ཕྱོགས་ཁག་རྒྱལ་ཁབ་བཞིས་རྒྱ་ནག་གི་དབང་ཤུགས་རྒྱ་སྐྱེད་ལ་རྒོལ་ལན་སྤྲོད་ཕྱོགས་ཐོག་གྲོས་བསྡུར་གནང་།

ད་ལན་ཕྱོགས་ཁག་རྒྱལ་ཁབ་བཞིའི་ལྷན་ཚོགས་ཐོག་རྒྱལ་ཁབ་བཞིས་སྔར་ལས་ལྷག་མཉམ་འབྲེལ་ནུས་པ་སྤུངས་ཏེ་རྒྱ་གར་ཞི་བདེ་རྒྱ་མཚོའི་ཁུལ་བརྟན་སྲུང་གིས་རྒྱ་ནག་གཞུང་གི་དབང་ཤུགས་སྐྱེད་པར་རྒོལ་ལན་སློག་དགོས་སྐོར་གླེང་སློང་གནང་ཡོད་འདུག

དེ་རིང་ཉི་ཧོང་གི་རྒྱལ་ས་ཊོག་ཡོ་རུ་ཕྱོགས་ཁག་རྒྱལ་ཁབ་བཞི་ (THE QUAD) ཡི་སྲིད་བློན་རྣམས་སྐོང་ཚོགས་གནང་ཏེ།  ཕྱོགས་ཁག་རྒྱལ་ཁབ་བཞིའི་ཉིན་གཅིག་རིང་གི་ནང་མོལ་ཚོགས་འདུ་ཞིག་འཚོགས་འདུག་ལ།  ད་ལན་གྱི་ཚོགས་འདུ་དེའི་སྟེང་རྒྱ་ནག་གཞུང་གིས་རྒྱ་གར་ཞི་བདེ་རྒྱ་མཚོའི་ཁུལ་དུ་སྟོབས་ཤུགས་སྐྱེད་ནས་སིམ་འཛུལ་བྱེད་མུས་ཡིན་པའི་གནད་དོན་དང་། བྱང་ཀོ་རི་ཡིའི་རྡུལ་ཕྲན་མཚོན་ཆ་བཟོ་སྐུན་བྱེད་བཞིན་པའི་སྐོར། ཨུ་རུ་སུས་ཡུ་ཀེ་རེན་ལ་བཙན་འཛུལ་གྱི་གནད་དོན་བཅས་ཀྱི་སྐོར་ལ་གླེང་སློང་གནང་ཡོད་འདུག་ལ།   ཕྱི་ལོ ༢༠༢༣ ལོའི་ཕྱོགས་ཁག་རྒྱལ་ཁབ་བཞིའི་ཚོགས་འདུ་གསུམ་པ་དེ་ཨོ་གླིང་དུ་འཚོག་གཏན་ཁེལ་ཡོད་འདུག

གསར་འགོད་ལྷན་ཚོགས་ཐོག་ཨ་རིའི་སྲིད་འཛིན་སྐུ་ཞབས་བྷའེ་ཌིན་ ( Biden ) མཆོག་གིས། ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་པ་དེས་འགྲོ་བ་མིའི་རིགས་ཀྱི་ཐོབ་ཐང་ལ་དོ་ཕོག་ཆེན་པོ་ཞིག་བཟོས་ཡོད་པ་མ་ཟད། ཁྲོམ་གཞུང་དུ་མི་མང་དཀྱུས་མ་མང་པོ་ཞིག་དམར་གསོད་བྱས་ཡོད་པ་དང་། སྐྱབས་བཅོལ་བ་ས་ཡ་མང་པོ་ཞིག་རང་ཁོངས་ནས་བྲོས་དགོས་བྱུང་ཞིང་། མང་པོ་ཞིག་རྒྱང་བུད་དུ་བཏང་ཡོད་པ་རེད། དེ་ནི་ཡུ་རོབ་གཅིག་པུའི་གནད་དོན་ཞིག་གཏན་ནས་མིན་པར་རྒྱལ་སྤྱིའི་གནད་དོན་ཞིག་ཡིན་པ་རེད། ཨུ་རུ་སུས་ཡུ་ཀེ་རེན་གྱི་སློབ་གྲྭ་དང་། འགྲེམས་སྟོན་ཁང་། མཆོད་ཁང་སོགས་སུ་གཏོར་རྒོལ་བྱས་ཏེ། ཡུ་ཁེ་རིན་གྱི་རིག་གཞུང་རྩ་གཏོར་གཏོང་ཐབས་བྱེད་ཀྱི་ཡོད་སྟབས། ཨ་རིས་མུ་མཐུད་དུ་རྒྱལ་སྤྱིའི་ཐོག་ནས་ཨུ་རུ་སུར་བརྡ་ལན་སྤྲོད་རྒྱུའི་ཐད་ལས་དོན་གཉེར་རྒྱུ་དང་། ཨུ་རུ་སུའི་ཡུ་ཁེ་རིན་ལ་བཙན་འཛུལ་གྱི་གནད་དོན་དེའི་ཐོག་ནས་ཕྱོགས་ཁག་རྒྱལ་ཁབ་བཞིའི་དམིགས་ཡུལ་དང་རིན་ཐང་མཐོར་འདེགས་གཏང་དགོས་པ་ཞིག་ཆགས་ཡོད་སྐོར་གསུངས་ཡོད་འདུག

