བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ད་ལྟའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་སྔ་མ་རྣམས་དང་མི་འདྲ་བར་ད་ལྟའི་ཚོགས་གཙོ་ལགས་ཀྱིས་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་གླེང་སློང་གནང་གི་མེད་པ་དེར་སེམས་འཚབ་ཆེན་པོ་ཡོད་སྐོར་གསུངས་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་མི་ཤེལ་བྷ་ཆི་ལེ་ཊི་ (Michelle Bachelet) ལགས་རིང་མིན་ཕྱི་ཟླ་ ༥ པའི་ནང་རྒྱ་ནག་གི་བཙན་འཛུལ་འོག་ཡོད་པའི་ཤར་ཊུར་ཀི་སི་ཐན་(ཤིན་ཅང་) ནང་གཞུང་འབྲེལ་གཟིགས་སྐོར་དུ་ཕེབས་གཏན་འཁེལ་ཡོད་པ་ལྟར། ཐེངས་འདིའི་གཟིགས་སྐོར་ལ་གྲ་སྒྲིག་ཆེད་ཟླ་འདིའི་ཕྱི་ཚེས་ ༢༥ ཉིན་རྒྱལ་ཚོགས་ཀྱི་ལས་བྱེད་སྐོར་ཞིག་རྒྱ་ནག་ལ་འབྱོར་ཟིན་ཡོད་སྟབས། ཁ་སང་ཕྱི་ཚེས་ ༢༩ ཉིན་བོད་མིའི་སྒྲིག་འཛུགས་ངོས་ནས་བསྐྱར་དུ་ལྕམ་སྐུ་ལགས་ངེས་པར་དུ་བོད་ནང་ཕེབས་རྒྱུའི་འབོད་སྐུལ་ཞུས་ཡོད་འདུག
དེ་ཡང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་རྒྱའི་ཐོག་སྤེལ་བའི་རེ་སྐུལ་ཞུ་ཡིག་དེའི་ནང་ཕྱི་སྲིད་བཀའ་བློན་ནོར་འཛིན་སྒྲོལ་མ་མཆོག་གིས། ང་ཚོའི་ངོས་ནས་དེ་སྔ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་མཆོག་ལ་བོད་ནང་ངེས་པར་གཟིགས་སྐོར་དུ་ཕེབས་དགོས་པའི་ཞུ་ཡིག་ཅིག་ཕུལ་ཡོད་ཀྱང་ད་བར་ལྕམ་སྐུ་མཆོག་གིས་བརྡ་ལན་ཁ་གསལ་ཞིག་གནང་མེད་སྟབས། ང་ཚོས་ཧ་ཅང་སེམས་འཚབ་བྱེད་ཀྱི་ཡོད། ད་ལྟའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་དེ་སྔའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་རྣམ་པ་ནང་བཞིན་མ་ཡིན་པར་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་གླེང་སློང་གནང་གི་མེད་པས། ང་ཚོས་ཧ་ཅང་སེམས་འཚབ་བྱེད་ཀྱི་ཡོད། ཅེས་གསུངས་འདུག
གཞན་ཡང་ཕྱི་དྲིལ་བཀའ་བློན་མཆོག་གིས། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་དང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་དང་། དེ་བཞིན་བོད་ནང་གི་ཛ་དྲག་གི་གནས་སྟངས་དང་དྲག་གནོན་གྱི་དཀའ་ངལ་སེལ་རྒྱུའི་འགན་འཁུར་ཡོད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་སྔར་ལས་ལྷག་བོད་ནང་གི་འགྲོ་བ་མིའི་ཐོབ་ཐང་དང་རང་དབང་། དེ་བཞིན་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་འགྲོ་བ་མིའི་ཐོབ་ཐང་དང་རང་དབང་གི་ཆེད་དུ་བཟང་ཕྱོགས་ཀྱི་