རྒྱ་ནག་གཞུང་གིས་བོད་ཁུལ་གྱི་ཤེས་ཡོན་པ་དང་སློབ་གསོའི་སྣེ་འཁྲིད་པ་རྣམས་ལ་དམིགས་བསལ་གྱིས་དམ་དྲག་བྱས་ཏེ་དྲ་ལམ་ནས་ནང་ཆོས་འཆད་འཁྲིད་དང་ཤེས་ཡོན་ལྟེ་གནས་སོགས་ལ་དངོས་སུ་ཕེབས་ཏེ་སློབ་གསོ་ཡར་སྐུལ་གྱི་གསུང་བཤད་གནང་བར་བཀག་སྡོམ་སྟངས་འཛིན་བྱེད་བཞིན་ཡོད་འདུག
རྒྱ་ནག་གཞུང་གིས་དེ་སྔ་ནས་བོད་ཁུལ་གྱི་ཤེས་ཡོན་པ་དང་རྩོམ་པ་པོ་ཚོར་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད། འདས་ལོའི་ལོ་མཇུག་ཏུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་དོན་ཚན་ཆེན་པོ་ལྔ་ཅན་གྱི་ཁྲིམས་ཡིག་ཅིག་གཏན་འབེབ་བྱས་ཏེ་འདི་ལོའི་ཕྱི་ཟླ་ ༣ ཡས་མས་ནས་དངོས་སུ་ལག་བསྟར་བྱས་ཡོད་པ་ལྟར། ད་ལྟའི་ཆར་རྒྱ་ནག་གཞུང་གིས་བོད་ཁུལ་གྱི་ནང་ཆོས་འཆད་འཁྲིད་གནང་མཁན་མཁན་པོ་དང་དགེ་བཤེས། རྩོམ་པ་པོ། ལྷག་པར་དུ་སློབ་གྲྭ་དང་ཤེས་ཡོན་ལྟེ་གནས་ཁག་ཏུ་གདན་འདྲེན་ཞུ་བཞིན་པའི་སློབ་གསོ་བ་ཆེན་མོ་རྣམས་ལ་དམ་དྲག་དང་དོགས་ཟོན་ཆེན་པོ་བྱེད་བཞིན་ཡོད་འདུག དེའི་ཐད་ཉེ་སྔོན་མཚན་དངོས་སུ་བརྗོད་ན་སྟབས་བདེ་མིན་པའི་བོད་ཁུལ་གྱི་སློབ་གསོ་བ་ཆེན་མོ་མཁན་པོ་ཞིག་གི་ཕྱག་དེབ་ཀྱང་པར་སྐྲུན་བྱེད་དུ་བཅུག་མེད་པ་དང་། དེ་བཞིན། བོད་མཚོ་སྔོན་ཞིང་ཆེན་དང་སི་ཁྲོན་ཕྱོགས་ནས་ཡིན་པའི་དུས་རྒྱུན་དྲ་ལམ་སོགས་ནས་ནང་ཆོས་འཆད་འཁྲིད་དང་གསུང་བཤད་གནང་མཁན་གྲགས་ཅན་ཁག་ཅིག་ཀྱང་དེང་སང་དྲ་ལམ་ནས་གོ་ཐོས་མེད་པར་གྱུར་ཡོད་འདུག
དེའི་ཐད་འདི་ག་དུས་བབ་གསར་ཁང་ལ་གནས་ཚུལ་མཁོ་སྤྲོད་གནང་མཁན་ཞིག་གིས། དེང་སྐབས་དེ་སྔ་ལྟ་བུ་འཆད་ཁྲིད་རིགས་གོ་ཐོས་གང་ཡང་མེད་པ་ཆགས་ཡོད་པ་མ་ཟད། སྤྱིར་དེང་སང་ཤེས་ཡོན་པ་ཚོར་དམིགས་བསལ་དམ་དྲག་ཡོད་པས། ཉེ་བའི་ལོ་ཤས་དང་བསྡུར་ན་དྲ་ལམ་ཁག་ཏུ་རིག་གནས་དང་ལོ་རྒྱུས་བགྲོ་གླེང་སོགས་བྱེད་མཁན་ཇེ་ཉུང་ནས་ཇེ་ཉུང་དུ་སོང་ཡོད་པ་དང་། དེ་དག་ཚང་མ་ཐུག་ས་གཙོ་བོ་སྲིད་གཞུང་གི་ལག་པ་འཆང་གི་ཡོད་པས་ཡིན་སྐོར་བརྗོད་བྱུང་།
