རིང་ནས་མཇུག་བསྡུ་ཡི་ཡོད་པས་སང་ཉིན་རྒྱ་གར་ནང་ཕྱིར་ལོག་རྒྱུ་ཡིན་འདུག
འདི་གའི་གསར་འགོད་པས་ཞལ་པར་བརྒྱུད་ཁོང་ལ་ད་བར་ཡུ་རོབ་ཀྱི་རྒྱལ་ཁབ་ག་ཚོད་ཅིག་གི་ནང་དུ་ལས་འགུལ་ཅི་སྤེལ་སྐོར་དྲིས་པར་ཁོང་གིས། ད་ལྟའི་ཆར་ཡུ་རོབ་ཁུལ་ལ་བོད་དོན་དྲིལ་བསྒྲགས་ཀྱི་སྐོར་སྐྱོད་འདི་ཉི་མ་ ༢༨ ཀྱི་ལས་རིམ་ཞིག་རེད། ཐོག་མར་སུད་སི་ (Switzerland) ནང་ (Geneva Summit) མཉམ་འབྲེལ་རྒྱལ་ཚོགས་ཀྱི་ཇི་ནི་ཝའི་ཚོགས་ཆེན་ནང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ནང་ལ་བོད་དོན་སྐོར་ལ་སྐད་ཆ་བཤད་རྒྱུའི་གོ་སྐབས་བྱུང་བ་རེད། སུད་སི་བོད་ཀྱི་བུད་མེད་ལྷན་ཚོགས་ཀྱིས་གོ་སྐབས་འདི་དམ་འཛིན་བྱས་ཐུབ་ནས་ང་ཡོང་ཐུབ་པ་བྱུང་རེད། དེའི་རྗེས་སུ་སུད་སིའི་ནང་ལོགས་ཀྱི་གྲོང་ཁྱེར་ཁག་མང་པོ་ཞིག་ལ་ཕྱིན་ཏེ་བོད་དོན་སྐོར་སྐྱོད་བྱ་རྒྱུ་བྱུང་སོང་། དེ་ནས་སི་ཝེ་ཌན་ (Sweden) ལ་ཕྱིན་ནས་བོད་དོན་རྒྱབ་སྐྱོར་བ་ཁག་ལ་སྐད་ཆ་བཤད་པ་དང་། ནོར་ཝེ་དང་ཌན་མག་ (Denmark)། སེ་པན་གྱི་གྲོང་ཁྱེར་བྷར་སེ་ལོ་ན་ (Barcelona) བཅས་ལ་བོད་དོན་དྲིལ་བསྒྲགས་དང་སྐོར་སྐྱོད་བྱས་པ་ཡིན། ད་ལྟའི་ཆར་ཅེག་སྤྱི་མཐུན་རྒྱལ་ཁབ་ (Czech Republic) ནང་བསླེབས་ཡོད། སང་ཉིན་རྒྱ་གར་དུ་ལོག་འགྲོ་རྒྱུ་ཡིན། ནུབ་ཕྱོགས་རྒྱལ་ཁབ་ནང་བོད་དོན་དྲིལ་བསྒྲགས་དང་ཞུ་གཏུག་བྱེད་པའི་སྐབས་སུ། གཙོ་བོ་གསར་འགྱུར་བརྒྱུད་ལམ་ཁག་གི་མི་དེ་དག་ལ་སྐད་ཆ་བཤད་པ་དང་། སློབ་གྲྭ་ཁག་དང་གཙུག་ལག་སློབ་གཉེར་ཁང་གི་ནང་གཏམ་བཤད། དེ་བཞིན་པར་དང་བརྙན་བསྟན་ནས་གཏམ་བཤད་བྱས་ཡིན། བོད་དོན་རྒྱབ་སྐྱོར་ཚོགས་པ་ཁག་ལ་ཐུག་ནས་དེང་དུས་བོད་ཀྱི་གནས་སྟངས་ག་བར་བསླེབ་ཡོད་མེད་དང་རྒྱལ་སྤྱིའི་ཆབ་སྲིད་ནང་བོད་ཀྱི་གནད་དོན་ག་འདྲ་ཡོད་པའི་སྐོར་སོགས་བཤད་ཡིན། དེའི་ཞོར་ལ་བོད་པའི་སྤྱི་ཚོགས་ནང་དམ་ཚིག་གཙང་མ་ཡོང་རྒྱུ་དང་རྡོག་རྩ་གཅིག་སྒྲིལ་ཡོང་རྒྱུའི་སྐོར་བགྲོ་གླེང་བྱེད་པ་སོགས་ལས་རིམ་སྣ་མང་སྤེལ་རྒྱུ་བྱུང་སོང་། ཅེས་བརྗོད་བྱུང་།
ད་ལན་གཙོ་བོ་ཇི་ནི་ཝའི་ཚོགས་
Aksel (adviser for the Christian Democratic Party) (R) and Alexander Zlatonos Ibsen, a senior adviser to MP Ine Eriksen Søreide from the Conservative Party (R)
གསར་འགོད་པས་ཁོང་ལ་ད་ལན་གྱི་ལས་འགུལ་གྲུབ་རྗེས་བོད་དོན་སྐོར་གྱི་ལས་འགུལ་ག་རེ་སྤེལ་རྩིས་ཡོད་མེད་དྲིས་པར། ཁོང་གིས་རྒྱ་གར་ནང་སློབ་སྦྱོང་བྱས་པ་དང་རྒྱ་གར་གྱི་ཆབ་སྲིད་གནས་སྟངས་ལ་རྒྱུས་ཡོད་པར་བརྟེན། མ་འོངས་པར་ནུབ་ཕྱོགས་རྒྱལ་ཁབ་ཁག་ལས་རྒྱ་གར་རང་གི་ནང་དུ་ལས་འགུལ་སྤེལ་རྩིས་ཡོད་ལ། རྒྱ་གར་རྒྱལ་ཡོངས་ནང་ལོ་ལྟར་ཟླ་དྲུག་རིང་མཐོ་རིམ་སློབ་གྲྭ་དང་གཙུག་ལག་སློབ་གཉེར་ཁང་གི་ནང་ཤེས་ཡོན་དང་ཆབ་སྲིད་ལ་འབྲེལ་བ་ཡོད་པའི་གཏམ་བཤད་བྱེད་དུ་འགྲོ་ཡི་ཡོད་པ་དེ་མུ་མཐུད་ནས་གནང་རྒྱུ་དང་། ཡང་སྐབས་རེར་ནུབ་ཕྱོགས་རྒྱལ་ཁབ་ཁག་ནང་གནད་དོན་གལ་ཆེན་དེ་འདྲ་ཡོད་ན་གོ་སྐབས་དམ་འཛིན་གྱིས་འགྲོ་འཆར་ཡོད་སྐོར་དང་། ཕྱིའི་རྒྱལ་ཁབ་ཁག་གི་ནང་མི་སེར་ཆགས་པའི་བོད་རིགས་ཚོས་སོ་སོའི་གནས་ཡུལ་རྒྱལ་ཁབ་ནང་བོད་དོན་ལས་འགུལ་སྤེལ་རྒྱུ་དེ་འོས་འགན་ཞིག་ཆགས་ཡོད་པ་དང་། དེ་བཞིན་རྒྱ་གར་ནང་ལས་འགུལ་སྤེལ་རྒྱུ་དེ་རྒྱ་གར་ནང་གནས་སྡོད་ཁོང་ལྟ་བུའི་ལས་འགན་ཆགས་ཡོད་པའི་ངོས་འཛིན་གནང་གི་ཡོད་སྐོར་བརྗོད་བྱུང་།
གསར་འགོད་པ། བསྟན་འཛིན་ཕུར་བུ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
