དེ་རིང་སྔ་དྲོའི་ཆུ་ཚོད་ ༨ ཡས་མས་སུ་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨ་ཛི་ར་ཛེ་ཡ་ (Uzra Zeya) མཆོག་གིས་གཙོས་ཨ་རིའི་གཞུང་འབྲེལ་སྐུ་ཚབ་ཚོགས་ཆུང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་གཟིམ་ཆུང་མཇལ་ཁ་ཞུས་ཏེ་ཆུ་ཚོད་ ༡ དང་ཕྱེད་ཀ་ལྷག་གི་རིང་བོད་དོན་སོགས་ཀྱི་སྐོར་ནས་བཀའ་མོལ་གནང་ཡོད་འདུག
ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨ་ཛི་ར་ཛེ་ཡ་མཆོག་གིས་དབུ་འཁྲིད་པའི་སྐུ་ཚབ་ཚོགས་ཆུང་ནས་༧གོང་ས་མཆོག་ལ་མཇལ་བཅར་ཞུས། Photo: OHHDL
དེ་ཡང་དགའ་ལྡན་ཕོ་བྲང་ཡིག་ཚང་ནས་མཇལ་འཕྲད་སྐབས་ཀྱི་བརྙན་ཐུང་ཞིག་འགྲེམས་སྤེལ་བྱས་པའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གིས། ཁྱེད་ཚོ་ཚང་མ་དང་ཐུག་འཕྲད་བྱ་རྒྱུ་བྱུང་བ་དེར་ཧ་ཅང་དགའ་པོ་བྱུང་། ང་ཚོ་གཞི་རྩའི་ཆ་ནས་འགྲོ་བ་མིའི་རིགས་ཀྱི་མིང་སྲིང་ལྟ་བུ་ཡིན་ཞིང་། ང་ཚོ་ཚང་མར་མིག་གཉིས་དང་སྣ་གཅིག་ཡོད་པའི་ཆ་ནས་ཚང་མ་གཅིག་པ་ཡིན་པ་རེད། ཅེས་དང་། ངོས་ཀྱིས་དམ་བཅའ་གཅིག་ནི་ཆོས་ལུགས་མཐུན་འབྲེལ་ཡིན་ཞིང་། (ཆོས་ལུགས་)ཚང་མས་བྱམས་བརྩེ་དང་བཟོད་སྒོམ་གྱི་བསླབ་བྱ་སྟོན་གྱི་ཡོད་པ་རེད། དེ་ང་ཚོར་དགོས་ངེས་ཆགས་ཡོད། ཅེས་གསུངས་འདུག་ལ། ཨ་རི་ནི་དམངས་གཙོ་དང་རང་དབང་ཡོངས་སུ་རྫོགས་པའི་རྒྱལ་ཁབ་རླབས་ཆེན་ཞིག་རེད། དེར་མཚུངས་རྒྱ་གར་ཡང་དམངས་གཙོའི་རྒྱལ་ཁབ་ཅིག་རེད། རྒྱ་གར་ནང་ཆོས་ལུགས་ཚང་མ་མཉམ་གནས་བྱེད་ཀྱི་ཡོད། ཅེས་དང་། རྒྱ་ནག་དམར་ཤོག་ཚོགས་པས་བོད་མིའི་བསམ་བློར་འགྱུར་བ་གཏོང་རྒྱུར་ལམ་ལྷོངས་བྱུང་མེད་པར་བརྟེན། རྒྱ་མི་ཁོ་རང་ཚོའི་བསམ་བློ་རིམ་པས་གྱུར་ཏེ་ད་ལྟ་སྤྱི་ཚོགས་རིང་ལུགས་དང་མར་ཁེ་སི་རིང་ལུགས་ཡལ་ཟིན་པ་རེད། ཅེས་གསུངས་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་བོད་དོན་དམིགས་བསལ་འབྲེལ་མཐུད་པར་གཟིམ་ཆུང་མཇལ་མོལ་གནང་། ༢༠༢༢།༠༥།༡༩ Photo:OHHDL