འདས་ལོའི་ཕྱི་ཟླ་ ༡༢ ཚེས་ ༢༠ ཙམ་ལ་རྒྱ་ནག་ཆོས་ལུགས་ལས་དོན་ཁང་ཟེར་བས་དྲ་ལམ་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་དོན་ཚན་ཆེན་པོ་ལྔ་ཅན་གྱི་ཁྲིམས་ཡིག་ཅིག་གཏན་འབེབ་ཟིན་ཏེ། ཕྱི་ལོ་ ༢༠༢༢ ཟླ་ ༣ ཚེས་ ༡ ཉིན་དངོས་སུ་ལག་བསྟར་བྱས་འདུག་ལ། ཁྲིམས་ཡིག་དེའི་ནང་འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང། པར་དང་ཡི་གེ བརྙན་སོགས་ཀྱི་ཐབས་ལམ་བརྒྱུད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གཙོ་གཉེར་བ་དེ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་ཞིག་ཡིན་དགོས་ཀྱི་འདུག་ལ། ཆོས་ལུགས་བྱེད་སྒོ་སྤེལ་ཆོག་པའི་ཡི་གེ་དེར་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་སོགས་བཀོད་ཡོད་པ་རེད།
གཞན་ཡང་། ཕྱི་ལོ་ ༢༠༢༡ ཟླ་ ༡༢ པའི་ནང་རྒྱ་ནག་རྒྱལ་ཡོངས་དམངས་འཐུས་རྒྱུན་ལས་ཟེར་བ་དེས་མི་རིགས་སྐད་ཡིག་འཛིན་སྐྱོང་སྤེལ་གསུམ་ཐད་ཀྱི་ཁྲིམས་སྒྲིག་ཁག་ཕྱིར་བསྡུ་བྱས་ཏེ། ཟླ་དེའི་ཕྱི་ཚེས་ ༩ ཉིན་རྒྱ་ནག་ཤེས་རིག་ལྷན་ཁང་གིས་སྤྱི་ཡོངས་ནས་དུས་རབས་གསར་བའི་སྐད་ཡིག་ལས་དོན་གྱི་བསམ་འཆར་ཟེར་བའི་སྲིད་ཇུས་ཤིག་ཡོངས་ཁྱབ་གསལ་བསྒྲགས་བྱས་ཏེ། ཕྱི་ལོ་ ༢༠༢༥ ལོར་རྒྱའི་སྤྱི་སྐད་ཁྱབ་ཚད་རྒྱལ་ཡོངས་ཀྱི་བརྒྱ་ཆ་ ༨༥ ཟིན་དགོས་ཡོད་སྐོར་བསྒྲགས་ཡོད་པ་ལྟར། བོད་ཁུལ་གྱི་བྱིས་གཉོར་ཁང་ནས་བཟུང་བོད་ཡིག་བོད་སྐད་བཤད་མི་ཆོག་པའི་སྲིད་ཇུས་ལག་བསྟར་བྱེད་བཞིན་ཡོད་པར་བརྟེན། བོད་ཁུལ་གྱི་ཤེས་ཡོན་པ་དང་ཕ་མ། དེ་བཞིན་བོད་རིགས་དགེ་རྒན་མང་པོ་ཞིག་ལ་དཀའ་ངལ་དང་སེམས་ཁྲལ་འཕར་མ་ཞིག་ཡོང་བཞིན་ཡོད་པ་རེད།
དེའི་ཐད་བོད་ནང་གི་གནས་ཚུལ་མཁོ་སྤྲོད་པ་ཞིག་གིས་ཡིག་ཐོག་བརྒྱུད་དེང་སྐབས་བོད་སྐད་ཡིག་གི་གནས་སྟངས་ཉིན་རེ་བཞིན་ཉམས་རྒུད་དུ་འགྲོ་བཞིན་པའི་ཁར། སློབ་གྲྭ་དང་དགོན་སྡེ་ཁག་ཏུ་ཤེས་ཡོན་པ་ཚོས་གང་བསམ་གྱིས་འཆད་ཁྲིད་བྱེད་དབང་མེད་པ་མ་ཟད། དེ་སྔ་འཆད་ཁྲིད་རིགས་ལ་བོད་ཁུལ་ཡོངས་ནས་གདན་ཞུ་ཤུགས་ཆེར་གནང་མྱོང་བའི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