ཨོ་གླིང་གི་སྲིད་བློན་གསར་པ་ཨེན་ཐོ་ནི་ཨལ་བྷེ་ནི་སི་ (Anthony Albanese) ལགས་ཀྱིས། སོ་ལོ་མོན་( solomon) གླིང་ཕྲན་ཚུད་པའི་ཞི་བདེ་རྒྱ་མཚོའི་ཁུལ་གི་གླིང་ཕྲན་རྒྱལ་ཁབ་ཀྱི་མགོ་ཁྲིད་ཚོ་དང་ལྷན་དུ་འབྲེལ་ལམ་བསྐྱར་གསོ་བྱ་འཆར་ཡོད་པ་དང། ཉེ་ལམ་སོ་ལོ་མོན་གླིང་ཕྲན་ནས་རྒྱ་ནག་གཞུང་གིས་གླིང་ཕྲན་དེའི་རྒྱལ་སྲུང་གི་ཐད་ལ་འགེབ་སྲུང་བྱ་རྒྱུར་གྲོས་ཆོད་ཅིག་བཞག་ཡོད་པས། རྒྱ་ནག་གཞུང་གིས་ཞི་བདེ་རྒྱ་མཚོའི་ཁུལ་དུ་དམག་གི་ས་ཚིགས་ཤིག་གཟུགས་རྒྱུའི་ཉེན་ཁ་མཐོང་གི་ཡོད་སྐོར་དང་། ཁོང་གིས་གནམ་གཤིས་འགྱུར་ལྡོག་ནི་གླིང་ཕྲན་རྒྱལ་ཁབ་ཁག་གི་རྒྱལ་སྲུང་དང་ཚོང་འབྲེལ་སོགས་ཀྱི་ཐད་ནས་གདོང་ལེན་བྱ་དགོས་པའི་གནད་དོན་ཞིག་ཡིན་སྟབས། ཨོ་གླིང་གིས་ཕྱི་ལོ་ ༢༠༣༠ བར་དུག་རླུང་སོགས་ཉུང་འཕྲི་བྱེད་པར་ལས་འགུལ་སྤེལ་མུས་ཡིན་པའི་སྐོར་སོགས་གསུངས་ཡོད་འདུག

 ཉི་ཧོང་གི་སྲིད་བློན་ཧྥི་མི་ཡོ་ཀི་སི་ཌ་(Fumio kishiada) མཆོག་གིས། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པ་དེ་ནི། མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དང་འགལ་ཡོད་ཅིང་། ང་ཚོས་དེ་འདྲ་བའི་གནད་དོན་ཞིག་རྒྱ་གར་ཞི་བདེ་རྒྱ་མཚོའི་ཁུལ་དུ་མི་ཡོང་བར་བྱ་དགོས། གནད་དོན་དེའི་དབང་གིས་་བྱ་དགོས་པ་དང་། རྒྱལ་སྤྱིའི་སྤྱི་ཚོགས་སུ་ཕྱོགས་ཁག་རྒྱལ་ཁབ་བཞི་ཡིས་རྒྱ་གར་ཞི་བདེ་རྒྱ་མཚོའི་ཁུལ་དུ་རང་དབང་ལྡན་པ་ཞིག་བསྐྲུན་རྒྱུར་ཁས་ལེན་དང་མཉམ་རུབ་བྱ་དགོས་སྐོར་སོགས་གསུངས་ཡོད་འདུག