མཇལ་འཕྲད་སྐབས་ལྕམ་ཨ་ཛི་ར་ཛེ་ཡ་མཆོག་གིས་མགོན་པོ་མཆོག་ལ་རང་ཉིད་ངོ་སྤྲོད་གནང་བ་དང་སྦྲགས། ཁྱེད་ཀྱིས་ང་རང་འདིར་སྣེ་ལེན་གནང་བ་དེ་ནི་ཆེས་དགའ་སྤོབས་ལྡན་པ་ཞིག་རེད། ངས་ང་ཚོའི་སྲིད་འཛིན་བྷའེ་ཌིན་མཆོག་དང་ཨ་རིའི་མི་མང་རྣམས་ཀྱི་ཚབ་ཞུས་ཏེ་ཁྱེད་ལ་འཚམས་འདྲི་དང་ཁྱེད་ཀྱི་སྐུ་གཟུགས་གསལ་ཐང་ཡོང་བའི་སྨོན་འདུན་ཞུ་ཡི་ཡོད་ལ། ཁྱེད་ཀྱིས་འཛམ་གླིང་སྤྱི་ལ་ཕན་པའི་ཞི་བདེའི་བསླབ་བྱ་སྩལ་བ་དེར་བཀའ་དྲིན་རྗེས་དྲན་ཞུ་ཡི་ཡོད། ཅེས་ཞུས་འདུག
ཕོ་བྲང་གི་མཇལ་འཕྲད་གྲུབ་རྗེས་གསར་འགོད་པས་ལྕམ་ཨ་ཛི་ར་ཛེ་ཡ་མཆོག་ལ་བཅར་འདྲི་ཞུ་ཐབས་བྱས་ཀྱང་གོ་སྐབས་བྱུང་མེད་ཀྱང་། དེ་རིང་མཇལ་འཕྲད་ལ་མཉམ་བཅར་གནང་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་མཇལ་འཕྲད་སྐོར་བཀའ་འདྲི་ཞུས་པར་ཁོང་གིས། དེ་རིང་དམིགས་བསལ་འབྲེལ་མཐུད་པ་ཁོང་རྣམ་པ་ཚོ་མི་ ༡༥ ལྷག་ཕེབས་ཡོད་པ་རེད། སྐུ་མདུན་ལ་མཇལ་ཁ་ཞུ་རྒྱུ་དེ་གཙོ་བོ་ང་ཚོ་བོད་པའི་ཆོས་དང་རིག་གཞུང་། སྐད་ཡིག་བཅས་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུའི་སླད་དུ་ཨ་རིས་རོགས་སྐྱོར་ག་རེ་བྱེད་ཀྱི་ཡོད་མེད་དང་། རྒྱུན་གཏན་གྱི་གནས་ཚུལ་གལ་ཆེ་བ་གཞན་འགའ་ཤས་སྐོར་ལ་བཀའ་འདྲི་དགོངས་སྐོར་ཞུས་པ་དང་། དེར་༧རྒྱལ་བ་རིན་པོ་ཆེས་བཀའ་སློབ་གནང་རྒྱུ་སོགས་ཆུ་ཚོད་ ༡ དང་སྐར་མ་ ༡༥ ལྷག་རིང་མཇལ་ཁ་གནང་སོང་། ཞེས་གསུངས་སོང་།
ལྕམ་ཨ་ཛི་ར་ཛེ་ཡ་མཆོག་གིས་དྷ་སྟེང་བོད་ཕྲུག་ཁྱིམ་སྡེའི་སློབ་ཕྲུག་རྣམས་དང་གླེང་མོལ་གནང་། Photo: tibettimes.net
