བོད་མིའི་སྒྲིག་འཛུགས་ཀྱི་ཏོག་དབྱིབས་ལས་དོན་ཚོགས་ཆུང་གིས་ནད་ཡམས་རྩ་མེད་ཕྱིན་མེད་པར་བརྟེན་འགོག་ཁབ་གསུམ་པ་བརྒྱག་དགོས་པ་དང་སྔོན་འགོག་གི་ཐབས་ལམ་མུ་མཐུད་ནས་ལག་བསྟར་བྱ་དགོས་པའི་གསལ་བསྒྲགས་གནང་འདུག
དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ ༡༩ པའི་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༡༠༩ གནང་བ་ལྟར་ན། འདས་པའི་བདུན་ཕྲག་གཅིག་གི་ནང་རྒྱ་བལ་གྱི་བོད་མིའི་ཁྲོད་ཏོག་དབྱིབས་ནད་པ་གསར་པ་ ༡ དང་། ཏོག་དབྱིབས་ནད་པ་ ༢ བྱུང་ཡོད་འདུག་ལ། གསལ་བསྒྲགས་ཐོག་འཕྲོད་བསྟེན་ལས་ཁུངས་ཀྱི་དྲུང་ལས་བསྟན་འཛིན་སྒྲོལ་དཀར་ལགས་ཀྱིས། རྒྱ་གར་ནང་དུ་ལོ་ ༡༨ ཡན་ལ་འགོག་ཁབ་ཐེངས་གཉིས་ཀ་བརྒྱབ་ཟིན་པའི་མི་གྲངས་ ༥༠།༡༢༡༦ དང་བལ་ཡུལ་ནང་དུ་མི་གྲངས་ ༧༠༢༩ ཡོད་པ་དང་། རྒྱ་གར་ནང་དུ་འགོག་ཁབ་ཐེངས་གཅིག་བརྒྱབ་ཟིན་པའི་མི་གྲངས་ ༢༧༡ ། ད་དུང་རྒྱ་གར་ནང་ལོ་ ༡༨ མན་ལ་འགོག་ཁབ་ཐེངས་གཉིས་ཀ་བརྒྱབ་ཟིན་པའི་མི་གྲངས་ ༡༩༩༣ དང་བལ་ཡུལ་ནང་དུ་ ༡༠༩ ཡོད་ལ། རྒྱ་གར་ནང་དུ་འགོག་ཁབ་ཐེངས་གཅིག་ཐོབ་མཁན་གྱི་མི་གྲངས་ ༣༧༩ ཡོད་སྐོར་དང་། གཞན་ཡང་རྒྱ་གར་ནང་དུ་ལོ་ན་ ༦༠ ཡན་ལ་འགོག་ཁབ་ཐེངས་གསུམ་པ་ཐོབ་པའི་མི་གྲངས་ ༥༦༠༩ དང་བལ་ཡུལ་ནང་དུ་ ༢༡༦། དེ་བཞིན་རྒྱ་གར་ནང་དུ་འཕྲོད་བསྟེན་ཞབས་ཞུ་བ་དང་ལས་བྱེད་རྣམས་ལ་འགོག་ཁབ་ཐེངས་གསུམ་པ་ཐོབ་པའི་མི་གྲངས་ ༥༨༦ དང་བལ་ཡུལ་ནང་དུ་ ༥ བྱུང་ཡོད་སྐོར་སོགས་བརྗོད་སོང་།
ད་དུང་ཁོང་གིས། ཟླ་འདིིའི་ཕྱི་ཚེས་ ༣ ཉིན་འཕྲོད་བསྟེན་དྲུང་ཆེ་ལྷན་བཞུགས་ཐོག་༧སྐུའི་ཕྱི་ལུགས་སྨན་པ་ཚེ་བརྟན་ལགས་དང་ཏོག་དབྱིབས་གཉན་རིམས་ཛ་དྲག་ཚོགས་ཆུང་གི་ཚོགས་མི་རྣམས་མཉམ་ཞུགས་ཀྱིས་ཛ་དྲག་ཚོགས་འདུ་ཞིག་འཚོགས་ཡོད་པ་དང་། སྐབས་དེར་རྒྱལ་སྤྱིའི་གནས་སྟངས་ཀྱི་ཐོག་ནས་ནད་རླབས་བཞི་པ་ཡོང་སྲིད་ཀྱི་ཡོད་མེད་དང་དེ་ལ་གྲ་སྒྲིག་ག་རེ་བྱ་དགོས་མིན། དེ་བཞིན་ལོ་ན་ ༡༨ ཡན་ལ་འགོག་ཁབ་གསུམ་པ་རག་ཐབས་ག་འདྲ་གནང་དགོས་སྐོར་ལ་གྲོས་བསྡུར་བྱས་ཡོད་་དང་། སྤྱིར་བཏང་གིས་ད་ལྟའི་ཆར་ཏོག་ནད་ཕོག་པའི་མི་གྲངས་ཉུང་དུ་ཕྱིན་ཡོད་ཀྱང་། ནད་ཡམས་རྩ་མེད་ཕྱིན་མེད་པར་བརྟེན། ཚང་མས་ཁ་རས་གྱོན་པ་སོགས་སྔོན་འགོག་གི་ཐབས་ལམ་ལག་བསྟར་མུ་མཐུད་བྱ་རྒྱུ་གལ་ཆེན་པོ་ཡིན་སྐོར་བརྗོད་འདུག
དེ་ནས་བདེ་ལེགས་སྨན་ཁང་གི་སྨན་པ་འཇིགས་མེད་སྐལ་བཟང་ལགས་ཀྱིས། ད་བར་དུ་རྒྱལ་ཡོངས་ཀྱི་ནང་དུ་ཏོག་དབྱིབས་ན་མཁན་མི་འབོར་ས་ཡ་ ༥༠༠ ཙམ་བྱུང་འདུག རྒྱ་གར་ནང་དུ་ད་ལྟ་ན་བཞིན་པའི་མི་གྲངས་སྟོང་ཕྲག་ ༡༩ ཙམ་རེད་འདུག ད་དུང་རྒྱ་གར་གྱི་སློབ་གྲྭ་ཁ་ཤས་ཀྱི་ནང་དུ་ནད་ཡམས་ཕོག་པའི་གནས་ཚུལ་ཡང་འདུག འདས་པའི་བདུན་ཕྲག་གཉིས་ཀྱི་ནང་ཏོག་ནད་ཕོག་པའི་མི་གྲངས་ཁ་ཤས་བྱུང་སོང་། དེར་བརྟེན་ཚང་མས་མུ་མཐུད་ནས་སྔོན་འགོག་གི་ཐབས་ལམ་ལག་བསྟར་གནང་རོགས་གནང་ཞུ་རྒྱུ་དང་། ལོ་ན་ ༦༠ ཡན་ལ་འགོག་ཁབ་གསུམ་པ་དང་ལོ་ ༡༢ ནས་ ༡༤ བར་ལ་འགོག་ཁབ་བརྒྱག་རྒྱུའི་གོ་སྐབས་བྱུང་ན་འགོག་ཁབ་བརྒྱག་དགོས་པའི་ལམ་སྟོན་གནང་སོང་ལ། རང་ལོ་ ༡༢ ནས་ ༡༤ བར་བྱིས་པ་ཚོ་ལའང་འགོག་ཁབ་རྒྱག་པའི་མགོ་བཙུགས་ཚར་ཡོད་འདུག
ད་བར་དུ་རྒྱ་གར་དང་བལ་ཡུལ་བོད་མིའི་ཁྲོད་ཏོག་ནད་ཕོག་མཁན་ ༩༡༥༣ བྱུང་བའི་ཁྲོད་དྲག་སྐྱེད་བྱུང་བ་ ༨༩༨༣ དང་མི་ ༡༦༨ རྐྱེན་འདས་སུ་ཕྱིན་ཡོད་འདུག ཉེ་སྔོན་རྒྱ་ནག་ནང་ཏོག་དབྱིབས་ནད་པ་ཇེ་མང་དུ་ཕྱིན་པ་དང་བསྟུན་བོད་ཀྱི་ས་ཁུལ་གང་སར་སྒོ་རྒྱག་བསྡམས་པ་དང་ཕྱི་མི་འགྲོ་སྐྱོད་བཀག་སྡོམ་སོགས་བྱས་དང་བྱེད་མུས་ཡིན་འདུག
གསར་འགོད་པ། བསྟན་འཛིན་ཕུར་བུ།
