ཁེ་ན་ཌའི་ནང་དུ་ཡོད་པའི་རྒྱ་ནག་གཞུང་ཚབ་ཁང་གིས་ཁེ་ན་ཌའི་ངོས་ནས་འཕྲལ་དུ་རྒྱ་ནག་གི་ནང་སྲིད་ལ་ཐེ་བྱུས་བྱེད་མཚམས་མ་བཞག་ཚེ་རྒྱ་ནག་ངོས་ནས་དེར་བསྟུན་ཡ་ལན་མ་སྤྲད་ཐབས་མེད་ཆགས་ངེས་ཡིན་སྐོར་ཉེན་བརྡ་བཏང་ཡོད་འདུག
ཟླ་འདིའི་ཕྱི་ཚེས་ ༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌར་ཕེབས་སྐྱོད་ཀྱིས་ཡུལ་དེའི་གྲོས་ཚོགས་འོག་མའི་ནང་ཕེབས་པ་མ་ཟད། གྲོས་ཚོགས་ཀྱི་ཕྱི་འབྲེལ་དང་རྒྱལ་སྤྱིའི་གནད་དོན་ཚོགས་ཆུང་གི་ཉན་ཞིབ་ཐོག་བོད་དོན་ཞུ་སྐུལ་གནང་བར། ཁེ་ན་ཌའི་རྒྱ་ནག་གཞུང་ཚབ་ཀྱིས་བོད་མིའི་སྒྲིག་འཛུགས་ནི་ཁ་བྲལ་གྱི་ཚོགས་པ་ཞིག་ཡིན་པ་དང་། ཁེ་ན་ཌ་ངོས་ནས་འཕྲལ་དུ་རྒྱ་ནག་གི་ནང་སྲིད་ལ་ཐེ་བྱུས་བྱེད་མཚམས་མ་བཞག་ཚེ། རྒྱ་ནག་ངོས་ནས་དེར་བསྟུན་ཡ་ལན་མ་སྤྲད་ཐབས་མེད་ཆགས་ངེས་ཡིན་སྐོར་ཉེན་བརྡ་བཏང་ཡོད་འདུག
ཁེ་ན་ཌའི་ནང་གི་རྒྱ་ནག་གཞུང་ཚབ་ཁང་གི་གཞུང་འབྲེལ་དྲ་བའི་སྟེང་། བཙན་བྱོལ་བོད་གཞུང་(Tibetan government-in-exile) ཟེར་བ་དེ་འཆར་གཞི་ལྡན་པའི་ཐོག་ནས་བོད་རང་བཙན་རྩོད་མཁན་གྱི་ཁ་བྲལ་ཆབ་སྲིད་ཚོགས་པ་ཡིན་ལ། ཚོགས་པ་དེས་རྒྱ་ནག་གི་རྩ་ཁྲིམས་ཡོངས་སུ་རྡོག་རོལ་གཏོང་གི་ཡོད། ཚོགས་པ་དེ་རྒྱལ་ཁབ་གཅིག་གིས་ཀྱང་ངོས་འཛིན་བྱེད་ཀྱི་མེད། སྤེན་པ་ཚེ་རིང་ཚོགས་པ་དེའི་མགོ་འཁྲིད་ཡིན་པའི་ཆ་ནས་རྒྱ་ནག་ལ་མཐའ་གཅིག་ཏུ་ངོ་རྒོལ་བྱེད་མཁན་གྱི་ཁ་བྲལ་བ་ཞིག་རེད་ལ། ཁོ་པའི་དམིགས་ཡུལ་ནི་བོད་རང་བཙན་ཁྱབ་བསྒྲགས་བྱས་ཏེ་བོད་དོན་དེ་རྒྱལ་སྤྱིའི་གནད་དོན་ཞིག་ཏུ་སྒྱུར་ཐབས་བྱེད་བཞིན་པ་དེ་རེད། ཅེས་འཁྱོག་བརྗོད་བྱས་འདུག་པ་མ་ཟད། ཁེ་ན་ཌའི་གྲོས་ཚོགས་ཀྱི་ཚོགས་ཆུང་གི་ཉན་ཞིབ་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་བོད་དེ་རྒྱ་ནག་གི་ཆ་ཤས་ཤིག་མིན་སྐོར་གསུངས་པ་དེས་བོད་རང་བཙན་རྩོད་མཁན་གྱི་ཤོག་ཁག་གི་ངོ་གདོང་མཚོན་གྱི་ཡོད་ཚུལ་བཤད་འདུག