 དེ་བཞིན་རྒྱ་གར་སྲིད་བློན་མུ་དྷི( Narendra Modi ) མཆོག་གིས། ཏོག་དབྱིབས་རིམས་ནད་ཀྱི་དཀའ་ངལ་འཕྲད་མུས་ཡིན་པའི་སྐབས་འདིར། ཏོག་དབྱིབས་འགོག་ཁབ་དང་། གནམ་གཤིས་འགྱུར་ལྡོག་གི་ལས་འགུལ། ཚོང་འབྲེལ་སོགས་ཀྱི་ཐད་ལ་མཉམ་འབྲེལ་གྱིས་ལས་དོན་སྤེལ་དགོས། དེས་རྒྱལ་སྤྱིའི་སྤྱི་ཚོགས་སུ་ཕྱོགས་ཁག་རྒྱལ་ཁབ་བཞི་ཡི་སྣང་བརྙན་བསྐྲུན་པར་ཕན་ཐོགས་ཆེན་པོ་ཡོད་སྐོར་སོགས་གསུངས་ཡོད་འདུག

 ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་པའི་གནད་དོན་ནི་ཕྱོགས་ཁག་བཞི་ཅན་གྱི་རྒྱལ་ཁབ་རྣམས་ཀྱི་མགོ་ཁྲིད་བཞི་ཡི་གླེང་སློང་བྱ་རྒྱུའི་གནད་དོན་གཙོ་བོ་ཞིག་ཆགས་ཏེ། ཨ་རི་དང་། ཉི་ཧོང་། ཨོ་གླིང་སོགས་ཀྱིས་ཨུ་རུ་སུས་ཁྲིམས་མཐུན་མིན་པའི་བཙན་འཛུལ་ལ་ངོ་རྒོལ་ཤུགས་ཆེན་བྱས་ཡོད་ཀྱང་། འདས་པའི་ཟླ་ཤས་གོང་ཨུ་རུ་སུ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་ཕྱིར་ཕུད་གཏང་རྒྱུ་འོས་ཤོག་བླུགས་པའི་ཁྲོད། རྒྱ་གར་དང་རྒྱ་ནག་སོགས་བར་གནས་སུ་བསྡད་ཡོད་འདུག རྒྱ་གར་གཞུང་གི་གོ་མཚོན་བརྒྱ་ཆ་ ༥༠ ལྷག་ཨུ་རུ་སུ་ནས་ཉོ་ཡི་ཡོད་པ་དང་། ཨུ་རྒྱ་གཉིས་ལ་ཚོང་གི་འབྲེལ་ལམ་ཡག་པོ་ཡོད་ཀྱང་། རྒྱ་གར་གཞུང་གིས་ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་པའི་ཐད་གླེང་སློང་གང་ཡང་བྱས་མེད་སྟབས། གནད་དོན་དབྱེ་ཞིབ་པ་དག་གིས། རྒྱ་གར་ལ་རྒྱ་ནག་དང་པ་ཀི་སི་ཐན་གཉིས་ཀྱི་མཐའ་མཚམས་ཁག་ནས་རྙོག་གླེང་མང་པོ་ཞིག་ཡོང་གི་ཡོད་པས། རྒྱ་གར་གཞུང་གིས་ཡུ་ཀེ་རེན་གྱི་གནས་དོན་ལ་སེམས་འཚབ་བྱེད་ཀྱིན་མེད་པར། སོ་སོའི་མཐའ་མཚམས་ཀྱི་ཉེན་ཁར་སེམས་ཁྲལ་བྱེད་ཀྱི་ཡོད་སྐོར་འགྲེལ་བརྗོད་བྱས་ཡོད་ཀྱང་། ཨ་རིའི་སྲིད་འཛིན་བྷའེ་ཌིན་མཆོག་གིས་ཨ་རི་དང་རྒྱ་གར་གཉིས་ཀྱིས་ཡུ་ཀེ་རེན་དང་འབྲེལ་བའི་གནད་དོན་ཐད་ལ་གྲོས་མོལ་བྱ་རྒྱུའི་རེ་འདུན་བཏོན་ཡོད་འདུག

