དེ་རིང་བཞུགས་སྒར་ཀིརྟིའི་བྱེས་པ་གྲྭ་ཚང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཀིརྟི་བྱེས་པ་གྲྭ་ཚང་གི་ཆེས་མཐོའི་རིག་གནས་སློབ་གཉེར་ཁང་གི་འདུལ་བ་དང་། མཛོད། ཕར་ཕྱིན། རིག་གནས་བཅས་ཀྱི་སློབ་ཐོན་པ་རྣམས་ལ་ཕྱག་ཁྱེར་གནང་སྟེ་བླ་མ་གང་འདྲ་ཡོད་མེད་སློབ་མར་བལྟས་ན་ཧ་གོ་ཡི་རེད་ཟེར་བ་བཞིན་དུ་ཀིརྟི་གྲྭ་ཚང་ནས་བསླབ་པ་སློབ་གཉེར་ཐོག་འབད་བརྩོན་ཆེན་པོ་གནང་བཞིན་པར་བསྔགས་བརྗོད་གནང་སོང་།
མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ང་ཚོ་སྐྱ་སེར་ཕོ་མོ་སུ་འདྲ་ཞིག་ཡིན་ཡང་། མི་བཟང་པོ་དང་ཡག་པོ་ཆགས་རྒྱུའི་ཆེད་དུ་སློབ་གཉེར་བྱེད་ཀྱི་ཡོད་པ་མ་ཟད། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་བཀའ་སློབ་དང་ལམ་སྟོན་གཞིར་བཟུང་རྣམ་པ་ཚོས་ཕྱག་ལས་གནང་གི་ཡོད་རེད། སྤྱིར་བླ་མ་གང་འདྲ་ཡོད་མེད་སློབ་མར་བལྟས་ན་ཧ་གོ་ཡི་རེད་ཟེར་བ་བཞིན། དགེ་འདུན་པའི་ཞལ་གྲངས་ ༡༧༩ ཙམ་ཞིག་ཡོད་པའི་ནང་ནས། དགེ་འདུན་པ་བརྒྱ་ཆ་མང་བ་ཞིག་གིས་ཕྱག་དཔེ་གཟིགས་ཀྱིན་ཡོད་འདུག དགོན་པ་མང་པོ་ཞིག་ཏུ་དགེ་འདུན་པའི་གྲངས་མང་པོ་ཞིག་ཡོད་ཀྱང་། བྱ་བྲལ་བ་དང་། དཔེ་ཆ་བ་སོགས་ག་ཚོད་ཙམ་ཡོད་དམ་བསམ་བསྡད་ཀྱི་ཡོད་ཀྱང་། ཀིརྟི་དགོན་པའི་གྲངས་ཐོ་ལ་ལྟ་དུས་བརྒྱ་ཆ་བདུན་ཅུ་ལྷག་གིས་དཔེ་ཆ་གཟིགས་ཀྱི་ཡོད་པ་ཧ་གོ་བྱུང་བར་དགའ་ཚོར་ཆེན་པོ་བྱུང་། བསླབ་པ་མཐར་སོན་གྱི་མཛད་སྒོར་མ་བཅར་གོང་དུ་དཔེ་མཛོད་ཁང་དུ་བཅར་བ་ཡིན། དེར་རིན་པོ་( ཀིརྟི་རིན་པོ་ཆེ།) མཆོག་གིས་ལྗགས་རྩོམ་གནང་བའི་ཕྱག་དེབ་གྲངས་ ༡༡༣ དག་དགོན་པས་དཔར་འགྲེམས་གནང་བའི་ཕྱག་དེབ་མང་པོ་ཞིག་འདུག