དེ་བཞིན་རྒྱ་ནག་གི་མགྲིན་ཚབ་པ་དེས་བོད་རྒྱ་གྲོས་མོལ་དང་འབྲེལ་ཏེ། རྒྱ་ནག་ངོས་ནས་བཙན་བྱོལ་བོད་གཞུང་ཟེར་བ་ཞིག་ངོས་འཛིན་བྱེད་ཀྱི་མེད་ལ། རྒྱ་ནག་དབུས་གཞུང་གིས་དེ་ལྟ་བུའི་ཁྲིམས་འགལ་གྱི་ཚོགས་པའི་ལྷན་ནམ་ཡང་གྲོས་མོལ་བྱ་རྒྱུ་མིན་པ་དང་། རྒྱ་ནག་དབུས་གཞུང་དང་བོད་རང་སྐྱོང་ལྗོངས་ཀྱི་སྲིད་གཞུང་གཉིས་ལས་གཞན་སུ་གཅིག་ལའང་བོད་མིའི་སྐུ་ཚབ་བྱ་རྒྱུའི་ཐོབ་ཐབ་མེད་སྐོར་བརྗོད་འདུག་ལ། འདས་པའི་ལོ་གཅིག་ནང་བོད་ནང་བོད་མི་གང་བྱུང་བཙོན་འཇུག་ཁྲིམས་ཆད་བཏང་བ་དང་། ཉེ་ཆར་བོད་མི་གཉིས་ཀྱིས་རང་ལུས་མེར་སྲེག་བཏང་བའི་གནས་ཚུལ་ཐོན་མུས་ཡིན་ནའང་། རྒྱ་ནག་གཞུང་ཚབ་ཁང་གི་མགྲིན་ཚབ་པས་ད་ལྟའི་ཆར་བོད་ཀྱི་སྤྱི་ཚོགས་དང་དཔལ་འབྱོར་རིག་གནས་དང་བཅས་པ་གོང་འཕེལ་འགྲོ་བཞིན་ཡོད་པ་དང་། བོད་ནང་གི་བོད་མི་རྣམས་ཀྱིས་སྤྲོ་སྐྱིད་ལྡན་པའི་འཚོ་བ་རོལ་བཞིན་ཡོད་པ། བོད་ནང་གི་བོད་མི་ཚོར་ཆོས་དད་རང་དབང་ཡོད་སྐོར་བཀོད་འདུག གཞན་ཡང་རྒྱ་ནག་གཞུང་གིས་འདས་ལོར་བོད་མགོ་ལོག་ཁུལ་གྱི་སེང་འབྲུག་སྟག་རྩེ་ཡིས་མཚོན་པའི་བོད་ཀྱི་སློབ་གྲྭ་ཁག་སྒོ་བརྒྱབ་ཏུ་བཅུག་པ་མ་ཟད། རྒྱལ་ཡོངས་སྤྱི་སྐད་ཟེར་བའི་སྲིད་ཇུས་འོག་བོད་ཀྱི་གཞི་རིམ་སློབ་གྲྭ་ཁག་གི་སློབ་ཁྲིད་སྐད་ཡིག་དེ་རྒྱའི་སྐད་ཡིག་ཏུ་བསྒྱུར་དགོས་པའི་བཙན་བཀའ་བཏང་བ་སོགས་གནས་ཚུལ་མང་པོ་ཐོན་ཡོད་ཀྱང་། གཞུང་ཚབ་ཁང་དེས་རྒྱ་ནག་གཞུང་ངོས་ནས་ཁྲིམས་སྒྲིག་གཞིར་བཟུང་བོད་ཀྱི་རིག་གཞུང་དང་སྐད་ཡིག་བཀོལ་སྤྱོད་ཐད་སྲུང་སྐྱོབ་དང་གོང་འཕེལ་འགྲོ་རྒྱུ་གཙོར་འཛིན་བྱེད་བཞིན་ཡོད་སྐོར་གྱི་འཁྱོད་བཤད་བྱས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཁ་ན་ཌིའི་ནང་སྐོར་སྐྱོད་གནང་བཞིན་ཡོད་པ་ལྟར། ཕྱི་ཚེས་ ༧ ཉིན་སྲིད་སྐྱོང་མཆོག་གིས་གྲོང་ཁྱེར་ཊོ་རོན་ཊོ་རུ་ཡོད་པའི་བོད་ཀྱི་ཆོས་ཚོགས་ཁག་ ༡༢ དང་ཚོགས་པ་སྐྱིད་སྡུག་ ༡༤ བཅས་ཀྱི་སྐུ་ཚབ་དང་ཐུག་འཕྲད་གནང་། ཁ་སང་ཕྱི་ཚེས་ ༨ ཉིན་སྲིད་སྐྱོང་མཆོག་གིས་རྒྱ་རིགས་དང་ཧོང་ཀོང་། ཤར་ཊུར་ཀི་སི་ཐན་བཅས་ཀྱི་སྐུ་ཚབ་དང་ཐུག་འཕྲད་ཀྱིས་དྲི་བ་དྲིས་ལན་སོགས་གནང་ཡོད་འདུག དེ་ཡང་སྲིད་སྐྱོང་སྤེན་པ་ཚེ་རིང་མཆོག་འདི་ལོའི་ཕྱི་ཟླ་ ༤ ཚེས་ ༢༡ ནས་ཟླ་འདིའི་ཕྱི་ཚེས་ ༡༢ བར་འཇར་མ་ཎི་དང་ཨ་རི། ཁེ་ན་ཌ་བཅས་གསུམ་དུ་གཞུང་འབྲེལ་སྐོར་བསྐྱོད་ཀྱི་ལས་རིམ་འགྲོ་མུས་ཡིན་ཞིང་། ཟླ་འདིའི་ཕྱི་ཚེས་ ༦ ཉིན་གྲོས་ཚོགས་ཀྱི་ལས་རིམ་ཁག་གྲུབ་རྗེས་མོན་ཊི་རལ་ (Montreal) ཁུལ་དུ་གནས་སྡོད་བྱེད་པའི་བོད་མི་རྣམས་ལ་གསུང་བཤད་གནང་འདུག་པ་མ་ཟད། གནས་དེར་ཡོད་པའི་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཟུར་པ་རྣམས་ལ་ཟུར་དུ་ཐུག་འཕྲད་ཀྱིས་བཀའ་མོལ་་གནང་ཡོད་འདུག
དེ་ཡང་ཟླ་འདིའི་ཕྱི་ཚེས་ ༦ ཉིན་ཁེ་ན་ཌའི་གྲོས་ཚོགས་འོག་མའི་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཨ་རི་ཧྥི་ཝི་ར་ནི་ (Arif Virani) ལགས་ཀྱིས་མགྲོན་འབོད་ཞུས་པ་ལྟར། སྲིད་སྐྱོང་སྤེན་པ་ཚེ་རིང་མཆོག་གྲོས་ཚོགས་ནང་ཕེབས་ཡོད་ལ། གྲོས་ཚོགས་ཀྱི་ཕྱི་འབྲེལ་དང་རྒྱལ་སྤྱིའི་གནད་དོན་ཚོགས་ཆུང་གི་རྒྱུན་ལས་ཀྱི་ཉན་ཞིབ་ཐོག་བོད་ནང་གི་གནས་སྟངས་སྤྱི་དང་། ཡང་སྒོས་སུ་འདས་པའི་ལོ་ངོ་ ༢༧ རིང་གར་སོང་ཆ་མེད་དུ་གྱུར་བའི་༧པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཐོག་གླེང་སློང་གནང་ཡོད་པ་རེད་ལ། བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་ནས་ཀྱང་༧པཎ་ཆེན་རིན་པོ་ཆེ་མཆོག་དང་འབྲེལ་ནས་ཁེ་ན་ཌའི་གཞུང་དང་གྲོས་ཚོགས་ལ་རེ་སྐུལ་དོན་ཚན་ ༥ བཏོན་ཡོད་པ་རེད། དེའི་ཐད་རྒྱ་ནག་གི་གཞུང་ཚབ་ཁང་དེས། རྒྱ་ནག་གཞུང་ངོས་ནས་ཆོས་དད་རང་དབང་གི་སྲིད་ཇུས་འོག་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ལམ་ལུགས་ལ་བརྩི་བཀུར་དང་སྲུང་སྐྱོབ་བྱེད་ཀྱི་ཡོད་ཚུལ་དང་། ༧གོང་ས་མཆོག་དང་༧པཎ་ཆེན་རིན་པོ་ཆེ་མཆོག་གིས་མཚོན་པའི་སྤྲུལ་སྐུའི་ཡང་སྲིད་ཕེབས་ཕྱོགས་ཀྱི་ལམ་ལུགས་དེ་དུས་རབས་མང་པོའི་གོང་ནས་རིམ་གྱིས་གཏན་འབེབས་བྱུང་ཡོད་ནའང་། དེ་ཉིད་ལོ་རྒྱུས་དང་ཆོས་ལུགས་ཀྱི་ཆོ་ག་གཞིར་བཟུང་བཅོས་བསྒྱུར་བྱ་དགོས་པ་མ་ཟད། རྒྱ་ནག་གི་ཁྲིམས་སྒྲིག་ཁག་དང་མཐུན་སྒྲིག་བྱ་དགོས་ཚུལ་བཤད་འདུག་ལ། ༧གོང་ས་རྒྱལ་བ་རིན་པོ་ཆེ་མཆོག་ནི་རྒྱ་ནག་ཁ་བྲལ་གཏོང་མཁན་ཞིག་ཡིན་ཚུལ་དང་། ཁོང་གིས་རྒྱ་ནག་ཁ་བྲལ་གྱི་ཆབ་སྲིད་ཁེ་ཕན་གྱི་ཆེད་དུ་སྲོལ་རྒྱུན་ལམ་སྲོལ་རྣམས་བརྩི་མེད་རྡོག་རོལ་བཏང་སྟེ་ཕྲུ་གུ་ཞིག་༧པཎ་ཆེན་རིན་པོ་ཆེ་མཆོག་གི་ཡང་སྲིད་དུ་ངོས་འཛིན་གནང་ཡོད་ཚུལ་དང་། དེ་ནི་ཁྲིམས་འགལ་ཙམ་དུ་མ་ཟད་ངོས་འཛིན་བྱ་ཐབས་མེད་པ་ཞིག་ཡིན་སྐོར་བརྗོད་འདུག་ལ། རྒྱུན་ལྡན་ལྟར་༧པཎ་ཆེན་རིན་པོ་ཆེ་མཆོག་རྒྱ་ནག་གི་མི་སེར་དཀྱུས་མ་ལྟར་འཚོ་བ་སྐྱེལ་བཞིན་ཡོད་སྐོར་བསྐྱར་དུ་བཤད་ཡོད་འདུག
གསར་འགོད་པ། པ་སངས་ཚེ་རིང་།
ཤིན་ཏུ་ལེགས།