གཟིམ་ཆུང་མཇལ་མོལ་གྲུབ་རྗེས་ལྕམ་ཨ་ཛི་ར་ཛེ་ཡ་མཆོག་གིས་གཙོས་ཨ་རིའི་གཞུང་འབྲེལ་མི་སྣ་རྣམས་བཞུགས་སྒར་དྷ་སར་རྟེན་གཞི་བྱས་པའི་དྷ་སྟེང་བོད་ཕྲུག་ཁྱིམ་སྡེར་ཕེབས་ཏེ། སློབ་མ་སྐོར་ཞིག་དང་ལྷན་དུ་གླེང་མོལ་ཞུས་སོང་ལ། བོད་ཕྲུག་ཁྱིམ་སྡེའི་གཙོ་འཛིན་དང་ལས་བྱེད་རྣམ་པར་གསུང་བཤད་གནང་སྐབས། ཨ་རིའི་གཞུང་འདི་འདས་པའི་ལོ་ངོ་མང་པོའི་རིང་ནས་བོད་ཕྲུག་ཁྱིམ་སྡེར་རྒྱབ་སྐྱོར་བྱེད་མཁན་ཞིག་ཡིན་པ་དེར་དགའ་སྤོབས་ཆེན་པོ་སྐྱེ་བཞིན་ཡོད་པ་དང་། ཨ་རིའི་གཞུང་ངོས་ནས་མུ་མཐུད་ནས་བོད་ཕྲུག་དང་གཞོན་སྐྱེས་རྣམས་ལ་གནས་ཚད་ལྡན་པའི་ཤེས་ཡོན་སྤྲོད་རྒྱུར་རྒྱབ་སྐྱོར་བྱ་རྒྱུ་ཡིན་སྐོར་དང་། ཨ་རིའི་གཞུང་གིས་འདས་པའི་དུས་ཡུན་ནང་བོད་ཕྲུག་ ༥༠༠ ཙམ་ལ་མཐོ་རིམ་སློབ་གྲྭ་འགྲིམ་རྒྱུར་རོགས་འདེགས་བྱེད་ཐུབ་ཡོད་པ་དེར་དགའ་སྤོབས་སྐྱེ་བཞིན་ཡོད་ལ། ད་ལན་གྱི་གཟིགས་སྐོར་སྐབས་བོད་མི་རྣམས་ཀྱི་དཀའ་སྤྱད་ལས་ཐོན་པའི་གྲུབ་འབྲས་ལ་གཟིགས་རྒྱུ་བྱུང་བ་དེར་ཧ་ཅང་དགའ་པོ་བྱུང་ཡོད་སྐོར་གསུངས་སོང་།
དྷ་སྟེང་བོད་ཕྲུག་ཁྱིམ་སྡེའི་གཟིགས་སྐོར་གྲུབ་རྗེས་སྐུ་ཚབ་ཚོགས་པ་དྷ་ས་ནོར་བུ་གསོལ་མགྲོན་ཁང་དུ་ཨ་རིའི་རོགས་ཚོགས་ཀྱི་སློབ་ཡོན་ཐོབ་པའི་བོད་མི་གཞོན་སྐྱེས་སྐོར་ཞིག་དང་ལྷན་དུ་གླེང་མོལ་གནང་། ཉིན་རྒྱབ་ཏུ་བཞུགས་སྒར་གྱི་ཉེ་འདབས་སུ་ཆགས་པའི་ནོར་གླིང་བོད་ཀྱི་རིག་གཞུང་ལྟེ་གནས་ཁང་དང་རྒྱུད་སྟོད་དགོན་པར་གཟིགས་སྐོར་དུ་ཕེབས་ཡོད་པ་རེད། གཞུང་འབྲེལ་མཛད་རིམ་ལྟར་ན་སང་ཞོགས་ཆུ་ཚོད་ ༦།༣༠ ཙམ་ལ་སྐུ་ཚབ་ཚོགས་པ་དྷ་སའི་ཉེ་འདབས་གྷ་གྷུལ་ནས་མཁའ་ལམ་བརྒྱུད་ལྡི་ལིར་ཕེབས་ཐོན་གནང་རྒྱུ་ཡིན་འདུག
གསར་འགོད་པ། པ་སངས་ཚེ་རིང་།
