རྒྱ་ནག་གཞུང་གིས་མགོ་ལོག་རྨ་ཆེན་རྫོང་མི་རིགས་སློབ་ཆུང་གཉིས་པའི་འཛིན་རིམ་དང་པོ་ནས་ལྔ་པ་བར་གྱི་བོད་རིགས་སློབ་མ་ཚོར་ཆེད་དུ་སྐད་འཕྲིན་ཚོགས་པ་བཙུགས་ཏེ་ཆབ་སྲིད་སློབ་གསོ་གཏོང་གི་འདུག
མགོ་ལོག་རྨ་ཆེན་རྫོང་གི་སློབ་ཆུང་ལོ་རིམ་དང་པོ་ནས་ལྔ་པའི་བར་གྱི་སྐད་འཕྲིན་ཚོགས་པའི་དྲ་ངོས། པར་བོད་ནས་འདི་ག་གསར་ཁང་དུ་མཁོ་སྤྲོད་བྱས།
ད་ལོ་ནས་བཟུང་རྒྱ་ནག་གཞུང་གིས་བོད་མགོ་ལོག་རྨ་ཆེན་རྫོང་མི་རིགས་སློབ་ཆུང་གཉིས་པའི་འཛིན་རིམ་དང་པོ་ནས་ལྔ་བ་བར་གྱི་བོད་རིགས་སློབ་མ་ཚོར་ཆེད་དུ་སྐད་འཕྲིན་ཚོགས་པ་བཙུགས་ཏེ། ཉིན་ལྟར་“ཞི་ཅིན་ཕིན་གྱི་དགོངས་དོན་གལ་ཆེན་”དང་“དུས་རབས་གསར་བའི་སྤྱི་ཚོགས་རིང་ལུགས་ཀྱི་རྒྱུན་འཛིན་པ་”བྱེད་དགོས་རབས་ཀྱི་ཆབ་སྲིད་སློབ་གསོ་སྤྲོད་བཞིན་འདུག
མིང་བརྗོད་འདོད་མེད་པའི་བོད་ནང་གི་བོད་མི་ཞིག་གིས་འདི་གའི་གསར་འགོད་པར། དེང་སྐབས་ང་ཚོར་སྐད་འཕྲིན་ཚོགས་པ་འདི་འདྲ་བཙུགས་ནས་རྒྱ་ཡིག་རྒྱ་སྐད་ཀྱི་དྲ་ལམ་འཛིན་གྲྭ་འཚོག་བཞིན་ཡོད་ལ། སློབ་ཁྲིད་གཙོ་བོ་ཞི་ཅིན་ཕིན་གྱི་དགོངས་དོན་གལ་ཆེན་དང་དུས་རབས་གསར་བའི་སྤྱི་ཚོགས་རིང་ལུགས་རྒྱུན་འཛིན། དེའི་ལྷག་བསམ་དང་རྒྱལ་ཞེན། ཕུགས་བསམ་སྐོར་གྱི་སློབ་གསོ་དང་དེ་འབྲེལ་གྱི་སློབ་ཚན་འཁྲིད་ཀྱི་འདུག སློབ་ཁང་ནང་དུའང་སློབ་སྦྱོང་ལྡུམ་ར་སོགས་ཚང་མའི་ནང་རྒྱ་ཡིག་འབྲི་དགོས་ཟེར་གྱི་འདུག ཅེས་བརྗོད་བྱུང་།
གསར་འགོད་པས་རྒྱུས་ལོན་བྱས་པ་ལྟར་ན། རྨ་ཆེན་རྫོང་མི་རིགས་སློབ་ཆུང་གཉིས་པའི་འཛིན་རིམ་དང་པོ་ནས་ལྔ་བ་བར་གྱི་འཛིན་གྲྭ་སོ་སོར་ཆེད་འཛུགས་བྱས་པའི་སྐད་འཕྲིན་ཚོགས་པའི་ནང་དུ། ས་གནས་ཉེན་རྟོག་པ་དང་དགེ་རྒན། ཕ་མ་དང་སློབ་ཕྲུག ཏང་ཡོན་ལས་བྱེད་པ་སོགས་མཉམ་ཞུགས་བྱས་ཏེ། བྱིས་པ་ཚོར་རྒྱ་སྐད་རྐྱང་བའི་ཐོག་ནས་ཆབ་སྲིད་སློབ་གསོ་གཏོང་བ་དང་སློབ་འཁྲིད་བྱེད་བཞིན་འདུག