ཡང་ཕྱོགས་ཁག་རྒྱལ་ཁབ་བཞི་ཡི་ཚོགས་འདུ་དེའི་སྟེང་ལྷོ་ཤར་ཨེ་ཤ་ཡའི་འབར་མ་ ( Myanmar ) ནང་དམག་གིས་བཙན་འཛུལ་བྱེད་མུས་ཡིན་པའི་ཁར། སྣུམ་དང་རླངས་རྫས་ཀྱི་ཁྲལ་ཉུང་འཕྲི་དགོས་པའི་སྐོར་དང་། ཨན་གྷ་ནི་སི་ཐན་ (Afghanistan ) དུ་དྲག་སྤྱོད་རིང་ལུགས་པས་སྲིད་གཞུང་བཙན་འཕྲོག་བྱས་ནས། རྒྱལ་ཁབ་ནང་གི་བུད་མེད་རྣམས་ཀྱི་བདེ་འཇགས་ལ་སྲུང་སྐྱོབ་དང་། བུད་མེད་མང་པོ་ཞིག་སློབ་གྲྭར་འགྲོ་རྒྱུར་བཀག་སྡོམ་བྱེད་བཞིན་ཡོད་པ་མ་ཟད། ཁ་ཆེ་བུད་མེད་དག་ཕྱི་རོལ་དུ་ངོ་རས་ངེས་པར་དུ་གྱོན་ནས་འགྲོ་དགོས་པ། དེ་བཞིན་འགྲོ་མིའི་རིགས་ཀྱི་གནད་དོན་དང་འབྲེལ་ནས་བྱང་ཀོ་རི་ཡའི་མགོ་ཁྲིད་ཀེམ་དང་གྲོས་མོལ་བྱས་ཏེ། བྱང་ཀོ་རི་ཡའི་ནད་ཡམས་ཀྱི་དཀའ་ངལ་སེལ་ཐབས་བྱ་རྒྱུའི་སྐོར་སོགས་གླེང་སློང་གནང་ཡོད་འདུག

 ཁོ་ཝ་ཊི་ ( Quad ) ནི་ཨ་རིའི་མཐུན་ཕྱོགས་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་ཀྱིས་གྲུབ་པའི་ཕྱོགས་ཁག་རྒྱལ་ཁབ་བཞི་ཡི་ཚོགས་སྡེ་ཞིག་ཡིན་ཞིང་།  ཕྱོགས་ཁག་འདི་ནི་རྒྱ་ནག་གཞུང་གི་ལངས་ཕྱོགས་ལ་ཁ་གཏད་གཅོག་མཁན་ཞིག་ཏུ་གྱུར་ཡོད་འདུག   རིམ་གྱིས་ཨེ་ཤ་ཡའི་བྱང་ཆིངས་སྒྲིག་འཛུགས་ (ASIAN NATO) ཞིག་ཏུ་འགྱུར་སྲིད་པའི་ཚོད་དཔག་བྱེད་ཀྱི་ཡོད་འདུག ཕྱོགས་ཁག་རྒྱལ་ཁབ་བཞི་དེས་ཨེ་ཤ་ཡའི་ཁུལ་གྱི་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་ཆེད་ཡིན་པ་རེད་འདུག འདས་པའི་ལོ་ཤས་རིང་རྒྱ་གར་ཞི་བདེ་རྒྱ་མཚོའི་མངའ་ཁུལ་དུ་ཨ་རི་དང་ཉི་ཧོང། རྒྱ་གར་བཅས་ནས་དམག་སྦྱོང་བྱས་པར་ཨོ་སི་ཊོ་ལི་ཡ་མཉམ་ཞུགས་བྱས་མེད་ཀྱང་། ཕྱི་ལོ ༢༠༢༠ ལོར་ཨོ་སི་ཊོ་ལི་ཡའི་དམག་དཔུང་ཀྱང་དམག་སྦྱོང་དེར་མཉམ་ཞུགས་བྱས་འདུག

གསར་འགོད་པ། དཔལ་ལྡན།