བོད་མགོ་ལོག་ཁུལ་དགའ་བདེ་རྫོང་ཆུ་འབྲི་སྡེ་བའི་འབྲོག་ཁུལ་དུ་ས་ཁྲིམས་སྐོར་སྐྱོད་ཟེར་བ་བྱས་ཏེ་ལོ་ངོ་ ༥༠ རིང་རྩྭ་ས་བཀོལ་སྤྱོད་བདག་དབང་མི་མང་ལ་ཡོད་ཟེར་བའི་ཡིག་ཆ་དེ་ཕྱིར་བསྡུ་ཡི་ཡོད་པས་དེ་ལ་མོས་མཐུན་མེད་པའི་བོད་མི་ ༡༧༠ ལྷག་ལ་འདྲི་ཞིབ་བྱེད་བཞིན་འདུག
རྒྱ་ནག་གཞུང་གིས་བོད་མཚོ་སྔོན་ཞིང་ཆེན་མགོ་ལོག་ཁུལ་དུ་ལོ་ངོ་ ༥༠ རིང་རྩྭ་ས་བཀོལ་སྤྱོད་བདག་དབང་ས་གནས་མི་མང་ལ་ཡོད་ཟེར་བའི་ས་ཁྲིམས་དེར་བསྐྱར་ཞིབ་བྱས་ནས་དུས་ཡུན་རྫོགས་པ་རྣམས་ཀྱི་བདག་དབང་ཕྱིར་བསྡུ་བྱེད་ཀྱི་ཡོད་སྟབས། མགོ་ལོག་ཁུལ་དགའ་བདེ་རྫོང་ཁོངས་ཀྱི་བོད་མི་མང་པོ་ཞིག་གིས་དེ་ལ་མོས་མཐུན་མ་བྱས་པར་བརྟེན། ས་གནས་བོད་མི་ ༡༧༠ ལྷག་ཅིག་ས་གནས་ཉེན་རྟོག་ཁང་དུ་མི་རེ་རེ་བཞིན་འབོད་འགུག་བཀག་སྐྱིལ་བྱས་ཏེ་འདྲི་ཞིབ་བྱེད་བཞིན་འདུག
འབྲེལ་ཡོད་གནས་ཚུལ་མཁོ་སྤྲོད་པས་འདི་ག་བོད་ཀྱི་དུས་བབ་གསར་འགོད་པར། དེ་རིང་མཚོ་སྔོན་ཞིང་ཆེན་མགོ་ལོག་ཁུལ་དགའ་བདེ་རྫོང་ཆུ་འབྲི་སྡེ་བའི་འབྲོག་ཁུལ་དུ་ས་ཁྲིམས་སྐྱོད་སྐོར་ཟེར་བའི་ཁྲིམས་ཀྱི་ལས་འགུལ་སྤེལ་ཏེ། ས་གནས་ཉེན་རྟོག་པ་དང་འབྲེལ་ཡོད་ལས་བྱེད་པ་བཅས་སྡེ་བའི་ནང་དུ་ཡོང་སྟེ། དེ་སྔའི་རྩྭ་སའི་སྐོར་སྐྱོད་ཡིག་ཆ་(རྩྭ་ས་བཀོལ་སྤྱོད་དཔང་ཡིག)ཟེར་བ་དེའི་དུས་ཡུན་རྫོགས་ཡོད་མེད་ལ་ལྟ་ཞིབ་བྱེད་ཀྱི་འདུག གལ་སྲིད་དུས་ཡུན་རྫོགས་ཡོད་ན་ཡིག་ཆ་དེ་གཞུང་ལ་ཕྱིར་སྤྲོད་དགོས་པ་དང་། རྗེས་ཕྱོགས་ས་ཆ་སོ་སོས་མུ་མཐུད་བེད་སྤྱོད་གཏོང་ཆོག་ཀྱང་ས་ཆའི་བདག་དབང་སྲིད་གཞུང་ཁོ་ནར་ཡོད་ལུགས་བཤད་པའི་རྐྱེན་གྱིས།