ལྟ་བུ་བཙོན་འཇུག་བྱས་པ་དང་། ཁོང་ལྟ་བུའི་མཁས་པ་མང་པོ་ཞིག་མི་མང་འདུ་འཛོམས་རིགས་དང་། ལྷག་པར་དུ་སློབ་གྲྭ་དང་དགོན་སྡེ་ཁག་ཏུ་འཆད་ཁྲིད་བྱེད་མི་ཆོག་པའི་བཀག་རྒྱ་བྱེད་ཀྱི་ཡོད་སྐོར་འགྲེལ་བརྗོད་གནང་བྱུང་ལ། འདས་ལོ་གཅིག་པུར་སྒོ་ཤེས་རབ་རྒྱ་མཚོ་ལགས་སུ་ཁ་བྲལ་གྱི་ཁྲིམས་འགལ་ལས་ཀ་བྱས་ཡོད་པའི་ཉེས་མིང་འོག ལོ་བཅུའི་བཙོན་འཇུག་ཁྲིམས་ཐག་བཅད་པ་དང་། དེ་བཞིན་བོད་རྔ་བའི་བོན་དགོན་ཆེ་ཤོས་སྣང་ཞིག་དགོན་པའི་བོད་སྐད་ཡིག་ཐོབ་ཐང་སྲུང་སྐྱོབ་པ་གྲྭ་རིན་ཆེན་ཚུལ་ཁྲིམས་ལགས་སུ་ལོ་ ༤ དང་ཟླ་ ༦ དང་། ས་བྱི་ཞི་རྒོལ་སྐོར་གྱི་དཔེ་དེབ་གལ་ཆེན་ཚེ་སྲོག་གིས་བསྐྲུན་པའི་སྐད་ཆ་ཞེས་པའི་རྩོམ་པ་པོ་དྷཱི་ལྷ་ལྡན་ལགས་སུ་ལོ་བཞི་ཡི་བཙོན་འཇུག་ཁྲིམས་ཐག་བཅད་པ་སོགས་ཤེས་ཡོན་པ་དང་རྩོམ་པ་པོ་འཛིན་བཟུང་བཙོན་འཇུག་བྱས་པའི་གནད་དོན་རིམ་བསྟུད་དུ་བྱུང་དང་འབྱུང་བཞིན་ཡོད་པ་རེད།
བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་ནས་སྤྱིར་ཤེས་ཡོན་པར་དམ་དྲག་དེ་རྒྱ་ནག་ཁྱོན་ནང་ཤུགས་ཆེར་ཡོད་ན་ཡང་། སྔ་ལོ་ནས་བཟུང་དངོས་སུ་འཆད་ཁྲིད་དང་རྩོམ་བྲིས་རང་དབང་བཀག་སྡོམ་རིགས་བོད་ནང་དམ་དྲག་ཆེན་པོ་ཡིན་སྐོར་འགྲེལ་བརྗོད་བྱས་པ་ལྟར། འདས་ལོར་བོད་སྐད་ཡིག་གི་ལྟེ་གནས་ལྟ་བུར་གྱུར་བའི་བོད་ཀྱི་དགོན་སྡེ་ཡི་སློབ་གྲྭ་བཙན་གྱིས་སྒོ་རྒྱག་ཏུ་བཅུག་སྟེ་གྲྭ་གཞོན་རྣམས་སྲིད་གཞུང་གི་སློབ་གྲྭར་བཅུག་པ་དང་། ནང་བསྟན་སློབ་གླིང་ཁག་གི་བསླབ་གཞིའང་རྒྱ་བསྒྱུར་ལག་བསྟར་བྱེད་བཞིན་ཡོད་པའི་གནས་ཚུལ་ཐོན་ཡོད་པ་རེད། དཔེར་ན། ཉེ་སྔོན་ཕྱི་ཟླ་ ༤ ཚེས་ ༢༧ ཉིན་མཚོ་སྔོན་བོད་བརྒྱུད་ནང་བསྟན་སློབ་གླིང་དུ་ཆོས་ལུགས་ལས་དོན་དང་འབྲེལ་བའི་ཚོགས་འདུ་ཞིག་བསྡུས་ཏེ། ནང་བསྟན་ཆོས་ལུགས་ཀྱི་བསླབ་གཞི་ཚང་མ་གང་མགྱོགས་རྒྱ་ཡིག་ཏུ་བསྒྱུར་དགོས་པའི་བཀོད་ཁྱབ་བཏང་ཡོད་པ་མ་ཟད། རྒྱའི་སྤྱི་སྐད་གསོ་སྦྱོང་ཁང་གསར་འཛུགས་སྒོ་འབྱེད་བྱས་ཏེ་དངོས་སུ་ལག་བསྟར་མགོ་བཙུགས་ཡོད་པ་རེད།
ས་གནས་གསར་འགོད་པ།
