སུད་སི་སྐུ་ཚབ་དོན་གཅོད་ལས་ཁུངས་ཀྱི་འགྲོ་བ་མིའི་ཐོབ་ཐང་དང་འབྲེལ་བའི་དམིགས་བསལ་ལས་བྱེད་འཕྲིན་ལས་ཆོས་སྐྱིད་ལགས་སུད་སི་དོན་གཅོད་དུ་བསྐོ་གཞག་གནང་འདུག
ཁ་སང་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་བཀའ་དྲུང་ཡིག་ཚང་གིས་གསལ་བསྒྲགས་ཤིག་སྤེལ་བའི་ནང་། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་བཅུ་དགུ་པའི་ནང་གསེས་ ༡ པོའི་དགོངས་དོན། ཕྱི་རྒྱལ་ཁག་ཏུ་སྐུ་ཚབ་དོན་གཅོད་རྣམས་སྲིད་སྐྱོང་དང་བཀའ་བློན་ཚང་འཛོམས་ཞིབ་གྲོས་དྲག་འདེམས་ཀྱིས་བཀའ་ཤག་ནས་བསྐོ་འཛུགས་གནང་བར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་བསྩལ་རྒྱུ། ཞེས་གསལ་བ་ལྟར་འཕྲིན་ལས་ཆོས་སྐྱིད་ལགས་སུད་སི་སྐུ་ཚབ་དོན་གཅོད་དུ་བསྐོ་གཞག་བསྩལ་དོན་ལྟར། འདི་ལོའི་ཕྱི་ཟླ་ ༦ ཚེས་ ༢༢ ནས་དངོས་སུ་ལས་འཁུར་མགོ་འཛུགས་གནང་རྒྱུ་ཡིན་པའི་གསལ་བསྒྲགས་སྤེལ་འདུག
སྐབས་བཅུ་དྲུག་པའི་བཀའ་ཤག་གིས་འོས་བསྡུའི་སྐབས་བཀའ་བློན་ནང་བུད་མེད་གསུམ་དང་དོན་གཅོད་ཁག་ཏུ་བུད་མེད་བརྒྱ་ཆ་ ༥༠ བསྐོ་གཞག་བྱ་རྒྱུའི་ཁས་ལེན་གནང་ཡོད་པ་ལྟར། ད་ལྟ་བཀའ་ཤག་ནང་བུད་མེད་བཀའ་བློན་གསུམ་ཡོད་པ་དང་། ཕྱི་ཟླ་ ༤ ཚེས་ ༡ ཉིན་བཀའ་དྲུང་ཡིག་ཚང་གི་དྲུང་འཕར་ཚེ་རིང་ཆོས་འཛོམས་ལགས་ལྷོ་ཨ་ཧྥི་རི་ཁའི་སྐུ་ཚབ་དོན་གཅོད་དང་། རིག་འཛིན་ཆོས་སྒྲོན་ལགས་སྦར་སིལ་སྐུ་ཚབ་དོན་གཅོད་དུ་བསྐོ་གཞག་གནང་ཡོད་པ་ལྟར། འཕྲིན་ལས་ཆོས་སྐྱིད་ལགས་ནི་བཀའ་ཤག་སྐབས་བཅུ་དྲུག་པས་ཕྱི་རྒྱལ་སྐུ་ཚབ་དོན་གཅོད་དུ་བསྐོ་གཞག་གནང་བའི་བུད་མེད་གསུམ་པ་དེ་ཡིན་པ་རེད།
ཕྱི་ལོ་ ༢༠༡༢ ལོར་འཕྲིན་ལས་ཆོས་སྐྱིད་ལགས་ཀྱིས་ཨ་རིའི་ཧར་ཝཌ་མཐོ་སློབ་ཏུ་ཁྲིམས་ལུགས་རིག་པའི་ཐོག་གཙུག་ལག་རབ་འབྱམས་པའི་སློབ་མཐར་ཕྱིན་པ་དང་། ཕྱི་ལོ་ ༢༠༡༨ ལོར་བོད་མིའི་སྒྲིག་འཛུགས་ཀྱི་འགྲོ་བ་མིའི་ཐོབ་ཐང་དང་སུད་སི་བོད་ཀྱི་སྐུ་ཚབ་དོན་གཅོད་ཁང་དུ་ཕྱག་ལས་གནང་། གཞན་ཡང་དེ་སྔོན་རྒྱ་གར་གྱི་ (TATA Motors) ཁེ་ལས་ཀྱི་རྒྱ་གར་ལྷོ་ཕྱོགས་ཁྲིམས་ལུགས་སྡེ་ཚན་གྱི་འགན་འཛིན་གནང་མྱོང་བ་དང་། ཡུ་རོབ་མཐུན་ཚོགས་དང་མཉམ་འབྲེལ་རྒྱལ་ཚོགས་ནང་ཉམས་ཞིབ་པའི་ཕྱག་ལས་གནང་བ། དེ་བཞིན༧གོང་ས་རྒྱལ་བ་རིན་པོ་ཆེ་མཆོག་གི་གསུང་བསྒྱུར་གྱི་ཕྱག་ལས་སོགས་གནང་མྱོང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