ས་གནས་མི་མང་གིས་མི་མང་གི་ས་ཆ་མི་མང་ལ་བདག་པ་དང་། དེ་སྔོན་མི་མང་ལ་བདག་པའི་ཡིག་ཆའང་སྤྲད་ཡོད་སྟབས། ད་ལྟ་ཕྱིར་བསྡུ་བྱེད་དགོས་དོན་གང་ཡང་མེད་སྐོར་བརྗོད་སྐབས། གོང་རིམ་གྱི་བཀའ་རྩིས་མེད་བཏང་སྟེ་རྒྱལ་ཁབ་ཀྱི་བདག་དབང་ལ་བསྙོན་འཛུགས་བྱེད་ཀྱི་ཡོད་པའི་ཉེས་མིང་འོག ས་གནས་བོད་མི་ ༡༧༠ ལྷག་དགའ་བདེ་རྫོང་ཉེན་རྟོག་ཁང་དུ་རེ་རེ་བཞིན་འབོད་འགུག་བཀག་སྐྱིལ་བྱས་ཏེ་འདྲི་རྩད་བྱེད་ཀྱི་ཡོད་སྐོར་དང་། འདྲི་ཞིབ་སྐབས་དེ་སྔོན་སྤྲད་པའི་རྩྭ་ས་བཀོལ་སྤྱོད་དཔང་ཡིག་གི་དུས་ཡུན་ཚང་ན་ངེས་པར་དུ་རྒྱལ་ཁབ་ལ་སྤྲོད་དགོས་ཀྱི་ཡོད་པ་དང་། མ་སྤྲད་ན་ཁྲིམས་དང་འགལ་གྱི་ཡོད་པ་སོགས་ངོས་ཟིན་པའི་ཐོག་ནས་མོས་མཐུན་བྱེད་དགོས་ཀྱི་ཡོད་སྐོར་བརྗོད་བྱུང་།
ཤེས་རྟོགས་བྱུང་བར་གཞིགས་ན། རྩྭ་ས་བཀོལ་སྤྱོད་དཔང་ཡིག་ཟེར་བ་དེ་གཞིར་བཟུང་ནས་ལོ་ངོ་ ༥༠ དུས་ཡུན་རྫོགས་ཟིན་རྗེས་རྩྭ་ས་གཞུང་བསྡུ་ཟེར་བའི་ལས་འགུལ་དེ་སྤེལ་གྱི་ཡོད་པ་དང་། ལས་འགུལ་དེ་མཚོ་སྔོན་ཞིང་ཆེན་མགོ་ལོག་ཁུལ་གྱི་རྨ་ཆེན་རྫོང་དང་། རྨ་སྟོད་རྫོང་། དགའ་བདེ་རྫོང། དར་ལག་རྫོང་། པད་མ་རྫོང། གཅིག་སྒྲིལ་རྫོང་བཅས་རྫོང་དྲུག་ནང་ལག་བསྟར་བྱས་དང་བྱེད་ཀྱི་ཡོད་འདུག
ཕྱི་ལོ་༢༠༢༡ ཟླ་༡༠ ནང་སྐྱེ་རྒུ་མདོ་ཁུལ་དུའང་རྩྭ་ས་བཀོལ་སྤྱོད་དཔང་ཡིག་ཟེར་བ་དེ་གཞིར་བཟུང་ནས་འབྲོག་པའི་རྩྭ་ས་གཞུང་བསྡུ་བྱ་རྒྱུ་ཡིན་པའི་དྲིལ་བསྒྲགས་བྱས་ཡོད་པ་མ་ཟད། དེ་འབྲེལ་གྱི་ཚོགས་འདུ་རིམ་པར་འཚོགས་ནས་ས་གནས་མང་ཚོགས་ལ་སེམས་འཚབ་ཆེན་པོ་བསླངས་བའི་གནས་ཚུལ་ཐོན་ཡོད་ཀྱང་། ཕྱིས་སུ་གནས་ཚུལ་དེ་དངོས་སུ་ལག་བསྟར་ག་འདྲ་བྱས་ཡོད་མེད་ད་ལྟའི་ཆར་ཤེས་རྟོགས་ཐུབ་མ་སོང་།
ན་ནིང་མཚོ་སྔོན་ཞིང་ཆེན་གྱི་རྫོང་ཁག་སོ་སོར་རྩྭ་ས་གཞུང་བསྡུའི་དྲིལ་བསྒྲགས་དང་དེ་འབྲེལ་གྱི་ཚོགས་འདུ་རིམ་པར་འཚོགས་ཏེ། རྩྭ་སའི་བདག་དབང་སྐོར་ཀྱི་ལམ་སྟོན་དང་རྩྭ་ས་བཀོལ་སྤྱོད་ཀྱི་བདག་དབང་འཛིན་ཡིག་ཟེར་བའི་ཤོག་གྲངས་༡༧ ཅན་གྱི་ལག་དེབ་དམར་པོ་ཞིག་ཀྱང་འགྲེམས་སྤེལ་བྱས་ཏེ། རྩྭ་ས་ནི་རྒྱལ་ཁབ་ལ་དབང་བར་བརྟེན། རྒྱལ་ཁབ་ལ་ག་དུས་དགོས་མཁོ་ཡོད་ན། དེ་དུས་རྒྱལ་ཁབ་ཀྱིས་གཞུང་བཞེས་བཏང་ཆོག་པའི་དྲིལ་བསྒྲགས་བྱས་ཡོད་པ་དང་། དུས་ཡུན་ལོ་ ༥༠ ཟིན་རྗེས་རྩྭ་ས་གཞུང་བཞེས་གཏོང་བའི་སྲིད་ཇུས་དེ་ནི་ལོ་རབས་ ༧༠ ནང་རྒྱ་གཞུང་གིས་གཏན་འབེབ་ལག་བསྟར་བྱས་པ་ཞིག་ཡིན་འདུག
སྤྱིར་བཏང་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་གྱི་ས་ཆ་མང་པོ་ཞིག་རྒྱ་ནག་གཞུང་ཕྱོགས་ནས་དྲིལ་བསྒྲགས་བྱེད་བཞིན་པའི་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་འཛུགས་སྐྲུན་དང་རང་བྱུང་སྲུང་སྐྱོང་ཁུལ་ཆེན་མོ་ཟེར་བར་ངོས་འཛིན་བྱེད་ཀྱི་ཡོད་སྟབས། འདས་པའི་ལོ་ངོ་འདི་དག་རིང་རྒྱ་ནག་གཞུང་གིས་སྐྱེ་ཁམས་དཔལ་ཡོན་སྲུང་སྐྱོང་གི་མིང་ཐོག་ནས་ས་ཁུལ་དེའི་འབྲོག་སྡེ་མང་པོ་ས་གནས་གཞན་དུ་བཙན་གྱིས་གནས་སྤོར་དུ་བཅུག་དང་འཇུག་བཞིན་ཡོད་པ་མ་ཟད། སྐྱེ་ཁམས་དཔལ་ཡོན་འཛུགས་སྐྲུན་གྱི་མིང་ཐོག་ནས་ཕྱུག་དོར་རྩྭ་གསོ་དང་རྩྭ་ཕྱུགས་དོ་མཉམ་ཟེར་བའི་སྲིད་ཇུས་སྤེལ་ནས། འབྲོག་སྡེ་མང་པོ་ཕྱོགས་གཅིག་ཏུ་བསྡུས་ནས་མཉམ་ལས་ཁང་འཛུགས་པ་དང་། འབྲོག་པའི་འཚོ་རྟེན་གཙོ་བོ་རྩྭ་ས་གཞུང་བསྡུ་དང་ཕྱུགས་གྲངས་ལ་ཚོད་འཛིན་བྱས་དང་བྱེད་བཞིན་ཡོད་པ་དང་། དེ་ལ་བརྟེན་ནས་འབྲོག་པ་མང་པོ་ཞིག་ལས་མེད་དུ་གྱུར་ཏེ་སྲིད་གཞུང་ལ་བརྟེན་ནས་འཚོ་བ་སྐྱེལ་དགོས་པའི་གནས་སྟངས་སུ་ལྷུང་བཅུག་གི་ཡོད་པ་རེད།
ས་གནས་གསར་འགོད་པ།