བརྡ་ལན་དང་རེ་བ་ཞིག་ངེས་པར་བསྐྲུན་དགོས། དེར་བརྟེན་ང་ཚོས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ལ་འབྱུང་འགྱུར་གྱི་གཟིགས་སྐོར་སྐབས་བོད་ཚུད་པའི་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་ངེས་པར་གཟིགས་སྐོར་དུ་ཕེབས་རྒྱུའི་རེ་སྐུལ་སླར་ཡང་ནན་ཏན་དུ་ཞུ་རྒྱུ་ཡིན། ཞེས་གསུངས་འདུག
དེ་བཞིན་འབོད་སྐུལ་ཞུ་ཡིག་ནང་། བོད་མིའི་སྒྲིག་འཛུགས་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ཤར་ཏུར་ཀི་སི་ཐན་ནང་ཆེད་ཕེབས་ཀྱིས་འགྲོ་བ་མིའི་ཐོབ་ཐང་ལ་རྟོག་ཞིབ་དང་། ཡུ་གུར་མི་མང་གི་དཀའ་ངལ་ངོ་མ་གང་ཡིན་སེལ་ཐབས་གནང་རྒྱུའི་ཡིད་ཆེས་བྱེད་ཀྱི་ཡོད་ལ། ཡུ་གུར་ནང་གི་ཛ་དྲག་གི་གནས་སྟངས་ལ་མཐའ་གཅིག་ཏུ་ངོ་རྒོལ་ཤུགས་ཆེ་གནང་དགོས། འབྱུང་འགྱུར་གྱི་གཟིགས་སྐོར་སྐབས་ལྕམ་སྐུ་མཆོག་གིས་རྒྱ་ནག་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་སྤེལ་བཞིན་པའི་ཉེན་ཁ་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་རྣམས་སེལ་ཐབས་གནང་དགོས། རྒྱ་ནག་གཞུང་གིས་ཁྲིམས་འགལ་ཐོག་བོད་ནང་དབང་བསྒྱུར་བྱས་པ་ནས་བཟུང་ད་བར་ནོར་འཁྲུལ་ཅན་གྱི་སྲིད་བྱུས་རིམ་པ་ཁག་ལག་བསྟར་བྱས་ཏེ་བོད་མིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་གི་ཡོད། ལྷག་པར་རྒྱ་ནག་གཞུང་གིས་བོད་ནང་དྲག་གནོན་བྱས་དང་བྱེད་བཞིན་ཡོད་སྟབས། ད་བར་བོད་མི་གྲངས་ ༡༥༨ ལྷག་གིས་རང་ལུས་མེར་སྲེག་བཏང་སྟེ་བོད་ནང་རང་དབང་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་ཞེས་ཞི་བའི་སྒོ་ནས་ངོ་རྒོལ་གྱིས་སྐད་འབོད་གནང་ཡོད།
འདི་ལོའི་ཕྱི་ཟླ་ ༡ པོའི་ནང་རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་མི་ཤལ་བྷ་ཆི་ལེ་ཊི་ལགས་པེ་ཅིན་གྱི་དགུན་དུས་ཨོ་ལིམ་པིག་རྩེད་འགྲན་མཇུག་སྒྲིལ་རྗེས། ཡུ་གུར་ས་ཡ་ ༡ ལྷག་འཛིན་བཟུང་བཀག་བསྐྱིལ་བྱས་ཡོད་པའི་ཤར་ཊུར་ཀི་སི་ཐན་ས་ཁུལ་དུ་ཕེབས་རྒྱུའི་ཆོག་མཆན་སྤྲད་ཡོད་ཀྱང་། རྒྱ་ནག་གཞུང་གིས་སྐོར་སྐྱོད་དེ་ཉིད་གྲོགས་འདྲིས་ཀྱི་རྣམ་པའི་ཐོག་ནས་མ་གཏོགས་རྟོག་ཞིབ་ལྟ་བུའི་ཚུལ་དུ་འགྲེལ་བརྗོད་བྱ་མི་ཆོག་པ་དང་། རྒྱལ་སྤྱིའི་སྤྱི་ཚོགས་ངོས་ནས་རེ་སྒུག་ཆེན་པོ་བྱེད་བཞིན་པའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་སྙན་ཐོ་དེ་ཉིད་གནས་སྐབས་ཕྱིར་བཤོལ་དགོས་པའི་རྐྱེན་རྩ་ཞིག་ཏུ་གྱུར་ཡོད་འདུག
གསར་འགོད་པ། པ་སངས་ཚེ་རིང་།
