༧གོང་ས་མཆོག་ནས་གདན་ས་ཁག་གཙོ་བོར་གྱུར་བའི་ཕྱི་རྒྱལ་ཡུལ་གྲུ་ཁག་ནས་ཕེབས་པ་བཅས་དགེ་འདུན་པ་ཞལ་གྲངས་ ༦༣༠ ལ་བསྙེན་རྫོགས་ཀྱི་སྡོམ་པ་འབོག་ཆོག་དབུ་འཛུགས་མཛད་འདུག
དེ་ཡང་ཁ་སང་ཕྱི་ཚེས་ ༩ ཉིན་གྱི་སྔ་དྲོར་༧གོང་ས་མཆོག་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བརྒྱད་གཏོར་ཆེན་མོའི་ཚོགས་མགོན་དུ་ཆིབས་སྒྱུར་བཀའ་དྲིན་བསྐྱངས་ཏེ། དགེ་འདུན་པ་ཞལ་གྲངས་ ༥༥ ལ་བསྙེན་རྫོགས་ཀྱི་སྡོམ་པ་འབོག་ཆོག་མཛད་ཡོད་འདུག
སྐབས་དེར་༧གོང་ས་མཆོག་གིས། དེ་རིང་ཁྱེད་རང་ཚོ་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་ཐོག་བསྙེན་རྫོགས་སྒྲུབ་རྒྱུ་རེད། སྐལ་བ་ཧ་ཅང་གི་བཟང་པོ་རེད། སྟོན་པ་བཅོམ་ལྡན་འདས་རང་ཉིད་རྒྱལ་པོའི་སྲས་རེད། འོན་ཀྱང་ཁྱིམ་སྤངས་ནས་རབ་ཏུ་བྱུང་སྟེ་བསྙེན་རྫོགས་སྒྲུབ་གནང་ཡོད་པ་རེད། ངོས་ཀྱིས་རྡོ་རྗེ་གདན་དུ་ཐུབ་དབང་རིན་པོ་ཆེའི་སྐུ་མདུན་དུ་བསྙེན་རྫོགས་བསྒྲུབས་པ་ཡིན། སྐལ་བ་ཧ་ཅང་བཟང་པོ་བྱུང་ཡོད་ཞེས་སོགས་གསུངས་ཡོད་འདུག
བསྙེན་རྫོགས་ཀྱི་སྡོམ་པ་འབོགས་ཆོག་གི་མཛད་རིམ་ལྟར་ན། འདི་ལོའི་བསྙེན་རྫོགས་སྡོམ་པ་འབོག་ཆོག་དེ་ཁག་གཉིས་སུ་དབྱེ་སྟེ། ཕྱི་ཚེས་ ༩ ནས་ཚེས་ ༡༥ བར་དང་། ཕྱི་ཚེས་ ༡༦ ནས་ཚེས་ ༢༣ བར་གཙུག་ལག་ཁང་གི་ཆོས་རའི་ནང་སྡོམ་པ་འབོག་ཆོག་གནང་རྒྱུ་ཡིན་འདུག་ལ། ད་ལན་བསྙེན་རྫོགས་སྒྲུབ་མཁན་དེ་གདན་ས་སེ་འབྲས་དགའ་གསུམ་གཙོ་བོར་གྱུར་བའི་རྒྱ་གར་དང་བལ་ཡུལ་ནང་ཡོད་པའི་གདན་ས་ཆོས་སྡེ་ཁག་ ༣༤ ལྷག་དང་། སོག་ཡུལ་དང་སི་པན། ཇར་མ་ནི། ཨཱར་ལེན་ཌི། ཧྥ་རན་སི། ཨོ་སི་ཊི་རི་ཡ། ཨ་རི། ཝེ་ཊི་ནམ། བལ་ཡུལ། ཨུ་རུ་སུ། སྦེལ་ཇམ་བཅས་ནས་ཁྱོན་དགེ་འདུན་པ་ཞལ་གྲངས་ ༦༣༠ ལ་བསྙེན་རྫོགས་ཀྱི་སྡོམ་པ་འབོག་ཆོག་གནང་གི་ཡོད་པ་རེད།
གཞན་ཡང་། ༧གོང་ས་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༥ ཉིན་༧གོང་ས་མཆོག་ལ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དཔལ་ས་སྐྱའི་ཆོས་བརྒྱུད་འཛིན་པ་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག ད་དུང་ཕྱི་ཟླ་ ༦ ཚེས་ ༡ ནས་ ༢ བར་ཉིན་གཉིས་རིང་༧གོང་ས་མཆོག་གིས་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་གསུང་ཆོས་གནང་རྒྱུ་ཡིན་འདུག་ལ། ཕྱི་ཟླ་ ༧ ཚེས་ ༨ ནས་ ༡༠ བར་༧གོང་ས་མཆོག་གིས་དཔལ་ལྡན་སྟོད་རྒྱུད་གྲྭ་ཚང་དང་དཔལ་ལྡན་སྨད་རྒྱུད་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་ལྟར། བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་དྷ་རམ་ས་ལར་བདེ་ཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་དང་། ཚེས་ ༨ ཉིན་གྱི་སྔ་དྲོ་སྔོན་འགྲོའི་སྟ་གོན་གྱི་རིམ་པ་དང་། ཚེས་ ༩ དང་ ༡༠ ཉིན་གཉིས་རིང་དངོས་གཞིའི་བཀའ་དབང་སྩལ་རྒྱུ་ཡིན་འདུག
བོད་མིའི་སྒྲིག་འཛུགས་ཀྱི་དྲ་བ་ལས་གསར་འགོད་པ་བསྟན་འཛིན་ཕུར་བུས་བཏུས།