ཀིརྟི་བྱེས་པ་གྲྭ་ཚང་གིས་དཔེ་དེབ་དཔར་སྐྲུན་སོགས་ཡག་ཐག་ཆོད་ཅིག་བྱེད་ཀྱི་ཡོད་པའི་ཚོར་སྣང་སྔ་མ་ནས་ཡོད་པ་ཞིག་ཡིན། དེའང་མུ་མཐུད་ཧུར་ཐག་འབད་ཐག་གནང་གི་ཡོད་རེད་བསམ་གྱི་འདུག དེ་བཞིན་ཧི་མ་ལ་ཡའི་ཁུལ་ནས་དགེ་འདུན་པ་གྲངས་ ༧༩ ཙམ་ཡོད་པ་རྣམས་ཀྱིས་སོ་སོའི་ཡུལ་སྐད་དེ་མ་བརྗེད་པ་བྱེད་ནས། ཡུལ་སྐད་དེ་ངེས་པར་དུ་ཉར་དགོས་པ་དེ་ཧ་ཅང་གལ་ཆེན་པོ་རེད། བོད་ཡིག་གཅིག་པུ་སྦྱངས་ནས་བོད་ཀྱི་དཔེ་ཆ་དག་ཤེས་ཀྱང་། རྗེས་སུ་སོ་སོའི་ཡུལ་མི་རྣམས་ལ་ཆོས་ཕྱོགས་ཀྱི་ལས་ཀ་བྱ་དགོས་སྐབས། སོ་སོའི་ཡུལ་སྐད་ནང་དུ་བྱེད་མ་ཐུབ་པའི་གནས་སྟངས་ཆགས་མི་སྲིད་པ་ཞིག་མ་རེད་ལ། ལྷག་པར་སོ་སོའི་ཡུལ་སྐད་བདག་ཉར་བྱ་རྒྱུ་གལ་ཆེན་པོ་ཡིན་པ་རེད། ཧི་མ་ཡ་ལའི་ཁུལ་ནས་ཡིན་པའི་གྲྭ་པ་ཚོས་བོད་ཡིག་ཀློག་ཤེས་པ་ཙམ་མ་གཏོགས། དཔྱད་པ་བྱ་རྒྱུ་དང་། ཉམས་ལེན་བྱ་རྒྱུ་ཞན་པོ་ཡོད་པའི་གནས་སྟངས་ཤིག་རེད། ཡིན་ཡང་། ཀིརྟི་བྱེས་པ་གྲྭ་ཚང་གི་བསླབ་གཞི་དང་། སློབ་གཉེར་བྱེད་སྟངས་སོགས་ཀྱི་ཐད་ནས། ཁྱེད་ཅག་ལ་ཏན་ཏན་ཐུགས་ཕན་གསོས་པའི་རེ་བ་བྱེད་ཀྱི་ཡོད། ཅེས་གསུངས་སོང་།
ཡང་སྲིད་སྐྱོང་སྤེན་པ་ཚེ་རིང་མཆོག་གིས། ང་ཚོ་བོད་མིའི་སྒྲིག་འཛུགས་ཀྱི་ངོས་ནས་ལས་འགན་གཙོ་བོ་གཉིས་བོད་ཀྱི་རྩ་དོན་སྒྲུབ་རྒྱུ་དང་། བཙན་བྱོལ་ནང་གི་བོད་མིའི་བདེ་སྡུག་ལྟ་རྒྱུ་དེ་རེད། ལས་དོན་གང་ཞིག་བྱས་རུང་༧གོང་ས་མཆོག་གི་བཀའ་དང་དགོངས་པ་གཙོ་བོར་བཞག་པའི་ཐོག་ནས། འདི་སྒྲུབ་ཐབས་དེ་རིག་པ་དང་བསམ་བློ་གསར་པ་གཏོང་བ་སོགས་བྱེད་རྒྱུའི་འབད་བརྩོན་གང་ཐུབ་ཞུ་ཡི་ཡོད་པ་རེད། དོན་དག་འགྲུབ་ཐུབ་མིན་དེ་མི་གཅིག་གིས་བྱས་པའི་ནུས་པ་གཅིག་པོར་བལྟས་ནས་ཡོང་རྒྱུ་མེད་པ་དེ་གསལ་པོ་རེད། ད་ལྟ་བར་དུ་༧གོང་ས་མཆོག་གི་འབད་བརྩོན་ལ་བརྟེན་ནས་འཛམ་གླིང་འདིའི་ནང་ལ་བོད་དོན་སྐོར་ལ་གོ་རྟོགས་དང་བོད་པའི་གནད་དོན་དེ་དག་རྒྱུན་གནས་ཐུབ་པ་དེ། ༧གོང་ས་མཆོག་གིས་བཀའ་དྲིན་ཉག་གཅིག་ལ་བརྟེན་ནས་བྱུང་བ་དེ་བཤད་མ་དགོས་པ་རེད། བོད་ཀྱི་གནད་དོན་དེ་འཛམ་གླིང་གིས་ཤེས་ཀྱི་ཡོད་ཤག་བྱས་ནས་བསྡད་པ་ཡིན་ན། ང་ཚོ་ནོར་གྱི་ཡོད་རེད། ལོ་གཉིས་གསུམ་གྱི་སྔོན་ལ་རྒྱ་གར་ནང་ཞིབ་འཇུག་བྱས་པའི་བརྒྱུད་རིམ་ནང་། བོད་པ་ལ་རྒྱབ་སྐྱོར་བྱེད་མཁན་བརྒྱ་ཆ་ ༦༨ ཡས་མས་ཡོང་གི་ཡོད་རེད་དེ། བོད་པའི་གནད་དོན་མགོ་འཚོས་མཁན་བརྒྱ་ཆ་ ༢༨ ཙམ་ཡོད་པ་རེད། བོད་པ་མང་ཤོས་སྡོད་སའི་ལུང་པའི་ནང་དུ་གནས་སྟངས་དེ་འདྲ་ཡིན་ན། བོད་པ་གཅིག་ཀྱང་མེད་པའི་རྒྱལ་ཁབ་དེ་ཚོའི་ནང་བོད་པའི་སྐོར་ལ་ཧ་གོ་མཁན་ཁག་པོ་རེད། དེའི་སྒང་ལ་རྒྱ་ནག་གཞུང་གི་འཁྱོག་བཤད་ཤུགས་ཆེ་དྲགས་ནས་བོད་པའི་གནད་དོན་དང་བོད་པའི་ལོ་རྒྱུས་ཀྱི་སྐོར་ལ་དམིགས་སུ་བཀར་ནས་བལྟས་ན་མ་གཏོགས། བོད་དེ་རྒྱ་ནག་གི་ཆ་ཤས་ཤིག་ཡིན་པ་བརྩི་མཁན་མང་པོ་ཡོང་གི་ཡོད་པ་རེད། དེར་བརྟེན་ང་ཚོས་ཐབས་ཤེས་གསར་པའི་ཐོག་ནས་བོད་ལོ་རྒྱུས་ཀྱི་གནས་བབ་ཐོག་ནས་རང་བཙན་ཡིན་པ་དེ་བསྒྲུབ་པར་བོད་པས་བཤད་པ་ཙམ་མིན་པར། ཕྱིས་སུ་རྒྱ་ནག་གི་མཁས་པ་དང་ནུབ་ཕྱོགས་ཀྱི་མཁས་པས་བརྩམས་པའི་དེབ་དེ་ཚོ་ལ་གཞི་བཞག་ནས་བོད་རང་བཙན་ཡིན་པའི་གནས་བབ་ཤེས་པའི་ཐོག་ནས། རྒྱལ་ཁབ་སོ་སོས་འདི་ལ་ངོས་འཛིན་བྱས་ན། རྒྱ་ནག་གིས་ང་ཚོར་སྐད་ཆ་བཤད་པར་མི་ཡོང་ཐབས་མེད་ཆགས་རྒྱུའི་གནས་སྟངས་ཤིག་ལ་འགྱུར་ཐུབ་ན་བསམ་ནས་འབད་བརྩོན་བྱས་དང་བྱེད་བཞིན་པ་རེད། ཅེས་གསུངས་སོང་།