སློབ་ཕྲུག་ཚོར་རྒྱ་ཡིག་གི་སྒྲིག་ཁྲིམས་སློབ་གསོའི་བརྙན་སྦྱོར་སྟོན་བཞིན་པ། པར་བོད་ནས་འདི་ག་གསར་ཁང་དུ་མཁོ་སྤྲོད་གནང་།
ཟླ་འདིའི་ཕྱི་ཚེས་ ༢༧ ཉིན་མཚོ་སྔོན་བོད་བརྒྱུད་ནང་བསྟན་སློབ་གླིང་དུ་ཆོས་ལུགས་ལས་དོན་དང་འབྲེལ་བའི་ཚོགས་འདུ་ཞིག་བསྡུས་ཏེ། ནང་བསྟན་ཆོས་ལུགས་ཀྱི་བསླབ་གཞི་ཚང་མ་གང་མགྱོགས་རྒྱ་ཡིག་བསྒྱུར་དགོས་པའི་བཀོད་ཁྱབ་བཏང་ཡོད་པ་མ་ཟད། རྒྱའི་སྤྱི་སྐད་གསོ་སྦྱོང་ཁང་གསར་འཛུགས་སྒོ་འབྱེད་བྱས་ཡོད་པ་ལྟར། རིམ་གྱིས་བོད་བརྒྱུད་ནང་བསྟན་སློབ་འཁྲིད་ཀྱང་རྒྱ་སྐད་ཐོག་བྱ་དགོས་པའི་སྲིད་ཇུས་ཤིག་ལག་བསྟར་བྱེད་ཡོང་གི་ཡོད་འདུག
རྒྱའི་སྤྱི་སྐད་གསོ་སྦྱོང་ཁང་ཟེར་བ་སྒོ་འབྱེད། པར་བོད་ནང་གི་དྲ་ལམ་ནས་བླངས།
འདས་ལོའི་ཕྱི་ཟླ་དགུ་པའི་ནང་རྒྱ་ནག་དབུས་ཤེས་རིག་ལྷན་ཁང་ནས་སྟོན་མཇུག་གི་སློབ་འགོ་བཙུགས་པ་ནས་བཟུང་གྲངས་ཉུང་མི་རིགས་ས་ཁུལ་ཁག་གཙོས་བྱས་ནས་རྒྱ་ནག་རྒྱལ་ཡོངས་ཀྱི་སློབ་གྲྭ་ཁག་ནང་རྒྱལ་ཡོངས་སྤྱི་སྐད་དེ། རྒྱ་ཡིག་རྒྱ་སྐད་ཀྱི་སློབ་ཁྲིད་སྔར་ལས་ཤུགས་ཆེ་རུ་གཏང་དགོས་པ་དང་། རྒྱ་ཡིག་རྒྱ་སྐད་ཀྱི་ཆུ་ཚོད་མཐོར་འདེགས་དེ་སློབ་མ་ཙམ་མིན་པར་དགེ་རྒན་དང་ལས་བྱེད་ཚོར་ཟུར་དུ་གསོ་སྦྱོང་འཚོགས་ནས་རྒྱ་ཡིག་རྒྱ་སྐད་ཀྱི་ཆུ་ཚད་དང་བྱང་ཚད་ཡར་རྒྱས་གཏོང་དགོས་ལུགས་དང་། གཞི་རིམ་མང་ཚོགས་དང་ཏང་ཡོན་ལས་བྱེད་པ་ཚང་མས་རྒྱལ་ཁབ་ཀྱི་སྤྱི་སྐད་སྦྱངས་ནས། བྱིས་པའི་སློབ་གཉེར་དང་མང་ཚོགས་ཀྱི་བསམ་བློས་ཆབ་སྲིད་སློབ་གསོར་གཞོགས་འདེགས་བྱེད་དགོས་སྐོར་གྱི་དྲིལ་བསྒྲགས་དང་སྐུལ་འདེད་ཤུགས་ཆེན་བྱེད་བཞིན་འདུག
མཚོ་སྔོན་བོད་བརྒྱུད་ནང་བསྟན་སློབ་གླིང་དུ་ཆོས་ལུགས་ལས་དོན་དང་འབྲེལ་བའི་ཚོགས་འདུ་བསྡུས་པ། པར་བོད་ནང་གི་དྲ་ལམ་ནས་བླངས།
ས་གནས་གསར་འགོད་པ།