ད་དུང་ཁོང་གིས། རྒྱ་ནག་ནང་ལོགས་ལའང་འགྱུར་བ་ཆེན་པོ་འགྲོ་བཞིན་པའི་དུས་ཚོད་ཞིག་ཡིན་པ་དང་། གནས་སྟངས་ག་འདྲ་ཆགས་ཀྱི་ཡོད་ནའང་། ང་ཚོས་གོ་སྐབས་དམ་འཛིན་བྱེད་དགོས་པ་དང་། རྒྱལ་སྤྱིའི་སྤྱི་ཚོགས་ལ་འབྲེལ་བ་བྱེད་སྐབས་བྱེད་ལུགས་བྱེད་སྟངས་ག་འདྲ་བྱ་དགོས་ཀྱི་ཡོད་མེད། དེ་བཞིན་རྒྱ་ནག་ལ་སྐད་ཆ་བཤད་ན་མ་གཏོགས་བོད་དོན་དཀའ་རྙོག་སེལ་རྒྱུའི་ཐབས་ལམ་གཞན་ཡོང་རྒྱུ་ཁག་པོ་ཆགས་ཀྱི་ཡོད་པ་རེད། རྒྱལ་ཁབ་གཞན་སུ་འདྲ་ཞིག་ཡིན་རུང་སོ་སོའི་རྒྱལ་ཁབ་ཀྱི་ཁེ་ཕན་སྔོན་ལ་ལྟ་ཡི་རེད། བོད་པའི་གནད་དོན་གྱི་ཁེ་ཕན་ལ་བལྟས་ནས་སོ་སོའི་རྒྱལ་ཁབ་ཀྱི་ཁེ་ཕན་བློས་གཏོང་བྱེད་མཁན་ཧ་ཅང་གི་དཀོན་པོ་རེད། ལྷག་པར་དུ་དེང་སང་གི་འཛམ་གླིང་དང་ཆབ་སྲིད་ཀྱི་འགྲོ་སྟངས་འདིའི་འོག་ནས་སོ་སོའི་རྒྱལ་ཁབ་ཀྱི་ཁེ་ཕན་དང་སོ་སོའི་མི་མང་གི་ཁེ་ཕན་བསྒྲུབ་རྒྱུ་དེ་གལ་ཆེ་བ་རྩི་ཡི་རེད། ད་ལྟའི་དུས་སུ་ང་ཚོ་ཚང་མ་མཉམ་རུབ་ཀྱི་ཐོག་ནས་འགན་འཁྱེར་སྟེ། ༧གོང་ས་མཆོག་གིས་སྐུ་ལས་བསྐྱོན་པ་དེ་དག་མི་ཉམས་རྒྱུན་འཛིན་བྱ་རྒྱུའི་ཐོག་ལ་བསམ་བློ་གཏོང་རྒྱུ་གལ་ཆེན་པོ་རེད་འདུག ཅེས་གསུངས་སོང་།
ཡང་སྲིད་སྐྱོང་མཆོག་གིས། ༧རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་ཟེར་དུས། དང་པོ་༧རྒྱལ་བ་རིན་པོ་ཆེ་མཆོག་གི་དགོངས་པ་ག་རེ་ཡིན་པ་ངོ་འཕྲོད་ཐུབ་པ་བྱ་དགོས་ཀྱི་རེད་མ་གཏོགས། སོ་སོའི་འདོད་པ་ཡོད་པ་ཞིག་སྐུ་མདུན་གྱིས་བཀའ་གནང་བ་ཡིན་ན། དེ་༧རྒྱལ་བ་རིན་པོ་ཆེའི་བཀའ་རེད་ཟེར་རྒྱུ་དང་། སོ་སོའི་འདོད་པར་ཞེ་དྲགས་མ་འགྲོ་བ་ཡིན་ན། དེ་སོ་སོས་ཧ་གོ་ཡི་མེད་མདོག་མདོག་ལྟ་བུར་བཞག་ན། དེས་༧རྒྱལ་བ་རིན་པོ་ཆེའི་བཀའ་ཡོངས་སུ་རྫོགས་པ་བསྒྲུབ་ཀྱི་ཡོད་པ་མ་རེད། ང་ཚོ་བོད་པའི་བསམ་བློ་དེ་མཚམས་རེར་དོགས་དྲགས་ནས་དོགས་པ་རྣམ་རྟོག་ཡོང་བསྡད་རྒྱུ་དེ་འདྲ་ཡོང་གི་ཡོད་པ་རེད། དོགས་པ་རྣམ་རྟོག་མེད་པར་གུ་ཡངས་ཙམ་དང་བསམ་བློ་རྒྱ་ཆེ་ཙམ་བཏང་ནས། ང་ཚོའི་ཆོལ་ཁའི་གནས་ཚུལ་ཡིན་ནའང་ཁམས་དང་ཨ་མདོ་དབུས་གཙང་གཅིག་པུར་བསམ་བློ་བཏང་ནས་དེ་རང་ནང་ལ་འཛུལ་བསྡད་ན། དེ་རང་མ་གཏོགས་བསམ་བློ་འཁོར་རྒྱུ་ཡོད་པ་མ་རེད། དེ་ལས་རྒྱ་ཆེ་ཙམ་བསལ་བློ་བཏང་བ་ཡིན་ན། མདོ་དབུས་ཁམས་གསུམ་བསྡུས་པའི་བོད་པའི་མི་རིགས་ཀྱི་ངོ་བོ་ཟེར་བ་བཙན་པོའི་རྒྱལ་རབས་སྐབས་བྱུང་བ་དེ་བཙན་བྱོལ་ནང་སླར་གསོ་བྱུང་ཐུབ་པ་དེ་༧རྒྱལ་དབང་སྐུ་ཕྲེང་བཅུ་བཞི་པའི་བཀའ་དྲིན་ཉག་གཅིག་ལ་བརྟེན་ནས་བྱུང་བ་རེད་མ་གཏོགས། ང་ཚོའི་ལོ་རྒྱུས་གནས་བབ་ལ་བལྟས་ན་གཅིག་གིས་གཅིག་ལ་འཁོན་འཛིན་རྐྱང་རྐྱང་བྱས་མ་ཚར་བར་བསྡད་ཡོད་པ་རེད། ཨ་མདོ་ཁུལ་ལ་བལྟས་ན་འཛིང་མ་ཚར་བ་སྡོད་ཀྱི་འདུག ང་ཆུང་ཆུང་སྐབས་པཱ་ལགས་ཀྱིས་འཁྲིད་ནས་སྒྲུང་མང་པོ་ཉན་གྱི་ཡོད། ནང་པ་སངས་རྒྱས་པ་ནི་ཡིན་ལབ་གྱི་ཡོད་རེད་དེ། གཅིག་གིས་གཅིག་ལ་འཛིང་མ་ཚར་བར་སྡོད་ཀྱི་ཡོད་རེད། དེར་བརྟེན་ཉམས་ལེན་གྱི་སྟེང་ནས་གང་འདྲ་ཡོང་གི་ཡོད་ན་བསམ་གྱི་ཡོད། ཕྱིས་སུ་སྔོན་མའི་སྤྱི་ཚོགས་ཀྱི་ལོ་རྒྱུས་དང་དེབ་དེ་འདྲ་ཉན་པ་དང་དེབ་ཀློག་དུས། སྤྱི་ཚོགས་ནང་བོད་ཡིག་ཤེས་མཁན་ཉུང་ཉུང་རེད་འདུག བོད་ཡིག་ཁོ་རང་ཤེས་མཁན་ཉུང་ཉུང་ཡིན་ན་ནང་ཆོས་ཤེས་རྟོགས་ཉུང་ཉུང་ཡིན་གྱི་རེད། ད་ལྟའི་༧རྒྱལ་བ་རིན་པོ་ཆེ་འདི་ལྟ་བུ་ཞིག་ང་ཚོར་བྱུང་མེད་ན་ཕལ་ཆེར་ཁག་པོ་ཆགས་ཡོད་ཀྱི་རེད། བསླབ་པ་སློབ་གཉེར་བྱེད་སྟངས་ཡིན་ནའང་ནང་ཆོས་ངོ་མ་ཡིན་མིན་དང་གོ་བ་ལེན་ཕྱོགས་ཐོག་ནས་ཁག་པོ་ཆགས་རྒྱུ་རེད། ཅེས་སོགས་གསུངས་སོང་།
ཀིརྟིའི་བྱེས་པ་གྲྭ་ཚང་གི་སློབ་
སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་བླ་ན་མེད་པའི་ཐུགས་རྗེའི་ལམ་སྟོན་དང་། ྋརོང་ཆེན་བསྟན་པའི་སྒྲོན་མེ་ྋསྐྱབས་མགོན་ཀིརྟི་རིན་པོ་ཆེ་རྣམ་གཉིས་ཀྱིས་ཐུགས་བསྐྱེད་བཞིན་ལུས་ལ་གྲྭ་ཆས་ཤིག་མནབས་ཕྱིན་ནང་ཆོས་ཀྱི་གོ་རྟོགས་ལེགས་པོ་ཞིག་དགོས་པ་ཤིན་ཏུ་གལ་ཆེར་དགོངས་ཏེ། ཕྱི་ལོ་ ༡༩༩༣ ལོར་གྲྭ་ཚང་འདིར་མཚན་ཉིད་དམ་རིགས་ལམ་འཛིན་གྲྭ་གསར་འཛུགས་ཀྱི་དབུ་ཙམ་བཟུང་བ་དང། ཕྱི་ལོ་ ༢༠༠༡ ཟླ་ ༤ ཚེས་ ༡༦ ཉིན་རིག་གནས་སྡེ་ཚན་ལས་ལོགས་སུ་རིགས་ལམ་འཛིན་གྲྭ་ཞིག་གསར་འཛུགས་གནང་བ་ནས། བསྡུས་གྲྭ་དང་། བློ་རིག རྟགས་རིགས། གྲུབ་མཐའ་དང་ས་ལམ་སོགས་ལོ་ཡུན་བཞི་དང་། ཕར་ཕྱིན་ལོ་ཡུན་བདུན། དབུ་མ་ལོ་ཡུན་བཞི། མཛོད་ལོ་ཡུན་གསུམ། འདུལ་བ་ལོ་ཡུན་གསུམ། དགེ་བཤེས་རྒྱུགས་སྤྲོད་ལོ་ཡུན་ལྔ། སྔགས་ལ་ལོ་ཡུན་གསུམ་བཅས་མདོ་སྔགས་གཉིས་ཀར་སློབ་གཉེར་གྱི་ལོ་ཡུན་ཉེར་དགུ་ཅན་རིམ་གྱིས་གཏན་འབེབས་བྱས་པ་ནས། ད་བར་ཕར་ཕྱིན་སློབ་ཐོན་པ་སྐབས་ལྔའི་རིང་གྲྭ་གྲངས་ ༤༢ དང་། དབུ་མ་སློབ་ཐོན་པ་སྐབས་གསུམ་རིང་གྲྭ་གྲངས་ ༢༦། མཛོད་སློབ་ཐོན་པ་སྐབས་གསུམ་རིང་གྲྭ་གྲངས་ ༢༣། འདུལ་བ་སློབ་ཐོན་པ་སྐབས་གཉིས་རིང་གྲྭ་གྲངས་ ༡༦ བྱུང་བ་བཅས་ཆ་ཚང་གིས་སྐབས་སོ་སོར་རབ་འབྱམས་པའི་ཕྱག་ཁྱེར་ཁག་བཞེས་ཐུབ་སྟེ། དེ་རིང་བར་གཞུང་ཆེན་རབ་འབྱམས་པ་ཁག་གི་ཕྱག་ཁྱེར་བཞེས་མཁན་གྲྭ་གྲངས་ ༡༠༧ བྱུང་ཡོད་ལ། སློབ་གཉེར་ཁང་འདིའི་སློབ་མའི་ཡོང་ཁུངས་ནི། གཞིས་ཀྱི་ཀིརྟི་ཚང་གི་གདན་ས་ཁག་དང་ཆོལ་ཁ་དང་ཆོས་ལུགས་རིས་སུ་མ་ཆད་པ་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་གྲྭ་གཞོན་རྣམས་ཡིན། གྲྭ་ཚང་འདིར་ད་ལྟའི་བར་དགོན་སྡེ་ཁག་མི་འདྲ་བ་སུམ་ཅུ་མ་ཟིན་ཙམ་གྱི་གྲྭ་རྒྱུན་གྲངས་ ༦༨༨ འབྱོར་ཡོད་ཅེས་གསུངས་སོང་།
ཡང་ཁོང་གིས། སྔན་ཆད་ས་གནས་འགོ་འཛིན་དང་སྤྱི་འཐུས་ལ་བཞེངས་མཁན་རིགས་ཀྱིས་མཚོན་ཆབ་སྲིད་མི་སྣ་རེ་ཟུང་ནས་གྲྭ་ཚང་ནང་སོ་སོའི་སྤྱི་ཚོགས་ཀྱི་བདེ་དོན་ཐད་དགོངས་པ་བཞེས་ཕྱོགས་ཀྱི་བགྲོ་གླེང་རེ་བྱེད་ཆོག་པའི་རེ་ཞུ་བྱུང་བར་གོ་སྐབས་ཕུལ་ཡོད། འོན་ཀྱང་ཕྱི་ལོ་ ༢༠༠༨ ལོར་བོད་ནང་ཆབ་སྲིད་ཀྱི་དཀའ་ངལ་རིམ་འཕྲད་དང། གྲྭ་ཚང་འདི་ཕྱོགས་ཉེ་རིང་སྣ་ཚོགས་པ་ནས་འདུས་པའི་ཚོགས་སྡེ་ཞིག་ཡིན་པར་བརྟེན། རིམ་གྱིས་གྲྭ་ཚང་འདིའི་གྲྭ་པ་རེ་ཟུང་ཆབ་སྲིད་ལ་ཁ་ཕྱོགས་ཏེ་སློབ་སྦྱོང་གི་འགལ་རྐྱེན་དུ་གྱུར་དོགས་ཀྱི་རྣམ་པ་རེ་བྱུང་བར་བརྟེན། ཕྱི་ལོ་ ༢༠༡༢ ནས་བཟུང་གཞུང་འབྲེལ་མ་ཡིན་པའི་ཆབ་སྲིད་མི་སྣ་སུ་ཞིག་གྲྭ་ཚང་འདིའི་ནང་བགྲོ་གླེང་བྱེད་པར་གདན་ཞུ་དང་རང་དགར་ཕེབས་མི་ཆོག་པ་དང་། གྲྭ་ཚང་འདིའི་གྲྭ་པ་རྣམས་ཀྱིས་ཀྱང་ཆབ་སྲིད་ཀྱི་ལངས་ཕྱོགས་བཟུང་སྟེ་གསལ་བསྒྲགས་དང་འགྲེལ་བརྗོད་འདྲ་མིན་བྱེད་མི་ཆོག་པ་སོགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲྭ་པ་རྣམས་ཆབ་སྲིད་ནང་ཞུགས་ན་ལེགས་པོ་མིན་པའི་ལམ་སྟོན་བཀའ་སློབ་སྔ་ཕྱིའི་དགོངས་དོན་བཞིན་སྒྲིག་གཞི་གཏན་འབེབས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡང་དག་པའི་བླ་ན་མེད་པའི་དབུ་ཁྲིད་འོག་རྒྱ་ཆེའི་བོད་མི་མང་གི་མངོན་འདོད་དང། དཔལ་ལྡན་བོད་མི་མང་སྤྱི་འཐུས་ནས་ཁྲིམས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ཀྱི་ལངས་ཕྱོགས་གཙིགས་སུ་བཟུང་སྟེ་འགྲོ་བཞིན་ཡོད་པ་སོགས་གྲྭ་མང་རྣམས་ལུགས་གཉིས་ཀྱི་གདམ་ག་མ་ནོར་བའི་ཐོག་ཤར་བསྐྱོད་གནང་ཐུབ་པའི་ཆིག་སྒྲིལ་འདི་ཡང། འཇམ་མགོན་ས་སྐྱ་པཎྜིཏས། འཁོར་ལ་ཕུན་སུམ་ཚོགས་གྱུར་པ། །རྗེ་དཔོན་ཉིད་ཀྱི་ཆེ་བ་ཡིན། །ཞེས་གསུངས་པ་ལས་མ་འདས་པར་གྲྭ་ཚང་འདི་ནས་ྋགོང་ས་ལྷ་མིའི་རྣམ་འདྲེན་ྋསྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་དང་རང་གཞུང་དགྱེས་པའི་རྒྱུ་ཚོགས་གང་ཞིག་བསགས་ཡོད་པ་རྣམས། བདག་ཅག་རྣམས་ཀྱི་འདྲེན་མཆོག་བླ་ན་མ་མཆིས་པ་༸རོང་ཆེན་བསྟན་པའི་སྒྲོན་མེ་ྋསྐྱབས་མགོན་ཀིརྟི་རིན་པོ་ཆེ་མཆོག་གིས་དུས་ནས་དུས་སུ་ལམ་སྟོན་གནང་བའི་ཐུགས་རྗེ་བཀའ་དྲིན་དང་རླབས་ཆེན་འཕྲིན་ལས་ཉག་གཅིག་ལས་བྱུང་བ་ཞིག་ཡིན་ཞེས་སོགས་གསུངས་སོང་།
ད་ལན་གྱི་ཀིརྟིའི་བྱེས་པ་གྲྭ་ཚང་གི་ཆེས་མཐོའི་རིག་གནས་སློབ་གཉེར་ཁང་གི་སློབ་ཐོན་པའི་ནང་སྐབས་གཉིས་པའི་འདུལ་བ་སློབ་ཐོན་པ་༦། སྐབས་གསུམ་པའི་མཛོད་ཀྱི་སློབ་ཐོན་པ་༩། སྐབས་ལྔ་པའི་ཕར་ཕྱིན་སློབ་ཐོན་པ་༡༣། སྐབས་གཉིས་པའི་རིག་གནས་འཛིན་རིམ་བཅུ་པའི་སློབ་ཐོན་པ་༨་འདུག
གསར་འགོད་པ། པ་སངས་ཚེ་རིང་། བསྟན་འཛིན་ཕུར་བུ། དཔལ་ལྡན།
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
འཇམ་མགོན་ས་སྐྱ་པཎྜིཏས། འཁོར་ལ་ཕུན་སུམ་ཚོགས་གྱུར་པ། །རྗེ་དཔོན་ཉིད་ཀྱི་ཆེ་བ་ཡིན། Very good!:)